දේව ධර්මය පිලිබඳ අති මහත් දැනුම් සම්භාරයක් ඇති උතුමකු වූ ද රට රටවලින් කිතුනු තනතුරු රැසක් ලැබුවා වූ ද 2010 දී කාදිනල් තනතුරට ඔසවා තබනු ලැබුවා වූ ද පාස්කු බෝම්බය නිසා අදටත් ජනප්‍රිය චරිතයක් වන්නා වූ ද පටබැඳිගේ දොන් ඇල්බට් මැල්කම් රංජිත් කාදිනල්තුමා තරම් ප්‍රසිද්ධියට පත් වෙනත් කාදිනල්වරයෙක් මධ්‍යකාලීන යුගයෙන් පසු ලෝකයේ බිහිවී ද? අප නම් හිතන්නේ නැති බවයි. සහරාන් පාස්කු බෝම්බය පත්තු කළ අතර එම බෝම්බය තවමත් ඇදගෙන යන්නේත් එම බෝම්බය නිසා හානියට පත් කිතුනුවන් වෙනුවෙන් හඬ නඟන්නේත් එතුමා පමණි.
පාස්කු බෝම්බය කවදාවත් නිමා කළ නොහැකි ප්‍රශ්නයක් බව වැටහුණු මෑත දවසක තමන් අතින් සිදු වූ වරද හෝ නොසැලකිල්ල හෝ ප්‍රමාද දෝෂය හෝ පිළිගෙන පාස්කු බෝම්බ සංවාදය අවසන් කරන ලෙස මේ කාදිනල්තුමා පසුගිය දවසක පාස්කු බෝම්බ කාලයේ මේ රට කරවූ දේශපාලඥයන්ගෙන් ඉල්ලා සිටියහ. එහෙත් ඒ වන විට පාස්කු සිද්ධිය සම්බන්ධයෙන් හතර පස් දෙනකුටම කෝටි ගණනින් දඩ ගසා අවසන්ය. පාස්කු බෝම්බය පිළිබඳ සංවාදය කවදාවත් අවසන් කළ නොහැක්කේ ඇයි? එම සිද්ධියට සම්බන්ධ බොහෝ දෙනා බෝම්බ පුපුරුවා ගෙන මිය ගියහ. සිද්ධියට සම්බන්ධ දෙවන පෙළ හමුදාවෙන් වෙඩි කා මිය ගියහ. දැනට ඉතිරිව පවතින්නේ සහරාන්ගේ බිරින්දෑ සහ දරුවකු පමණි. සහරාන්ගේ බිරිය බෝම්බ කේස් එකට කිසිසේත්ම සම්බන්ධ නැති බව මේ වන විට හෙළිව තිබේ. එහෙත් කාදිනල්තුමා වැඩේ අත්හරින්නේම නැත. උන්වහන්සේ කියා හිටින්නේම අපරාධකරුවන්ට දඬුවම් දිය යුතු බවය. මේ සම්බන්ධයෙන් වැඩිදුර කටයුතු පිණිස උන්වහන්සේ වතිකානයේ සංචාරයක ද නිරත වී එහි සිටින කතෝලික ප්‍රධානීන් ද හමු වූහ.
එකම අඩුපාඩුව වූකලී පාප් තනතුර ඇබෑර්තු නොවීමයි. කෙසේ වුව ද පාස්කු බෝම්බය පත්තු වූ දා පටන් කාදිනල්තුමාට නිතරම තරහ යන්නට පටන්ගෙන ඇති බව පෙනේ. ඉන්දියාව සහ ලංකාව අතර සෑදීමට යෝජිත සැතපුම් 22ක් දිග පාලම සම්බන්ධයෙන් එතුමාට මේ දිනවල හොඳටම කේන්ති ගොස් ඇත. එබැවින් රජීව් ගාන්ධිගේ ආණ්ඩුව යාපනයට පරිප්පු දැමූ ආකාරය ද සිහිපත් කරමින් කාදිනල්තුමා ඉන්දියාව විවේචනය කළේය. කාදිනල්තුමාට ඉන්දියාව තරහ කරගැනීම මහ භයානක වැඩකි. කලාපයේ රටවල් අතර තිබෙන කතෝලික බලයට ඇඟිලි ගැසීමට තරම් ඉන්දියාව ශක්තිමත්ය.
පාස්කු බෝම්බය පිපිරූ දවසේ සිට අද වන තුරුත් කතෝලික සභාව ඒ සම්බන්ධයෙන් ආණ්ඩුවට බැන වදිමින් කාලය ගත කරයි. මේ බැන වැදීමේ න්‍යාය පත්‍රය කුමක් ද යන්න අපට නොතේරේ. මේ කාරණය සම්බන්ධයෙන් පොලිසිය භාර ඇමැති ටිරාන් අලස් පසුගියදා කදිම විග්‍රහයක් කළේය.
ඇමැතිවරයා කියන පරිදි පාස්කු සිද්ධිය සම්බන්ධයෙන් පරීක්ෂණ පැවැත්වෙන්නේ බෝම්බය පිපිරීමටත් පෙර, ඉස්ලාමීය අන්තවාදීන් විසින් මාවනැල්ලේ බුදු පිළිම කැඩීම කළ දවසේ පටන්ය. එතැන් සිට පොලිසිය දිගින් දිගටම මේ කාරණය පස්සේ ගමන් කළ නමුදු බෝම්බ පිපිරවීම සිදු වූ දවස සම්බන්ධයෙන් යහපාලන ආණ්ඩුවේ දේශපාලනඥයන්ට සහ පොලිස් දෙපාර්තමේන්තුවට කිසියම් වැරදීමක් සිදු විය. තමා පොලිසිය භාර ඇමැති වූ පසු පාස්කු බෝම්බය පිළිබඳ පැවැත්වෙන පරීක්ෂණවලදී උදව් කරන ලෙස ටිරාන් අලස් දිගින් දිගටම කතෝලික සභාවෙන් ඉල්ලීම් කළේය. එහෙත් දැන් වැඩිදෙනා කටයුතු කරන්නේ බෝම්බ පිපිරීම සම්බන්ධයෙන් නොව බෝම්බ පිපිරීමෙන් පසු එළියට විසි වූ වෙනත් න්‍යාය පත්‍රයක් අහුලාගෙන ය.
මේ න්‍යාය පත්‍රය තුළ ආණ්ඩු පෙරළීම් අලුත් දේශපාලන නායකයන් පත්කිරීම් තමන්ට අනභිමත රජයේ සේවකයන් ගෙදර යැවීම වැනි කාරණා ද තිබේ. පාස්කුව යෙදෙන්නේ අවුරුද්දකට වතාවකි. කතෝලික සභාවේ ඇතැම් කණ්ඩායම් අත තිබෙන අලුත් න්‍යාය පත්‍රය නිසා හැමදාම පාස්කු දිනයක් උදාවී සංකේතාත්මක බෝම්බයක් පුපුරයි. පාස්කු බෝම්බය පිපිරවූ සහරාන් සහ එවකට සිටි බුද්ධි අංශ ප්‍රධානියා වූ සුරේෂ් සලේ අතර සම්බන්ධයක් තිබෙන බව කිතුනු ව්‍යාපාරයක් වූ සමාජ සහ ආගමික කේන්ද්‍රයේ අධ්‍යක්ෂ පියතුමා ළඟදී කීවේය. බෝම්බය පුපුරන විට සුරේෂ් සලේ විශ්‍රාම ගොස් සිටි අතර පිටරටක රැකියාවක් කරමින් සිටියේය. සමාජ සහ සාමයික කේන්ද්‍රය කළ චෝදනාවෙන් යක්ෂප්‍රාප්ත වූ සුරේෂ් සලේ මේ වන විට පෙරකී කේන්ද්‍රයේ ලොකු පියතුමාට එරෙහිව රුපියල් ලක්ෂ 500ක් ඉල්ලමින් නඩු පවරා ඇත. පොලිසිය භාර ඇමති ටිරාන් අලස් කියන විදිහට පාස්කු බෝම්බයේ පරීක්ෂණවලට සහය දීමට කාදිනල්තුමාට හැකි නම් වැඩේ මෙපමණ අල වන්නේ නැත. පාස්කු යනු අවුරුද්දකට එක සැරයක් පමණක් උදාවන දෙයක් බව අපි මතක් කරමු. හැමදාම පාස්කුත් නැත; නත්තලුත් නැත.
