ශ්‍රී ලංකා පොදුජන පෙරමුණේ ජනාධිපති අපෙක්ෂකයා වීමට නියමිතව සිටින ගෝඨාභය රාජපක්ෂ මහතා වෙනුවෙන් ඇමෙරිකානු අධිකරණයට මෝසමක් ගොනු කළ ඇමෙරිකානු නීතිඥයන් අපූරු සඳහනක් කර ඇත. සන්ඩේ ලිඩර් කර්තෘ ලසන්ත වික්‍රමතුංග ඝාතනය සහ තවත් සිදු වීම් කිහිපයක් සම්බන්ධයෙන් ඇමෙරිකාවේ මධ්‍යම කැලිෆෝනියා දිස්ත්‍රික් අධිකරණයේ ගොනු කොට ඇති නඩුව විමසීම අත්හිටුවන ලෙස ඉල්ලීම් කර ඇත.
එයින් ගෝඨාභය රාජපක්ෂ මහතාගේ නීතිඥයා පවසන්නේ තම සේවාදායකයා ඉදිරියේදී පැවැත්වීමට නියමිත ජනාධිපතිවරණයට ඉදිරිපත් වීමට නියමිත අතර එයින් ඔහු ජයගැනීමේ ඉඩක් ඇති බවයි. දෙසැම්බර් 07 වැනිදාට එම මැතිවරණය පැවත්වීමට නියමිත බව කියවෙන හෙයින්ද එලෙස ඔහු ජයගතහොත් ජනාධිපතිවරයාට හිමි වන මුක්තිය පාවිච්චි කරමින් ඔහුට විරුද්ධව ඇසෙන නඩුවකට සහභාගී විම වැළකෙන හෙයින්ද එම නඩුව ඵල රහිත වීමට ඉඩ තිබෙන බව ඔවුන් එම මෝසමින් පෙන්වා දී ඇත.
ගෝඨාභය රාජපක්ෂ මහතා අධිකරණය මඟ හැරීම සඳහා විවිධ උප්පරවැට්ටි අනුගමනය කිරීම පිළිබඳ දක්ෂයෙකි. ඔහු ශ්‍රි ලංකාවේ අධිකරණවල ඔහු සම්බන්ධයෙන් විභාග වන නඩු කිහිපයකදීම එයට සහභාගී වීමෙන් වැළකී සිටින්නට අධිකරණයෙන් ගත හැකි උපරිම පියවර ගැනීමට කිහිප වරක්ම කටයුතු කළේය. කිසිදු නීති විරෝධි කටයුත්තක නියැළුණේ නැති නම් අධිකරණය හමුවේ නිර්දෝෂී වීමේ හැකියාවක් නිසැකව තිබේ නම් රාජපක්ෂ මහතාට නොබියව එම අධිකරණ සියලල්ටම යෑමේ හැකියාවක් තිබේ.
ඔහුගේ ඒ න්‍යාය ඇමෙරිකානු අධිකරණය හමුවේද මේ වන විට තබා ඇත. ඒ අනුව රාජපක්ෂ මහතාගේ නිතීඥයන් වන ආනල්ඩ් ඇන්ඩ් පෝටර් කේයී නීතිඥ සමාගමේ නිතිඥයන් කැලිෆෝනියා මධ්‍යම දිස්ත්‍රික් අධිකරණයේදී ගෝඨාභය රාජපක්ෂ මහතාට විරුද්ධව ගොනු කොට ඇති නඩුව විභාගයට ගැනීම කල් දමන ලෙස මෝසමක් මඟින් ඉල්ලිමක් කර ඇත. ඔහුගේ නීතිඥයන් ඒ අනුව පවසා ඇත්තේ ඊළඟට එළැඹෙන ජනාධිපතිවරණයට ඉදිරිපත් වීමට රාජපක්ෂ මහතා ශ්‍රි ලංකාවේ ප්‍රධානතම විපක්ෂ දේශපාලන පක්ෂයෙන් ඉදිරිපත් වීමට සුදානමින් සිටින අතර ඔහු එම මැතිවරණය ජයගනු ඇති බවය. ඒ බව හෙළි වන්නේ ඇමෙරිකානු අධිකරණයේ නිති රීතින්වලට අනුව ගෝඨාභය රාජපක්ෂ මහතා වෙනුවෙන් පෙනී සිටින නීතිඥයන් සහ පැමිණිල්ල වෙනුවෙන් පෙනී සිටින නිතිඥයන් අතර දුරකථන මාර්ගයෙන් සිදු කරන ලද නිල සාකච්ඡාවක් අවසානයේ අධිකරණය වෙත ඉදිරිපත් කරනු ලබන ඒකාබද්ධ ප්‍රකාශනයක් ලෙසින්ය.
එම ලියවිල්ල තුළ පැමිණිලි පාර්ශ්වය ජනාධිපතිවරණය සඳහා ඉදිරිපත් වීම සඳහා ඔහුට පවතින සුදුසකම් පිළිබඳ ප්‍රශ්න මතු කර ඇති අතර විශේෂයෙන් ඔහු තවමත් ඇමෙරිකානු පුරවැසි භාවය ඉවත් කර ගත්තාද යන්න නිල වශයෙන් සනාථ වන කිසිදු ලියවිල්ලක් හෝ සටහනක් නැති බව දක්වා ඇත.
පැමිණිල්ල වෙනුවෙන් වූ නීතිඥයන් සඳහන් කර ඇත්තේ ඇමෙරිකානු ෆෙඩරල් ලේඛනයේ අවසන් වරට පසුගිය අගෝස්තු මාසයේදී නිකුත් වූ වාර්තාවට අනුව නන්දසේන ගෝඨාභය රාජපක්ෂ මහතාගේ නම සඳහන් වී නැති බවය. ඒ පිළිබඳ පැමිණිලි පාර්ශ්වයෙන් කළ ප්‍රශ්න කිරීමට විත්තිකාර ගෝඨාභය මහතාගේ පාර්ශ්වයෙන් කිසිදු නිල ප්‍රකාශයක් එම නිතිඥ සාකච්ඡාවේදීවත් ඉදිරිපත් වී තිබුණේ නැත. අධිකරණයෙන් සහන ඉල්ලා ඉදිරිපත් කරන ලද එම මෝසමට එරෙහිව සන්ඩේ ලිඩර් කර්තෘ ලසන්ත විකුමතුංග මහතාගේ දියණි අහිම්සා විකුමතුංග මෙනවියද තම නීතීඥයන් මඟින් අධිකරණය වෙත ලියවිල්ලක් ඉදිරිපත් කළේ පසුගිය 03 වැනිදාය.
එහිදී ඇය ගෝඨාභය රාජපක්ෂ මහතාට එරෙහි අධිකරණ කටයුත්ත පමා කිරීම වෙනුවෙන් ඉදිරිපත් වූ මෝසමට එරෙහිව කරුණු දක්වා ඇත. එහිදී ඇය ප්‍රකාශ කොට ඇත්තේ එසේ අධිකරණය මඟ හැරීමට ඉඩදීම යුක්ති සහගත නොවන බවය.
ඇය කැලිෆෝනියා අධිකරණය වෙත ප්‍රකාශ කොට ඇති කරුණුවලින් පෙන්වා දෙන්නේ රාජපක්ෂ මහතාට දැනට පැන නැගී ඇති ගැටලුවලට විසඳුමක් නොලැබුණෝතින් හැර සිදු වෙමින් පවතින බොහෝ දේ ඔහුට හිතකරව නිර්මාණය වී ඇති බවය. ජනාධිපතිවරණයේ අපෙක්ෂකයකු වීම සඳහා යෝජනා වීම පමණක් නොව ඔහුගේ අමෙරිකානු පුරවැසි භාවය සම්බන්ධයෙන් සහ මැතිවරණ කොමිසම හමුවේ මේ වන විට ඉදිරිපත්ව ඇති පැමිණිලි තවමත් විමර්ශනය වෙමින් තිබේ. රටේ සිදුව තිබෙන දේවල් පිළිබඳ සැලකීමේදී ගෝඨභය රාජපක්ෂ මහතාට ජනාධිපතිවරණට ඉදිරිපත් වීමට තිබෙන බාධක ඉවත් විමටද ඉඩ ඇත. එසේ වුවද අහිම්සා විකුමතුංග මෙනවිය දස වසක් තිස්සේ අයදින තම ජීවිතය වඩාත් කම්පනය කළ ආදරණිය පියාණන්ගේ ඝාතනයට වගකිව යුත්තන් හෙළි කර ඔවුන්ට එරෙහිව නීතිය ක්‍රියාත්මක කිරීමේ ක්‍රියාවලිය මෙවැනි මෝසම් මඟින් අධිකරණ ක්‍රියාදාම කල් දැමීමට කටයුතු කිරීමෙන් සිදු වන්නේ කුමක්ද යන්න ඇය ප්‍රශ්න කර තිබේ.
ඇයගේ නීතීඥයන් කැලිෆෝනියා අධිකරණය හමුවේ තම විරුද්ධත්වය ප්‍රකාශ කරමින් සඳහන් කර ඇත්තේ දරුණු ක්‍රියා සම්බන්ධයෙන් අතීතයක් ඇති සහ තමන්ගේ සතුරන් ලෙස විශ්වාස කෙරෙන අයගෙන් පළිගැනීමේ ඉතිහාසයක් ඇති පුද්ගලයකු ශ්‍රි ලංකාවේ බලවත් තනතුරකට පත්වුවහොත් ඔවුන්ගේ අනාගතය සම්බන්ධයෙන් ඇති අනතුර පිළිබඳය.
ඉදිරි මැතිවරණ ප්‍රචාරණ වැඩසටහනේදී එවැනි නඩුවක් අධිකරණයේ විභාග වීමෙන් සහ එහි තොරතුරු මාධ්‍ය ඔස්සේ ප්‍රසිද්ධියට පත් වීමෙන් තම සේවාදායකාගේ මැතිවරණ වැඩපිළිවෙළට අගතියක් වනු ඇති බවත් එයින් අන්තර්ජාතික මිතුමට බාධාවක් විය හැකි බවත් රාජපක්ෂ මහතාගේ නීතිඥයන් මෝසමෙන් සඳහන් කර ඇති බව කියවෙයි. අහිම්සා වික්‍රමතුංග මහත්මියගේ නීතීඥයන් තර්ක කරන්නෙ ඇමෙරිකානු අධිකරණයක විභාග වන නඩුවක් සම්බන්ධයෙන් මාධ්‍යවල පළ වන ප්‍රචාර අන්තර්ජාතික මිතුදම සම්බන්ධයෙන් ඇති වන ප්‍රශ්නය කුමක්ද යන්නය.
එසේම ඇය අධිකරණය වෙත යවන ලද ලියවිල්ලේ රාජපක්ෂ මහතා රොයිටර් පුවත් සේවය වෙත ලබා දුන් වාර්තාවක්ද උපුටා දක්වා ඇත. එහි රාජපක්ෂ මහතා ලසන්ත ඝාතනය සම්බන්ධයෙන් ඇමෙරිකාවේ ගොනු වූ නඩුව මැතිවරණය වෙනුවෙන් වෙහෙසෙන ඔහුට සුළු වික්ෂිප්ත බවක් පමණක් ඇති කරන සිදු වීමක් ලෙස දක්වා තිබුණු බවය.
ශ්‍රි ලංකා පොදුජන පෙරමුණ කල් වේලා ඇතිව තම ජනාධිපති අපෙක්ෂකයා එළි දැක්වුවද ඔහුට නිල වශයෙන් නාම යෝජනා ලබාදීමට තවත් කල් තිබේ. එම පක්ෂයට අමතරව ජනාධිපති අපෙක්ෂකත්වය පිළිබඳ හෙළි කර ඇත්තේ ජනතා විමුක්ති පෙරමුණ පමණි. පාලනයේ සිටින එක්සත් ජාතික පක්ෂය තම අපෙක්ෂකයා තවමත් හෙළි කළේ නැත. එසේම ශ්‍රි ලංකා නිදහස් පක්ෂයෙන්ද අපේක්ෂකයකු ඉදිරිපත් කරන බවට පසුගියදා එම පක්ෂයේ මහ ලේකම් දයාසිරි ජයසේකර ප්‍රකාශ කොට තිබිණි. අහිම්සාගේ අධිකරණයට යැවූ විරෝධතා ලියවිල්ලේද ඒ පිළිබඳ කරුණු සඳහන් කර තිබිණි.
රාජපක්ෂ මහතා මේ වන විට තම ප්‍රචාරන කටයුතු කෙමෙන් සිදු කරගෙන යන අතර ඔහු 2005 වසරේ ඇමෙරිකානු පුරවැසි බව පැවැති කාලයේ මැදමුලන මහගෙදර ඡන්ද හිමි නාම ලේඛනයට නම ඇතුළත් වූ ආකාරය ගැන මෙන්ම ඔහුට විදේශ ගමන් බලපත්‍රයක් ලැබුණු ආකාරය පිළිබඳ රහස් පොලිසිය වෙත ඉදිරිපත් වුණු පැමිණිලි මත පොලිස් පරීක්ෂණ සිදු වෙමින් තිබේ. කෙසේ වුවද අහිම්සා බලාපොරොත්තු වන්නේ අවසානයේ වසර 10ක් තිස්සේ බලා හිඳින තම ආදරණිය පියාණන්ගේ ඝාතකයන් සම්බන්ධයෙන් යුක්තිය ඉටු වන තුරුය.
මාධ්‍යවේදියකු, පුවත්පත් කතුවරයකු ඝාතනය කිරීම මීට වසර 10කට වඩා අද සමාජය තුළ බරපතළ ලෙස කතාබහට ලක් වන කරුණක් බව තහවුරු වූයේ තුර්කියේදී ඝාතනය වූ සවුදි මාධ්‍යවේදී ජමාල් කෂෝගි ගේ ඝාතනයත් සමඟය. ඒනිසා මේ නඩු විභාගයද අැතැම් විට ලෝකයේම අවධානයට නතු වනු ඇත.
