WORLD HISTORY
- ලෝක ඉතිහාසය
කර්තෘ : කලාකීර්ති ආචාර්ය එඩ්වින් ආරියදාස
ප්‍රකාශක : එම්.ඩී.ගුණසේන සහ සමාගම
ජී. එම්. ට්‍රෙව්ලියන් නමැති ඉතිහාසඥයා සඳහන් කරන පරිදි ඉතිහසය යනු තනි විෂයක් නොවේ. එය විෂයයන් ගණනාවකින් සැදුම් ලත් මහා ගෘහයකි. එමෙන්ම මහාචාර්ය ඊනියාර් සඳහන් කළ පරිදි එය සමාජ ක්‍රමවල මතක සටහනක් වේ. එය අතීතයේ විසූ ශ්‍රේෂ්ඨ මිනිසුන් හා ලොව හැරවුම් ලක්ෂ්‍ය කැටිකොට වර්තමානය ඉගෙනීමට අපට ලබා දුන් ස්වර්ණමය ද්වාරයක් බඳු ය.
ඉතිහාසය යනු ඉතා සංකීර්ණ වූ ද, විචිත්‍ර වූ ද විෂයයකි. ලෝක ඉතිහාසය සරල සුගම ලෙස කැටි කළ ග්‍රන්ථ වල හිඟකම හා ශ්‍රී ලංකාවේදී නම් සිංහල භාෂාවෙන් පළවූ ග්‍රන්ථ මෑත යුගයේ නොමැති වීම මෙරට පාඨක ප්‍රජාවට මෙම විෂය අධ්‍යයනයේදී තිබූ ප්‍රමුඛ දුෂ්කරතාවයි. යුරෝපා ඉතිහාසය, රෝම ඉතිහාසය, ග්‍රීසියේ කතාව, ඉන්දියානු ඉතිහාසය ආදී විවිධ ශිෂ්ටාචාර කේන්ද්‍රගත පොත පත පළවී තිබුණ ද, ඒවා වත්මන් යුගයේ දක්නට නොලැබීම හේතුවෙන් පාඨකයන්ට ඒ යුගයන් පිළිබඳ ඉතිහාසය කියැවීමට මඟක් නොවීය.
කලාකීර්ති ආචාර්ය එඩ්වින් ආරියදාස සූරීන් විසින් සැකසූ “ලෝක ඉතිහාසය“ නම් හුරුබුහුටි ග්‍රන්ථය එම පාඨක පියාසය සංසිඳුවීමේලා එළිදැක්වූ දියුණු කෘතියක් බැව් සඳහන් කළ යුතුය. මේ ග්‍රන්ථය හරහා මානව ශිෂ්ටාචාරයේ මුල සිට 21 වැනි සියවසේ මුල් වර්ෂ 18 දක්වාම, එනම් 2018 වසර දක්වා ම විද්‍යානුකූල ලෙස පෙළගස්වා තිබීම හේතුවෙන් තොරතුරු අධ්‍යයනයේදී පාඨකයාට සුවිශේෂී වරප්‍රසාද රැසක් හිමිවීමට මඟ පාදා ඇත.
මේ ලෝක ඉතිහාස ග්‍රන්ථයේ සිදුවීම් පෙළගස්වා ඇති ආකාරය නිසාවෙන් පරිශීලකයාට අවශ්‍ය තොරතුරු පහසුවෙන් සොයා ගැනීමට මංපෙත් විවර කර දී ඇත. දුරකථන නාමාවලියක් පෙරළමින් තොරතුරු සොයා යන පරිද්දෙන්, ලෝක ඉතිහාසයේ සිදුවීම් සුපැහැදිලි ක්‍රමවේදයක් යටතේ පිටු අතර සොයා යෑමට තරම් පහසුකම් මෙහි අන්තර්ගත ය. පෞරාණික ලෝකය, මධ්‍යකාලීන යුගය හා පහලොස්වන සියවසේ සිට නූතන යුගය දක්වා පරිච්ඡේද නවයක් (09) යටතේ ලෝක ඉතිහාසයේ වැදගත් සිදුවීම් මැනවින් පෙළ ගස්වා ඇති ග්‍රන්ථ සකසුවාණන්, ඒ සෑම පරිච්ඡේදයක් ම බලය හා දේශපාලනය, යුද්ධය හා සාමය, සමාජය හා සංස්කෘතිය, ගවේෂණය හා අධිරාජ්‍ය, වෙ‍ෙළඳාම හා කර්මාන්ත, විද්‍යාව හා තාක්ෂණය, ආගම් - විශ්වාස හා චින්තනය යන උප කොටස් හතක් (07) යටතේ ක්‍රමානුකූල ලෙස වර්ගීකරණය කර ඉදිරිපත් කරයි. මේ හේතුවෙන් ඒ ඒ සියවසේ මානව සමාජයේ ලැබූ ජයග්‍රහණ, පසුබැසීම්, සොයා ගැනීම්, රාජ්‍යයේ ස්වභාවය, දියුණුව හා පරිහානිය කොතෙක්ද යන්න පාඨකයාට ම ස්වයංව අවබෝධ කර ගැනීමට තරම් රුකුල් දෙයි.
ඉතිහාසය වැනි විෂයයන් උගෙනීමේදී බොහෝ පාඨකයන්ට දැනෙන අඩුපාඩුවක් වන්නේ ඒ ඒ යුග වල සිද්ධීන් මූර්තිමත් වන ඡායාරූප, සිතුවම් හෝ සිතියම් දැක ගැනීමට ඇති නොහැකියාවයි. එබැවින් බොහෝ සිදුවීම් හා පුද්ගල චරිත පාඨක මනස තුළ පරිකල්පිත රූප ලෙස ඔවුනොවුන්ට අනන්‍යව ධාරණය කර ගැනීමට සිදුවී තිබිණි. එහෙත් මේ ලෝක ඉතිහාස ග්‍රන්ථයේ ඉදිරිපත් කරන්නාවූ සිදුවීම් වලට අදාළ වෛවර්ණ සිතුවම්, ඡායාරූප හා සිතියම් හරහා ඉතිහාසගත වාර්තා සර්ව සම්පූර්ණ ලෙස අවබෝධ කර ගැනීමට පාඨකයාට මඟ එළිකර දී ඇත. එමඟින් ග්‍රන්ථයේ වාච්‍යාර්ථය තව තවත් තීව්‍ර කර දී තිබේ.
සිංහල පරිවර්තකයා හා පාඨකයා ද එකසේ මුහුණ දෙන අභියෝගයක් වන්නේ කිසියම් භාෂාවකින් එළිදක්වා ඇති පුද්ගල, ස්ථාන, සිද්ධි හෝ යෙදුම් ප්‍රකාශිත අක්ෂර කියැවීමේ ස්වරූපය හා එය උච්චාරණයේදී ජනිත වන හඬ ස්වරූපය එකිනෙකට වෙනස් වීමයි. එ් දෝශය නිදොස් ව ඉදිරිපත් කළ හැක්කේ ලොව විවිධ භාෂා පිළිබඳ පුළුල් අවබෝධයක් හා විවිධ සමාජයන්හි භාෂා යෙදුම් පිළිබඳ පෘථූල දැනුමක් සහිත වූවකුට ම පමණි. මේ ග්‍රන්ථය තුළදී එඩ්වින් ආරියදාස සූරීන් මේ අභියෝගය නම් ඉතා අග්‍රගණ්‍ය ලෙස ජය ගෙන ඇති බව නම් කිවමනාය. එය ඔහුගේ පළල් දැනුමට පිදිය යුතු සම්මානයකි. ඒ හේතුවෙන් මේ පොතේ ඉදිරිපත් කෙරෙන ලෝක ඉතිහාසයේ අවස්ථා ඉතා නිරවද්‍ය මෙන්ම විශ්වාසනීය වන බවට ද සහතිකයක් ලබා දිය හැකිය.
අපගේ ඉතිහාස කතාව ඇතුළත් මහාවංශය ඇතුළු වංශ කතා ග්‍රන්ථ මෙන්ම ලෝක ඉතිහාස ග්‍රන්ථ වලද ඇති පොදු එක් ලක්ෂණයක් වේ. එය නම් ඒ සියල්ල භාවිතයට තරමක් අපහසු ‘මහා ග්‍රන්ථ‘ බවයි. එහෙත් ආරියදාසයන් සැකසූ ලෝක ඉතිහාස ග්‍රන්ථය ඉතා හුරුබුහුටි ප්‍රමාණයේ වීම පාඨනයේ පහසුවද, සිත් ගන්නා සුලු බවද ජනිත කර ඇත. ඒ තුළින් ආකර්ෂණීය මෙන්ම හෘදයංගම බවක් ද ප්‍රකට කරවයි.
ශතවර්ෂ ගණකාවක් පුරා දිව ගිය මානව ඉතිහාසයක්, ශිෂ්ටාචාර රාශියක සිදුවීම්වලින් පොහොසත් ලෝක ඉතිහාසයක් හුරුබුහුටි ග්‍රන්ථයකට කැටි කිරීම මේ කතුවරයාගේ සංකීර්ණ භූමිකාව මොනවට විදහා පාන්නකි. මෙවැනි ව්‍යායාමවල ඇති වෙහෙසකර බව නිසාවෙන්ම අද යුගයේ එවැනි සාර ග්‍රන්ථකරණයකට ලේඛකයන් අත තැබීම දුලබ ය. එහෙත් මානව සමාජය කෙරේ අත්‍යන්ත අවශ්‍යතාවක් ලෙස මෙය හඳුනා ගනිමින්, කාලීන සමාජ අවශ්‍යතාවක් සැපිරීම පිළිබඳ කතුවර එඩ්වින් ආරියදාස මහතාට ආචාරය පුද කළ යුතුය.
මේ ග්‍රන්ථය එළිදැක්වීමේලා තවත් ප්‍රශංසාව හිමිවිය යුතු පාර්ශ්ව කිහිපයක් සිටිත්. ඔවුන් වන්නේ ඉතා රමණීය ලෙස මෙහි පිටු සැකසීම් කළ ශිල්පීන්ටත්, ආකර්ෂණීය නිමාවකින් යුතු කංචුක නිර්මාණයක් කළ ශිල්පියාට හා පොතේ පෙළ සංවිධානය කරමින්, මුද්‍රණ ශිල්පයේ ගුණාත්මක ප්‍රමිතීන් හා භෞතික ගති ලක්ෂණ ඒ තුළට ගොනු කරමින් පොත ප්‍රකාශ කළ එම්.ඩී. ගුණසේන සමාගමටත් ය.
මෙම ග්‍රන්ථයේ වෙහෙසකර ක්‍රියාන්විතය පිළිබඳ මෙහි කතුවර එඩ්වින් ආරියදාසයෝ මෙසේ ප්‍රකාශ කළහ. “මාගේ 97 වසක දිවිය තුළ මා ලියූ පොත පත අතරින් බැරෑරුම් හා වෙහෙසකර වූ ව්‍යායාමය වූයේ මේ පොත අවසන් කිරීමයි. මෙහි වූ පළමු දුෂ්කරතාව වූයේ පරිවර්තන දුෂ්කරතා ය. මෙහි එන ඇතැම් වචනයක නිවැරදි උච්චාරණය තහවුරු කර ගැනීම උදෙසා ශබ්ද කෝෂ කිහිපයක් ම පෙරළා බැලීමට මට සිදු විය. මා හට අවශ්‍ය වූයේ සිංහල සමාජයට ලෝක ඉතිහාසය පහසුවෙන් හැදෑරීමට මඟ කියන අත්පොතක් ප්‍රදානය කිරීමයි. අපේ දරු පරපුරට ලෝකය අතැඹුලක් කිරීමයි...“
උපුල් ගලප්පත්ති
