ලංකාව මේ අර්බුදය කළමනාකරණය කරගැනීමේදී සාධනීය පාර්ශ්වයෙන් ඉදිරියෙන්ම සිටින්නේ යැයි ලොවම පිළිගෙන තිබේ. දෙවැනි කොවිඩ් 19 රැල්ලක් ගැන කතා කරමින් අනිසි බියක් මවන්නට තතනන ගෝනිබිල්ලන් නොදන්නා කරුණ වන්නේ අපට තවමත් පළමු රැල්ලක්වත් ඇවිත් නැති බවය. රැල්ලක් යන්නට ඔබට උදාහරණ අවැසි නම් මේ මොහොතේ ඇමෙරිකාව දෙස හෝ ඉන්දියාව දෙස බැලිය හැකිය. ඒවායේ පාලනය කරගත නොහැකි ලෙසින් කොවිඩ් 19 පැතිර යයි. අප කොවිඩ් 19 ගැන දැනගත් වහා කළ මැඬ පැවැත්වීම් හා පාලනය කිරීම් විධිමත්ව කළ නිසා අපට ගසාගෙන යන රැල්ලක් ආවේ නැත. නායකත්වය යන්න අර්බුද කළමනාකරණයේදී වඩාත් සවිඥානිකව වටහා ගත යුත්තක් නම්; අපේ රට තරම් ඊට වෙනත් උදාහරණ ඇත්තේ නැත. රාජ්‍ය නායකත්වට විපක්ෂය පැල් බැඳගෙන විවිධ චෝදනා නඟද්දී අවලාද කරන්නන්ට කෑ ගසන්නන්ට ඕනෑ තරම් කෑ ගසන්නට දී වැඩ කර පෙන්වූයේය. ඔවුන් පාර්ලිමේන්තුව කැඳවන්නේ කෙසේදැයි මාධ්‍ය ඔස්සේ සාකච්ඡා කරමින් සිටියදී ජනාධිපතිවරයා වසංගත අර්බූදය මනාව කළමනාකරණය කර ජනතාවට සහන සැලසු‍වේය; ඒ භෞතික සහන පමණක් නොවේ. විශ්වාසය නැමැති ආධ්‍යාත්මික සහනයද සමඟය. වචන සහ ක්‍රියාව අතර වන පරතරය මෙදා තරම් කවරදාවත් ජනතාව අත්දකින්නට, අත්විඳින්නට නැත.
විපක්ෂයට දැන් යළිත් මාතෘකාවක් ලැබී තිබේ. දැන් දැන් පෙර කළ දෑ මතක නෑ සේ මේ මතු වූ පොකුර ගැන ඔවුහු කොරහේ කිඹුල්ලු දකිති. කොරෝනා පාලනය කරන සැටිත්, පාලනය කර රට සංවර්ධනය කරන සැටිත් සමහරු වාග් චිත්‍ර නඟන්නේ පළිඟු මාළිගා මවා පාමිනි. අනාගත නායකයා එන්නට පරක්කු වෙන බැවින් ආර්යාව ලෙස මේ ස්ථානයට තමා පැමිණි බව පවසන ආර්යාවෝ මෙන්ම, වෙළෙඳසැලේ තමන්ගේ වාරය එනතෙක් බිල ගෙවීමට බලා සිටින සැබෑ නායකයන්ගේ බිරින්දෑවරුත් දකින කල; මවන සිහින මාළිගාවල දිග පළල මැන ගන්නට සාමාන්‍ය මිනිසුන්ට නොහැකි වන්නට ඉඩ නැත. කන්දකාඩු පුනරුත්ථාපන කඳවුර මුල් කරගනිමින් මතුවූ කොවිඩ් 19 රැල්ල රටේ මානව සම්පතට හෝ ආර්ථිකයට අබැටක් තරම් හානි වන්නට නොදී තමා පාලනය කරගන්නා බව ජනාධිපතිවරයා රටම ඉදිරියේ පැවසුවේ තමන්ගේ ක්‍රියා කලාපය කෙරෙහි වන අතිමහත් විශ්වාසයෙනි. මේ වැනි අවස්ථාවක ජනතාවගේ මනස විශ්වාසයෙන් සුවපත් කිරීම අත්‍යවශ්‍ය කාරණයකි. තමන් මුඛ ආවරණ පලඳින්නේ නැතැයි වහසි බස් දෙඩූ ලෝක බලවතා වන ඩොනල්ඩ් ට්‍රම්ප් පවා කොරෝනා අබියස දුර්මුඛව මුඛ ආවරණ පැලඳ සිටින සේයාරූ සමාජ මාධ්‍ය ඔස්සේ බෙහෙවින් සංසරණය විණි. ප්‍රාන්ත ආණ්ඩුකාරයාගේ සිට ලෝකයේ වෙනත් ජනනායකයන් සමඟ පවා කොරෝනා නිසා ආරවුල් ඇති කරගත් ට්‍රම්ප් වැනි නායකයන් ඉදිරියේ අප ජනාධිපතිවරයාගේ සැලසුම් සහගත බව ආදර්ශයකි. පළමු පොකුර මතු වූ සැණින් සෞඛ්‍ය අංශය සමඟ දැඩි විශ්වාසයකින් හා ක්‍රමවත්ව මෙකී ලෝක අර්බුද තත්ත්වය පවා මැනවින් පාලනය කිරීමම, මේ දෙවැනි පොකුර සම්බන්ධයෙන්ද අපට ආදර්ශයකි. එනිසා ජනතාවට බිය වන්නට අබැටක හෝ දෙයක් නැත.
පළමුව රෝග ව්‍යාප්තිය හඳුනාගනිමින් ආශ්‍රිතයන් හැකි ඉක්මනින් සොයා නිරෝධායනය කිරීමෙන් රෝග ව්‍යාප්තිය පාලනය කර ගැනීමට රජය සමත්වී තිබේ. එකී නිරෝධායන ක්‍රියාවලිය රටේ ආර්ථිකයට හානියක් නොවන පරිද්දෙන් සක්‍රිය නිෂ්පාදන ආර්ථිකයක් ක්‍රියාවට නංවමින් ක්‍රියාත්මක කළ යුතුව තිබේ. එනිසාම බොහෝ අය කටට එන පරිද්දෙන් ලොක්ඩවුන් කිරීමක් ගැන කතා කළත්, එසේ ලොක්ඩවුන් කිරීමෙන් වන ආර්ථික කඩාවැටීම ගැන එසේ කියන අය සවිඥානික නැත. එනිසා මේ කරුණු දෙකම එකිනෙකට නොදැවැනි සේ සංතුලනය කළ යුතුව තිබේ. එසේ කොරෝනාවට මුහුණ දෙන ගමන්ම බිඳ වැටුණු ආර්ථිකයේ බියකරු සෙවණැලිවලින් ද ගැලවීමට සිදුව ඇත. මේ සියල්ල ක්‍රමවත්ව හා විධිමත්ව කර ගන්නේ නම් මොන වසංගතය ආවත් කිසිවකු හෝ බිය විය යුතු නැත.
කන්දකාඩු පුනරුත්ථාපන කඳවුරේ සිද්ධිය සම්පූර්ණයෙන්ම අහම්බයකි. එය කිසිවකු හෝ හිතා මතා කරන ලද්දක් නොවන අතරම; පරිස්සම් නොවීමේ ප්‍රතිඵලයක් ලෙස බිහි වූවකි. එනිසාම අප සියලු දෙනාගේ වගකීම විය යුත්තේ ඇතිව තිබෙන අවදානම් තත්ත්වය තවදුරටත් ව්‍යාප්ත වීම අවම කර ගැනීමය. ලොව කොවිඩ් වසංගතයට මුහුණ දුන් රටවල් අතර එකී අවදානම නිසි පරිදි කළමනාකරණය කරගත් රටක් ලෙස මෙය අපට අපහසු නැත. ආණ්ඩුවේ නිවැරදි දැක්ම මෙන්ම පොදු ජනතාවගේ අසීමිත කැපවීම හා වගකීමද මෙහිදී අත්‍යවශ්‍ය කාරණා වෙයි. මෙවර පෙර පොකුර හමුවූ විට පරිස්සම් වූවාටත් වඩා පරිස්සම් විය යුතු යැයි අප කියන්නේ ඒ නිසාය. මේ වනවිට සංචරණයට සීමා පනවා නැතත්, අනවශ්‍ය ගමන් බිමන් වලින් වැළකීමටත්, සෞඛ්‍ය උපදෙස් නොපිරිහෙළා ඉටු කිරීමටත් වගබලා ගැනීම අප සැමදෙනාගේ යුතුකමකි.
රටක් ලෙස සාමාන්‍ය තත්ත්වයට පත්වූ විගස සිදුවූ කොරෝනාවේ නැවත නැගිටීම අපට පසක් කරන්නේ එය පාලනය කළ හැකි වුවත් සම්පූර්ණයෙන්ම තුරන් කිරීම අපහසු බවය. ජර්මනිය, දකුණු කොරියාව එසේ දෙවැනි මතුවීමක් පෙන්නුම් කළ රටවල්ය. එනිසා මේ ලොව වෙසෙන සකල මනුෂ්‍ය වර්ගයාටම මේ වයිරස බලපෑම හේතුවෙන් මුව ආවරණ දමා, නිතර දෑත් සෝදා, මීටරේ දුර ආරක්ෂා කර ගනිමින් සිටීමට සිදුවීම නොවැළැක්විය හැකිය. පසුගියදා අගමැති මහින්ද රාජපක්ෂයන් සමඟ පැවති පුවත්පත් කතුවරු හමුවේදී ඵතුමා පැවසුවේ දෙවැනි රැල්ලක් ගැන කිසිම බියක් ඇති නොකර ගත යුතු බවයි.
මෙරට දැනට ක්‍රියාත්මක කරන්නේ ද එවන් වැඩපිළිවලකි. ඒ, රටේ මෙන්ම අපේද යහපත වෙනුවෙනි. එනම් වයිරසය සමඟ ජීවත් වීමේ ක්‍රමය අප සොයා ගත යුතුව ඇත. කොරෝනාවට අතවැනීම නවතා මඟ හැරීම කරන්න යැයි ඔබට අප උදක්ම කියන්නේ ඒ නිසාය.
සෞඛ්‍ය නිර්දේශ අකුරටම පිළිපදිමින් ඡන්දය පැවැත්වීමට සියල්ල සූදානම් කෙරෙමින් තිබේ. නිරෝධායන ක්‍රියාවලියට අනුගත කර සිටින්නන්ට ජංගම ඡන්ද දැමීමේ ක්‍රමයක් ක්‍රියාත්මක කිරීමේ සාකච්ඡාවක් මේ ලියන මොහොතේත් පැවැත්වෙමින් ඇත. මැතිවරණ කොමිසමේ සභාපතිවරයා පවසන පරිද්දෙන් සියලු සෞඛ්‍ය ආරක්ෂිත ක්‍රම මුළුමනින්ම ඡන්ද පොළෙහි ක්‍රියාත්මකය. එනිසා ඡන්දය දැමීමට පැමිණීමට අනිසි බියක් ඇති කරගත යුතු නැත. ආණ්ඩුව අපහසුතාවට පත් කිරීමේ අභිලාෂයෙන් සමහරු අසත්‍ය ප්‍රකාශ ප්‍රචාරය කරති. එයින් අපහසුතාවට පත්වන්නේ රටවැසියන් ලෙස අප සැවොමය. එනිසා මේ වනවිට වයිරසයෙන් මෙන්ම වයිරසයටත් වඩා වැඩි වේගයෙන් පැතිර යන බොරු තොරතුරුවලින්ද ආරක්ෂා වීමට ජනතාව සවිඥානික විය යුතුව ඇත.
