නිරෝගී සිහින් සිරුරක් ලබා ගන්නට අකැමැති වන්නේ කවුද? කොතෙක් උත්සාහ කළත් කෙට්ටු නොවන, සුවපත් සිරුරකට හිමිකම් නොකියන ඔබේ සිතට සහනය දනවන උපදෙස් කිහිපයක් ප්‍රවීණ ආහාර හා පෝෂණවේදී ඇන්ඩි බෙලට්ටි මෙලෙස දක්වනවා. මේ උපදෙස් නිවැරැදිව සතියක් පුරා පිළිපැද්දොත් බොහෝ දුරට ඔබේ සිහිනය සැබෑ කර ගන්නට හැකි වෙනු ඇතැයි ඇය කියනවා.
හැකිතරම් වතුර බොන්න
ඔබේ සිරුරෙහි ඇති සෑම සෛලයක් ම නිරෝගීව තබමින් එහි හැඩය රැකදීමට ජලය උපකාරී වෙනවා. ප්‍රමාණවත් තරම් වතුර නොබීවොත් සිරුරෙහි සෛල වියැළී හැකිලෙනවා. ඔබේ බර අඩු කරගන්නට ඕනෑ නම් හොඳින් වතුර බොන්න. බර පාලනයට වතුර කදිම ඔසුවක්. පැණි බීම හෝ රසකළ බීම වර්ග එයට නුසුදුසු ම පාන වර්ගයි.
රුව වඩන්නට යුෂ වර්ග එපා
රුව වඩන්නට හෝ සිහින් වන්නට විවිධ යුෂ වර්ග බොන්නට ඔබත් සිතනවාද? ඒ සියල්ලට වඩා හොඳම බීම වතුරය. බීම හෝ යුෂවලින් ඔබේ සිරුරට ‘සීනි’ එකතු වේ. පිපාසය වැඩි වේ. එමෙන් ම කෑම රුචිය වඩයි. එමඟින් වැඩිපුර ආහාර ගැනීමට පෙළැඹේ. ශරීරයේ සීනි මට්ටම ඉහළ යාමට යුෂ හා බීම වර්ග හේතු වේ.
ලුණු භාවිතය අඩු කරන්න.
ලුණු කෑම අඩු කරන්න. සෝස් වර්ග, කට ගැස්ම, අච්චාරු, ලුණු, දෙහි මෙන් ම ලුණු වැඩිපුර අඩංගු ආහාර අඩු කරන්න. බත්වලට ලුණු දැමීමෙන් වළකින්න. සළාද වර්ග හෝ බීම වර්ග සෑදීමේදී ලුණු අඩු කරන්න.
අත්හල යුතු ආහාර හා කුළුබඩු
සීනි සහ ග්ලූටන් යෙදූ ආහාර ගැනීමෙන් වැළකිය හැකිනම් වඩා සුදුසුය. සීනි සම්පූර්ණයෙන් ම නතර කරනවා නම් ඒ වෙනුවට භාවිතා කරන ආදේශක පැණි රසකාරක පිළිබඳ වඩාත් සැලකිලිමත් විය යුතුය. යම් කුළුබඩුවක් වෙනුවට යොදන වෙනත් ද්‍රව්‍ය පෝෂණය අතින් අඩු විය හැකිය. එය වඩා අහිතකර විය හැකිය. තෙල්, පිටි, සහ ලුණු වැඩි ආහාර අත්හරින්න.
කෙඳි සහිත ආහාර වැඩිපුර
කෙඳි වැඩිපුර අඩංගු අලුත් එළවළු සහ පලතුරු සිරුරේ බර අඩු කිරීමට මහඟු පිළියමකි. එමඟින් සිරුරේ පරිවෘත්තීය ක්‍රියාදාමය හොඳින් සිදුවේ. ආහාර ජීර්ණයට පහසුය. විටමින් සී සහ ප්‍රතිඔක්සිකාරක බහුලය. ඔබේ ආහාරවේල කොළ වර්ග එළවළු සහ පලතුරුවලින් පොහොසත් වූ විට අත්වන වාසි රැසකි. ඉක්මනින් කුස පිරෙයි. විටමින් සහ පෝෂක බහුලය. රුව සහ ආයු වඩයි. කොළ ගෝවා, මල්ගෝවා බෝංචි දඹල, මෑ, ඇටවර්ග, රටකජු මුං ඇට වැනි ධාන්‍ය හා පලතුරු ඉතා සුදුසුය.
විටමින් පෙති හා කෘත්‍රිම අාහාර
ආහාර මත නො යැපෙන්න
ස්වභාවික එළවළු, පලතුරු හෝ මස් මාංශවලින් ලැබෙන පෝෂණය කෘත්‍රිමව සකස් කළ ආහාරවලින් හෝ පෙතිවලින් ලබා ගත නොහැකිය. ස්වභාවික ආහාරවලින් ලැබෙන විටමින් ඛනිජ ලවණ හෝ ශක්ති පිටි කළ ආහාර හෝ ටොනික් සිරප් වැනි ක්‍රමවලින් නොලැබේ. විටමින් පෙති හෝ කැප්සියුල්ස්වලින් ස්වභාවිකව ගන්නා ආහාරවලින් මෙන් ගුණයක් නොලැබේ. අමතර ශක්ති ජනක හෝ පෝෂක පිළිබඳ දැන්වීම්වලින් රැවටී ඒවා බහුලව ගැනීමෙන් සිතන තරම් ඵලක් නොවේ.
අමතර කැලරි පිළිබඳව වැඩිපුර නොසිතන්න
කැලරි පිළිබඳ පමණට වැඩි අවධානය ද භයානක විය හැකිය. කැලරි වැඩි ආහාර සිරුර තර කරයි. කැලරි දහනය කිරීමට ප්‍රමාණවත් තරම් වෙහෙස නොවෙන්නන් වැඩිපුර කැලරි සහිත ආහාර ගැනීම අඩු කළ යුතුය. අඩු කැලරි ආහාර ලෙස දක්වා ඇති ආහාරවලින් ද සිතන තරම් වාසි අත් වන්නේ නැත. බොහෝමයක් අඩු කැලරි ආහාරවල වැඩිපුර ඇත්තේ ලුණු සහ ජලයයි. ඒවා වැඩිපුර ආහාරයට ගැනීම කුස පිරෙනවාට වඩා කුස පිපීමට හේතු වේ.
සුභවාදීව සිතන්න
ඔබේ ආහාර රටාව වෙනස් කරගන්න. වඩා සුදුසු ආහාර තෝරා ගන්න. මෙතෙක් සුපුරුදු ක්‍රමයට වඩා අලුත් විදිහට අලුත් රටාවකට කෑම ගන්න උත්සාහ කරන්න. වෙනදා කන තරමට අඩුවෙන් කුස පිරෙන ගුණ වඩන ආහාර තෝරා ගන්න. අඩුවෙන් කන්න. ව්‍යායාම කරන්න. අලුත් ක්‍රමවල කෑම වට්ටෝරු අත් හදා බලන්න. ඔබේ ආහාර රටාව සහ නව වෙනස්කම් ගැන සුභවාදීව සිතන්න. විශ්ව කර්මයක් නොවුණත් සතියක් තුළ ඔබට පැහැදිලි වෙනසක් දැනෙනු නිසැකය.
අන්තර්ජාලයෙනි
සාගරිකා
