අප මේ ගෙවන්නේ තීරණාත්මක සංක්‍රාන්ති සමයකි. ශ්‍රී ලංකාවේ සත් වැනි විධායක ජනාධිපතිවරයා තේරීම සඳහා පැවැත්වෙන ජනාධිපතිවරණ ක්‍රියාන්විතයේ ජනතාව අතේ ඇති සහ ස්වාධීන මැතිවරණ කොමිසම සතු තීරණාත්මක භාරධුර කාර්යය වෙනුවෙන් මේ සති අන්තය වෙන් වෙයි. තමන්ගේ රට කරවන විධායකය සහ ව්‍යවස්ථාදායකය සේම රටේ නීති-රීති වෙනස් කළ හැකි, පාලනය වෙනස් කළ හැකි බලය සහිත මහජන නියෝජිතයන් තෝරා පත් කරගැනීමේ පරම අයිතිය හිමි එක් කෝටි හැට ලක්ෂයකට ආසන්න ඡන්ද දායකයන් සංඛ්‍යාවක් සඳහා 16 වැනිදා, සෙනසුරාදා තම බලය පාවිච්චි කිරීමට ඡන්ද පොළ දොළොස් දහස් අටසිය හතළිස් පහක් විවෘත විය. මේ බලය හිමි මෙරට පුරවැසියන් අතුරින් සියයට 80ත් 85ත් අතර පිරිසක් ඡන්ද පොළට පැමිණ තම බලය පාවිච්චි කරනු ඇතිය යන්න මැතිවරණ විශේෂඥයන්ගේ පූර්ව නිගමනය වීය. මෙවර ජනාධිපතිවරණය සම්බන්ධයෙන් බොහෝ දෙනකුගේ අවධානය යොමුව ඇති සැටියක් පෙන්වයි. ඊට හේතු වන්නේ නැවුම් අපේක්ෂකයන් දෙදෙනකු කරළියට පැමිණීමය. මේ අපේක්ෂකයන් දෙදෙනා අතර පවතින තරගය සැලකිය යුතු තරම් තියුණු එකක් වන්නේ ඔවුන් ජනාධිපති පුටුවට පත් කිරීමේ ඡන්ද බලය ඇති ඡන්ද දායකයන්ද මෙවර අතිවිශාල උනන්දුවකින් මේ කෙරෙහි පසු වීමය. විශේෂයෙන් අලසව සිටි ඡන්ද දායකයන් යළි ඡන්ද පොළට ඇද්දවීමේ ආකර්ෂණයක් මේ ජනාධිපති අපේක්ෂකයන්ට තිබූ බව පැහැදිලිව පෙනී ගිය කරුණකි.
මේ ජනාධිපතිවරණයේ ප්‍රදර්ශිත තවත් සුවිශේෂ තත්ත්වයක් වූයේ මෙවර මාරාන්තික මට්ටමේ ප්‍රචණ්ඩ ක්‍රියා සිදු නොවීමය. පසුගිය 2015 මැතිවරණයද බොහෝ දුරට සාමකාමිව පවත්වන්නට මැතිවරණ නිලධාරීන්, පොලීසිය සහ සිවිල් සමාජය කටයුතු කළද අවසන් දින කිහිපය අතරතුර ඡන්ද රැස්වීමකදී සිදු වූ වෙඩි තැබීමකින් අසරණයකු ඝාතනයට ලක් වූයේය. එසේ වුවත් මැතිවරණ කොමිසම, පොලීසිය සහ වගකිව යුතු සියලු පාර්ශ්ව මෙවර මැතිවරණයේදී එවැනි මට්ටමේ ප්‍රචණ්ඩත්වයකට යෑමට කිසිදු අවකාශයක් නොසැලසීම සැලකිය යුතු එකක් විය. එයට අදාළ පාර්ශ්වවලට රටේම ප්‍රශංසාව හිමි විය යුතුය. එසේම මැතිවරණ ප්‍රචාරණ ව්‍යාපාරයේදීද සියලු අපේක්ෂකයන් සහ පක්ෂ සාධනීය මට්ටමින් විනයානුකුලව හැසිරුණු ආකාරය දැකිය හැකි විය. කෑගල්ලේදී පමණක් එක්තරා මැතිවරණ රැලියකට ගිය තරුණියක දූෂණයට ලක් කිරීමේ සිදුවීම හැරෙන්නට බොහෝ ප්‍රවාරණ කටයුතු මැතිවරණ නීති-රීතිවලට අනුකූලවම සිදු විය. මේ නිසාම රට තුළ ඇඟට දැනෙන ආකාරයේ මැතිවරණ උණුසුමක් නොතිබිණි. එයට හුදෙක් හිතට පමණක් දැනෙන උණුසුමක් පමණක් විණි. අප දුටු තවත් සාධනීය පියවරක් වූයේ මෙවර අපේක්ෂකයන් පරිසරය පිළිබඳවද උන්නදු වීමය. සෑම පක්ෂයක්ම පාහේ තම මැතිවරණ රැලි අහවර වූ පසු ඒ ස්ථාන ඉතා හොඳින් පිරිසිදු කිරීමට කටයුතු කිරීම පැසසිය යුතුය. මෙවැනි පියවරවලින් පෙනී යන්නේ රටේ ශිෂ්ටත්වයද යම් වර්ධනීය ප්‍රවණතාවකට අවතීර්ණ වී ඇති බවයි. මේ තත්ත්වයට බොහෝ දුරට බලපෑ කරුණක් වූයේ දේශපාලනික ග්‍රහණයෙන් මිදුණු මැතිවරණ කොමිසමක් සහ පොලීසියක් රටේ තිබීමය. ඒ ස්වාධීනත්වයේ, නීතිගරුකත්වයේ සහ විනයානුකූල භාවයේ සහනය පුරවැසියන් ලෙස සැබෑ ලෙසම මේ ගෙවුණු මැතිවරණ සමයේ අපි භුක්ති වින්දෙමු. යම් හෙයකින් දේශපාලනයට පහසුවෙන් හැසිරවිය හැකි පොලීසියක් හෝ මැතිවරණ යන්ත්‍රණයක් පැවතියේ නම් මේ සහනශීලි වාතාවරණය අපට සිහිනයක් පමණක්ම වනු ඇත. මේ මැතිවරණ සමයේ අප අත්දුටු තවත් විශේෂ ලක්ෂණයක් වූයේ පක්ෂ පාට බදාගත් පාක්ෂිකයන්ගේ වඳ වී යෑමය. කැපුවත් තමන්ගේ පක්ෂය අත් නොහරින පාරම්පරික දේශපාලනයකට බවුතීස්ම වීමේ ආවේණික ලක්ෂණයන්ගෙන් යුතු ශ්‍රී ලංකාවේ වර්තමාන පරම්පරාව මේ ජානගත තත්ත්වයෙන් වියුක්ත වෙමින් තිබේ. තරුණයන් දේශපාලනය ගැන උනන්දු නොවීම සම්බන්ධයෙන් අප කලබල විය යුතු වුවද පක්ෂ-පාට බදාගෙන මැරෙන්න යන දේශපාලනයෙන් ඈත් වීම ප්‍රජාතන්ත්‍රවාදයේ දිදුලන අනාගතයක් ගැන එක්තරා පෙරනිමිත්තකි.
ප්‍රජාතන්ත්‍රවාදි සමාජයක දැකිය හැකි උත්තුංග ලක්ෂණ කරා රටක් ලෙස ගමන් කරන බව පෙන්වන මේ පෙරනිමිති සුබ-අසුබ බවට පත් කරගැනීමේ බලයද ඇත්තේ මේ සර්වජන ඡන්ද බලය හිමි අපටමය. අප ගමන් කළ යුත්තේ මෙතැනින් ඉදිරියටය. නීතියට ගරු කරන, හොර-බොරු නොකරන, තමන්ගේ වැරදි හංගන්නට හෝ තමන් හැංගෙනන්ට යන සමාජයක් වෙනුවට; ඉතා විවෘත, මනා ප්‍රජාතන්ත්‍රීය නිදහසක් විඳින රටක් අප නිර්මාණය කරගත යුතුය. මේ ජනාධිපතිවරණයේදී රටක් ලෙස, දේශපාලන නායකයන් ලෙස අප පෙන්වා ඇති ප්‍රගතිය තවදුරටත් ඉදිරියට තල්ලු කළ යුතුය. එය මේ රට කිසිදු යටත්විජිකරණයකට හෝ පැසිස්ට්වාදි ඒකාධිපතිත්වයකට යළි තල්ලු නොකිරීමකට හේතු වන්නකි. ඇතැම් විට මෙවැනි ප්‍රගතිශීලි ඉදිරි පියවරක් වෙනුවෙන් දැනට රටේ පවතින ව්‍යවස්ථාව තුළ හෝ රටේ පවතින සියවස් ගණනක් පැරණී නීති-රීති තුළ අවකාශ නොතිබෙන්නට පිළිවන. එබැවින් මෙකී ස්වර්ග රාජ්‍යයක් සඳහා වූ කතිකාවක් සෑම අංශයකම සිදු විය යුතුය. ඒ සඳහා මේ රටේ ජ්‍යෙෂ්ඨ පුරවැසියන්ගේ සිට තරුණ, කාන්තා ආදි සියලු නියෝජනයන්ගෙන් සමන්විත විය යුතුය. එබැවින් නව කතිකාවට මුල පිරීම සඳහා හොඳ පසුබිමක් සැකසීම අලුතින් පත් වන නායකයන්ගේත් ඔවුන් පත් කිරීමේ බලය සහිත ජනතාවගේත් එකම අරමුණ විය යුතුය.
