දශක කිහිපයකට පසු ජනතා විමුක්ති පෙරමුණ විසින් ජනාධිපති අපෙක්ෂකයකු ඉදිරිපත් කර තිබේ. ඒ ජාතික ජන බලවේගය හරහාය. ඔහුගේ ජයග්‍රහණය උදෙසා කටයුතු කරන ජනතා විමුක්ති පෙරමුණ වෙනුවෙන් අද සිළුමිණට අදහස් දක්වන්නේ ජවිපෙ ප්‍රචාරක ලේකම්, පාර්ලිමේන්තු මන්ත්‍රී, විජිත හේරත් මහතාය.
ජනාධිපති අපේක්ෂකයන්ට සහාය දෙන්න දෙමළ ජාතික සන්ධානය ඇතුළු පක්ෂ 5ක් කරන ඉල්ලීම් 13 ගැන ඔබ දරන අදහස කුමක්ද?
ඒ යෝජනාවල මූලික දේ ලෙස දක්වා ඇති උතුරු සහ නැඟෙනහිර පළාත් ඒකාබද්ධ කිරීම වැනි දේ කොහෙත්ම කරන්න බැහැ. නැඟෙනහිර ජනතාව කිසිසේත්ම කැමැති නැහැ උතුර හා ඒකාබද්ධ කරනවාට.
ත්‍රස්තවාදය වැළැක්වීමේ පනත අහෝසි කිරීම, ඒ වගේම උතුරේ ජනතාවගේ ඉඩම් අයිතිය තහවුරු කිරීම වැනි යෝජනා අප දැනටමත් ප්‍රකාශ කර තිබෙනවා. ඒක මේ ජනාධිපතිවරණ කොන්දේසි විදිහට නෙමෙයි, යුද්ධය අවසන් වූ විගසම අප පැවසූ දෙයක්. උතුරේ ජනතාවගේ පවරාගත් පෞද්ගලික ඉඩම් ආපහු දිය යුතුයි. ඒ වගේම උතුරු-නැඟෙනහිර තරුණයන්ගේ රැකියා ප්‍රශ්නයට විසඳුමක් සැපයිය යුතුයි.
ඒත් ආරක්ෂක හේතු මත ආපසු දිය නොහැකි ඉඩම් ඒ ප්‍රදේශවල තිබෙනවා නේද?
ජනතාවට දෙන්න පුළුවන් ඉඩම් දෙන්න ඕන. එහෙම දෙන්න පුළුවන් ඉඩම් තව ගොඩක් තිබෙනවා. පෞද්ගලික ගෙවල් පවා එසේ පවරාගත් ඉඩම් අතර තිබෙනවා. ඒවා තබාගෙන සිටීම හමුදාවටත් ප්‍රායෝගිකව ගැටලුවක් වෙලායි තිබෙන්නෙ. ආරක්ෂක හේතු මත ආපසු දිය නොහැකි ඉඩම් තිබෙනවා නම් ඒවා හමුදා අවශ්‍යතාවලට දිගටම පවත්වාගෙන යා යුතු යැයි නිර්දේශ වනවා නම් ඒවා විධිමත් ක්‍රමවේදයකට පවරාගෙන, ඒ සදහා අවශ්‍ය වන්දි ගෙවිය යුතුයි. ඒ වගේම ඒ ජනතාවට විකල්ප ඉඩම් දිය යුතුයි.
එහෙත් උතුරු-නැඟෙනහිර හිටපු මහ ඇමැතිවරයකු වූ වර්ධරාජා පෙරුමාල් මහතා පසුගියදා ප්‍රකාශ කළා දෙමළ සන්ධානගත පක්ෂ විසින් සිදු කළ මේ ඉල්ලීම් සියල්ල හුදෙක් පටු දේශපාලන වැඩක් කියලා.
මේ ඒකීය රට තුළ දෙමළ ඊළාම් රාජ්‍යයක් ප්‍රකාශයට පත් කරපු කෙනෙක් තමයි වර්ධරාජා පෙරුමාල් කියන්නෙ. ඔහු ත්‍රිකුණාමලයේ ඊළාම් කොඩිය ඔසවපු කෙනෙක්. එවැනි උග්‍ර බෙදුම්වාදියෙක් තමයි අද රාජපක්ෂ කඳවුර එකතු කරගෙන ඉන්නේ. වර්ධරාජා විතරක් නොවෙයි; පිල්ලෙයාන්, කරුණා අම්මාන් ඇතුළු ගොඩක් දෙනකු අද ඒ කඳවුරේ ඉන්නවා. අද ඒ අය අවස්ථාවාදි විදිහට එක එක ප්‍රකාශ කරනවා. මේ ප්‍රකාශයත් එවන් අවස්ථාවාදි දේශපාලන ප්‍රකාශ බවයි අපට පවසන්න ඇත්තේ. වර්ධරාජා වැනි අයගේ එවැනි ප්‍රකාශ ගැන එතරම් තැකීමක් කළ යුතු නැහැ. ඒ ප්‍රකාශ කිසිම වලංගුභාවයක් ඇති ප්‍රකාශ නොවෙයි.
ඔවුන් අවි-ආයුධ අත්හැර ප්‍රජාතන්ත්‍රවාදි දේශපාලනයට පැමිණ සිටිනවා නම්, අප ඔවුන් ත්‍රස්තවාදීන්, ඊළාම්වාදීන් ලෙස කොන් කිරීම සාධාරණද?
එදත් ප්‍රජාතන්ත්‍රවාදී ප්‍රවාහයත් හරහා තමයි ඔවුන් ඇවිත් හිටියේ. වර්ධරාජා පෙරුමාල් උතුරු-නැඟෙනහිර පළාත් සභාවේ මහ ඇමැති ධුරයේ ඉදගෙන තමයි ඊළාම් රාජ්‍යය ප්‍රකාශයට පත් කළේ. ඒ මහ ඇමැතිධුරයේ සිට එවැනි බෙදුම්වාදයක් කළ අය ගැන අපට විශ්වාසයක් නැහැ. ඒක නිසා එදයි අදයි කියලා එයාලාගෙ ලොකු වෙනසක් නැහැ.
ඇල්පිටිය ඡන්දයෙන් පසු ජවිපෙ ග්‍රාමීය ජනතාව මීට වඩා ළං කරගත යුතු බවට ඉඟියක් ලැබුණු බව බිමල් රත්නායක මන්ත්‍රීවරයා පවසා තිබුණා. එවැනි ක්‍රමයක් සකස් කරලාද තිබෙන්නේ...
අපි පැහැදිලිවම ග්‍රාමීය ජනතාවට ළං වෙලා තිබෙන්නේ. 2018ට පෙර පවත්වන ලද පළාත් පාලන ඡන්දයට වඩා අප 121%ක වර්ධනයක් ලබා තියෙනවා. රාජපක්ෂ කණ්ඩායම මෙවර බලය ලබාගත් බව ඇත්ත. එහෙත් පෙර පළාත්පාලන මැතිවරණයේදී ආසනයෙන්ම ඡන්ද 42,000ක් ගත් ඔවුන්ට මෙවර ඔවුන්ට ලබා ගන්නට පුළුවන් වුණේ ඡන්ද 38000ක් පමණයි. ඇත්තටම ඡන්ද 4000ක් අඩු වෙලා තියෙනවා, ඔය දිනුවා දිනුව කිව්වට ඇත්ත ඒකයි. නමුත් අපි විශාල වර්ධනයක් ඇති කරගෙන තියෙනවා. ඒ කියන්නෙ අපි ග්‍රාමීය ජනතාවට ළං වෙලා තියෙනවා කියෙන එකයි. ඒ තත්ත්වය තවත් වර්ධනය කරන්න අප පියවර ගත යුතුයි. ඒකයි බිමල් රත්නායක මහතා ප්‍රකාශ කෙළේ. ග්‍රාමීය ජනතාවට ළං වීම අපි ඒක ප්‍රායෝගිකව ඔප්පු කර තිබෙනවා.
කුමන ක්‍රමය හරහාද ඔබ පක්ෂය ජනතාව ළං කර ගැනීමට කටයුතු කරන්නෙ?
අපි ගම් මට්ටමේ ජනතාව සමග ඓන්ද්‍රීයව කටයුතු කරනවා. ගොවි ජනතාවගේ, ධීවර ජනතාවගේ, වතු කම්කරුවාගේ මේ සියලු ග්‍රාමීය ජනතාවගේ ගැටලු සමග කටයුතු කරනවා. හැමෝගෙම ප්‍රශ්නත් සමග එක්ව අපි ඔවුන් වෙනුවෙන් විශාල කාර්යභාරයක් කරනවා.
මෙවර අපේක්ෂක සංඛ්‍යාව වැඩි නිසා කෝටි 100ක් අමතරව ජනාධිපතිවරණයට වැය කරන්න වෙන බව මැතිවරණ කොමිසමේ සභාපතිවරයා කියා තිබුණා. මේ නිසා කුඩා කණ්ඩායම් සහිත අපේක්ෂකයන්ට වැට බැඳිය යුතු බවත් ඔහු පැවසුවා. ජාතික ජන බලවේගය එය දකින්නේ කුමන ඇසකින්ද?
ඇත්තටම කුඩා කණ්ඩායම් කිව්වාට ඔය බොහෝ දෙනෙක් ප්‍රධාන පක්ෂවල අනුරූ විදිහටයි කටයුතු කරන්නෙ. රාජපක්ෂලාගේ අනුරූ ගොඩක් තිබෙනවා. සජිත් ප්‍රේමදාසලාගේ අනුරූ ගොඩක් තිබෙනවා. ඇත්තටම ඒ අය තමයි ඔය ඉත්තො දාලා අපේක්ෂකයො වැඩි කර තිබෙන්නෙ. ඒ වගේම ඒක මහ විහිළුවක්. ඒ විහිළුකාරී තත්ත්වය වළක්වන්න වෙනවා. ඒක අපිත් පිළිගන්නවා.
පාස්කු දින ප්‍රහාරය පිළිබඳ සෙවීමට පත් කළ තේරීම් කාරක සභාවේ තීරණය දකින්නේ කෙසේද?
ඒ තේරීම් කාරක සභාවේ තීන්දුවේ කිසි තැනක බරපතළ පාස්කු ප්‍රහාරයේ සිදුවීමට, නිශ්චිතව මේ ආණ්ඩුව වගකිව යුතුයි කියලා නැහැ. ජනාධිපතිවරයා, අගමැතිවරයා, ආරක්ෂක ලේකම්වරයා වැනි අය වගකිව යුතු බවට එක් එක් තැන්වල තිබෙනවා. එහෙත් කිසිදු තැනක නැහැ එහි වගකීම ආණ්ඩුව බාර ගත යුතු බවක්. ඇත්තටම ගත්තොත් ආණ්ඩුවයි එහි වගකීම බාර ගත යුත්තේ. ඒ වගකීම ලබා නොදීම ලොකු අඩුපාඩුවක්.
කෙහොම වුණත් ඒ අඩු පාඩු මධ්‍යයේ හෝ ජනතාවට බොහෝ දේවල් දැනගන්න පුළුවන් වුණේ මේ තේරීම් කාරක සභාව නිසයි. බොහෝ දේ මාධ්‍යයට විවෘත වුණා. තොරතුරු දැනගන්න පුළුවන් වුණේ ඒ හරහා.
එහෙත් රාජපක්ෂ පිල ඒකට සම්බන්ධ වුණේ නැහැ. ඒකට හේතුව හැටියට ඒ අය කිව්වෙ බදුර්දීන්ට එරෙහිව ගෙනා චෝදනා කතාවක්. අද කියනවා රවුෆ් හකීම් හිටපු නිසා විරුද්ධයි කියල. හකීම් හිටිය කියල ප්‍රශ්න කිරීම් නැවතුණාද? විමර්ශනය කිරීම් නැවතුණාද?
වගකිව යුතු විපක්ෂයක් ලෙස ඒ අයට කරන්න තිබුණේ ජනතාවගේ ආරක්ෂාව වෙනුවෙන් මැදිහත් වෙලා ඒක නිවැරැදි කරන තැනට ගේන එකයි. ඒ අයටත් තේරීම් කාරක සභාව හරහා බොහෝ දේ දැනගන්න පුළුවන් වුණා.
එය මැතිවරණය අස්සේම එළියට දැමීම එක්තරා දේශපාලන වාසියක් ගන්න හදන ක්‍රමයක් කියලා හිතෙන්නෙ නැත්ද?
නැහැ. එහෙම කියන්න බැහැ. ඒක පටන් ගත්තෙ කලින්නෙ. අනිත් එක දින වකවානු දීලා, පසුවයි කාලය දීර්ඝ කරලා මේ අවසන් වාර්තාව දක්වා ගියේ.
චෝදනා එල්ල වූ ඇමැතිවරයකු වූ රවුෆ් හකීම් මහතා ඒ තේරීම් කාරක සභාවේ සිටීම ඔබ දකින්නේ කෙසේද?
මා කලින් කියූ පරිදි රවුෆ් හකීම් ඇමැතිවරයා හිටියා කියලා ඔහුට මොනවද කරන්න පුළුවන් වුණේ? ඔහුට සාක්කි දීම වළක්වන්න හරි විමර්ශන නවත්වන්න හරි පුළුවන්කමක් තිබුණෙ නැහැනෙ? අනිත් එක රවුෆ් හකීම් කියන්නෙ රාජපක්ෂ ආණ්ඩුවේ අධිකරණ ඇමැතිවරයා. ඔහු විතරක් නෙමෙයි; බදුර්දීන් හිස්බුල්ලා පවා හිටියා. අදත් හිස්බුල්ලා ඉන්නේ රාජපක්ෂ කල්ලිය ළඟනේ? ඔය ඔක්කොම ඒ කාලෙ හිටියෙ රාජපක්ෂ ඔඩොක්කුවෙ තමයි.
ගස්ලබු ඇටයක් රු. 100ක් විතර වෙනවා කියල අනුර කුමාර දිසානායක මහතා කෘෂි ප්‍රතිපත්තිය එළිදැක්වීමේදී කියලා තිබුණා. ඒක ප්‍රායෝගිකව වෙන්න පුළුවන්ද?
ඔව්. මේ වෙනකොට බීජ ලබාගැනීම විශාල ප්‍රශ්නයක් වෙලා තියෙන්නෙ ගොවි ජනතාවට ගස්ලබු බීජ ග්රෑම් 100ක් රුපියල් 75,000ක් පමණ වෙනවා. ඒ විදිහට බලපුවාම ඇටයක් රු. 100ක් විතර වෙයි!
කෘෂිකර්ම ප්‍රතිපත්තිය නිකම්ම ලියවිල්ලක් විතරයි කියලා ඇතැම් දේශපාලනඥයන් කියලා තිබුණා...
ඒක සම්පූර්ණ වැරැදි කතාවක්. කෘෂිකර්ම ඉඩම් පශුසම්පත් හා වාරිමාර්ග ඇමැතිවරයා ලෙස අනුර කුමාර දිසානායක මහතා කටයුතු කළා. ඉතා දුරදර්ශී, ප්‍රායෝගිකව ඉටු කළ හැකි ප්‍රතිපත්තියක් තමයි ඔහු ඉදිරිපත් කළේ. අපි කෘෂිකර්ම ප්‍රතිපත්තිය විතරක් නෙමෙයි; අධ්‍යාපන, සෞඛ්‍ය, ප්‍රවාහන ප්‍රතිපත්ති පවා ඉදිරිපත් කළා. අපි විතරයි ප්‍රතිපත්ති ඉදිරිපත් කළේ. අනිත් සියලු දෙනා පොරොන්දු දේශපාලනයේ කටයුතු කරන්නේ.
රටේ ආරක්ෂාව සම්බන්ධයෙන් ජාතික ජන බලවේගයේ - නැත් නම් ජනතා විමුක්ති පෙරමුණේ ප්‍රතිපත්තිය කුමක්ද?
ඉතා පැහැදිලිව රටේ ආරක්ෂාවට අප මුල් තැනක් දෙනවා. රටේ මහජනතාවගේ ආරක්ෂාව ගොඩනඟන්න පුළුවන් වන්නේ රටේ සමගිය ගොඩනැඟීමෙන් පමණයි. මහජන ආරක්ෂාවයි රටේ ආරක්ෂාවයි කියන්නෙ දෙකක්. ජාතික ආරක්ෂාව යටතේ රට බෙදන-එක, විදේශීය ආක්‍රමණ වැළැක්වීම වැනි කටයුතු උදෙසා කටයුතු කිරීමයි වැදගත් වන්නේ. ඒ සඳහා ත්‍රිවිධ හමුදාව ශක්තිමත් කර අදාළ තීන්දු-තීරණ ගත යුතුයි. රටේ ජාතික ආරක්ෂාව වෙනුවෙන් උපරිම කැපවීමෙන් කටයුතු කරන පක්ෂයක් - එහෙමත් නැත්නම් සංවිධානයක් ලෙස ජාතික ජන බලවේගය හඳුන්වා දෙන්න පුළුවන්.
ඒ වගේම මහජන ආරක්ෂාව උදෙසා එකිනෙකා අතර අසමඟිය, සැකය, අවිශ්වාසය දුර-ලිය යුතු වනවා. අප ඒ වෙනුවෙන් කටයුුතු කරනවා. ඒ අනුව සියලු ජන කොටස් අතර විශ්වාසය ගොඩනැඟීමට අප කටයුතු කරනවා. සමඟියෙන් තොරව රටක මහජන ආරක්ෂාව ඇති කරන්න බැහැ. ඒක තමයි මහජන ආරක්ෂාවට තියෙන එකම උත්තරය.
විදේශ ගෘහ සේවයට කාන්තාවන් යැවීම නවත්වන බව අනුර කුමාර දිසානායක මහතා පැවසුවා. එවිට ගෘහ සේවය පිණිස එතෙර යන අයට දෙන විකල්පය කුමක්ද?
විදේශ ගෘහ සේවිකා රැකියා එක පාර නවත්තනව කියල නෙමෙයි අනුර කුමාර දිසානායක මහතා කිව්වෙ. ඇත්තටම අපේ රටේ අම්මල, අක්කල මේ කාන්තාවන් විසින් තමයි විදේශ රටවල වහල් සේවය කරල මේ රටට ආදායම එවන්නේ. ඔවුන්ගෙන් තමයි අද වැඩි විදේශ විනිමයක් උපයන්නේ. ඇත්තටම අපේ රට ආර්ථිකය නිසි පරිදි මෙහෙයවනවා නම් විදේශ රටවල ගිහින් බැළ මෙහෙවර කිරීම අවශ්‍ය වන්නේ නැහැ.
එහෙම වුණාම පවුල් ප්‍රශ්නත් අඩුයි. දූදරුවන් ළඟ අම්ම-තාත්ත දෙන්නම ඉන්නව. තමන්ගෙ ඥාති මිත්‍රාදීන් සහෝදර සහෝදරියන් එක්ක මේ රටේ ගත කරන්න පුළුවන්. ඒකට ආර්ථිකය ශක්තිමත් කළ යුතුයි. අපේ රට ආර්ථික වශයෙන් ගොඩනඟනවා නම් එතෙර යන්න ඕන නැහැ. ජාතික ජන බලවේගය හරහා අප නිර්මාණය කරන්න යන්නේ එවැනි ආර්ථික ක්‍රමවේදයක්.
රුපියල බාල්දු වන විදිහට ඔබ හිතනවාද ඒ තත්ත්වය රටේ ආර්ථිකය සකස් කරගන්න පුළුවන් මට්ටමේ තියේවි කියලා?
රටේ සිදු වන මේ දූෂණ වංචා නවත්තනවා නම් කිසිදු අපහසුවකින් තොරව එය කරන්න පුළුවන්. ජනාධිපතිවරයාගේ දවසේ වියදම රුපියල් කෝටි 2ක්. ඉතිරි මාස 4ට වියදම ලෙසින් කෝටි 240ක වියදමක් වෙන් කර තිබෙනවා. ඒ කියන්නේ දවසක වියදම කෝටි දෙකයි. එක් පුද්ගලයෙක් වෙනුවෙන් වියදම් කරන ඒ නාස්තිය නවත්වන්න පුළුවන් නම් රටේ ආර්තිකය ගොඩ ගන්න එක අසීරු දෙයක් නෙමෙයි.
ජාතික ජන බලවේගය හරහා මාධ්‍ය ප්‍රතිපත්තිය නිදහස් ආකාරයකට හසුරවන්න ඉඩක් ලැබෙයිද?
මාධ්‍ය ස්වාධීන කළ යුතුයි. ජනතාවට මාධ්‍ය ආයතනයට ඕනෑ දේ නොව; ඇත්ත දැනගන්නා තත්ත්වයට පත් කළ යුතුයි. අප එදා ඉදල උත්සාහ කළේ ජනමාධ්‍ය සඳහා ස්වාධීන කොමිසමක් ඇති කරන්නයි. එවිට මාධ්‍යවල පක්ෂග්‍රාහිත්වය ඇති වන්නේ නැහැ. මාධ්‍ය නිදහස ආරක්ෂා වන ලෙස මෙන්ම මාධ්‍ය අයිතීන් ආරක්ෂා වන ලෙස මාධ්‍යවේදීන්ට නිදහසේ කටයුතු කළ හැකි ආකාරයට මාධ්‍ය කොමිසමක් මඟින් කටයුතු කළ හැකියි.
