ඔහුගේ අනුගාමිකයන් අතර පමණක් ප්‍රසිද්ධව සිටියා වූ ද ඔහු අදහන දෙවියන් වහන්සේ ඇතුළු තවත් කිහිපදෙනකුගේ පමණක් මිතුරකු වූ ද දිවැසිවර ජෙරොම් ප්‍රනාන්දු එක රැයක් ඇතුළත මේ රටේ ප්‍රසිද්ධම චරිතය බවට පත්වුණා පමණක් නොව සෑහෙන ජන කොටසකගේ කුතුහලයට ද ද්වේශයට ද ලක්වූ චරිතය බවට පත්විය. අද වන විට ජෙරොම් ප්‍රනාන්දු ගෙදර දොරේ භාවිත වන සබන්, ශීතකරණය, ලයිට් එක, මිරිස් කුඩු, ගෑස් එක මස් මාළු යනාදිය තරමටම භාණ්ඩයක් බවට පත්ව තිබේ. එමතුද නොව ජෙරොම් ප්‍රනාන්දු ගැන මෙලෝ මඟුලක් නොදැන සිටි අපිද ඔහු ගැන හොයන්නට පටන් ගත්තෙමු.
මීට මාස කිහිපයකට පෙර ශ්‍රී ලංකා ක්‍රිකට් පිලට ජයග්‍රහණ අත්පත් කරගැනීම සම්බන්ධයෙන් තමා වගකිව යුතු යැයි ඔහු කළ ප්‍රකාශය පමණක් අපට මතක තිබූ නමුත් එම ප්‍රකාශය කළ තැනැත්තාගේ නම අමතක වී තිබිණ. අප ජෙරොම් ප්‍රනාන්දු දිවැසිවරයකු ලෙස හඳුන්වන්නේ ඔහුට දිවැස් තිබෙනවා ද නැත්නම් නැද්ද යන කාරණය ගැන අප තුළ දැනීමක් ඇති නිසා නොව එය ඔහුගේ නමේ කොටසක් ලෙස සලකාය. දිවැසිවරයකු යනුවෙන් අර්ථ නිරූපණය වන පරාසය ඉතා පුළුල්ය. Merriam Webster නමැති ශබ්ද කෝෂයේ එන පරිදි දිවැසිවරයකු යනු කෙළින්ම දිව්‍යමය ගතිගුණ ඇත්තෙකි. එසේම දෙවියන්ගේ නියමය ක්‍රියාත්මක කිරීමේ කොන්ත්‍රාත්තුව දෙවියන් විසින්ම කිසියම් මනුෂ්‍යයකුට බාරදෙන ලද්දේ නම් ඔහු දිවැසිවරයකු බව පෙරකී ශබ්දකෝෂය කියයි. එසේම සුවිශේෂ අධ්‍යාත්මික බල මහිමයක් ඇති අනාගත වාක්‍යය ටක්කෙටම හරි යන ලෙස කියන අනාගත වක්තෘවරුන් දිවැසිවරු ලෙස හඳුන්වනු ලැබේ. යුරෝපා ඉතිහාසයේ අනාගත වක්තෘවරු ලෙස හඳුන්වන සෑහෙන පිරිසක් වෙති. ජේසුස් ක්‍රිස්තුස් වහන්සේ, පළමුවන සියවසේ කිතුදහමේ ශුභාරංචිය මිනිසුන්ට උගැන්වූ පාවුළුතුමා මයිකල් නොස්ත්‍රඩැමුස්, මෝසස්, නෝවා, ආබ්‍රාහම්, මහම්මත්තුමා ඇතුළු විශේෂ පිරිසක් මේ අතර වෙති. මීට අමතරව හිටපු ගමන් පහළ වී තමන් වක්තෘවරයකු හෝ දිවැසිවරයකු ලෙස කියමින් දේශන පවත්වමින්, ගීත ගායනා කරමින් ලස්සනට ඇඳගෙන වේදිකා දිගේ දුවමින් සංදර්ශන පවත්වන අයද වක්තෘවරුන් ලෙස පෙනී සිට තිබේ. නයිජීරියාවේ පාස්ටර් කෙනකු වන ටී. බී. ජොශුවා එවැනි කෙනෙකි. ඔහුගේ ෆේස්බුක් බළකාය මිලියන 350ක් පමණ වේ. ඔහුගේ යූ ටියුබ් subscribers ලා ගණන දස ලක්ෂය ඉක්මවයි. කිසියම් ප්‍රශ්නයක් ඇතිවූ විට සිය පවුල පිටින්ම ගුවන් යානයක නැඟී සිංගප්පූරුවට පලාගොස් එතැනින් වෙනත් රටකට යාම අනාගත වක්තෘවරුන්ගේ ස්වභාවයක් දැයි අපි නොදනිමු.
එහෙත් පාස්ටර් ජෙරොම් ප්‍රනාන්දු මීට දින කිහිපයකට පෙර එසේ පැන ගිය අතර ලංකාවට පැමිණි විටක අත්අඩංගුවට ගැනීම වළක්වාලීම සඳහා අපේක්ෂිත ඇපයක් ලබා ගැනීමට නීතිඥයන් එකතු කරමින් සිටින බව දැනගන්නට තිබේ. දිවැසිවරයකුට නීතිඥ සහය අවශ්‍ය නැත. සාමාන්‍යයෙන් දිවැසිවරයකුට ඕනෑම කෙනකු වශී කරගැනීමට ඇති හැකියාව නිසා ඇප ඉල්ලීමටත් පෙර ඇප ලැබීමට පුළුවන. මේ කතාව මඳකට මෙතැනින් නවත්වා මේ කතුවැකියේ ඉතිරි හරිය සාකච්ඡා කරමු.
ශිෂ්ටාචාරය පෙළගස්වන ලද්දේ ගින්දර හා රෝදය සොයා ගැනීමත් ලැජ්ජාවත් යන කාරණා නිසාය. මිනිසුන් ඇඳුම් අඳින්නට පටන් ගත්තේ සිය පුද්ගලික අංශය වසා ගැනීම පිණිසය. ලජ්ජාව ක්‍රියාත්මක වන්නේ ඒ ආකාරයෙනි. මේ අතර ආගම නමැති සාධකය විසින් ශිෂ්ටාචාරය හැඩගස්වන ලදී. මේ නිසා යථාර්ථවාදී ආගම්වලට මෙන්ම යථාර්ථවාදී නොවන ආගම්වලට ද ඇබ්බැහි වීමට ජනතාවට සිදු විය. නිවැරදි ලෙස පාවිච්චි කරන ආගම ලෝකයේ වඩාත්ම උතුම් ආධ්‍යාත්මික සංසිද්ධිය බවට පත්වෙයි. එයට සමාන්තරව හිටගැනීමට හැක්කේ ආදරයට පමණි. එහෙත් ආගම යනු බෝම්බයකි. එහි වෙඩි නූල හැමවිටම සඟවා තැබිය යුතු අතර එය සඟවා ඇති තැන මවුපියන්ටවත් කිව යුතු නැත. මෙයට හේතු වන්නේ ආගම සතු බලයයි. තමන්ගේ නාමයෙන් කෝටි ගණනක් එකම තැනකට ගේන්නට කිසිදු දේශපාලනඥයකුට නොහැකිය. එහෙත් දෙවියන්ගේ නාමයෙන් කෝටි ගණනක් එකම තැනකට ගෙන ඒමට පූජකයන්ට හැකිය. මේ කාරණය නිසා මධ්‍යකාලීන ලෝකයේ රජවරු දෙවියන්ට සහ උන්වහන්සේගේ නියෝජිතයන් වූ පූජකයන්ට මහත් සේ බිය වූහ. එහෙත් සමහර අවස්ථාවලදී ඇතැම් නිර්භීත රජවරු තමන්ගෙන් ගේම ඉල්ලන පූජකයන් මරා දෙවියන් වහන්සේ සමඟ කෙළින්ම ගනුදෙනු කිරීමට පටන් ගත්හ. ආගමේ භාරකරුවා රජතුමාය යනුවෙන් සංකල්පයක් මධ්‍යකාලීන යුරෝපයේ තිබිණ. මෙම සංකල්පය පටන් ගත්තේ රජතුමා පූජකයන්ට ගේම දී දෙවියන් සමඟ හිතවත්කම් ඇතිකරගත් බැවිනි. පූජකයා යනු ඇතැම් අවස්ථාවලදී බ්‍රෝකර් කෙනෙකි. ඔහු දෙවියන් සිටින බව අපට පෙන්වා උන්වහන්සේ ලවා වැඩ කරවාදීම පිණිස අපෙන් ගාණක් කපා ගනී. මෙබඳු බ්‍රෝකර්ලා වර්තමානයේදි තිස්තුන් කෝටියකට වඩා සිටිති.
අප ජෙරොම් ප්‍රනාන්දු දකින්නේ ආගමික සිඟිත්තකු ලෙසය. ඔහුගේ ආගමික නිකාය, ආගමික කල්ලිය යනාදියෙන් තඹ තුට්ටුවක වැඩක් අපට නැත. එහෙත් ඔහුගේ ආගමික හැසිරීම පිළිබඳ අපට ලොකු ප්‍රශ්නයක් තිබේ. දෙවියන්ගේ අතරමැදියකු ලෙස බ්‍රෝකර් රස්සාව කරන ගමන් අනෙක් ආගම් විවේචනය කිරීම ඔහුගේ ලක්ෂණයකි. මෙය මූලධර්මවාදය ලෙස හඳුන්වනු ලැබේ. තලේබාන් මුල්ලාවරුද, අයි. එස්. අයි. එස්. වධකයන්ද ඇතැම් අන්තවාදී හින්දුන්ද මේ තත්ත්වයේ ලා සැලකිය හැකිය. ඕම් ෂින්රික්යෝ යනුවෙන් ආගමික කල්ලියක් ජපානයේ තිබේ. මෙහි නායකයා සෝකෝ අසහාරා නමැති පූජකයෙකි. තමා දිවැසිවරයකු බව ඔහුත් ඔහු දිවැසිවරයකු බව ඔහුගේ බැතිමත්හුත් කල්පනා කළහ. එසේම අනුන්ගේ පව් තමා වෙත පවරාගෙන ඒ වෙනුවට සිය ආධ්‍යාත්මික බලය හරහා එම පුද්ගලයන්ගේ ගිණුම්වලට පින් බැර කිරීමට තමාට හැකි බව ඔහු කියා තිබිණ. 1995 මාර්තු 20 දා සෝකෝ අසහාරා සිය අනුගාමිකයන් සමඟ දිව්‍ය ලෝකයේ ට්‍රිප් එකක් යාමට සූදානම් විය. ඒ සඳහා පණ තියෙන අය නොව මියගිය අය පමණක් සුදුසු වන බව ඔහු කී නිසා වැඩි පිරිසක් මේ ගමනට එකතු කරගැනීම සඳහා ඔහුගේ ගෝලයෝ ටෝකියෝ නගරයේ උමං දුම්රිය මාර්ගයකට විෂ වායුවක් ගසා විශාල පිරිසක් ඝාතනය කළහ. අප ජෙරොම් ප්‍රනාන්දුලාගෙන් පරෙස්සම් විය යුත්තේ මෙබැවිනි. ලංකාව ජාතිවාදය නිසා ඉමහත් පීඩාවක් විඳි රටකි. එවැනි රටක් තුළ ආගම්වාදය පටන් ගත්තොත් සෝකෝ අසහාරා කළ දේ අපටම කරගන්නට අපට සිදුවනවා ඇත.
