අධ්‍යාපන අමාත්‍ය අකිල විරාජ් කාරියවසම් මහතාගේ සංකල්පයක් අනුව එදා මෙදා තුර මෙරට ඉතිහාසයේ පාසල් සංවර්ධනය වෙනුවෙන් හඳුන්වා දී ඇති දැවැන්තම සංවර්ධන වැඩසටහන “ළඟම පාසල හොඳම පාසල” යි. තම දරුවන්ට ඉහළ ගුණාත්මක බවින් යුතු අධ්‍යාපනයක් ලබාදීම හැම මවකගේම හැම පියෙකුගේම බලාපොරොත්තුවයි.
එහෙත් ඉදිරි වසර 20ක් 30ක් එපිට ඇති අනාගතය පිළිබඳ නිවැරදිව, පැහැදිලිව අනුමාන කරමින්, ඒ වන විට රටක් වශයෙන් අප සිටිය යුතු තැන, අපේ දරුවන් අත්පත් කරගත යුතු දේ, සහ මෙරට පාසල් අධ්‍යාපන පද්ධතිය තුළ සිදුවිය යුතු වෙනස්කම් ආදී සියල්ල කෙරෙහි පූර්ණ අවධානය යොමු කරමින්, අනාගතයට ගැළපෙන අධ්‍යාපන ක්‍රමයක් ගොඩනැඟීමේ අවශ්‍යතාව කෙරෙහි අධ්‍යාපන අමාත්‍යවරයාගේ පූර්ණ අවධානය යොමු කෙරිණි.
පාසල් ඉදිකිරීම වෙනුවෙන් ඉතිහාසයේ මෙතෙක් එක වර සිදු කළ විශාලතම මූල්‍ය ආයෝජනය සිදු කරමින් සෑම දරුවෙකුටම තමන් පදිංචි ස්ථානයේ සිට ළඟම පාසල දරුවාට ඇතුළත් විය හැකි හොඳම පාසල බවට පත් කිරීමේ දැවැන්ත වැඩසටහන ඒ අනුව ආරම්භ කෙරිණි. රුපියල් මිලියන 65,000 මූල්‍ය ආයෝජනයෙන් ප්‍රධාන ව්‍යාපෘති 18,000කින් සමන්විතව 2016 වසරේ සිට 2020 තෙක් වසර හතරක කාල සීමාව තුළඉදිකිරීම් අවසන් වන පරිදි “ළඟම පාසල හොඳම පාසල” වැඩසටහන ආරම්භ කෙරිණි.
පාසල් පද්ධතියේ සංවර්ධනය වෙනුවෙන් එක වර ක්‍රියාත්මක වන විශාලතම සංවර්ධන කාර්යද මෙයයි. ඒ අනුව ජාතික සංවර්ධනයට නව පරිච්ඡේදයක් එක් කරමින් දිවයින පුරා පළාත් නවයම ආවරණය වන පරිදි දිස්ත්‍රික්ක 25ක් තුළ ගොඩනැගිලි පන්සියයක් සැප්තැම්බර් මස 09 වන දින ජාතික අධ්‍යාපන පද්ධතියට එක් කෙරිණී. මීට පෙර එහි පළමු අදියර යටතේ පාසල් ගොඩනැගිලි 200ක්ද, දෙවන අදියර යටතේ තවත් පාසල් ගොඩනැගිලි 250ක් සිසු අයිතියට පත් කෙරිණි.
පන්ති කාමර ගොඩනැගිලි - පාසල් 480
ගුරු සිසු සැමට දිගු කලක් රැඳී සිටිය හැකි නව භෞතික පහසුකම් වලින් සමන්විත මනා අධ්‍යයන පරිසරයක් සහිත පන්ති කාමර ලබා දීම අත්‍යවශ්‍ය ය. තවද සාර්ථක ඉගෙනුම් ක්‍රියාවලියක් සඳහා පන්ති කාමර නවීන පහසුකම් වලින් යුක්ත විය යුතුය.
ප්‍රාථමික ඉගෙනුම් සම්පත් මධ්‍යස්ථාන - පාසල් 845
විවිධ ක්‍රියාකාරනම් සහිත පරිපූර්ණ ක්‍රියාවලියක් බවට පත් කිරීමේ අරමුණින් නවීන පහසුකම් වලින් සමන්විත ප්‍රාථමික අධ්‍යාපන සම්පත් මධ්‍යස්ථාන ඉදිකෙරේ.
ද්විතීයක කනිෂ්ඨ විද්‍යාගාර - පාසල් 249
විද්‍යාව හා තාක්ෂණය පිළිබඳ ප්‍රමාණවත් දැනුමක් හා හැකියාවක් ධනාත්මක ආකල්ප යටතේ කුඩා කල සිටම සිසුන් සතු විය යුතුය. අදාළ ප්‍රායෝගික ක්‍රියාකාරකම් සමඟ අත්හදා බැලීමට අවශ්‍ය පහසුකම් සැපයීම අත්‍යවශ්‍ය වී ඇත. සෞන්දර්ය ඒකක - පාසල් 26
සිසුන් නිර්මාණාත්මක පුරවැසියන් බවට පත් කිරීම සඳහා ඔවුන් තුළ සෞන්දර්යාත්මක කරුණු පිළිබඳ උද්‍යෝගය නැංවිම සඳහා සෞන්දර්ය ඒකක ඉදි කෙරේ.
සුළු හා මහා පරිමාණ අලුත්වැඩියා කටයුතු - පාසල් 4939
පාසල් රැසක අසම්පූර්ණ හා හානි වූ ගොඩනැගිලි සහ වෙනත් ඉදිකිරීම් හේතුවෙන් යහපත් ඉගැන්වීම් හා ඉගෙනුම් පරිසරයක් නිර්මාණය කිරීමට බාධා එල්ල වන බව නිරීක්ෂණය වී ඇත. එබැවින් පන්ති කාමර, වැසිකිළි, විද්‍යාගාර හා වෙනත් ගොඩනැගිලි ආදීයට අදාළ සුළු හෝ මහා පරිමාණ අලුත් වැඩියා සිදු කෙරේ.
ගුරු නිවාස හා විදුහල්පති නිවාස
ප්‍රධාන විෂයන් සඳහා දක්ෂ ගුරුවරුන් මඳකම ග්‍රාමීය පාසල් නිරන්තරයෙන් මුහුණ පාන අභියෝගයකි. විදුහල්පතිවරුන්ට හා ගුරුවරුන්ට අත්‍යවශ්‍ය පහසුකම් සහිත නවාතැන් ප්‍රමාණවත්ව සැපයීමෙන් එවැනි පාසල්වල, දක්ෂ කාර්යක්ෂම ගුරුවරුන් හා විදුහල්පතිවරුන් රඳවාගැනීමට හැකිය. විදුහල්පති නිල නිවාස 168ක් හා ගුරු නිල නිවාස 371ක් අවශ්‍ය පාසල් තුළ ඉදි කෙරේ.
තාක්ෂණික ගොඩනැගිලි - පාසල් 260
අධ්‍යාපන අමාත්‍යංශයේ අපේක්ෂාව වන්නේ නාගරික පාසල්වලට සමානව ග්‍රාමීය පාසල් සඳහාද ඉහළ ගුණාත්මක බවින් යුතු තාක්ෂණික අධ්‍යාපනයට පහසුකම් සැපයීම වන අතර ඒ වෙනුවෙන් ක් සඳහා සියලු පහසුකම් සහිත නවීන තාක්ෂණික ගොඩනැගිලි ඉදි කිරීමට පියවර ගෙන ඇත.
වතු පාසල් සංවර්ධනය - පාසල් 635
පන්ති කාමර, වැසිකිළි පානීය ජලය ආදී අවශ්‍ය පහසුකම් සැපයීමෙන් හඳුනාගත් වතු පාසල් ප්‍රතිසංවිධානය කෙරේ.
ආපන ශාලා
පෝෂණ අවශ්‍යතාවය සපුරා ගැනීම සඳහා ප්‍රමාණවත් පහසුකම් වලින් යුතු ආපන ශාලා 53ක් ඉදි කෙරේ. මීට අමතරව පාසල් 7ක ක්‍රීඩා සංකීර්ණ, පාසල් 150ක දන්ත සෞඛ්‍ය ඒකක, පාසල් 3667ක සනීපාරක්ෂක පහසුකම්, ජල පහසුකම් සැපයීම, පාසල් 3116 ක විදුලි පහසුකම් සැපයීමට කටයුතු කෙරේ.
