ජනාධිපතිවරණ අපේක්ෂකයන්ගේ ප්‍රචාරක රැලි ඉහළ මට්ටමින් පැවැත්වෙනවා. අනුරාධපුරයේදී ශ්‍රී ලංකා පොදුජන පෙරමුණේත්, කොළඹ ගාලු මුවදොරදී එක්සත් ජාතික පෙරමුණෙත් රැලි පැවැත්වුණා. ඒත් ජාතික ජනබලවේගයේ අපේක්ෂකයාගේ ප්‍රචාරක රැලි මන්දගාමි වෙලා වගේ...
ජනතා විමුක්ති පෙරමුණත් ඇතුළත් ජාතික ජනබලවේගය කේන්ද්‍ර කරගත් අනුර කුමාර දිසානායක මහතා දිනවීමේ ප්‍රචාරක කටයුතු ඉහළ මට්ටමින් පැවැත්වෙනවා. තඹුත්තේගමදී පැවැත්වුණු ප්‍රචාරක රැලිය ඉහළ මට්ටමක තිබුණා. ඒ වගේම අප මේ වන විට විවිධ ප්‍රචාරක මාධ්‍ය භාවිත කරනවා. ඒත් ඇතැම් ජනමාධ්‍ය ඒ බව පෙන්වන්නේ නැහැ. සමහර මාධ්‍ය හිතාමතාම ඒ ප්‍රචාරක කටයුතු අඩු කර තිබෙනවා. අපේ ප්‍රචාරක කටයුතු එන්න එන්න වැඩි දියුණු වනවා මිසක් අඩු වන්නේ නැහැ. මාධ්‍ය ඒ බව නොපෙන්වන නිසා තමයි ප්‍රචාරක කටයුතු අඩු බවක් පේන්නෙ.
සජිත් ප්‍රේමදාස වටා එක්සත් ජාතික පෙරමුණම එක් වෙලා. පසුගියදා අනුරාධපුරයේදී පොදුජන පෙරමුණත්, ශ්‍රී ලංකා නිදහස් පක්ෂයත් එක් වුණා. එය ජාතික ජනබලවේගයට විශාල අභියෝගයක් නේද?
ශ්‍රී ලංකා නිදහස් පක්ෂය යන-එන මං නැතිව හිටියේ; පක්ෂයේ සමහරු එක්සත් ජාතික පක්ෂයට එක් වුණා; සමහරු පොදු ජන පෙරමුණට එක් වුණා. සමහරු යන-එන මං නැතිව අනාථ වෙලා හිටියෙ. ඒ කට්ටිය දැන් මහා බලයක් තියෙනවා වගේ පොදුජන පෙරමුණත් එක්ක එකතු වුණා. එයින් අපට කිසිම බලපෑමක් නැහැ.
ඒ වගේම තමයි මේ පක්ෂ දෙකේම අය එහෙමත් නැත්නම් මේ ප්‍රධාන බල කඳවුරු දෙකම පෙනී ඉන්නේ බලය ලබා ගන්න මිසක් ජනතාවට සෙතක් කරන්නවත්, රට හදන්නවත් නෙමෙයි. ඒක ජනතාව දන්නවා.
අනුරාධපුර රැලියේදී මහින්ද රාජපක්ෂ මහතා කිව්වා මේ ආණ්ඩුව කෘෂිකර්මයට කිසිවක් නොකළ බවට, එතැන දුමින්ද දිසානායකත් හිටියා. කවුද කෘෂිකර්ම ඇමැති හිටියේ? දුමින්ද දිසානායක නේද? නෙළුම් කුලුනෙන් කෝටි 200ක් මහින්ද රාජපක්ෂ ආණ්ඩුව ගසා කෑව කිව්ව ජනාධිපතිතුමා අද ඒ අයත් එක්ක ගිවිසුම් ගහන්න තීරණය කරලා. මේව ලජ්ජ නැති දේශපාලකයන්ට තමයි හොඳ. බලය දකින විට සියලු දේ වෙනස් කරගන්නවා.
එහෙත් මෙවර ජනාධිපතිවරණයේදී ජනාධිපතිවරයා මධ්‍යස්ථව කටයුතු කරන බව ප්‍රකාශ කර තිබෙනවා. වැඩ බලන සභාපතිවරයකුත් පත් කර තිබෙනවා...
ඒක තනිකරම බොරුවක්; ජනතාව මෙන්ම පාක්ෂිකයා රැවටීමක්. ශ්‍රී ලංකා නිදහස් පක්ෂය පොදුජන පෙරමුණ හා සම්බන්ධ වුණා කියන්නේ රාජපක්ෂ පවුල් පාලනය ඇතුළට ගිහින් ඉවරයි. ශ්‍රී ලංකා නිදහස් පක්ෂය බොඳ වෙලා, දිය වෙලා ඉවරයි. මෛත්‍රීපාල සිරිසේන මහතා ස්වාධීන වුණා කියන එක ජනතාව රවට්ටන කතාවක් විතරයි.
මේ ප්‍රධාන බලකඳවුරු දෙක අතරේ ඔබ පක්ෂයේ අපේක්ෂකයාට තැනක් තිබේවිද?
අපි එන්නේ රට හදන්න මිසක් රට විකුණන්න නෙමෙයි නේ. ඒ බව ජනතාව දන්නවා. මෙතැන එක් පැත්තක ඉන්නේ රට වෙනුවෙන් ඉන්න ජාතික ජන බලවේගයයි. අනෙක් පැත්තෙන් බල කණු දෙකක් කිව්වත් ඉන්නේ රට ආගාධයට ඇද-දැමූ, රටට ණය බර ඇති කළ පක්ෂ දෙකක්. ඒක පක්ෂ දෙකක් වගේ තිබුණත් දෙගොල්ලම එකයි.
මෙවර ජනාධිපතිවරණයට උතුරේ සිවාජිලිංගම් වගේම නැඟෙනහිරින් හිස්බුල්ලා තරග කරනවා. ඔබ පක්ෂය මේ දෙදෙනාගේ තරග කිරීම දකින්නේ කෙසේද?
ඒ අය තනිකරම ජාතිවාදය පැතිරවීමක් කරන්නේ. රටේ හොරකම, දූෂණය මැඬපැවැත්විය හැකි, ජාතිවාදයෙන් තොරව කටයුතු කරන එකම අපේක්ෂකයා ඉන්නේ ජාතික ජනබලවේගයේයි. ඒ බව ජනතාව අවබෝධ කරගනීවි.
පසුගියදා වර්ජන රැල්ලක් ඇති වුණා. සරසවි අනධ්‍යයන සේවකයන් තවමත් වර්ජනයේ. මේ වර්ජනවලින් -විශේෂයෙන්ම සෞඛ්‍ය හා දුම්රිය වර්ජනවලින්- රෝගීන් හා මඟී ජනතාව විශාල පීඩාවකට පත් වුණා. වර්ජනවල සදාචාරයක් තිබිය යුතු බව ඔබ පිළිගන්නවාද?
ඕනෑම වර්ජනයක් මඟින් ජනතාව පීඩාවට පත් වනවා. එය වළක්වන්න බැහැ. ඒ වර්ජනවලට වගකිව යුත්තේ පවත්නා රජයයි. වර්ජන රැල්ල ඇති කරන්නේ ආණ්ඩුව විසින්. ආණ්ඩුව සේවක අයිතීන් මෙන්ම ඔවුන්ට හිමි දේ ලබා නොදුන් විට වර්ජන ඇති වෙනවා. එය එක්වරම ඇති වන්නේ නැහැ. පළමුව ඒ අය තමන්ගේ ගැටලු දැනුම් දෙනවා. ඒ සඳහා විසඳුම් දෙන්න කාලයක් දෙනවා. එවිට පාලකයන් බොරු පොරොන්දු දෙනවා. ඒ පොරොන්දු ඉටු නොවන විට සේවකයන් පූර්ව දැනුම් දීම් අනුව වර්ජනයට පෙලඹෙනවා. වර්ජන වැළැක්වීම රජය සතු කාර්යයක්. තම අයිතීන් දිනාගැනීම වෙනුවෙන් සේවකයන්ට අවසානයේ කළ හැකි එකම දේ වර්ජනයයි. ඒ වර්ජන සියල්ලට වගකිව යුත්තේ රජයයි. ගුරුවරුන් හා විදුහල්පතිවරුන් විසින් පසුගිය කාලය පුරා තම වෘත්තීය අයිති හා ගැටලු දැනම් දුන්නා. එහෙත් ආණ්ඩුව බීරි අලින්ට වීණා ගායනා කරනවා වගේ කිසිදු පිළියමක් දුන්නේ නැහැ. අවසානයේ වර්ජන දක්වා එය ගියා. ආණ්ඩුවට මේ සේවක ගැටලු විසඳන්න මුදල් නැහැ කියා පවසන්න බැහැ. ජනාධිපතිවරයාගේ ආරක්ෂාවට ගෙනෙන රථයට බදු පමණක් කෝටි 10කුත් දස ලක්ෂයක් ගෙවන්න වෙනවා. තනි පුද්ගලයකුගේ විහරණයට එසේ බදු සඳහා පමණක් කෝටි 10කටත් අධික මුදලක් වැය කරන විට ඒ දෙස බලා ඉන්න රටේ ජනතාව තම අයිතීන් වෙනුවෙන් හඬ නඟනවා.
ගුරු හා විදුහල්පති වැඩ වර්ජනයක් පසුගිය දිනවල පැවතුණා. ඒ මෙහෙයවීමේ ප්‍රධානියා ලෙස පෙනී සිටියේ ජනතා විමුක්ති පෙරමුණේ හිටපු පළාත් සභා මන්ත්‍රී මහින්ද ජයසිංහ මහතා. එය ජනතා විමුක්ති පෙරමුණේ අරගලයක් වගේ පේනවා කිව්වොත්...
නැහැ ඒක වැරැදියි. ඒ වර්ජනය එක් වෘත්තීය සමිතියක ක්‍රියාමාර්ගයක් නෙමෙයි. වෘත්තීය සමිති රැසක්ම එක් වෙලා තමයි ඒ වෘත්තීය සමිති ක්‍රියා මාර්ගය ගත්තේ. ඒකාබද්ධ වෘත්තීය සමිති පෙරමුරණක් එතැන තිබුණා. එතන සියලු පක්ෂවලට අයත් වෘත්තීය සමිති පෙරමුණක් තිබුණෙ.
කොහොම වුණත් රාජ්‍ය ආයතනවල වෘත්තීය සමිති අතුරින් ජනතා විමුක්ති පෙරමුණට සම්බන්ධ වෘත්තීය සමිති මේ දිනවල වර්ජන පිටුපස ඉන්නවා කියලා චෝදනාවක් ආවොත් දෙන පිළිතුර කුමක්ද?
වෘත්තීය සමිති ක්‍රියාමර්ග ගන්නේ වැඩ කරන සේවකයාගේ, කම්කරුවාගේ වෘත්තීය අයිතීන් වෙනුවෙන්. ඒකෙදි අප පස්ස ගහන්නෙ නැහැ; ඉස්සරහින්ම ඉන්නවා. සාධාරණ වැටුප් අරගලයක් නම් සාධාරණ වෘත්තීය අයිතියක් වෙනුවෙන් අප ඒ මූලිකත්වය ගන්නවා. අප යම් වෘත්තීය හෝ ජනතාවට සිදු වන අසාධාරණයකට සම්බන්ධ නම් ඍජුවම ඉන්නා බව පවසනවා. නැත් නම් නැහැ. එතැනදි පස්සෙන් ඉඳලා උසිගන්වනවද? වක්‍රාකාරයෙන් ඉන්නවාද කියල දෙයක් නැහැ. මේ දවස්වල ක්‍රියාත්මක බොහෝ වෘත්තීය සමිති ක්‍රියාමාර්ග ඒකාබද්ධ වෘත්තීය ක්‍රියාමාර්ග. එක් වෘත්තීය සමිතියක් නොවෙයි ; ඒ අය විවිධ පක්ෂවලට අයත් වන්න පුළුවන්. උදාහරණයක් හැටියට: මේ දිනවල ක්‍රියාත්මක විශ්වවිද්‍යාල අනධ්‍යයන වෘත්තීය ක්‍රියාමාර්ගයත් ඒ වගේ සියලු වෘත්තීය සමිති එක්ව කරන වෘත්තීය අරගලයක්. එතැන දේශපාලනයක් නැහැ.
එහෙත් ජනාධිපතිවරණයක් ප්‍රකාශ කළ පසු මේ වර්ජන රැල්ල ඇතිව තිබෙන බවයි අපට පෙනෙන්නේ...
නැහැ, එය වැරැදියි, දුම්රිය වර්ජනය පසුගිය වසරෙත් තිබුණා. තවමත් ඒ අර්බුදය විසඳිලා නැහැ. ගුරු විදුහල්පති ගැටලුවත් දැන් කාලයක පටන් තියෙන්නේ. ඒකටත් විසඳුම්ක දෙන්න ආණ්ඩුව කටයුතු කරලා නැහැ. ආණ්ඩුව ජනාධිපතිවරණයට ලඝු කරලා ඒ සේවක ඉල්ලීම් පසෙක දැමීමේ වගකීම ආණ්ඩුව විසින්ම දැරිය යුතුයි.
මෙවර ජනාධිපතිවරණයට හිටපු යුද හමුදාපති ජනරාල් මහේෂ් සේනානායක මහතාගේ පැමිණීම ඔබ දකින්නේ කෙසේද?
මේ රජය එපා වීම තමයි ඒ සියල්ලෙන්ම පෙන්නුම් කරන්නේ. ඔහු පමණක් නෙමෙයි මේ වන විට ජනාධිපතිවරණයට තරග කරන බොහෝ දෙනාගෙන් සැදුම්ලත් පක්ෂ දෙස බැලූ විට පෙනී යන්නේ ඔවුන්ගේ ආණ්ඩුවට ඇති විරෝධතාවයයි. එයින් මේ රජය ජනතාවට ජනතා සංවිධානවලට කොතරම් එපා වෙලාද කියල පේනවා.
ඔබ පක්ෂය මේ ප්‍රධාන බල කණු දෙකට විරුද්ධව නැඟී සිටිනවා නම්, ඇයි ඒ පක්ෂ සියල්ල එකතු කරගෙන පොදු ගමනක් නොයන්නේ?
අප උත්සාහ කළා. ඒත් ඒ උත්සාහයන් එතරම් සාර්ථක වුණේ නැහැ.
මෙවර ජනාධිපතිවරණයට 35 දෙනකු තරග කරනවා, ජනාධිපතිවරණයත් ගම් මට්ටමේ ප්‍රාදේශීය සභා ඡන්දයක් ගානට වැටිල වගේ පේන්නෙ නැද්ද?
එයින් බහුතරයක් පක්ෂවල අනුරූ හැටියටයි තරග කරන්නේ. පහුගිය ජනාධිපතිවරණයටත් මෛත්‍රීපාල සිරිසේන මහතාගේ අනුරූ ඉදිරිපත් කරන්න අනෙක් අය කටයුතු කළා නේ මේකත් ඒ වගේ තමයි. එක් එක් අය තම-තමන්ගේ වෙනත් කටයුතු උදෙසාත් මේ අවස්ථාව උපයෝගි කරගන්නවා.
එහෙත් පළාත් සභා කෝටි ගණන් කාබාසිනියා කරන සුදු අලියකු බවට වාර්තා වනවා. පළාත් සභාවලට වැය කරන මුදලෙන් වැඩි මුදලක් වැය වන්නේ පළාත් සභාවල නඩත්තුවට හා පළාත් සභා මන්ත්‍රීවරුන්ගේ වැටුප් හා දීමනා සඳහායි. නාස්තිය, දූෂණය ගැන කතා කරන ඔබ පක්ෂය ඇයි මේ පළාත් සභා අහෝසි කිරීම සම්බන්ධව කටයුතු නොකරන්නේ?
අපි එදා ඉඳලාම පළාත් සභාවලට විරුද්ධයි. ඔය කතාවත් අපි කිව්වා. ඒත් කැමැත්තෙන් හෝ අකැමැත්තෙන් හෝ අපට මේ වන විට පළාත් සභාවලට මුහුණ දෙන්න සිදු වනවා. මේ වන විට ව්‍යවස්ථාවන්හි ඇති ක්‍රමවේද අනුව පළාත් සභා අහෝසිය ප්‍රායෝගිකව කළ නොහැක්කක්.
පළාත් සභා ගෙනාවේ ජනවාර්ගික අර්බුදයට විසඳුමක් ලෙස මෙන්ම ප්‍රාදේශීය මට්ටමින්, පළාත් මට්ටමින් රට දියුණු කරන්නයි. ඒත් ඒ මූලික අරමුණු දෙකින් එකක් වත් ඉටු වෙලා නැහැ. පළාත් සභා සුදු අලියෙක් වුණත් මේ අවස්ථාවේ එයට මුහුණ දෙනවා හැර වෙනත් විකල්පයක් නැහැ.
ඇල්පිටිය ප්‍රාදේශීය සභා මැතිවරණයේ ප්‍රතිඵල අනුව ජනාධිපතිවරණ මැතිවරණ ප්‍රතිඵලත් තීරණයට වන බවට ඒකාබද්ධ විපක්ෂයේ බොහෝ මන්ත්‍රීවරුන් පැවසුවා. ඔබ එය පිළිගන්නවාද?
ප්‍රාදේශීය සභාවක ජන්ද ප්‍රතිඵලයෙන් ජාතික තලයේ මැතිවරණයක ප්‍රතිඵල මනින්න බැහැ. ප්‍රාදේශීය සභා මැතිවරණය කියන්නේ ගමට, ඒ ප්‍රදේශයට සීමා වේචච පුංචි ඡන්දයක්. ඒ ප්‍රතිඵලයෙන් සමස්ත රටේම මැතිවරණ ප්‍රතිඵලය මැනීම වැරදියි. ඒකෙන් එහෙම තීරණයකට එන්න බැහැ. ඉතිහාසයේත් එහෙම වෙලා නැහැ.
