ශ්‍රී ලංකා පොදුජන පෙරමුණේ ජනාධිපති ධුර අපේක්ෂක ගෝඨාභය රාජපක්ෂ මහතා ශ්‍රී ලාංකික පුරවැසියකු ලෙස පිළිගැනීම සහ කටයුතු කිරීම වළක්වන ලෙස ඉල්ලා ගොනු කළ රිට් පෙත්සම දේශපාලන තලයේ පමණක් නොව සමස්ත ජනතාව තුළම වඩාත් අවධානයක් සහ කුතූහලයක් නිර්මාණය කළ කරුණක් විය. එපමණක් නොව; මේ නඩු තීන්දුව මඟින් ගෝඨාභය මහතාට හෝ පොදු පෙරමුණේ අපේක්ෂකත්වයට යම් අවදානමක් මතු වුව හොත් ජනාධිපතිවරණයට ඉදිරිපත් වීම සඳහා ලහිලහියේම රාජපක්ෂ පවුලේ වැඩිමහල් සහෝදරයා වන චමල් රාජපක්ෂ මහතා විකල්පයක් ලෙස ඉදිරිපත් කිරීමට අදාළ කටයුතුද සිදු කර තිබිණි.
පුරවැසි බලය සංවිධානයේ සම-කැඳවුම්කරුවන් වන ගාමිණී වියන්ගොඩ සහ මහාචාර්ය චන්ද්‍රගුප්ත තේනුවර විසින් ගොනු කර තිබූ මේ පෙත්සම විභාග කළේ අභියාචනාධිකරණ විනිසුරු යසන්ත කෝදාගොඩ සහ මහින්ද සමයවර්ධන, අර්ජුන ඔබේසේකර යන ත්‍රිපුද්ගල විනිසුරු මඬුල්ල විසිනි.
මේ පෙත්සම ඉකුත් 2, 3 සහ 4 යන දිනයන්හිදී අභියාචනාධිකරණය හමුවෙහි කැඳවිණි. ආගමන විගමන පාලකවරයා, පුද්ගලයන් ලියාපදිංචි කිරීමේ කොමසාරිස්වරයා, රාජ්‍ය පරිපාලන සහ අභ්‍යන්තර කටයුතු ඇමැතිවරයා, ඒ අමාත්‍යාංශ ලේකම්වරයා, නීතිපතිවරයා පෙත්සමෙහි වගඋත්තරකරුවෝ වූහ.
පෙත්සම්කරුවන් වෙනුවෙන් විදානපතිරණ නීතිඥ සමාගමේ උපදෙස් මත නීතිඥ සුරේන් ප්‍රනාන්දු මහතාද, පළමු සහ දෙවන වගඋත්තරකරුවන් වෙනුවෙන් නියෝජ්‍ය සොලිසිටර් ජෙනරාල් නෙරීන් පුල්ලේ මහතාද, රාජ්‍ය පරිපාලන සහ අභ්‍යන්තර කටයුතු ඇමැතිවරයා වෙනුවෙන් නීතිඥ චානක ද සිල්වා මහතාද ඉදිරිපත් වූ අතර, ගෝඨාභය රාජපක්ෂ මහතා වෙනුවෙන් ජනාධිපති නීතිඥ රොමේෂ් ද සිල්වා මහතාද කරුණු ඉදිරිපත් කළෝය.
පෙත්සම්කරුවන් විසින් මතු කරන ලද ප්‍රධාන ප්‍රශ්නයක් වූයේ 2005 වසරේදී ඇමෙරිකානු පුරවැසියකු ලෙස ශ්‍රී ලංකාවට එන ගෝඨාභය රාජපක්ෂ මහතා ද්විත්ව-පුරවැසි භාවය ලබාගත් ආකාරයයි. ඇමෙරිකාවේ සිටි ගෝඨාභය මහතා ශ්‍රී ලංකාවට එන්නේ 2005 වසරේ සැප්තැම්බර් 4 වැනිදාය. ඔහු එලෙස එන්නේ ඇමෙරිකානු පුරවැසියකු ලෙස දින 30ක සංචාරක වීසා පහසුකම් යටතේය. තනිකරම සංචාරක අරමුණින් එන ඔහු එසේ පැමිණ මහින්ද රාජපක්ෂ මහතාගේ ජනාධිපතිවරණ ප්‍රචාරක ව්‍යාපාරයේ මූලික කටයුතුවලට සම්බන්ධ වූයේය.
කෙසේ වුවද සංචාරකයකුට වීසා ලද දින 30කට එහා රැඳී සිටීම මෙරට ආගමන විගමන නීතිවලට අනුව වසරත් වසර පහත් අතර කාලයක සිර දඬුවමකට යටත් විමේ ඉඩක් පවතී. මේ නිසා ගෝඨාභය රාජපක්ෂ මහතා මෙම දින 30 සම්පූර්ණ වෙද්දී රටින් පිට වෙයි. ඒ 2005 වසරේ ඔක්තෝබර් 4 වනිදාය. එහෙත් ඔහු යන්නේ ඉන්දියාවටය.
ඉන්දියාවේ දින දෙකක් ගත කරන ඔහු 6 දා යළි මෙරටට පැමිණෙයි. මහින්ද රාජපක්ෂ මහතා 2005 වසරේ ජනාධිපති ධුරය සඳහා නාම යෝජනා භාර දෙන්නේ ඊට පසුදාය. නොවැම්බර් මස 18 දා ජනාධිපතිවරණයෙන් මහින්ද රාජපක්ෂ මහතා ජයග්‍රහණය කරන අතර, එයින් පසු ගෝඨාභය රාජපක්ෂ මහතා ඇමෙරිකානු පුරවැසිභාවයට අමතරව ශ්‍රී ලංකාවේද පුරවැසි භාවය සඳහා ඉල්ලුම් කොට ඇතත්, එය ලබා ඇති ආකාරය පිළිබඳ ඇත්තේ පැහැදිලි තත්ත්වයක් නොවේ.
ඔහු 2005 වසරේ නොවැම්බර් 21 දා ද්විත්ව-පුරවැසි භාවය සදහා ඉල්ලීම් කළ බවට වාර්තා වුවද ඒ සඳහා අනුගමනය කළ යුතු අනුමත කරවාගැනීම් ඇතුළු දීර්ඝ පියවර සම්පූර්ණ කොට නැති බව ඉදිරිපත් වූ කරුණකි. නොවැම්බර් මස 18 දින ජනාධිපතිවරයා ලෙස මහින්ද රාජපක්ෂ මහතා ජයග්‍රහණය කොට නොවැම්බර් 19 දා එවකට අගමැති ධුරයේ සිට ජනාධිපති දුරයේ දිවුරුම් දුන් පසු කැබිනට් මණ්ඩලය අහෝසි වන තත්ත්වයක් යටතේ මේ අනුමත කිරීම් නිසි ආකාරයෙන් සිදු නොවූ බවට නැඟුණු තර්කයක් විය.
එසේ වුවද මෙහිදී වගඋත්තරකාර පාර්ශ්වයේ නීතීඥයන් පෙන්වා දුන්නේ නොවැම්බර් මස 21 වැනිදා වන විට රටේ කැබිනට් මණ්ඩලයක් නොපැවති තත්ත්වයක් යටතේ අමාත්‍යවරුන් සතු සියලු බලතල විධායක ජනාධිපතිවරයා සතු වන බැවින් ඔහු එකී බලතල ප්‍රකාරව අදාළ ද්විත්ව පුරවැසි සහතිකය අනුමත කොට ඇති බවයි. විශේෂයෙන් 19 වැනි සංශෝධනයට පෙර ව්‍යවස්ථාමය ඉඩකඩ අනුව ඒ ආකාරයට හිටපු ජනාධිපතිවරයා ක්‍රියා කොට ඇති බව ඔහුගේ තර්ක අතර මූලික විය.
උපතින් ශ්‍රී ලාංකිකයකු වූ ගෝඨාභය රාජපක්ෂ මහතා ඇමෙරිකානු පුරවැසිභාවය ලද විගස මෙරට නීතිය අනුව ශ්‍රී ලාංකික පුරවැසිභාවය අහිමි වුවත් එරටේ පුරවැසි භාවය අත්හළ විගස මෙරට පුරවැසි භාවය නැවත ලබාගැනීමේ හැකියාව පවතින බවට ඔහු තර්ක කළේය.
පෙත්සම්කරුවන් වෙනුවෙන් නැවත කරුණු දැක්වීම සිදු කරමින් නීතිඥයන් ඉදිරිපත් කළ කරුණක් වූයේ ගෝඨාභය රාජපක්ෂ මහතාගේ ද්විත්ව පුරවැසි භාවය ලබාදීමේදී අන් කිසිවකුට නොමැති කඩිනම් බවක් දක්වා ඇති බවයි. සාමාන්‍ය ක්‍රියා පටිපාටිය අබිබවා යමින් ඒ සහතිකය ලබාදී ඇති බව ඔවුහු කරුණු කාරණා සහිතව පෙන්වා දුන්හ.
එමෙන්ම මෙම පෙත්සම ද්වේශ සහගතව ඉදිරිපත් කර ඇති බවට වගඋත්තරකරුවන්ගේ නීතිඥවරුන් ඉදිරිපත් කරන ලද කරුණු නිවැරදි නොවන බවද ඔවුන්ගේ මතය විය.
මෙහිදී අදහස් පළ කළ නීතිඥ සුරේන් ප්‍රනාන්දු මහතා “මහින්ද රාජපක්ෂ මහතා ජනාධිපති ලෙස පත් වන්නේ 2005 නොවැම්බර් මස 18 දිනයේදීයි. නොවැම්බර් මස 21 අගමැති පත් කර 23 දින ඇමැතිවරුන් පත් කරනවා. අමාත්‍යාංශ විෂයයන් දෙසැම්බර් 08 දින වෙන් කර අදාළ ගැසට් පත්‍රය දෙසැම්බර් 13 ප්‍රසිද්ධ කරනවා. ජනාධිපති ලෙස පත්වූ නොවැම්බර් 18 දින සිට නොවැම්බර් 21 තෙක් කාලයේදී මෙම සහතිකය අත්සන් කිරීම ප්‍රධානම ගැටලුව ලෙස පෙන්වා දිය හැකියි.
අලුතෙන්ම පත් වූ ජනාධිපතිවරයාට ඔහු ඊට පෙර දැරූ තනතුරට හිමි බලතල හිමියි. එසේ ම අගමැති, ඇමැතිවරුන් පත් කිරීමේ බලතල හිමියි. එය අනිවාර්යයෙන්ම කළ යුතුයි. අමාත්‍යාංශයක් බාර නොගෙන ඊට අදාළ විෂයයන් හෝ කටයුතු සම්බන්ධයෙන් ක්‍රියා කිරීමේ හැකියාවක් ජනාධිපතිවරයාට නැහැ.
එසේ නම් ජනාධිපතිවරයාත් අමාත්‍ය ධුරයක් බාරගත යුතුයි. එසේ නොමැතිව එක් විශේෂිත විෂයයක් සම්බන්ධයෙන් කටයුතු කිරීමේ හැකියාවක් ඔහුට නැහැ. ඔහුට කටයුතු කළ හැක්කේ ඇමැතිවරයකු පත් නොකළ අමාත්‍යාංශයක් හෝ ඊට අදාළ කටයුතු පමණයි.“ යන්නය.
තවදුරටත් තම කරුණු ඉදිරිපත් කළ ඔහු අධිකරණයෙන් ඉල්ලා සිටියේ වගඋත්තරකරුවන්ගේ කරුණු පදනම් විරහිත බැවින් මේ අතුරු නියෝගය නිකුත් කරන ලෙසය.
නීතිඥවරුන්ගේ කරුණු දැක්වීමෙන් අනතුරුව ලිඛිත දේශන සිකුරාදා (4) පස්වරු 3.15ට අධිකරණයට ලබාදෙන ලෙස පෙත්සමෙහි පාර්ශ්වකරුවන්ගේ නීතිඥවරුන්ට නියම කරනු ලැබීය. අතුරු නියෝගය පිළිබඳ තීන්දුව පස්වරු 6.00ට ප්‍රකාශ කිරීමට කටයුතු කෙරිණි.
මේ තීන්දුව ප්‍රකාශ කරන මොහොතේ අධිකරණය තුළ ප්‍රීතිඝෝසා කිරීමක් සහ අත්පුඩි ගැසීමක් ඇසුණු අතර ඒ පිළිබඳව සභාපති විනිසුරු යසන්ත කෝදාගොඩ මහතා තම අප්‍රසාදය පළ කළේය. නඩු තීන්දුව කියවීම නවත්වා ඔහු සැණින් වහා නිශ්ශබ්ද වන ලෙස ප්‍රකාශ කළ අතර, එසැණින් වගඋත්තරකරුවන් වෙනුවෙන් පෙනී සිටි ජනාධිපති නීතීඥ රොමේෂ් ද සිල්වා මහතා “සමා වෙන්න සවාමීනි“ යැයි ප්‍රකාශ කළේය.
අධිකරණ ශාලාව තුළ දැක්වූ මේ අවිනීත හැසිරීම දුටු සභාපති විනිසුරුවරයා මේ සම්බන්ධයෙන් තමා කම්පනයටත් කනගාටුවටත් පත් වන බව ප්‍රකාශ කළ අතර, මේ අකටයුත්තට නීතිඥයන්ගේ සම්බන්ධයක් නැති බවට අනුමාන කරන බවත්, යම් හෙයකින් නීතිඥයකු ඊට සම්බන්ධ නම් ඔහුට එරෙහිව නෛතික පියවර ගන්නා බවත් ප්‍රකාශ කළේය. ජනාධිපති නීතිඥ රොමේෂ් ද සිල්වා මහතා යළිත් වරක් එහිදී සමාව අයැද සිටිනු දක්නට ලැබිණි.
