හංසයා ලකුණින් තරග කරන නව ප්‍රජාතන්ත්‍රවාදී පෙරමුණේ සජිත් ප්‍රේමදාස මහතාගේ ජනපතිවරණ සටනේ වත්මන් තත්ත්වය ඔබ දකින්නේ කොහොමද?
සජිත් ප්‍රේමදාස මහතාගේ ජයග්‍රහණය වෙනුවෙන් මේ වෙනකොට විශාල පිරිසක් ඒකරාශි වෙනවා. ගම් මට්ටමින් බිම් මට්ටමින් හා මධ්‍යම පාංතිකයන් රැසක් එකතු වෙමින් පවතිනවා. විශේෂයෙන් විවිධ හේතු මත අතීතයේදී එජාපය හැර ගිය කොටස් එජාපය පිළිබඳ කලකිරුණු කොටස් විතරක් නෙවෙයි අනිකුත් පක්ෂ කණ්ඩායම්වලිනුත් පිරිස් සජිත් වටා එක්රොක් වෙනවා. ගාලු මුවදොර පිටියේදී පැවැති සජිත්ගේ මංගල රැලියට එක්වූ ගම් නියම් සිසාරා පැමිණි ලක්ෂ සංඛ්‍යාත පිරිස් කියාප‍ෑවේ සජිත්ගේ ජයග්‍රහණය සහතික බවයි. මහජන රැලි පවා ඉතාමත් ශක්තිමත්ව ජනී ජනයාගෙන් පිරී ඉතිරී පවතිනවා. අලුත් ජවයක් අලුත් උත්තේජනයක් අපේ සන්ධානයට ලැබී තිබෙනවා.
සමහරු සජිත් ප්‍රේමදාස මහතාව පීඩිත පංතියේ මිනිහා දුප්පතාගේ හිතවතා ආදී වශයෙන් හඳුන්වනවා. ඒත් සජිත් කියන්නේ ජනාධිපතිවරයෙකුගේ පුතෙක්. එහෙම නම් ඔහු කොහොමද පොඩි මිනිහාගේ පංතිය නියෝජනය කරන්නේ.
කොළඹ රාජකීය විද්‍යාලයේ අධ්‍යාපනයෙන් පස්සේ සජිත් ප්‍රේමදාස මහතා උසස් අධ්‍යාපනය හැදෑරීමට එංගලන්තයට ගියා. තම පියා වන රණසිංහ ප්‍රේමදාස ජනපතිවරයාගේ නොසිතූ අභාවයෙන් පසුව තමයි ඔහු ලංකාවට පැමිණ දේශපාලනයට ඇතුළත් වුණේ. සජිත්ට මැද කොළඹ බටහිර කොළඹ හෝ එජාපය කිසිදා නොපැරදෙන ආසනයක් ඕනෑ තරම් ගන්න තිබ්බා. ඒත්... ඔහු තෝරා ගත්තේ හද්දා පිටිසර දිස්ත්‍රික්ක‍යක් වූ හම්බන්තොට දිස්ත්‍රික්කයයි. මේ දිස්ත්‍රික්කය රාජපක්ෂවරුන්ගේ කඳවුරක් බවත් ඔහු හොඳින් ම දන්නවා. කෙදිනක හෝ මේ රාජපක්ෂ බල කඳවුර බිඳ දැමීමට ඔහු තුළ අධිෂ්ඨානයක් තියෙන්න ඇති. සජිත් හම්බන්තොට හිසට සෙවණක් නැති අයට ගෙවල් හැදුවා. විදුලිය නැති අයට විදුලිය ලබාදුන්නා. පොල් අතු වහලවල් තිබුණු ගෙවල් රට උළු සෙවිලිකර සකසා දුන්නා. පන්සලට පල්ලියට කෝවිලට උදව් කළා. පන්සල්, වෙහෙර විහාර, දහම් පාසල්, ධර්මශාලා හැදුවා. බුදු දහමට මුල් තැන දුන්නා. ඒ නිසා නිරායාසයෙන් ම සජිත් පොඩි මිනිහාගේ තැලෙන පෑගෙන මිනිහගේ හිතවතෙක් බවට පත්වුණා. ඒ විතරක් නෙවේ නවීන තාක්ෂණය සමඟ සිටින තරුණ පිරිස් ද සජිත් වටා ඒකරාශි වුණා. ග්‍රාමීය ජනතාවගේ දුක දාඩිය සුවඳ ඒ අයට ආවේණික ප්‍රශ්න ගැටලු සජිත් හොඳින් ම දන්නා නිසා ඒ ප්‍රශ්නවලට විසඳුම් සෙව්වා. ඒ නිසාම තමයි ඔහු පීඩිත පංතියේ ප්‍රශ්න ගැටලු හඳුනන මිනිසෙක් වුණේ.
සජිත් ප්‍රේමදාස මහතාගේ සෑම ජන රැලියකටම රනිල් වික්‍රමසිංහ මහතා සහභාගි වන බව කලින් ප්‍රකාශ වුණත් දැන් දැන් සජිත්ගේ ජන රැලිවලදී රනිල් වික්‍රමසිංහ මහතා දකින්නට නැත්තේ ඇයි?
මෙතනදී ජනපතිවරණ අපේක්ෂකයා තමයි සජිත්. ඔහුට තනි ගමනක් යන්න ශක්තිය තියෙනවා. නායකත්වයේ ආශිර්වාදය ලැබෙනවා. ඔබ මට කියන්න මහින්ද රාජපක්ෂ මහතා සහභාගි නොවන රැලියකට ගෝඨාභය රාජපක්ෂ මහතා ගිහින් තිබෙනවාද කියලා. මහින්ද නැතිව ගෝඨාභයට පැවැත්මක් නෑ.
ඕනෑම ජනපතිවරණ අපේක්ෂකයකුට ඡන්දය ජය ගන්න නම් ද්‍රවිඩ ජාතික සංධාන‍ෙය් සහාය අවශ්‍ය වෙනවා. ඒත් ඔවුන් තම සහාය ලබාදීමට ඉදිරිපත් කර ඇති කොන්දේසි ගැන මොකද හිතන්නේ.
අපේ දැක්ම අපි ප්‍රතිපත්ති ප්‍රකාශනයෙන් එළිදක්වනවා. ඒකීය රාජ්‍යයක් තුළ උපරිම බලය බෙදීම අපේ ප්‍රතිපත්තියයි. ජනවාර්ගික ප්‍රශ්නය ව්‍යවස්ථානුකූල විසඳුමක් ලබාදී තිබෙන්නේ එජාපය පමණයි. පළාත් සභා ප්‍රාදේශීය සභා තුළින් ඒ බලය බෙදීම කළා. ඒත් එදා මහින්ද රාජපක්ෂලා සිරිමා මැතිනිය සමඟ පලා බබා අපිට එපා කියා පිටකොටුවේ බෝධිය ළඟ විරෝධතා දැක්වූ ආකාරය උතුරේ ජනතාවටත් දකුණේ ජනතාවටත් හොඳට මතක ඇති. රටේ ඒකීයභාවයත් ආරක්ෂා කරගෙන බුද්ධාගමටත් මුල් තැන දීලා. සුළු ජාතීන්ටත් අපි බලයක් ලබාදී තිබෙනවා. ජනවාර්ගික ප්‍රශ්නයට සාධනීය විසඳුමක් හැම තිස්සේ ම ලබා දුන්නේ එජාපයයි.
ශ්‍රී ලංකා නිදහස් පක්ෂයේ සංවිධායකවරුන් සම සංවිධායකවරුන් පසුගියදා සජිත් දිනවීමට එක්වූ බව අප දුටුවා. මේ එකතුවීම දේශපාලනිකව ඔබ දකින්නේ කොහොමද?
අද ශ්‍රී ලංකා නිදහස් පක්ෂයත් පොහොට්ටුවත් දැඩි අර්බුදයකට පත්ව තිබෙනවා. ශ්‍රී ලංකා නිදහස් පාක්ෂිකයෝ අතරමං වෙලා. රැස්වීමකට ගියහම පොහොට්ටුවේ අය ශ්‍රී ලංකා නිදහස් පක්ෂයේ මන්ත්‍රීවරුන්ට හූ කියනවා. එජාපය කියන්නේ පවුල්වාදී පක්ෂයක් නොවේ. ප්‍රජාතන්ත්‍රවාදී පක්ෂයක්. ඒත් පොහොට්ටුව කියන්නේ පවුල් සමාගමක්. ජනපති අපේක්ෂක ගෝඨාභය අගමැති අපේක්ෂක මහින්ද. බැසිල්ට ආර්ථික ඇමැතිකම චමල්ට කථානායකකම, නාමල්ට තරුණ කටයුතු තව ශෂින්ද්‍රට පවුලේ අනෙක් රාජපක්ෂලාට සලකපුවහම අනෙක් අයට දෙන්නේ මොනවද? මේක පක්ෂයක් ද පවුල් සමාගමක්ද? ඒ නිසා තමයි ශ්‍රී ලංකා නිදහස් පක්ෂයේ සංවිධායකයින් බුරුතු පිටින් අපත් සමඟ එක් වෙන්නේ.
ශ්‍රී ලංකා නිදහස් පක්ෂයේ වැඩබලන සභාපතිවරයා නම් කියන්නේ සජිත් සමඟ එක්වූ ශ්‍රී.ල.නි.ප. සංවිධායකවරුන්ට ඡන්ද සීයක්වත් ගත නොහැකි බවයි. මේ අය පක්ෂයෙන් ඉවත් කළ අය බවත් ඔහු කියනවා. මොකක්ද ඊට ඔබේ ප්‍රතිචාරය.
කොළඹ ශීත කාමරවල ඉන්න අයට වඩා ජනහද ගැස්ම ගමේ මිනිහා හඳුනනවා. සජිත් දිනන බව දන්න නිසයි මේ අය අප හා එකතුවෙන්නේ.
යහපාලන ආණ්ඩුවට එක් වූ ශ්‍රී ලංකා නිදහස් පක්ෂයේ මන්ත්‍රීවරුන්ට පොහොට්ටු වේදිකාවේ දී හූ කීවා. මේ හූ සංග්‍රහයත් පිටුපස සිටින්නේ එජාපය බව දයාසිරි ජයසේකර මහතා චෝදනා කළා. ඒ ගැන මොකද කියන්නේ.
එයාලට හූ කියන්නේ දහයක් දොළහක් නෙවේ. මං දැක්කා දහස් ගණනක් හූ කියනවා. මේවා කරන්නේ එජාප පාක්ෂිකයෝ නම් අපි ජය ගන්නේ ගව් ගානක් තියලයි. දයාසිරි කියනවා නම් එතන ඉන්නෙත් එජාප අය කියා මං දයාසිරිට ස්තුතිය පුද කරනවා.
බැසිල් රාජපක්ෂ මහතා පසුගියදා පෞද්ගලික රූපවාහිනී නාළිකාවක් හා කරන ලද සාකච්ඡාවකදී කිව්වා එජාපයෙනුත් පොහොට්ටුවට කීප දෙනෙක්ම එන්න ඉන්නවා කියා. ඒක ඇත්තද කවුද ඒ කට්ටිය.
නෑ... නෑ... අපේ කවුරුවත් යන්නේ නෑ. මෙච්චර කල් වුණේ එයාලගෙන් අපිට ආපු එක විතරයි. නාවින්න, සොයිසා මහත්වරුන් ඇතුළුව සිය ගණනක් සංවිධායකවරු, පළාත් සභා මන්ත්‍රීවරු ප්‍රාදේශීය සභා මන්ත්‍රීවරු අපිට නම් ආවා. එජාපය ජයග්‍රහණයෙන් ඔදවැඩී ඉන්න වෙලාවේ කවුද ඒ පැත්තට යන්නේ.
පාස්කු බෝම්බ ප්‍රහාරයෙන් අවතැන් වූ හෝ ජීවිත අහිමිව‍ූ තුවාල වූ සියලුම දෙනාට වන්දි හා ආධාර මුදල් මේ වනවිට ලබාදී තිබෙනවාද?
පාස්කු බෝම්බ ප්‍රහාරයෙන් විපතට පත් සැමට අපේ සංවේගය පළ කරනවා. තුවාල වූ සියලුම දෙනාට මෙරට රෝහල්වල ප්‍රතිකාර ලබාගත නොහැකි නම් විදෙස් රටවල රෝහල් වෙත හෝ ප්‍රවේශ වී ප්‍රතිකාර ලබා ගැනීමට පහසුකම් සැපෙයුවා. තුවාල ලැබූවන්ට ඉතිහාසයේ මෙතෙක් මෙවැනි අනතුරකදී නොගෙවූ වන්දි ලබා දී තිබෙනවා. අහිමි වූ ජීවිත හැර සෙසු සියලු ම දේ මේ ප්‍රහාරවලින් අනතුරට ලක්වූ අයට අපි ලබාදී තිබෙනවා. තවදුරටත් වෛද්‍ය ප්‍රතිකාර ගත යුතු නම් ඒ පහසුකම් ද සපයනවා. විනාශ වූ දේවස්ථාන මාස දෙකකදී ප්‍රතිසංස්කරණය කළා. ඒ සඳහා ක්‍රියාත්මක වුණේ සජිත් ප්‍රේමදාස මහතායි. අතිඋතුම් මැල්කම් කාදිනල් හිමිපාණන් පවා සජිත් ප්‍රේමදාස මහතාගේ කැපවීම අගය කර තිබුණා.
ජනපතිවරණයේදී කතෝලික ප්‍රජාවේ ඡන්දයත් තීරණාත්මකයි. මෙවර කතෝලික ජනතාවගේ ඡන්ද හැසිරීම පිළිබඳව ඔබට කිව හැක්කේ කුමක්ද?
කතෝලික ප්‍රජාවේ අතිබහුතරය කවදත් ඉන්නේ එජපය සමඟයි. ඒ එක්සත් ජාතික පක්ෂය තුළ ජාති ආගම් කුල මල බේද නොමැති නිසයි.
භූමිතෙල් මිල අඩු කරන්න කියා උද්ඝෝෂණය කළ ඇන්තනී ධීවර සහෝදරයාට වෙඩි තබා මරා දැමීම, පිරිසුදු වතුර ඉල්ලා රතුපස්වලදී කළ උද්ඝෝෂණයේදී තිදෙනෙක් මරා දැම්මා. අර්ථ සාධකය සුරැකීමේ විරෝධතාවයේදී රොෂාන් චානක සහෝදරයාට වෙඩි තබා මරා දැමීම වැනි සිද්ධිත් කතෝලික ජනතාවට හොඳට මතකයි. ඒ නිසා කතෝලික අයගේ සහාය අපිට ලැබෙනවා.
මේ දිනවල ඇතැම් පුද්ගලයන් මවා පාන බෝම්බ බිය වැනි සිද්ධීන්වලට ආණ්ඩුව මුහුණ දෙන්නේ කොහොමද?
මේක කරන්නේ සංවිධානාත්මක කල්ලියක්. ජාතික ආරක්ෂාව අපි සහතික කරලා තියෙන්නේ. පසුගිය දිනවල උතුරෙන් ඇල්ලූ බෝම්බ වසර දහයක් දොළහක් පමණ ඒවා. මේ බොරුකාරයන්ට විරුද්ධව ජනතාව නිසි පිළිතුර ලබාදේවි.
සියයට එකසිය හතකින් (107%) රජයේ සේවක වැටුප් වැඩිකළා කිව්වත් ඇයි මේ තැනින් තැන උද්ඝෝෂණ වැඩ වර්ජන පවතින්නේ.
ඒක දේශපාලන වුවමනාව මත කරන දෙයක්. වසර හතරක් වර්ජන නොකරපු අය ඇයි දැන් පාරට බහින්නේ මේවා පිටුපස ඉන්නේ පොහොට්ටුවේ නායකයෝ. රජයේ සේවකයින්ට ගෞරවයෙන් යුතුව ජීවත්වීමට හැකි පරිසරයක් අපි හදනවා.
