මෙයට ශත වර්ෂයකට පෙර ගුරුවරයා යනු දෙවියෙකි. අකුරු සාස්තරය දත් පිරිස බෙහෙවින් අඩු වූ එකල ලංකාවේ පිටිසර බද ගම්මානවල ගුරුවරයාත් ගම්මුලාදෑනියාත් එක පෙළට සිටගෙන වැඩ කිරීමට තරම් සුදුසුකම් ලද අය වූහ. ඔවුන්ට ඉහළින් සිටියේ පන්සලේ නායක හාමුදුරුවන් පමණි. ක්‍රමයෙන් ශ්‍රී ලංකාවේ academic level එක හෙවත් ශාස්ත්‍රාලයීය මට්ටම ඉහළ ගිය අතර එතැනදී ගම්මුලාදෑනියාට ඉහළින් ගුරුවරයා සිටියේය.
පසුගිය ශත වර්ෂය අවසන් භාගය වනවිට ගුරුවරයා යන සංකල්පය ගුරු සංගම් මාර්ගයෙන් දේශපාලනයට හේත්තු වූ අතර තත්ත්වය ටිකෙන් ටික කොතරම් පරිහානියට පත්වීද යත් මේ ශත වර්ෂය මුල වනවිට ගුරුවරයා සිසුන් අතින් මහපාරේ ගුටි කන මට්ටමටම ආවේය. හොඳ ගුරුවරු රට තුළ ඉතිරි වී සිටිය ද ගුරු දෙවියා යකෙක් බවට පත් වීමේ ප්‍රවණතාවක් හට ගත්තේය. මෙය ක්‍රමයෙන් උග්‍ර වූයේ ගුරුවරුන් අතින් සිසු සිසුවියන් කෙළෙසෙන්නට පටන් ගැනීමත් සමඟය. ගුරුවරයා අතින් අපහරණයට පත් වීම යනු දරුවකුට සමස්ත අධ්‍යාපනයම එපා කරවන්නකි. ඒ අතර ඇතැම් ගුරුවරු හරකුන්ට තඩි බාන්නාක් මෙන් සිසුන්ට පහර දුන්හ. එවිට ඒ සිසු සිසුවියෝ රෝහල්ගත වූහ. මෙහිදී වැදගත් කාරණයක් කියමු. ඉහත සඳහන් කිසිදු සිදු වීමකින් ගුරුවරයා සිසු දරුවන්ගේ සහ දෙමාපියන්ගේ පොදු සතුරා බවට පත් වූයේ නැත.
එහෙත් උසස් පෙළ පිළිතුරු ප්‍රශ්න පත්‍ර පරීක්ෂා කිරීම අත්හිටුවීමට මේ රටේ සරසවි ඇදුරන් තීන්දු කිරීමත් සමඟම ගුරුවරයා නමැති සංකල්පය පොදු සතුරා නමැති ආකල්පය සමඟ මිශ්‍ර විය. සරසවි ඇදුරන් උසස්පෙළ විභාගයේ ප්‍රශ්න පත්‍ර පරීක්ෂා කිරීමෙන් වැළකී සිටින්නේ අලුත් බදු ප්‍රතිපත්තිය නිසාය. මේ අනුව සල්ලි වෙනුවෙන් සිසු දරු දැරියන්ගෙන් පළිගැනීමටත් ඔවුන්ගේ අනාගතය ප්‍රාණ ඇපයට ගැනීමත් සිදු වී ඇති බවක් රට පුරා පැතිරෙන්නට පටන්ගෙන තිබේ. මෙය ඉතා නරක තත්ත්වයකි. විශ්වවිද්‍යාල ඇදුරන් උසස් පෙළ ප්‍රශ්න පත්‍ර පරීක්ෂාවෙන් තව දුරටත් ඉවත්වී සිටියොත් ශිෂ්‍යයන් සහ දෙමාපියන් එක්ව සිය පීඩනය මුදාහැරීමට ඉඩ ඇත. එවන් තත්ත්වයක් ඇති වුණොත් රිළවුන් වෙනුවට චීනයට ගොස් පණ බේරා ගැනීමට සරසවි ඇදුරන්ට සිදුවනවා ඇත. ඒ සඳහා වලිග බද්ධ කරගත යුතු බවද අපි මහත් ඕනෑකමින් යුතුව පෙන්වා දෙමු. වලිග නැති රිළවුන් චීන සතුන් වතු වලට හෝ සර්කස්වලට නොගැනීමට ඉඩ තිබේ. මේ තත්ත්වය සහ මේ රටේ ශිෂ්‍ය ප්‍රජාවගේ අනාගතය සලකා බලා වහා පියවර ගැනීම සරසවි ඇදුරන් කළ යුතු බව අපි විශ්වාස කරමු.
උසස්පෙළ විභාගය අවසන් වී මාස දෙකක් ගතවී තිබේ. බදු ප්‍රතිපත්තිය ලෙළවමින් ප්‍රශ්න පත්‍ර බැලීමෙන් වැළකී සිටීමට විශ්වවිද්‍යාල ඇදුරන් තව දුරටත් කටයුතු කළොත් මේ රටේ විභාග කාල රාමුව මුළුමනින්ම අවුල් වනවා ඇත. අපොස සාමාන්‍ය පෙළ විභාගය යනු, අපොස උසස් පෙළ විභාගය පසුපසින් එන ඇගැයීම් ක්‍රියාවලියකි. අ.පො.ස. උසස් පෙළ විභාගය යනු විශ්වවිද්‍යාල ප්‍රවේශය පසුපසින් ඇදී එන ඇගයීම් ක්‍රියාවලියකි. මේ කියන හන්දියේදී පරක්කු වී බස් එක අල්ලා ගැනීමට නොහැකි වන ශිෂ්‍ය ශිෂ්‍යාවන්ට සිදුවන්නේ ප්‍රමාද වී විශ්වවිද්‍යාලයට ගොස් ප්‍රමාද වී විභාගවලට පෙනී සිට ප්‍රමාද වී විශ්වවිද්‍යාලයෙන් එළියට යාමටය. මෙයින් පසු ඔවුන්ට රැකියාවක් ලැබෙන්නේ ප්‍රමාද වෙලාය. ඔවුනට කසාද බඳින්නට සිදු වෙන්නේත් ප්‍රමාද වෙලාය. ඔවුනට ලෝන් අරගෙන ගෙවල් හදන්නට සිදුවෙන්නේත් ප්‍රමාද වෙලාය.
මෙය එකිනෙකට සම්බන්ධ දාම ක්‍රියාවලියකි. දාම ක්‍රියාවලියක් බොහෝවිට භෞතික වශයෙන් අපට දැකගන්නට හැකිවන්නේ න්‍යෂ්ටික බලාගාරයක් තුළය. න්‍යෂ්ටික බලාගාරයක ශක්තිය ඉපදවීමට අවශ්‍ය පළමුවැනි පරමාණුව පුපුරවන්නේ ඩයිනමයිට් එකක් යොදාගෙනය. ඩයිනමයිට් එක පුපුරන විට එහි ස්පෝඨන වේගය නිසා යාබද පරමාණුව පුපුරයි. ඒ පිපිරීම නිසා ඊට යාබද පරමාණුව ද පුපුරයි. මේ පිපිරීම දාමයක් මෙන් ක්‍රියාත්මක වන අතර එය අවසන් වන්නේ සියලුම පරමාණු අවසන් වීමත් සමඟය. දැනට මේ රටේ උසස් පෙළ විභාගයෙන් ඉහළ විභාගවලට සම්බන්ධ සියලුම පරමාණු එක ළඟ පුපුරන්නට පටන් ගෙන තිබේ. මේ පිපිරීමේ විභවය පිටස්තර සමාජයට ඇතුළු වුණොත් එතැනදී පුපුරන්නේ න්‍යෂ්ටික බලාගාරයක පිපිරුමට වඩා භයානක න්‍යෂ්ටික බෝම්බයකි. ඉදිරි සතිය ඇතුළත සිය ප්‍රශ්න නිරාකරණය කරගෙන අ.පො.ස. උසස් පෙළ උත්තර පත්තර නොබලන සරසවි ඇදුරන්ට එරෙහිව නෛතික ක්‍රියාමාර්ග ගන්නා බව ජනාධිපති රනිල් වික්‍රමසිංහ පවසා තිබේ. සරසවි ඇදුරන් ගේම ඉල්ලන විට ආණ්ඩුව ද ගේම රිටර්න් කළ යුතු තැනකට පත් වේ. අපගේ භාෂාව යම් තරමකට අව්‍යක්ත වීම ගැන පාඨකයෝ කමත්ව! කඩු පහරක් වැළැක්වීමට හැක්කේ තවත් කඩුවකටම පමණි. කඩුවක් වෙනුවට පොල්ලක් යෙදුවොත්, එම පොල්ල දෙකට කැපී ගිය විට පොලු කොටය සහිත පාර්ශ්වයට සිදු වන්නේ එම කොටය ද පැත්තකට දමා දිව යාමටය.
මීට අවුරුද්දකට පමණ පෙර ගාලු මුවදොරින් හටගත් ආණ්ඩු විරෝධී අරගල සමයේදී මේ රටේ ගුරු පරම්පරාව මහත් වෙනසකට ලක් විය. කොවිඩ් වෙනුවෙන් අවුරුදු දෙකකට කිට්ටු කාලයක් ආණ්ඩුවෙන් පඩි ලබමින් ගෙවල්වල සිටි ඔවුහු රට යළි විවෘත කළ සැණින් වැටුප් විෂමතා හදා ගැනීම, තනතුරු විෂමතා නැතිකර ගැනීම යන පෞද්ගලික අරමුණු කරේ තබාගෙන වැඩ වර්ජන පටන් ගත්හ. ඒ සඳහා නායකත්වය දෙන්නේ කාගෙන්වත් තේ එකක්වත් නොබොන සත පහක පගාවක් නොගන්නා ස්කූටරයක ගමන් බිමන් යන ජෝෂෆ් ස්ටාලින් නමැති මහතෙකි. ඔහු ඉගැන්වීමට නොව වෘත්තීය සමිති ක්‍රියාකාරකම් සඳහා පාසලෙන් නිදහස් කරන ලද මහතෙකි. ඔහු කොතරම් යහපත් කෙනකු වුවද පාසල් පද්ධතියට ඔහු විසින් කෙරුණු හානිය ස්වල්ප නොවේ. ජෝෂෆ් ස්ටාලින් නමැති ආඥාදායක ක්‍රෑර සෝවියට් පාලකයාගේ චරිතයෙන් භාගයක්ම ඔහු මේවන විට රඟ දක්වා ඇත.
ඔහුගෙන් බැටන් එක භාරගෙන ඇත්තේ උසස්පෙළ උත්තර පත්තර බලන සරසවි ඇදුරු කල්ලියයි. රිලේ එකක් දිවීමට අවශ්‍ය වන්නේ ඉතා සීමිත පිරිසක් පමණි. සියලුදෙනාම ක්‍රීඩා පිටියට පැන රිලේ එක දුවන්නට ගිය විට එකා පිට එකා ඇදගෙන වැටෙනවා පමණක් නොව නරඹන්නන් ගෙන් ගුටි කෑමට ද ඔවුන්ට සිදුවේ. විශ්වවිද්‍යාල ඇදුරන් දැනට බෙල්ල බේරාගෙන සිටින්නේ නරඹන්නන්ගේ ගුණ යහපතක්ම නිසාය. මේ ගුණ යහපතක්ම නැති නොකරන ලෙස අපි එම ඇදුරු බල මුළුවෙන් ඉල්ලමු. භූමිතෙල් භාගයක් ගෙන ඒම පිණිස පාරේ යන මිනිසකු ළඟට කැඳවා ඔහු අතට කඩුවක් දී අංගුලිමාලගේ පාට් එක රඟ පාන්නැයි කීවොත් පළමුවෙන්ම ඇඟිලි අහිමි වනු ඇත්තේ එම චරිතය රඟපෑම සඳහා ආරාධනා කළ අයගේ වීමට පුළුවන. මේ නිසා අංගුලිමාලත් නොවී රිලේ දුවන්නේත් නැතුව ස්වකීය රාජකාරිය පමණක් කරන ලෙස අපි සරසවි ඇදුරන්ගෙන් ඉල්ලමු.
