ප්‍රවාහන හා සිවිල් ගුවන් සේවා රාජ්‍ය ඇමැති අශෝක් අ‍බේසිංහ
2020 ආණ්ඩුව හදන්නේ ශ්‍රී ලනිපයේ අපි කියා ජනපතිවරයා 68 වැනි පක්ෂ සම්මේලනයේදී කිව්වා. ඒ ගැන කිව හැක්කේ කුමක්ද?
ජනධිපතිවරයා කිව්වේ ජනපතිවරණය ගැන නොවේ. මහ මැතිවරණය ගැනයි. මෛත්‍රීපාල සිරිසේන ජනධිපතිවරයා කවදාවත් ගෝඨාභය රාජපක්ෂ මහතාට උදව් කරන්නේ නෑ. ශ්‍රී.ල.නිපය අපිට කෙළින් එළිපිට උදව් නොකළත් යම් සහායක් ලබා දෙයි. අපි ජයග්‍රහණය කළාට පසු පොදු ජන පෙරමුණ යන එන මං නැති වෙනවා. එතකොට ඊට පසුව එන මහ මැතිවරණයේදී ශ්‍රී ලංකා නිදහස් පක්ෂයට ආසන තිහක් තිස්පහක් ලබා ගත හැකි වේවි. එහිදී ශ්‍රි.ල.නි.ප තීරණාත්මක බලවේගයක් වේවි. ඒ ගැන වෙන්න ඇති ජනපතිවරයාගේ හිතේ ඇත්තේ.
එජාපයට තවත් තියන චෝදනාවක් තමයි රනිල් වික්‍රමසිංහ අග්‍රාමාත්‍යවරයා පළාත් සභා මැතිවරණය පැවැත්වීමට අවැසි වාර්තා හිතාමතාම නොහදා මග අරිනවා කියන එක. ඒ ගැන මොකද කියන්නේ.
2015 මහමැතිවරණයේදී අපි පොරොන්දු වුණා ඡන්ද ක්‍රමය වෙනස් කරන්න. පළාත් පාලන මැතිවරණයේදී එය කළා. පළාත් සභා මැතිවරණයටත් මිශ්‍ර හා සමානුපාතික ක්‍රමයට ගේන්න සකස් කළා. සීමා නිර්ණ කටයුතුත් කරගෙන ගියා. එහි යම් යම් අඩුපාඩු තිබුණා. පරණ ක්‍රමය යටතේ පළාත් සභා කොහොමටත් තියන්න බෑ. අලුත් ක්‍රමය යටතේ තියන්න බැරි වුණේ සීමා නිර්ණයේ අඩුපාඩු නිසයි. මේක හදන්න කොමිටියක් පත් කළා. කොමි‍ටියේ අඩු පාඩු නිසා එය සිදු වුණේ නෑ. ඒක තමයි ජනපතිවරයා කියන්න ඇත්තේ. ජනපතිවරණයෙන් පස්සේ මේ අඩුපාඩුකම් හදාගෙන අලුත් ක්‍රමයට පළාත් සභා ඡන්දය තියන්න පුළුවන්.
ඇල්පිටිය පළාත් පාලන ඡන්දයට මුහුණ දීමට ඇති සූදානම කෙබඳුද? මා දන්නා තරමින් ඇල්පිටිය එජාප දිනුවේ 1977 මැතිවරණයේ දී රූපා කරුණාතිලක මහතා පමණයි.
ඇල්පිටිය අපිට අභියෝගයක් තමයි. දකුණු පළාතේ බොහොමයක් තියෙන්නේ වාමාංශික ආසන. ඒත් සජිත් ප්‍රේමදාස මහතාට අපේක්ෂකත්වය ලැබුණහම ඇල්පිටියට යම් වෙනසක් කරන්න හැකි වේවි. මේ මැතිවරණය පවත්වාවිද කියලත් යම් දෙගිඩියාවල් තිබෙනවා. එජාප ලැයිස්තුවේ එක් අපේක්ෂකයෙක් මැරිලා. තවත් අපේක්ෂිකාවකගේ පදිංචිය වෙනස්වෙලා. පැරණි නාම යෝජනාවලට තමයි ඡන්දය තියන්නේ. මේවා නීතිමය වශයෙන් තේරුම් බේරුම් කරගත යුතුයි. ඇල්පිටිය පළාත් පාලන ආයතනයේ මැතිවරණ ප්‍රතිඵලය ජනපතිවරණයට බලපාන්නේ නෑ.
“සජිත් එනවා” තේමාව යටතේ සංවිධානය කළ තෙවැනි ජන රැලිය කුරුණෑගල දී පසුගිය 05 වැනි දා පැවැත් වුණා. ඒත් තවමත් සජිත් ප්‍රේමදාස මහතාට එජාප ජනපති අපේක්ෂක ධූරය ලබා ගැනීමට නොහැකි වී තිබෙන්නේ ඇයි?
අපිට වෙලා තියෙන්නේ සුවිශේෂි තත්ත්වයක්. ඒක තමයි සජිත් ප්‍රේමදාස මහතා ජනපති අපේක්ෂක විය යුතු බව පක්ෂයටම ඒන්තු ගැන්වීමට සිදු වීම. ඒ සඳහා තමයි අපි මේ රැස්වීම් මාලාව පවත්වන්නේ. මේ යටතේ පළමු රැලිය බදුල්ලේදීත්, දෙවැනි රැලිය මාතරදීත්, තෙවැනි රැලිය කුරුණෑගලදීත් පැවැත් වූවා. මේ සියලුම රැලිවලට අති විශාල ජනකායක් පොදි කකා සහභාගි වුණා. සියලුම රැලි අති සාර්ථකයි. පාක්ෂිකයන්ගේ විතරක් නෙවෙයි මධ්‍යස්ථ මත දරන ජනතාවගෙනුත් ලොකු උනන්දුවක් මේ රැස්වීම්වලට තිබුණා. ඇත්තෙන්ම අපි එක අතකින් කනගාටු වෙනවා අපේ අපේක්ෂකයා පිළිබඳ පක්ෂයට දැනුවත් කිරීම සඳහා මෙවැනි රැස්වීම් මාලාවක් පවත්වන්න සිදුවීම ගැන. දේශපාලන පක්ෂයක ප්‍රධානතම වගකීම තමයි බලය ලබා ගැනීම හා ලබාගත් බලය තහවුරුකර ගෙන ඉදිරියට ගෙන යෑම. පක්ෂයක නායකයාගේ වගකීම තමයි අදාළ මැතිවරණවලට ජයගත හැකි සුදුසුම අපේක්ෂකයා ඉදිරිපත් කිරීම. රටේ ජනතාවගෙන් සාතිෂය බහුතරය ඉල්ලා සිටින්නේ සජිත්වයි. ඔහු දැනට සිටින අපේක්ෂකයන් අතර ඉදිරියෙන්ම ඉන්නේ. කුරුණෑගල නගරයට ඉතිහාසයේ වැඩිම ජන ගංගාවක් ගැලුවා. එයින් කියන්නේ සජිත් ගේ අවශ්‍යතාව දැන්වන් නායකයින්ට මේ තත්ත්වය තේරුම් ගිහින් සජිත් ප්‍රේමදාස මහතාට අපේක්ෂකත්වය ලබා දෙයි කියා අපිම තුළ දැඩි විශ්වාසයක් තිබෙනවා.
එජාප මන්ත්‍රිවරුන් පනස්හතර දෙනෙකුගේ අත්සනින් යුත් ලිපියක් පසුගිය දා අගමැතිවරයාට ඉදිරිපත් කළා. එමගින් ඉල්ලා සිටියේ පාර්ලිමේන්තු මන්ත්‍රී කණ්ඩායමත්, එජාප කෘත්‍යාධිකාරි මණ්ඩලයත් ඉක්මනින් කැදවන්න කියලයි. ඊට ප්‍රතිචාරයක් තිබෙනවාද?
ඒ ලිපියට තවමත් ප්‍රතිචාරයක් නෑ. ඒ නිසා අපි මේ වෙනකොට තවත් ලිපියක් අත්සත් කරමින් යනවා සජිත් ප්‍රේමදාස මහතාට ජනපති අපේක්ෂකත්වය ලබා දෙන ලෙසට දැනට පාර්ලිමේන්තුවේ එජාප මන්ත්‍රිවරුන් ඉන්නේ කථානායකවරයත් සමඟ හැත්තෑ හතයි. මන්ත්‍රිවරුන් පනහකට වඩා ඊට අත්සන් කළොත් සියයට හැත්තෑවකට වඩා කැමැත්තක් ලැබෙනවා.
මේ වන විට ජනතා විමුක්ති පෙරමුණ හා පොදුජන පෙරමුණ මැතිවරණ ප්‍රචාරක වැඩ කටයුතු කරනවා. එජාපයට තවමත් අපේක්ෂකයකු නොමැතිවීම පාඩුවක් නෙවෙයි ද?
නෑ එහෙම පාඩුවක් වෙන්නේ නෑ. 2015 ජනපතිවරණය තිබුණේ ජනවාරි 08 මෛත්‍රීපාල සිරිසේන ජනාධිපතිතුමා ඉදිරිපත් වන බව ප්‍රකාශ කළේ 2014 නොවැම්බර් 21 දිනයි. මාස එකහමාරක කාලයක් තමයි තිබු‍ෙණ්. අපිට එපමණ කාලයක් අවශ්‍ය නෑ. සජිත් ප්‍රේමදාස මහතා දැනටමත් ජනතා සිත්සතන්වලින් ජයගෙන තියෙන්නේ. ඔහු ජනතාව සමඟ සිටින නායකයෙක්. මැතිවරණ දිස්ත්‍රික්ක විසි දෙකෙන් එකොළහක ජයග්‍රහණය අපිට දැනටමත් තියනවා. තව එකක් දෙකක් තමයි ජයග්‍රහණය කළ යුත්තේ. පක්ෂයෙන් සජිත් නම් කළ දා සිට අපිට මැතිවරණ ප්‍රචාරක වැඩ කරගෙන යන්න පුළුවන්.
සජිත් ප්‍රේමදාස මහතා ජනපති අපේක්ෂක ලෙස නම් නොකළොත් ඔබලා යම් විකල්ප ක්‍රියා මාර්ගයක් ගන්නවාද?
නෑ. අපි එවැන්නක් ගැන තවම හිතලා නෑ. අපි හිතන්නේ සජිත් ප්‍රේමදාස මහතා ජනාධිපති අපේක්ෂකයා ලෙස නම් කරයි කියලයි. මොකද පක්ෂයේ බහුතර කැමැත්ත සජිත්ට තිබෙන නිසා කෘත්‍යාධිකාරී මණ්ඩලය පත් කරන්නේ පක්ෂ නායකයායි. මේ වන විට මහජන නියෝජිතයින් බහුතරයකුත් කෘත්‍යාධිකාරී මණ්ඩලයේ බහුතරයකුත් ජනපති අපේක්ෂකයා විය යුත්තේ සජිත් ප්‍රේමදාස මහතා බවට තීරණය කර අවසන්. ඒ නිසා පක්ෂය වැඩි කැමැත්තට ඉඩ දෙයි. අනිවාර්යෙන්ම සජිත් එජාප අපේක්ෂක ලෙස නම් කරයි.
පාර්ලිමේන්තු මන්ත්‍රී කණ්ඩායමේ හා එජාප කෘත්‍යාධිකාරි මණ්ඩලයේ බහුතර කැමැත්තට පක්ෂ නායකත්වය ඉඩ ලබා දෙවි යැයි සිතනවාද?
පිළිතුර:- පක්ෂය බොහෝ දුරට මීට ප්‍රථම එලෙස කටයුතු කර තිබෙනවා. ඒත් අපිට තියන ප්‍රශ්නය තමයි ඇයි මේ වතාවේ එලෙස ක්‍රියා කරන්නේ නැත්තේ කියන එක. එක්සත් ජාතික පක්ෂය පළමුව ජනපතිවරණයකින් දිණුවේ 1988 දීයි. ඒ රණසිංහ ප්‍රේමදාස මහතායි. ඒ ජය ලබා දැන් වසර තිස් එකක් පමණ වෙනවා. රණසිංහ ප්‍රේමදාස මහතා මිය ගියේ 1993 දීයි. දැන් වසර විසිහයක්. අවුරුදු විසි හයකට පස්සේ හා ජනාධිපතිවරණය තියලා වසර තිස් එකකට පස්සේ තමයි අපි රාජ්‍ය නායකයෙක් තෝරා ගන්න යන්නේ. දෛවයේ සරදමකට වගේ අවුරුදු විසිහයකට පස්සේ රණසිංහ ප්‍රේමදාස පුත්‍රයා තමයි. එජාපයේ රාජ්‍ය නායකයා බවට පත් වෙන්නේ. ඒ නිසා මා හිතනවා එජාප නායකත්වය මේ පිළිබඳව මනාව තේරුම් ගෙන සජිත් ප්‍රේමදාස මහතාට එජාප ජනපති අපේක්ෂකත්වය ලබා දෙයි කියලා.
වසර තිස් එකක් යනතුරු එජාපයට රාජ්‍ය නායකයෙක් බිහිකර ගැනීමට බැරි වුණේ ඇයි?
1993 වසරේ දී රණසිංහ ප්‍රේමදාස ජනපතිවරයා එල්.ටී.ටී.ඊ. බෝම්බකරුවකු අතින් ඝාතනය වූවාට පසුව රනිල් වික්‍රමසිංහ මහතා එජාප නායකත්වයට පත් වුණා. පසුව 1994 මැතිවරණයේදී අවුරුදු 17 ක් බලයේ සිටි එජාප ආණ්ඩුව පරාජයට පත් වූණා. අපිට විපක්ෂයට යන්න සිදු වුණා. පක්ෂ නායකයකුගේ වගකීම විය යුත්තේ පක්ෂය ජයග්‍රහණය කරවීමයි. 1999 ජනාධිපතිවරණයේදී එජාපය පරාදයි. 2000 මහ මැතිවරණයේදී පරාදයි. 2002 දී අපි ජයග්‍රහණය කළා. ඊට හේතුව එස්.බී.දිසානායක මහතා ඇතුළු කණ්ඩායමක් අපේ පැත්තට පැමිණීම. ඒ ජයග්‍රහණයට සමෘද්ධි නිලධාරීන් රැසකගේ සහාය ලැබුණා. හැබැයි ඒ ආණ්ඩුව අවුරුදු දෙකකදී බිඳ වැටුණා. ඊට පස්සේ 2005 ජනපතිවරණය පරාදයි මහ මැතිවරණය අපි පරාදයි. 2010 මහ මැතිවරණය පරාදයි ජනපතිවරණය පරාදයි. 2013 පළාත් සභා මැතිවරණය පරාදයි. 2015 දී අපිට අපේක්ෂකයෙක් නැතිව ශ්‍රී ලංකා නිදහස් පක්ෂයේ ලේකම්වරයා දාලා තමයි අපි ජය ගත්තේ. 2015 අගෝස්තු පැවැත් වූ මහ මැතිවරණයෙන් අපිට ආසන 113 ක් ලබා ගන්න බැරි වුණා. අපි ආසන 106 යි ලබා ගත්තේ. ඒ අවස්ථාවෙත් ආණ්ඩුවක් පිහිටුවීමට අවශ්‍ය මන්ත්‍රීවරුන් දිනා ගන්න බැරි වුණා. 2018 පැවැති පළාත් පාලන මැතිවරණයේදී ඉතිහාසයේ පළමු වතාවට ආණ්ඩු බලයත් තියාගෙන අපි අන්ත විදියට පරාජය වුණා. පක්ෂයක් මෙහෙය වන්න යම්කිසි දක්ෂතාවක් තියනවා නම් මෙවැනි සිදුවීම් වෙන්නේ කොහොමද? අපි අවුරුදු විසිපහක් තිස්සේ මැතිවරණ විශාල ප්‍රමාණයක් පරාජය වුණා. එකක් දෙකක් හැරෙන්න. ඒ දිනපු අවස්ථාවලත් දිණුවේ එස්. බී. දිසානායක ගේ පැමිණීම හා මෛත්‍රීපාල සිරිසේන මහතාගේ පැමිණීම නිසයි. එහෙමනම් තව දුරටත් අපිට මේ විදියට ගමනක් යන්න පුළුවන් ද? මේ තත්ත්වය වෙනස් කළ යුතු නැති ද කියලයි මා අහන්නේ.
සරත් ෆොන්සේකා මහත්තයා නම් කියන්නේ කුරුණැගල රැලිය නවත්වන්න කියා පක්ෂ නායකවරයා දැනුම් දුන් බවයි. අනික මේ රැලිය එජාපයේ රැලියක් නොවන බවත් ඔහු කියනවා.
සරත් ෆොන්සේකා මහතා කියන්නේ මා ගොඩක් ගරුකරන චරිතයක් මා පසුගිය දා ඔහු සමඟ කතා කළා. එහිදී සරත් ෆොන්සේකා මහත්තයා කිව්වේ පක්ෂයෙන් නම් කරන අපේක්ෂකයාට ඔහුගේ උදව් ලැබෙන බවයි. එයත් අපේක්ෂකත්වය බලාපොරොත්තුවෙන් හිටියා. විශේෂයෙන් මා 2010 පාර්ලිමේන්තුවට ඇවිත් කෘත්‍යාධිකාරි මණ්ඩලයේදී පක්ෂ නායකයාට කිව්වා පක්ෂයේ තනතුරු වෙනස් විය යුතු බව. එහි ප්‍රතිඵලයක් විදියට මගේ සංවිධායකධුරය සාමාජිකත්වය හිටන් අහෝසි වුණා.
මේවාට මුහුණ දීලා අපිට හොඳට හුරුයි. කොහොම වුණත් අපි මේ අරගලය ජය ගන්නවා. සජිත් ප්‍රේමදාස මහතා එජාප ජනපති අපේක්ෂකයා කරනවා.
