අගනුවර හා තදාසන්නව ජීවත් වන බොහෝ ජනතාව මේ දවස්වල කතාබහ කරන මාතෘකාවක් වන්නේ කොළඹදී පැවැත්වෙන බෝරා ප්‍රජාවගේ ආගමික සමුළුවයි. ඉන්දියාවේ සම්භවය ලදැයි සැලකෙන ජන කොට්ඨාසයක් වන ‘ඩාවුඩි බෝරා’ ප්‍රජාව ‘ආෂාරා මුබාරකා’ නමින් පවත්වන දස දින ආගමික සමුළුව සඳහා මෙවර තෝරාගෙන ඇත්තේ ශ්‍රී ලංකාවයි. ෂියා ඉස්ලාම් ආගම අදහන දස ලක්ෂයක් වන බෝරා ප්‍රජාව අතුරින් 21,000කට ආසන්න පිරිසක් මේ සඳහා මෙරටට පැමිණ ඇති බව වාර්තා වෙයි. ඔවුන් 2009 වසරේද මෙරටදී මේ අයුරින්ම සමුළුවක් පවත්වා ඇති අතර, එවරද (මෙතරම් සහභාගිත්වයක් දක්නට නොලැබුණත්) සැලකිය යුතු පිරිසක් කොළඹට පැමිණි බව ඒ දවස්වල කතා කෙරිණි.
බෝරා ජාතිකයකු පළමුවම ශ්‍රී ලංකාවට එන්නේ 1830දීය. ඉන්දියාවේ සිට වෙළෙඳාම් කිරීමේ අරමුණින් පැමිණි බෝරා ප්‍රජාව නියෝජනය කරන ව්‍යාපාරිකයකු එලෙස ශ්‍රී ලංකාවට පැමිණි මුල්ම බෝරා සමාජිකයා ලෙස සැලකෙන අතර, ඔහුගේ නැව අනතුරට පත් වීම හේතුවෙන් ගාල්ලේ නව ජීවිතයක් ඇරඹීමට කටයුතු කළ බව මෙරට බෝරා ඉතිහාසය කියයි. උපතින්ම ව්‍යාපාරකරණය උරුම කරගත් මේ ප්‍රජාව අගනුවරටද පැමිණ ක්‍රමයෙන් තම ව්‍යාපාර ස්ථාවර කරගැනීමට පටන් ගත්හ. අදටද මෙරට ප්‍රධාන පෙළේ අපනයන ව්‍යාපාර කිහිපයකම අයිතිය ඇත්තේ මොවුන් සතුවය.
සාමකාමිව ඉස්ලාම් ආගමික දර්ශනයක් අනුගමනය කරන, අසල්වැසි ඉන්දියාවේ ප්‍රවේණික පසුබිමක් සහිත මේ ප්‍රජාව මෙවර ශ්‍රී ලංකාවට පැමිණීම විශේෂිත වූයේ ඔවුන් සංඛ්‍යාත්මකව විශාල ප්‍රමාණයක් පැමිණීම සහ ඒ හේතුවෙන් රටේ සංචාරක ව්‍යාපාරය ඇතුළු සමස්ත ආර්ථිකයට ඇති වන යහපත් බලපෑමය. පැමිණි 21,000ක පිරිස මෙරට ගත කරන දින 10 තුළ අමෙරිකානු ඩොලර් මිලියන 35 ඉක්මවූ විදේශ විනිමය ප්‍රමාණයක් ශ්‍රී ලංකාවේ සංචාරක කර්මාන්තය ඇතුළු ක්ෂේත්‍ර වෙත ලැබීම අවධානය යොමු කළ යුතු කරුණකි. පසුගිය අප්‍රේල් 21 වැනිදා එල්ල වූ අන්තවාදි මුස්ලිම් ත්‍රස්තවාදීන්ගේ ප්‍රහාරයෙන් පසු ඇද වැටුණු සංචාරක කර්මාන්තයට ශක්තියක් වෙමින් ශ්‍රී ලංකාව ලෝක ප්‍රජාව අතර සුරක්ෂිත රටක් බවට විශ්වාසය තහවුරු කිරීමට මේ සමුළුව විශේෂයෙන් වැදගත් බව මෙරට බෝරා ප්‍රජාව විශ්වාස කළ අතර, සැබැවින්ම එය රටට දැනෙන ප්‍රතිඵලයක් විය.
මේ වන විටද කොල්ලුපිටිය සහ බම්බලපිටිය අතර මුහුදුබඩ මාර්ගය මුළුමනින්ම වැසී ඇත්තේ ඒ ප්‍රදේශයේ දේවස්ථානයක් පසුබිම් කරගෙන ඔවුන්ගේ ආගමික සමුළුව පැවැත්වෙන නිසාය. මේ මාර්ගය අවහිර වීම සහ අධික ජනතාවක් මේ ප්‍රදේශයේ සැරිසැරීම නිසි ලෙස කළමනාකරණය කිරීමේදී පොදු ජනතාවට ඇති වු ඇතැම් ගැටලු නිසා එහි අප්‍රසාදය රජයට එල්ල වීම වැළැක්විය නොහැකිය. මේ තත්ත්ව කළමනාකරණය කරගැනීමට රජය සහ වගකිව යුතු පාර්ශ්ව සාධනීය පියවර ගත යුතු බව මෙහිලා සිහිපත් කළ යුතුය.
එය වෙනම කතාවකි. එහෙත් පසුගියදා සිදු වීමට ගියේ මේ හරහා දේශපාලනික වශයෙන් උසිගැන්වුණු පිරිසකගේ පිළිකුල් සහගත ක්‍රියාවලියකි. මේ සමුළුව කෙරෙහි විරෝධයක් දක්වා සම්පූර්ණ ක්‍රියාවලිය අවුල්සහගත බවට ලක් කිරීමේ විශාල වැඩපිළිවෙළක් පිළිබඳ තොරතුරු අනාවරණය වීමත් සමඟ පොලීසිය කොළඹ මහේස්ත්‍රාත් අධිකරණය මඟින් ඊට වාරණ නියෝගයක් ගත්තේය.
මේ විරෝධය සඳහා මූලික වූයේ කිසිදු දෙයක හොඳක් නොදකින, දේශපාලනිකව උසි ගැන්වුණු චීවරධාරී පිරිසකි. ඔවුන් එසේ පැමිණියේ බෝරා ප්‍රජාව කවුරුන්දැයි නොදැන නොවේ. ඔවුන්ට අවශ්‍ය වූයේ රටේ ආගමික සංහිඳියාව කෙලෙසා, එහි අපකීර්තිය රජයේ ගිණුමට බැර කොට, ඉදිරියේ එන මැතිවරණවලදී තමන් පිනවන අපේක්ෂකයාගේ ගමනට පාවඩ එළීමය. ඔවුන් මාධ්‍ය ඉදිරියේ කළ කතාවෙන් පෙනෙනුයේ බුදුදහමටද නිගා දෙන අයුරකි. එසේ වුවද මේ නිගාවේ තරම දේශපාලන සීතාම්බරයෙන් දෑස් වසාගත් මේ නාමික චීවරධාරීන්ට වැටහෙන්නේ ද යන්න ගැටලුවකි. මේ විරෝධය පිළිබඳ අදහස් දැක්වීමට පැමිණි භික්ෂූන් අතර මහින්ද රාජපක්ෂ මහතාගේ උපදේශකත්වයේ ‘වැඩ සිටි’ සංඝයා වහන්සේ ද රූපවාහිනී තිරවල දැකිය හැකි විය.
පෙරද කී ලෙස 2009 වසරේදී ද ලෝ වැසි බෝරා ප්‍රජාව ශ්‍රී ලංකාවට පැමිණ සමුළුවක් පැවැත්වූහ. එවකටද රටේ ආණ්ඩුවක් තිබිණි. මේ හිමිවරුන් එදවස ඇස්-කන් පියාගෙන සිටියේ එවකට ආරක්ෂාව භාරව සිටි අය තමන් කුදලාගෙන ගොස් හිරේ දමාවිද යන බිය නිසාද? එසේ නැති නම් සුදු වෑන් භීතිකාව නිසාද? යන්න ගැටලුවකි. ඒ කෙසේ වෙතත් එදා හොඳ වූ සමුළුව ඔවුන්ට අද පිළිලයකි! අතළොස්සක් වූ මේ පිරිස හැරෙන්නට කිසිවකුත් මෙවර සමුළුව කෙරෙහි විරෝධාකල්පයක් දැක්වූයේ නැත. එයට හේතුව ඔවුන් කෙරෙහි පවතින අවබෝධය මිස, දේශපාලන උසිගැන්වීම් නොලැබීම නොවේ.
බලය අත්පත් කරගැනීමේදී ඉදිරියේ ඇති අභියෝග දකින මේ දේශපාලන හස්තයන් හැකි සෑම විටකම උත්සාහ දරන්නේ රටේ සිදු වන කවර ක්‍රියාකාරකමක් හෝ සංසිද්ධියක් හෝ දේශපාලන බලය ඩැහැගැනීමේ හිණිමඟක් කරගැනීමටය. ඔවුහු මේ සඳහා විවිධ පුද්ගලයන් හෝ කණ්ඩායම් යොදාගැනීමට සූක්ෂ්ම වෙති. බොහෝ දෙනකු එවැනි කූට න්‍යායපත්‍රවලට හසු නොවුණද, දේශපාලනික වශයෙන් හෝ දෘෂ්ටිමය වශයෙන් හෝ දුබලතාවෙන් පසු වන්නන් මෙවැනි නොහික්මුණු දෑ කරා යොමු වීම වැළැක්වීම අසීරුය. කෙසේ වුවද සමස්ත සමාජය සබුද්ධිකව, විමසුම් සහගතව සිටින්නේ නම් ඔවුන් දෑස් වසා අඳුරට ගෙන යන්නට මේ දේශපාලනික නොදරුවන්ට හැකියාව ලැබෙන්නේ නැත.
