‘හොඳම දේ දරුවන්ට ය' යනුවෙන් පැවසූයේ 1917 දී සාර් රජුගේ පාලනය පෙරළා දමා සමාජවාදී සෝවියට් දේශය නිර්මාණය කිරීමේ පුරෝගාමියා වූ විලැඩිමීර් ඉලිච් ලෙනින් ය. බොහෝ රටවල් විසින් ඔහුගේ කියමන යථාර්ථයක් බව පසක් කොට ගැනීමෙන් අනතුරුව ප්‍රතිපත්ති සම්පාදනයේ දී උපයුක්ත කර ගන්නා ලදී.
හොඳම දේ තමාටත් තමාගේ බේබිලා ටත් පමණක් උරුම කරදීම වෙනුවෙන් සදාකාලිකව බලයේ රැඳී සිටීමේ අති බහුතර දේශපාලකයන්ගේ ස්වභාවය වෙනස් කරමින් අලුත් මාවතකට නව රජය පියනඟා තිබේ. ඒ මඟ මල් අතුරා නැති බව පැහැදිලිව පෙනෙන බොහෝ දෑ හා ක්‍රියා සිදුවෙමින් පවතී. නමුත් ඒ සියල්ලට ද යථාවාදී පිළිතුරු ලැබෙමින් තිබේ. වෙනදා ලැබෙන කඳුළු ගෑස් වෙනුවට මෙදා උද්ඝෝෂණ භූමියටම ගොස් ප්‍රතිඥා දෙන නායකත්වයක් අපට හිමිය.
මේ සැප්තැම්බර් 2 වැනිදා වනවිට රාජ්‍ය සේවයට එක්ලක්ෂ හැටදහසකට වැඩියෙන් නව මුහුණු එක්වෙති. එතරම් විශාල ප්‍රමාණයකට රැකියා ලැබෙන ප්‍රථම අවස්ථාව මෙයයි. රජයේ රැකියාවක් යනු බොහෝ දෙනකුගේ සිහිනයකි. එ් සිහිනය බොහෝ ඈත තිබුණු බොහොමයකට මෙවර රජයේ රැකියා හිමිවීම ඓතිහාසික කරුණකි. මේ පිරිස තෝරන්නේ කිසිම දේශපාලන බලපෑමකින් තොරව වීම එයට වඩාත් ගෞරවනීය බවක් එක්කර තිබේ. උස අය සිකියුරිටි, මිටි අය කම්කරු කියා තම පාක්ෂිකයන් පවා බෙදූ කාලයක් පසු කර විත් ඇති බැවින් මේ එළැඹුම වඩාත් වටින්නේය. තරුණ ශ්‍රමයට වටිනාකමක් එක්කරමින්, තරුණ ශ්‍රමයෙන් හැකි උපරිම ඵල ප්‍රයෝජන ගැනීම මෙහි අරමුණයි.
මනුෂ්‍යයන් ගැන සිතන දේශපාලන විද්‍යාවක් ද, මිනිසුන්ගේ වටිනාකම් මැන බලන ආර්ථික විද්‍යාවක් ද අද අපට අවශ්‍ය වේ. ඒ දෙකෙහි ම පෙරමුණ ගත යුත්තේ දේශපාලන නායකයෝ ය. ශ්‍රී ලංකාවේ රාජ්‍ය නායකයා ඉහත කී සාධක දෙක කෙරෙහි ම අවධානය යොමු කරමින් සිය කාර්ය සාධනයෙහි නිරත වන බව පෙනෙයි. එය සිදුවන්නේ ශ්‍රී ලංකාවේ දේශපාලන ඉතිහාසයෙහි විප්ලවීය වෙනසක් හැටියට ය. උපාධිධාරීන්ට පමණක් නොව අ.පො.ස.සා/පෙළ අසමත් තරුණ පිරිසට රාජ්‍ය අංශයේ සුදුසු රැකියා ලබාදීම මේ වැඩසටහනෙහි කැපී පෙනෙන අංශ දෙකක් හැටියට සැලැකෙන්නේ ඒ නිසාය.
කිසියම් රාජ්‍යයක උපාධිධාරීන්ගේ රැකියා විරහිත වීම ගැන පැමිණිල්ලක් තිබේ නම්; එය රජයේ ආර්ථික සැලැසුම් වල වැරැද්දකි. එලෙස ම සංවර්ධන ව්‍යාපෘතිවල මන්දගාමී හා අවිධිමත් බව එයින් සනාථ වෙයි. තරුණ පිරිස වල්මත් වී ඇත්නම් එය ද මීට සමගාමී ප්‍රතිඵල පෙන්වයි. එය වෙනස් කිරීමට වත්මන් රජයේ තැත වඩාත් වැදගත් වන්නේ මේ ප්‍රවේශයේ සිට බලත්දීය. වත්මන් ජනාධිපතිවරයාගේ හා අගමැති ප්‍රමුඛ දේශපාලන නායකත්වයේ ඉලක්කය වී ඇත්තේ තරුණ ශ්‍රම හමුදාවේ උපරිම ශ්‍රම දායකත්වය රටේ සංවර්ධනය සඳහා යොදා ගැනීමය.
මේ වන විට සුදුසුකම් සපුරා ඇති සියලු උපාධිධාරීන් හට ඔවුන් විසින් හදාරා ඇති විෂය මාලාව අනුව අදාළ ක්ෂේත්‍රයේ රැකියා සඳහා යෙදවීමට පියවර ගන්නා ලෙස ජනාධිපතිවරයා විෂය බාර නිලධාරීන්ට උපදෙස් දී ඇත. රාජ්‍ය සේවයේ ඇති දුර්වලතා සහ අඩු පාඩු මඟ හැරෙන ලෙස රැකියාගත පුහුණුවක් ලබාදීමේ අවශ්‍යතාවද මෙහිදී ජනාධිපතිවරයා අවධාරණය කළේය. ඒ අනුව තරගකාරී ආකාරයට පෞද්ගලික අංශය සමඟ කටයුතු කළ හැකි ලෙස පෞද්ගලික අංශයේ පුහුණුව සඳහා ද මේ අය යොමු කිරීමට නියමිතය.
එපමණක් නොවේ, ඉතිහාසයේ ප්‍රථම වරට අපොස සාමාන්‍ය පෙළ අසමත් අයට ද රැකියා ලක්ෂයක් දීම පෙර නොවූ විරූ ක්‍රියාවකි. මෙතෙක් බලයේ පැවැති රජයන් තරුණ අසහනයට විවිධ පැලැස්තර විසඳුම් දැමුවත් ස්ථිරසාර විසඳුමක් ලබාදීමට අසමත් විය. මේ නිසා තරුණ අසහනය ද වර්ධනය වූ අතර විවිධ අසම්මත දෑ සඳහා ඔවුහු යොමු වීමක්ද දක්නට ලැබිණි. ඒ අනුව මෙරට ප්‍රථම වරට අපොස සාමාන්‍ය පෙළ අසමත්, ගමේ දරිද්‍රතාවෙන් අන්තයටම පත්ව සිටින පවුල්වල තරුණ තරුණියන් ලක්ෂයකට ‘සෞභාග්‍යයේ දැක්ම’ ප්‍රතිපත්ති ප්‍රකාශනය යථාර්ථයක් කරමින් රජයේ ස්ථිර විශ්‍රාම වැටුප් සහිත රැකියා ලබාදීමේ වැඩපිළිවෙළක් දැන් ක්‍රියාත්මක කර තිබේ.
ජපානය වෙත පරමාණු බෝම්බ හෙළා හිරෝෂිමා හා නාගසාකී නගර බිමට සමතලා වෙද්දී හැඬූ ජපන් පාලකයන් පසුව රටෙහි වත්මන් දියුණුව උදා කරගනු ලැබූයේ අන් කිසිවකින් නොව දුර දිග බලා සිදුකරන ලද සැලසුම් හේතුවෙනි. ඒ සැලසුම් අතර මතු පරපුරෙහි අධ්‍යාපනය දියුණු කිරීම උදෙසා රජය විසින් මුදල් ආයෝජනය කිරීම පුළුල් කිරීම විශේෂයෙන් දැකගත හැකි විය. අද වන විට ඔවුහු එහි ප්‍රතිලාභ අත් විඳිති. කියුබාවේ සේම වෙනිසියුලාවෙහි ද, පැවති සෝවියට් දේශයේ ද මේ තත්ත්වය මැනැවින් දැකගත හැකි විය. එහෙත් ලංකාවේ විටින් විට පත්වන පාලකයන් ගේ අභිමතාර්ථය වී ඇත්තේ රට සංවර්ධනය කිරීම හෝ ජාතික අධ්‍යාපන ප්‍රතිපත්තිය නඩත්තු කර ගුණාත්මක අයුරින් පවත්වාගෙන යෑම හෝ නොව ඉදිරි මැතිවරණය ජයගන්නේ කෙසේදැයි තුන් කල්හිම කල්පනා කරමින් ඒ උදෙසා කටයුතු කිරීමය. මේ ආකල්ප වෙනස් වී රට වෙනුවෙන් සිතන, පතන පාලකයන් පත්වීම දැයේ භාග්‍යයක් බැව් කිව යුතුය.
''යුගයේ දැවැන්තම ඛේදවාචකය වනුයේ නපුරු මිනිසුන්ගේ නපුරු වැඩ නොව හොඳ මිනිසුන්ගේ නිහැඬියාවයි'' යනුවෙන් වරක් මාටින් ලූතර් කිං විසින් ප්‍රකාශ කරන ලද්දේ ද මෙවන් තත්ත්ව ඉදිරියේ ගොලුවත් රකින්නන් ස්වකීය හෘදය සාක්ෂිය ඇතුළතම වැරදිකරුවන් වන බව දැක්වීමට ය. හිසේ රුදාවට කොට්ටය මාරු කළාක් මෙන් මෙතෙක් අප කළේ අර්බුදය විවේචනය කිරීම විනා අර්බුදයට පිළියම් කිරීම නොවේ. පැලැස්තර විසඳුම් වලින් විනිර්මුක්තව සාධනීය වෙනසක් උදෙසා කඩිසරව, එක් සිත්ව හා එක්සත්ව ක්‍රියා කළ යුතු බව අප දැන්වත් අවබෝධ කරගත යුතුව තිබේ.
රාජ්‍ය සේවයට ඉතිහාසයේ වැඩිම පිරිසක් එක්වන මේ මොහොතේ ඒ සැමට කියන්නට අපට යමක් තිබේ.
මේ ඔබට ලැබෙන අවස්ථාව ඉතිහාසයේ කිසි කලෙක කිසිවකුට මෙලෙස මල් වට්ටියක තබා පිළිගන්වා නැත. ඔබ ඉදිරියේ ඇත්තේ ඒ වෙනුවට රටට කළ හැකි සහ ඔබෙන් විය යුතු යුතුකම ඉටු කිරීමය; ඒ සඳහා නොපමාව, නොපැකිළ ව පෙළ ගැසීමය.
