දේශපාලන වේදිකාවේ විහිළුවට හෝ උපහාසයට ගත හැකි ඕප දූප කතා ඕනෑවටත් වැඩි ය. ඒ අතරේ අපට ඒ කතාවලින් යළි සිතන්නට සිදුවන කතා කිහිපයක් පසුගිය සතියේ ද කියවිණි. එසේම යළි යළි සිතන්නට සිදුවන සිදුවිම් ද කිහිපයක් ම සිදුවිණි. මේ එවැනි කතා කිහිපයකි.
පසුගිය සතිය පුරා මහත් කතා බහට ලක් වූ යළි යළි සිතන්නට සිදුවූ කතාවක් වූයේ පොදු පෙරමුණු ජනාධිපති අපේක්ෂක ගෝඨාභය රාජපක්ෂ මහතාගේ පළමු මාධ්‍ය හමුවයි. එය පැවැත්වූ තැනට ද ඔවුන් ගේ සබැඳියාවක් ඇත. ගෝඨාභය රාජපක්ෂ මහතා ආරක්ෂක ලේකම්වරයාව සිටියදී කොළඹ අතිශයින් ම වටිනා වාණිජමය වැදගත්කමක් ඇති ගාලු මුවදොර අද්දර පිහිටි ශ්‍රි ලංකා යුද හමුදා මූලස්ථානය සහිත අක්කර 10l ඉඩම ඩොලර් මිලියන 125කට විකිණීමෙන් පසු ගොඩනඟන ලද ෂැංග්‍රිලා හෝටලයේ මේ මාධ්‍ය හමුව පැවත්විණි. එහිදී ගෝඨාභය රාජපක්ෂ මහතාගෙන් මාධ්‍යවේදීන් කරුණු විමසද්දී ඔහු ඒවාට උත්තර නොදී මහින්ද රාජපක්ෂ මහතාට ඒවාට පිළිතුරු දෙන්නට සැලැස්වීය. එමෙන්ම මෙහිදී වැඩි කතාබහට ලක් වූ කතාවක් වූයේ මාධ්‍යව්දියකු විසින් අසන ලද ප්‍රශ්නයකදී ඔහු යුද්ධය කළේ තමන් නොව යුද හමුදාව සහ එය මෙහෙය වූයේ හමුදාපති බවට ප්‍රකාශ කිරීමයි. මේ සමඟ ඔහුගේ ප්‍රතිවාදී ජනාධිපති අපෙක්ෂකයා ජනතාව හමුවේ දුන් පොරොන්දුවට විශාල වටිනාකමක් ලැබිණි. ඒ මේ ෂැංග්‍රිලා හෝටලය ඉදිරිපිට පිහිටි ගාලු මුවදොර පිටියේදී ඊට දින කිහිපයකට පෙර අතිවිශාල ජනකායක් ඉදිරියේ නව ප්‍රජාතන්ත්‍රවාදී පෙරමුණේ ජනාධිපති අපේක්ෂකයා පොරොන්දු වුයේ, රටේ ජාතික ආරක්ෂාව සම්බන්ධයෙන් ඉහළම වගකීම ගෝඨාභය රාජපක්ෂ මහතා කියූ මේ යුද්ධයට නායකත්වය දුන් ෆීල්ඩ් මාෂල් සරත් ෆොන්සේකා මහතාට ලබා දෙන බව ය. එය එක් අතකට සජිත් කළ යෝජනාව ගෝඨාභය විසින් ස්ථිර කරනු ලැබීමක් වැනි ය.
මේ පුවත්පත් සාකච්ඡාවේදී වැඩි දෙනකුගේ අවධානයට යොමු නොවුණ ද තවත් අපට සිතන්නට කතාවක් ඉතිරි වූයේය. මාධ්‍යවේදියා ඇසුවේ බැසිල් රාජපක්ෂ මහතා ‘ද හින්දු‘ පුවත්පතට කළ සාකච්ඡාවකදී පවසා තිබූ කරුණක් ගැන ය. එයින් කියැවුණේ කවුරු ජනාධිපති වුවද ආණ්ඩුවේ නායකයා වන්නේ මහින්ද රාජපක්ෂ මහතා බව ය. එය ඔබ පිළිගන්නේදැයි විමසූ කල මහින්ද රාජපක්ෂ මහතා සැකෙවින් පැවසූයේ අපිට ඒක බෙදා ගන්න පුළුවන් යන්න ය.
දේශපාලකයන්ට ලැබෙන හූ සංග්‍රහය
මෙවර ජනාධිපතිවරණ වේදිකාවේ දී ආ අලුත් ම ප්‍රවණතාව වන්නේ ශ්‍රී ලංකා නිදහස් පක්ෂයෙන් මෑතකදී පොදුජන පෙරමුණ සමඟ ජනපති සටනට එක් වූ දේශපාලකයන්ට ලැබෙන හූ සංග්‍රහයයි. මේ වනවිටත් දුමින්ද දිසානායක, ජෝන් සෙනෙවිරත්න, ටී.බී ඒකනායක, තාරානාත් බස්නායක වැනි දේශපාලකයන්ට ඒ රැස්වීම්වලට පැමිණ සිටි ජනතාව හූ කීම නිසා ඔවුන්ට මේ වනවිට වේදිකාවට ගොඩවීමට නොහැකි තත්ත්වයකට පත්ව ඇත. මේ ගැන ශ්‍රීලනිප මාධ්‍ය ප්‍රකාශක වීරකුමාර දිසානායක මන්ත්‍රීවරයා කියන්නේ වෙන කතාවකි. ඔහු කියන්නේ පොදු ජන පෙරමුණු රැස්වීම් අතරේ මෙසේ සංවිධානගත වී හූ කියන්නේ එක්සත් ජාතික පාක්ෂිකයන් බවට තොරතුරු ලැබී ඇති බවයි. එසේ වුවද පසුගියදා ශ්‍රී ලංකා නිදහස් පක්ෂය සහ පොදු ජන පෙරමුණු ජ්‍යෙෂ්ඨයන් මේ හූ කීම සම්බන්ධයෙන් සාකච්ඡා කර ඇති අතර, එහිදී පොදු ජන පෙරමුණු නායකයින් ශ්‍රි ලංකා නිදහස් පක්ෂ නියෝජිතයන්ට පවසා තිබුණේ තමන් ආසන සංවිධායකයකවරුන් සහ රැස්වීම් සංවිධායකවරුන්ගේ මට්ටමින් කෙසේ හෝ මේ තත්ත්වය පාලනය කිරීමට කටයුතු කරන බවයි.
හිස්බුල්ලාගේ සහයෝගය
පසුගිය දිනවල දේශපාලන තලයේ කතා බහට ලක්වූ කරුණක් වූයේ අන්ත ජාතිවාදී කඳවුරු නියෝජනය කරන එම්.කේ ෂිවාජිලිංගම් සහ නැගෙනහිර හිටපු ආණ්ඩුකාර ඒ.එල්.ඒ එම් හිස්බුල්ලා යන මහත්වරුන් යම් ප්‍රධාන දේශපාලන පක්ෂයක වුවමනාව මත උතුරේ සහ නැගෙනහිර ඡන්ද කෙරෙහි බලපෑම් කිරීමේ අරමුණින් ඔවුන් ජනාධිපතිවරණය සඳහා ඉදිරිපත් කළ බව ය. මේ කාරණාවේ ඇත්ත නැත්ත ගැන යම් ඉඟියක් දෙන කතාවක් කළේ මෑතකදී පොහොට්ටුව සමඟ එක්ව වැඩ කරන්නට ගිය එස්.බී දිසානායක මහතා ය.
ඔහු පසුගියදා මාධ්‍ය හමුවකදී පවසා සිටියේ තමන් හිස්බුල්ලා මහතා සමඟ කතා කළ බව ය. එහිදී ඔහුගේ සහය ගෝඨාභය මහතාට ලැබෙන බව ය. මේ කාරණාවේ ඇත්ත නැත්ත කෙසේ වුවද පසුගියදා නැගෙනහිර පළාතේ අමුතු ආකාරයේ පෝස්ටරයක් දක්නට ලැබිණි. දෙමළ භාෂාවෙන් ලියැවුණු පත්‍රිකාවේ ගෝඨාභය රාජපක්ෂ මහතාත් ඒ.එල්.ඒ.එම් හිස්බුල්ලා මහතාත් දෙදෙනාගේම ඡන්ද ලකුනු සහිතව දෙදෙනාට ඡන්දය ලබා දෙන ලෙස මෙම පෝස්ටරයෙන් පවසා තිබිණි.
සජිත්ගේ පිස්සුවෙන් මතුවුණු ජනාධිපති අපේක්ෂක මෙඩිකල් එක
පසුගියදා පිවිතුරු හෙළ උරුමය නායක පාර්ලිමේන්තු මන්ත්‍රී උදය ගම්මන්පිල වෛද්‍ය මතය අනුව සජිත් ප්‍රේමදසා මහතාට පිස්සු යැයි පැවසුවේය. ඔහු වෛද්‍ය පරීක්ෂණයට ලක් කළ යුතු බව ද ඔහු කීවේය. මේ කතාව අනපේක්ෂිත ලෙස අනුමත කළේ සජිත් ප්‍රේමදාස මහතාගේ මැතිවරණ ව්‍යාපාරයේ බල කණුවක් වන අමාත්‍ය මංගල සමරවීරයි. ඔහු කීවේ සජිත් ප්‍රේමදාස මහතාට තිබෙන පිස්සුව ජනතාවට වැඩ කිරීම බවයි. ගම්මන්පිල මහතාට අවශ්‍ය වූයේ ප්‍රේමදාස මහතාට අපහාස කිරීමට වුවත් මංගල පැවසුවේ එහි යම් අර්ථයක් පවතින බව ය. ජනාධිපතිවරණයට ඉදිරිපත් වන සියලු ම අපේෂකයන්ගේ සෞඛ්‍ය තත්ත්වය පරීක්ෂා කිරීමේ ක්‍රමවේදයක් පැවතිය යුතු බව ඔහු කීවේය. එවිට සියලු ම ජනාධිපති අපෙක්ෂකයන්ගේ සෞඛ්‍ය තත්ත්වය ගැන ජනතාවට පූර්ව නිගමනයක් ලබා ගත හැකි බව ඔහු සඳහන් කළ අතර, මේ කතාවට සජිත් ප්‍රේමදාස මහතාට ශක්තිය දීමට මැතිවරණ ව්‍යාපාරයට එක් වූ තිස්ස අත්තනායක මහතා ද තල්ලුවක් දුන්නේය. මේ පිස්සු කතාව ගැන කොළඹින් පිට සිටි සජිත් ප්‍රේමදසා මහතාට කීවේ තිස්ස අත්තනායක මහතා ය. ඔහු එය කී ගමන් සජිත් කිවේ, මගේ සෞඛ්‍ය වාර්තා ඕන වෙලාවක දෙන්න සූදානම්; අනෙක් අපේක්ෂකයනුත් ඒ දේ කරන්න ඕන; සෞඛ්‍ය වාර්තාවක් විතරක් නෙවෙයි පොලිස් වාර්තාවකුත් ගන්න ඕන යනුවෙනි.
යුද හමුදාපති අමාරුවක වැටුණු තැන
ගෝඨාභය රාජපක්ෂ පොදුජන පෙරමුණු ජනාධිපති අපේක්ෂකයා සම්බන්ධයෙන් පසුගිය සතියේ තවත් ආන්දෝලනාත්මක සිදුවීමක් විය. ඒ වත්මන් යුද හමුදාපති ලුතිනන් ජනරාල් ශවේන්ද්‍ර සිල්වා මහතා ගෝඨාභය රාජපක්ෂ මහතා අගයමින් කළ ප්‍රකාශයක් ඔහුගේ ඡායාරූපය ද සමඟ පළ කිරීම ය. මේ සම්බන්ධයෙන් මැතිවරණ කොමිසමේ ද අවධානයට ලක් වු අතර, මේ සම්බන්ධයෙන් පැහැදිලි කිරීමක් කරන ලෙස මැතිවරණ කොමිසමේ සභාපති මහින්ද දේශප්‍රිය මහතා යුද හමුදාපතිවරයාගෙන් ඉල්ලා සිටියේය. මේ සම්බන්ධයෙන් දැඩි අප්‍රසාදය පළ කළ සභාපතිවරයා, යුද්ධ සමයේ ජයග්‍රහණ මැතිවරණ සමයේ ඈදා ගැනිම ගැන ද විවේචනයක් කළේය. ඒ අතර පොහොර නිකම් දී වැට් බද්ද අඩු කළාත් වෙන දේ ගැන චම්පික පැහැදීමක් කළේය.
චම්පිකගේ තර්කය
ගෝඨාභය රාජපක්ෂ මහතාගේ අනුරාධපුර මංගල රැලියේදි පොහොර නොමිලේ දෙන බවට කළ ප්‍රකාශයත් පසුගියදා තේ කර්මාන්ත ශාලා හිමියන් හමුවේ වැට් බද්ද සියයට 8ක් දක්වා අඩු කිරීම ගැනත් අමාත්‍ය පාඨලී චම්පික රණවක අපූරු තර්කයක් පසුගියදා ඉදිරිපත් කළේය. ඔහු පවසන්නේ අද පවතින මිල ගණන් අනුව පොහොර නොමිලේ ලබාදීම සඳහා අඩුම තරමින් රුපියල් බිලියන 35 ක්වත් වැයවෙනු ඇති බව ය. එමෙන්ම පසුගියදා තේ වැට් බද්ද 15% සිට 8% දක්වා අඩු කිරීමට ගියහොත් රුපියල් බිලියන 215 ක අඩුවක් අයවැයට එන අතර, සෙස් බද්ද ඉවත් කළොත් රුපියල් බිලියන 41 ක් ඉවත්වනු ඇති බව ය. ඔහු දැනමටත් ප්‍රකාශ කර ඇති ඒ කරුණු තුන එනම්, පොහොර සහනාධාරය ඉවත් කිරීම, සෙස් බද්ද ඉවත් කිරීම, වැට් බද්ද 15% සිට 8% දක්වා අඩු කිරීම යන කරුණු විසින් රුපියල් බිලියන 290 ක් හෝ ඊට වැඩි ගණනක හිඟයක් ආණ්ඩුවේ ආදායම්වලට එකතු වනු ඇතිය යන්න අමාත්‍ය චම්පික ගේ තර්කය විය.
