දැන් දේශපාලන පිටිය උණුසුම් ය. කවුරුත් නොසිතන විවිධ දේශපාලන පෙරළි කැලඹීම් හෝ අමතක නොවන සිදුවීම් සෑම දිනක ම සිදු වෙයි. එයින් ඇතැම් සිදුවීම් රටේ ජනතාවට සිතන්නට දෙයක් ඉතිරි කරයි. මේ ඉඩ වෙන්වෙන්නේ එසේ සිතන්නට දෙයක් ඉතිරි කළ දේශපාලන සිදුවීම් කිහිපයක් ගැන ය.
පසුගිය සතියේ දේශපාලන පිටියේ සිදුවූ සිදුවීම් අතර කතා බහට ලක් වූ කරුණක් වූයේ ශ්‍රී ලංකා නිදහස් පක්ෂයත් පොදුජන පෙරමුණත් එක්ව ගිවිසුමකට එලඹීම ය. ඉතා සුලබ දේශපාලනික පොදු කාරණා කිහිපයක් මත මේ දේශපාලන දීගය ට ගිවිස ඇති අතර ශ්‍රී ලංකා නිදහස් පක්ෂයේ සභාපතිවරයා වන ජනාධිපති මෛත්‍රීපාල සිරිසේන මහතා ජනාධිපතිවරණය අවසන් වන තෙක් නිර්පාක්ෂිකව සිටීමට තීරණය කර ඇත. රාජපක්ෂ පවුල්වාදයට එරෙහිවූ මෙන්ම බණ්ඩාරනායකයන් බිහි කළ ශ්‍රි ලංකා නිදහස් පක්ෂයේ අර්ථාන්විත ප්‍රතිපත්ති සමඟ ජීවත් වන පිරිසක් මේ දීගයට විරෝධය පෑවද පක්ෂයේ මහලේකම් දයාසිරි ජයසේකර, දුමින්ද දිසානායක, නිමල් සිරිපාල ද සිල්වා වැනි ප්‍රබලයන්ට පොදු ජන පෙරමුණට හේත්තු වීමට ඕනෑ විය.
පක්ෂ ආරංචි මාර්ගවලට අනුව ඊළඟ මහ මැතිවරණයේදී මේ පක්ෂ දෙක අතර සන්ධානගත වීමක් ගැන කියැවෙන අතර මේ වනවිටත් එ් මැතිවරණයේ තරග කිරීම සඳහා අපේක්ෂකත්වය ලබාගැනීම සම්බන්ධයෙන් විවේචන එල්ල වී ඇත. මේ වනවිට කියැවෙන ආකාරයට පොදුජන පෙරමුණට නාමයෝජනාවලින් සියයට 51ක් ද ශ්‍රී ලංකා නිදහස් පක්ෂයට සියයට 30ක් සහ සෙසු පක්ෂවලට ඉතිරි කොටස වන ලෙසින් නාම යෝජනා ලබා දීම සම්බන්ධයෙන් යෝජනා වී ඇතත් මුලින් ම පොදු ජන පෙරමුණට සම්බන්ධ නොවී රජයේ වරප්‍රසාද භුක්ති විඳ අවස්ථාවාදී ලෙස එක් වුණේ යැයි සඳහන් කරමින් පොදු ජන පෙරමුණේ ප්‍රබල සාමාජිකයන් මේ යෝජිත සන්ධානය සම්බන්ධයෙන් තම විරෝධතාව දක්වා ඇත. මේ කෙළිය එළියේ බලා ගත හැක්කේ ඊළඟ මහ මැතිවරණය ආසන්න වන විටදී ය.
මධුමාධව මුදු ලෙස අස් වෙයි
කලා ලෝකයෙන් දේශපාලනයට පැමිණි මදුමාධව අරවින්ද පිවිතුරු හෙළ උරුමයේ නියෝජ්‍ය නායකයා ය. හිටි හැටියේ ම ඔහු පක්ෂයේ නියෝජ්‍ය නායක තනතුරින් මෙන් ම සියලු තනතුරු හා වගකීම්වලින් ඉල්ලා අස්වීම දේශපාලන ක්ෂේත්‍රයේ කාගෙත් අවධානය දිනා ගත්තේය.
පාස්කු ප්‍රහාරයෙන් පසු කුලියාපිටිය ඇතුළු ප්‍රදේශවල ජාතිවාදී කෝලහාල ප්‍රමාණයක් සිදුවිය. එවකට පිවිතුරු හෙළ උරුමයේ නියෝජ්‍ය නායක මධුමාධව අරවින්ද ද ඒ කලබල අතර ඒ ප්‍රදේශයේ සැරිසරන කතා මෙන්ම ඡායාරූප එළියට ආවේ මේ කලබලවලට ඔහුගේ ද නම ගැට ගසමිනි. මධුමාධව පිවිතුරු හෙළ උරුමයෙන් හදිසියේ ඉවත්ව ගියේ මන්ද? සැබෑ හේතුව තාමත් හෙළි වී නැත.
කෙසේ වුවද ඔහුගේ ඉල්ලා අස්වීම සහ මෑතකදී ඔහු මුස්ලිම් ජනතාව සම්බන්ධයෙන් සිදු කරන ලද වෛරී ප්‍රකාශ සහිත වීඩියෝවක් සමාජ ගත වීම ආන්දෝලනාත්මක වී ඇත. මේ ලංකා පොදු ජන පෙරමුණේ ප්‍රබල නියෝජනයක් වන පිවිතුරු හෙළ උරුමයේ නියෝජ්‍ය නායකයාගේ මේ හැසිරීම මුස්ලිම් ජනතාවගේ ඡන්ද ඔවුන්ගේ අපෙක්ෂකයා වෙත ආකර්ෂණය කර ගැනීමට බලපෑ හැකි බවට වූ මතය හේතුවෙන් ඔහුට ඒ පක්ෂයෙන් ඉවත් වන්නට කිවාද නැද්ද යන්න සම්බන්ධයෙන් මේ වනවිට කතිකාවක් නිර්මාණය වී ඇත.
අලි සබ්රිගේ ෆේස්බුක් සංවාදය
ජනාධිපති නීතීඥ අලි සබ්රී මහතා යනු ශ්‍රී ලංකා පොදු පෙරමුණු (පොහොට්ටු පක්ෂයේ) ජනාධිපති අපේක්ෂක ගෝඨාභය රාජපක්ෂ මහතාගේ නීතිඥවරුන් අතර ප්‍රධාන නීතිඥවරයෙකි; සමීප ආධාරකරුවෙකි. ඔහු පසුගියදා ෆේස්බුක් සමාජ මාධ්‍යයක දී කළ සංවාදයක් පසුගියදා සමාජය අතර මහත් ආන්දෝලනයට ලක් විය. ඔහු එහිදී කුරුණෑගල කාන්තාවන් වඳ බවට පත් කළ බවට චෝදනා එල්ල කළ වෛද්‍ය සාෆි සම්බන්ධ කතාව පොහොට්ටු පක්ෂයෙන් නිර්මාණයක් බව පිළිගැනීම ය.
කෙසේ වුවත් සමාජ ජාල බෙබ් අඩවියේ ඔහු සටහන් තැබූ ප්‍රකාශයක් නිසා ඉකුත් සතියේ සමාජ වෙබ් ජාලවල විශේෂ අවධානයක් ඊට යොමු වී තිබිණි. “සියලු අන්තවාදීන් සහ ජාතිවාදීන් පරාජය කළ යුතුය. විවිධත්වය ශක්තියක් කර ගත යුතුය. මානසික රෝගීන්ට ප්‍රතිකාර කළ යුතුය.“ ඒ ෆේස් බුක් සටහනට විශාල අවධානයක් යොමුව තිබූ අතර ඊට අයෙක් ප්‍රතිචාර දක්වා තිබූ අතර එහි මෙසේ සටහන් විය.
“පොහොට්ටු පක්ෂය අන්තවාදීන්ගෙන් පිරිලා.වෛද්‍ය ෂාෆිගේ ප්‍රශ්නය නිර්මාණය කළෙත් ඔවුන්.” යැයි ඒ සටහන ය. සබ්රි මහතා ඊට ලබා දුන් උත්තරෙයෙන් ඒ බව පිළිගෙන තිබුණි. ඉකුත් සතියේ මේ ෆේස් බුක් සටහනට විශාල අවධානයක් යොමුව තිබිණි.
කාදිනල්තුමා අපක්ෂපාතීද?
කොළඹ අගරදගුරු කාදිනල් මැල්කම් රංජිත් පියතුමා මීට දින කිහිපයකට පෙර කීවේ තමා කිසිම දේශපාලන පක්ෂයකට සම්බන්ධ නැති බවයි. දේශපාලනයක් මට නැතැයි කියූ කාදිනල් හිමිපාණන් ඉකුත් සතියේ ඊට හාත්පසින්ම වෙනස් කතාවක් කළ අතර එමඟින් ඉඟි කළ කාරණය කාගෙත් අවධානයට ලක්විය.
කොළඹ අගරදගුරුතුමන්ට දේශපාලනයක් නොමැති වුවත් උතුරු කළුතර අශෝකාරාම විහාරයේ පැවති දහම් පාසල් උත්සවයකට එක්වෙමින් කාදිනල් හිමිපාණෝ මෙසේ කීහ.
“ජනතාව කාටද ඡන්දය දෙන්නෙ කියලා දැනටමත් තීරණය කරලා ඉවරයි. පරාජිත අය නම්බුකාර විදිහට රට බාර දීලා යා යුතුයි.” මේ කතාව අසා සිටි ජනතාව කල්පනා කරන්නට ගන්නේ ඇත්තට ම කාදිනල් හිමිපාණන්ට දේශපාලනයක් තිබෙනවාද නැද්ද කියාය.
ෆොන්සේකාගේ අනාගත වගකීම
වාර්තාගත ජනකායකගේ සහභාගීත්වයෙන් පසුගියදා කොළඹ ගාලු මුවදොර පැවැති එක්සත් ජාතික පෙරමුණු ජනාධිපතිවරණ රැලියේදී ජනාධිපති අපේක්ෂක අමාත්‍ය සජිත් ප්‍රේමදාස මහතා කළ කතාවේ වඩාත් අවධානයට ලක් වූ කරුණ වූයේ තමන් ජනාධිපති වූ පසුව ජාතික ආරක්ෂාව සම්බන්ධ ඉහළ ම වගකීම ෆීල්ඩ් මාෂල් සරත් ෆොන්සේකා මහතාට ලබා දෙන බව ය. එමෙන්ම මත්ද්‍රව්‍යවලට එරෙහිව සිදු කරන සටන දැඩි සේ ඉදිරියටත් සිදු කරන බව ඔහු එහිදී ප්‍රකාශ කළේය. මෙය එතැන සිටි පාක්ෂිකයන්ගේ මෙන්ම රටේ ජනතාවගේද වඩාත් අවධානයට ලක් වූයේ පසුගිය කාලයේදීද සරත් ෆොන්සේකා මහතාට මේ වගකීම ලබා දීම සම්බන්ධයෙන් පුළුල් කතිකාවක් නිර්මාණය වී තිබූ නිසා ය.
ටෘෘඩෝ සහ සජිත්
ජනාධිපති අපේක්ෂක සජිත් ප්‍රේමදාස අමාත්‍යවරයාගේ කතාවේ තවත් වැදගත් ලක්ෂණයක් වූයේ ඔහු පසුගියදා ශ්‍රි මුඛය සම්බන්ධයෙන් සිදුකළ ප්‍රකාශය සම්බන්ධයෙන් සමාව අයැදීම ය. ඒ සඳහා ලක්ෂ ගණනාවක් රැස්ව සිටින තැනක සමාව ගැනීමට තමන් බලා සිටි බව ට කළ ප්‍රකාශය ඇතැම් අය සම කළේ පසුගියදා කැනඩාවේ අගමැති ජස්ටින් ටෘඩෝ මීට වසර කිහිපයකට පෙර පෞද්ගලික පාසලක ගුරුවරයකු ලෙස සේවය කළ කාලයේ කළු ජාතිකයන්ට අනුකරණය කරමින් එක්තරා විකට ඇඳුමක් සහිත ඡායාරූපයක් ටයිම්ස් වෙබ් අඩවියේ පළ වීමත් සමඟ ඒ පිළිබඳ ව සමාව ගැනීම ය. කළු ජාතිකයන්ට මේ හේතුවෙන් යම් අපහසුතාවක් වී නම් සමාව ගන්නා බව පැවසීමෙන් ටෘඩෝ අගමැතිවරයාට එරට ජනතාව තුළ විශාල ප්‍රසාදයක් හිමි වු අතර ඔහු ජනප්‍රියතාව මඳකින් හෝ අඩු නොවූ බව ටයිම් සඟරාවම පසු කලාපයක වාර්තා කළේය.
දයාසිරිට ආ වට්ස් ඇප් පණිවුඩය
ශ්‍රි ලංකා නිදහස් පක්ෂය හිටිහැටියේ පොදුජන පෙරමුණ සමඟ එක් ව එහි ජනාධිපති අපෙක්ෂක ගෝඨාභය රාජපක්ෂ මහතාට සහය ලබා දීම සම්බන්ධයෙන් නොසතුට පළ කරන හිටපු ජනාධිපතිනි චන්ද්‍රිකා බන්ඩාරණායක කුමාරතුංග මහත්මිය පසුගියදා මේ තීරණය සම්බන්ධයෙන් නිදහස් පක්ෂ මහලේකම් දයාසිරි ජයසේකර මහතාට වට්ස් ඇප් පණිවිඩයකින් අමතා තිබිණි. එහි සඳහන් ව වූයේ සියයට 90ක් ශ්‍රිලනිප සංවිදායකයන් විරුද්ධ වෙද්දී ඔබ ගෝඨාභය රාජපක්ෂ මහතාට සහය ලබා දෙන්නට තීරණය කළේ කෙසේද යන්න ය. මෙය සම්පූර්ණයෙන් ම පක්ෂය පාවාදීමක් බව ඇය පවසා තිබුණි.
ශ්‍රීලනිපය දුර්වල වූයේ එක්සත් ජාතික පක්ෂය හෝ ඊට සම්බන්ධ පාර්ශ්වවලට සහය දීම නිසා නොවන බව දයාසිරි ජයසේකර මහතාට පෙන්වා දෙන හිටපු ජනපතිනිය, ඇය දැනුවත් කළේ නම් කෙසේ හෝ පක්ෂයේ සභාපතිත්වය ඔහුට ලබා දී එය ප්‍රතිසංවිධානය කිරීමට අවැසි සහය ලබා දෙන බව පවසා තිබේ. එසේම දයාසිරි ජයසේකර මහතාගෙන් හිටපු ජනපතිනිය ඉල්ලා ඇත්තේ තමන්ගේ පෞද්ගලික අභිමථාර්ථ අනුව කටයුතු කර පක්ෂය විනාශ කිරීමට ඉඩ නොදෙන ලෙස ය.
