“අපිට 20 එපා. එපා. එපා. අපිට එපා. ඕන ඕන ඕන අපිට 20 ඕන රට හදන්න ඕන” සමගි ජන බලවේගයත් ආණ්ඩු පක්ෂයේ මන්ත්‍රීවරුන් ඉකුත් 22 වැනිදා පාර්ලිමේන්තු සභා ගර්භය මැද පැයක පමණ කාලයක් විරෝධතා දැක්වීය. පාර්ලිමේන්තුව දැඩි උණුසුම්කාරී තත්වයට පත්ව තිබූ අතර මෙහිදී මැති ඇමතිවරුන් මෙන්ම පක්ෂ විපක්ෂවල මන්ත්‍රීවරුන් නොයෙකුත් සටන් පාඨ කියමින් කෑ කෝ ගසනු දැක ගත හැකි විය.
දෙපාර්ශ්වය එකිනෙකා ළඟට පැමිණ මුහුණට මුහුණ ළංකරමින් කෑ ගසාගත් අතර අතින් පයින් ප්‍රහාර එල්ල කිරීම දක්වා නොගොස් කටින් පමණක් විරෝධතාවයක් පෙන්වීමට දෙපැත්තේම මන්ත්‍රීවරුන් මහත් අපහසුතාවයෙන් යුතුව වගබලා ගත්හ. මෙලෙස මැති සබය ශබ්දාගාරයක් බවට පත්වූයේ 20 වෙනි ආණ්ඩුක්‍රම ව්‍යවස්ථා සංශෝධන කෙටුම්පත පාර්ලිමේන්තුවට ඉදිරිපත් කිරීමට ආණ්ඩුව සූදානම් වනවාත් සමඟිනි.
පාර්ලිමේන්තුව උදෑසන 10.00ට පමණ කථානායක මහින්ද යාපා අබේවර්ධන මහතාගේ ප්‍රධානත්වයෙන් ආරම්භ වී න්‍යාය පත්‍රයට අනුව සිදු කරගෙන ගියේය.
අගමැති මහින්ද රාජපක්ෂ මහතා සහ කැබිනට් මෙන්ම රාජ්‍ය ඇමතිවරු පැමිණ සිටි අතර විපක්ෂ නායක රනිල්, සජිත් ප්‍රේමදාස මහතා ප්‍රමුඛ සමගි ජන බලවේගය නියෝජනය කරන සෙසු පක්ෂවල නායකයන් මෙන්ම පාර්ලිමේන්තු මන්ත්‍රීවරු රැසක් සභාව වෙත පැමිණියහ.
මනූෂ - හේෂා හොර රහසේ හොර වැඩක
මේ අතරතුර සමගි ජන බලවේගය නියෝජනය කරන මන්ත්‍රීවරු කිහිපදෙනකු විරෝධතාව සඳහා අවශ්‍ය දේවල් සංවිධානය කරමින් සිටියේය. ගාල්ල දිස්ත්‍රික් පාර්ලිමේන්තු මන්ත්‍රි මනුෂ නානායක්කාර, රත්නපුර දිස්ත්‍රික් පාර්ලිමේන්තු මන්ත්‍රි හේෂා විතානගේ, නලින් ජයතිස්ස මෙහි ප්‍රධානත්වය ගනු ලැබීය.
විරෝධතා පුවරු, කළු පටි බෙදා හැරීම ඒ වන විටත් ඉතා රහසිගතව සිදු කිරීමට මෙම මන්ත්‍රීවරුන් කටයුතු කළහ.
20 අවජාතකයි, 20 අපිට එපා, ඇතුළු සටන් පාඨ බෝඩ් මත අඳිනු ලැබ ඇත්තේ පාර්ලිමේන්තු සංකීර්ණයේ පිහිටි විපක්ෂ නායක කාර්යාලය තුළදීය.
කළු පැහැති ෆයිල් කවරවල සටන් පාඨ ලියනු ලැබුවේ රෝහිණී කවිරත්න විසිනි. ඇය ඉතා දක්ෂ ලෙස එම පාඨ අඳිනු ලැබුවේ ගුරුවරියක් වශයෙන් කටයුතු කර ඇති බැවිනි. මාතලේ දිස්ත්‍රික්කය නියෝජනය කරන ඇයට මෙය පවරා තිබුණේ නලින් ජයතිස්ස මන්ත්‍රීවරයා විසිනි. දෙමළ භාෂාවෙන් සටන් පාඨ ලියනු ලැබුවේ වඩිවේල් සුරේෂ් මන්ත්‍රීවරයාය.
මෙලෙස අඳිනු ලැබූ සටන් පාඨ මැති සභාව තුළට සඟවාගෙනවිත් හරීන් ප්‍රනාන්දු සහ හර්ෂ ද සිල්වා ඔවුන්ගේ ආසන යට සඟවා තිබුණි.
ස.ජ.බ. අයගේ අත්වල කළුපටි
සමගි ජන බලවේගයේ මන්ත්‍රීවරුන් එකිනෙකාගේ අත්වල කළු පටි ගැටගැසීමට කටයුතු කළ අතර විපක්ෂ නායක සජිත් ප්‍රේමදාස මහතාගේ වම් අතේ කළුපටිය බඳිනු ලැබුවේ මනූෂ නානායක්කාර මන්ත්‍රීවරයා විසිනි.
ලක්ෂ්මන් කිරිඇල්ල මහතා ඉදිරිපිට සිටින අගමැති මහින්ද රාජපක්ෂ මහතා සිනාසෙමින් කියා සිටියේ ඔබතුමා කළු පටියක් බඳින්නේ නැද්දයි කියාය. මම කළු පටියක් ඔබගේ අතේ බඳින්නදැයි අගමැතිවරයා මෙහිදී කිරිඇල්ල මන්ත්‍රීවරයාගෙන් විමසා සිටියේය.
විපක්ෂයේ බාධක සියල්ල බිඳ දමමින් පෙ.ව. 11.40ට පමණ අධිකරණ අමාත්‍ය ජනාධිපති නීතිඥ අලි සබ්‍රී නැගී සිටිමින් 20 වන ව්‍යවස්ථා සංශෝධන පාර්ලිමේන්තුවට ඉදිරිපත් කළහ.
මේ සමඟම නැවත දැඩි විරෝධතාවයක් පාර්ලිමේන්තුව තුළ ඇතිවූ අතර එකම කාලගෝට්ටියක් බවට පාර්ලිමේන්තුව පත්විය.
එහෙත් ආණ්ඩු පක්ෂයේ මන්ත්‍රීවරුන්ගේ අත්පොළසන් මැද මෙම කෙටුම්පත පාර්ලිමේන්තුවට ඉදිරිපත් කෙරිණි.
මේ සමඟම සජිත් ප්‍රේමදාස මහතා රීති ප්‍රශ්නයක් මතු කරමින් 20 සංශෝධනය මෙරට ප්රජාතන්ත්ර
වාදය ආපස්සට යවන බව ප්‍රකාශ කළේය.
බන්දුලගෙන් මුදල් රෙගුලාසි ගැන කතාවක්
එහිදී නැගී සිටි බන්දුල ගුණවර්ධන අමාත්‍යවරයා සමගි ජන බලවේගයේ විරෝධතා මැද මුදල් රෙගුලාසි දිගින් දිගටම කියාගන යනු ලැබීය. ඔහුට සහය වීමට උදය ගම්මන්පිල, කෙහෙළිය රඹුක්වැල්ල, ජනක බණ්ඩාර තෙන්නකෝන් යන අමාත්‍යවරුන් ක්‍රියාත්මක විය.
මහින්දානන්ද අලුත්ගමගේ, රෝහිත අබේගුණවර්ධන, විමල් වීරවංශ ඇතුළු මන්ත්‍රීවරු පිරිසක් දිගින් දිගටම 20 අපිට ඕනෑ බව කියමින් කෑගැසූහ.
මේ අතර ආණ්ඩු පක්ෂයේ සහ විපක්ෂයේ මන්ත්‍රීවරු අතර කිසිඳු ගැටුමක් ඇතිවිය නොහැකි තත්වයක් සභා ගර්භය තුළ තිබිය යුතු බව අගමැති මහින්ද රාජපක්ෂ මහතා ආණ්ඩු පක්ෂයේ සියලු මන්ත්‍රීවරුන් වෙත දන්වා තිබුණි.
මහින්දානන්ද අලුත්ගමගේ, ජොන්ස්ටන් ප්‍රනාන්දු සහ ලොහාන් රත්වත්තේ යන අමාත්‍යවරුන්ට විශේෂ රාජකාරියක් ලෙස ගැටුම් හට ගැනීමට ඉඩ නොතබන ලෙසට වගබලා ගන්නා ලෙස ප්‍රකාශ කර තිබූ අතර ඔවුන් තිදෙනා එම කටයුත්ත අකුරටම ඉටුකරනු ලැබීය.
“අදත් ඊයෙත් ආපු දෙදෙනෙකුම හරවා යවලා තියෙනවා. අනෙක් කාරණය කාන්තාවක් පැය ගණනක් රස්තියාදු කරලා ඇගේ ඉල්ලීම මඟ හැරලා තිබෙනවා.”
“මෙතන ක්ලාක් කෙනෙක් නැතිලු, පියන් කෙනෙක් නැතිලු. එකවුන්ටන් කෙනෙක් නැතිලු. සල්ලි ගෙවන්න ආපු අය හරවා යවලා තිබෙනවා.”
ඔයාලා මෙහෙම කරන එක හරිද ජනතාවට සේවය කරනවා කියන්නේ මේකටද. මේවා ඉදිරියේදි නම් කොහොමටවත් සිද්ධ වෙන්න බෑ. මම සිද්ධ වෙන්න ඉඩ තබන්නෙත් නැතැයි ජනාධිපති ගෝඨාභය රාජපක්ෂයන් එක හුස්මට කියාගෙන යනු ලැබීය.
ඒ ඉකුත් 23 වැනිදා පස්වරුවේදීය. කිසිවෙකු නොසිතූ මොහොතක කිසිවෙකුටත් නොදැනෙන්නට නාරාහේන්පිට පිහිටි නිවාස සංවර්ධන අධිකාරියට අයත් කාර්යාලයට හදිසි නිරීක්ෂණයකට එක්වෙමිනි.
ඒ වනවිටත් එම කාර්යාලයේ නොයෙක් තනතුරුවල නිරතව සිටින පුද්ගලයන් රාජකාරීවල නිරත නොවී සිටිනු ජනාධිපතිවරයා නිරීක්ෂණය කළේය.
සේවා ලාභියෙකු කළ පැමිණිල්ලකට අනුව ජනාධිපතිවරයා එම කාර්යාලය වෙත ගියේය.
රාජකාරී අවශ්‍යතාවක් සඳහා අවස්ථා ගණනාවකදී පැමිණියද එය ඉටුකිරීමට නිලධාරීන් අපොහොසත්ව ඇති අතර කාර්ය මණ්ඩලය ප්රමාණවත් නොවන බව පවසමින් සේවා ඉටු නොකරන බවට පැමිණිලිකාරිය සඳහන් කර තිබුණි.
කාර්යාලය අධීක්ෂණය කළ ජනාධිපතිවරයාට ප්රමාණවත් සේවක පිරිසක් එහි සිටින බව නිරීක්ෂණය වූ අතර සේවා ලබා ගැනීමට පැමිණි ආබාධිත පුද්ගලයෙකු දැඩි අපහසුතාවයක පත්ව සිටි අයුරු දැක ගත හැකි විය.
මහජන අවශ්‍යතා කාර්යක්ෂම සහ නොපිරිහෙලා ඉටු කිරීම රාජ්‍ය සේවකයන්ගේ මූලික වගකීම බව කාර්ය මණ්ඩලය හමුවේ ජනාධිපතිවරයා මෙහිදී අවධාරණය කළේය.
නිපුණතා සංවර්ධන, වෘත්තීය අධ්‍යාපන පර්යේෂණ හා නව නිපැයුම් රාජ්‍ය අමාත්‍යාංශයේ ඉදිරි සැලසුම් පිළිබඳ ජනාධිපති කාර්යාලයේදී ඉකුත් 22 වැනිදා සාකච්ඡාවක් පැවැත්වුණි. මේ සඳහා එම අමාත්‍යාංශයේ නිලධාරිහූ සහ රාජ්‍ය ඇමතිනි වෛද්‍ය සීතා අරඹේපොල මහත්මිය සහභාගී වූහ.
ඉකුත් සෙනසුරාදා ජනාධිපති ගෝඨාභය රාජපක්ෂ පුත්තලමේ සංචාරයක නිරත විය. එතුමා මදුරන්කුලිය වතු යායකට ගියේය. පසුව රදගුරු මන්දිරය, කෘෂි තාක්ෂණික ආයතනය නිරීක්ෂණය කරනු ලැබුවේය. මේ ගමන සඳහා අගරදගුරු කාදිනල් රංජිත් හිමිපාණන් එක්වීම විශේෂ කරුණකි.
21 වැනි සඳුදා ජනාධිපතිවරයා කාර්ය බහුල දිනයකි. ඔහු රාජ්‍ය අමාත්‍යාංශවල ඉදිරි වැඩසටහන් පිළිබඳව විමර්ශන කටයුතු සාකච්ඡා කිරීම ආරම්භ කළේය. 
කාන්තා හා ළමා සංවර්ධන පෙර පාසල් හා ප්‍රාථමික අධ්‍යාපන පාසල් යටිතල පහසුකම් සහ අධ්‍යාපන සේවා රාජ්‍ය අමාත්‍යාංශවල නිලධාරි හා අදාළ ඇමතිවරු එක්වූහ.
එදින රාත්‍රියේදී ජනාධිපතිවරයා වීඩියෝ තාක්ෂණ භාවිතයෙන් එක්සත් ජාතීන්ගේ මහා මණ්ඩලයේ සැසිවාරයට සමගාමීව සංවිධානය කෙරුණු ඉහළ පෙළේ එක්දින සමුළුව අමතා කතා කළේය.
එක්සත් ජාතීන් රාජ්‍යයන්ගේ අභ්‍යන්තර කටයුතුවලට මැදිහත් නොවනු ඇතැයි අපේක්ෂා කරන බව ජනාධිපතිවරයා සමස්ත ප්‍රජාවට පැවසීය.
බදාදා උදෑසන ජනාධිපතිවරයා වැඩසටහන් ආරම්භ කරනු ලැබුවේ අගමැති මහින්ද රාජපක්ෂයන් සමඟ එක්වෙමින්ය.
ඔවුහු ජනාධිපති කාර්යාල භූමියේ ඇති නිදහස් අධ්‍යාපනයේ පියා ලෙස සම්මානයට පත් ආචාර්ය සී.ඩබ්.ඩබ්. කන්නන්ගර ශ්‍රීමතාණන්ගේ 51 වැනි ගුණ සැමරුමට සහභාගි වෙමින් එම පිළිරුවට පුෂ්පෝපහාර පුද කළහ.
වෙළෙඳ අමාත්‍ය ආචාර්ය බන්දුල ගුණවර්ධන මහතා විසින් නව රජයේ පළමු කැබිනට් රැස්වීමේදී පෙන්වා දුන් අවශ්‍යතාවය හා වැදගත්කම සැලකිල්ලට ගනිමින් අපනයන සංවර්ධන සභාවේ පළමු හමුව 23 වැනි දින පස්වරු 04.00ට ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් හා අග්‍රාමාත්‍ය මහින්ද රාජපක්ෂ මහතාගේ සහභාගීත්වයෙන් යුතුව ජනාධිපති කාර්යාලයේදී පැවැත්විණි.
මෙම සභාව පිහිටුවීමේ ප්‍රධානතම පරමාර්ථය වශයෙන් අමාත්‍ය මණ්ඩලය විසින් ලබා දී ඇති සාමාන්‍ය හෝ විශේෂ උපදෙස්වලට යටත්ව ජාතික අපනයන සංවර්ධන ප්‍රතිපත්ති හා වැඩසටහන් සකස් කිරීම හා ක්‍රියාත්මක කිරීම පෙන්වා දිය හැකිය. අපනයන සංවර්ධන සභාවේ පළමු රැස්වීම 1980 සැප්තැම්බර් 11 දින පැවැත්වූ අතර එතැන් සිට 1992 මැයි 26 දක්වා රැස්වීම් 10ක් පවත්වා ඇත. ඉන්පසු වසර 28ක් පුරාවට මෙම අමාත්‍ය මණ්ඩලය රැස්වී නොමැත.
ජනපති එක්සත් ජාතීන්ගේ සමුළුව වීඩියෝ තාක්ෂණයෙන් අමතයි
සෞභාග්‍යයේ දැක්ම ප්‍රතිපත්ති ප්‍රකාශය මූලික කර ගනිමින් රටේ සම්පත්වලින් උපරිම ප්‍රයෝජන ලබමින් රටට ආදායම් හිමි කර දෙන අපනයනකරුවන්ගේ වෙළෙඳපොළ අවශ්‍යතා නිසි නියාමනයකින් යුතුව උසස් මට්ටමින් ඉටු කර දීමටත්, හැකි සෑම අවස්ථාවකදීම ඔවුන්ට ජාත්‍යන්තර වෙළෙඳපොළ සකසා දීමටත්, රටටත් අපනයනකරුවාටත් වාසිදායක සහ වැඩි ප්‍රතිලාභ අත්කරගත හැකි අන්දමේ නව සැලසුම් ක්‍රියාත්මක කිරීමටත් මෙමඟින් ඍජුවම හැකියාව ලැබෙන අතර අපනයන ක්ෂේත්‍රයේ ගැටලු විසඳමින් දැනට පවත්නා ජාතික වෙළෙඳ ප්‍රතිපත්තිය සංශෝධනයට සහ නව්‍යකරණයට ලක් කිරීමත් අරමුණු කර ගනිමින් සාකච්ඡා ආරම්භ කෙරිණි.
මෙහිදී දේශීය ගොවියාගේ නිෂ්පාදනයන් සඳහා මූලිකත්වය ලබා දීමටත් ප්‍රති අපනයන කටයුතු නියාමනයක් සහිතව සිදු කිරීමට අපනයන නිෂ්පාදන ගම්මාන ඇති කිරීම සඳහාත් ගත හැකි ක්‍රියාමාර්ග රැසක් පිළිබඳව මෙහිදී සාකච්ඡාවට බඳුන් විණි. තානාපති කාර්යාලවල සිටින වෙළෙඳ ප්‍රවර්ධන නිලධාරීන් මෙම ඉලක්ක සපුරා ගැනීම සඳහා පෞද්ගලිකවම දැනුම්වත් කර ඇති බව ජනාධිපතිතුමා විසින් මෙහිදී සභාව දැනුම්වත් කරන ලදී. එමෙන්ම ගුවන්තොටුපළ පහසුකම් වැඩිදියුණු කර ව්‍යාපාරිකයන්ගේ හා ආයෝජකයන්ගේ ආකර්ෂණය දිනාගැනීම සඳහා පසුබිම් සැකසීමේ අවශ්‍යතාවය අග්‍රාමාත්‍යතුමා විසින් පෙන්වා දුන් අතර අපනයනකරුවන් අධෛර්යවත් කරන අන්දමේ නීති රෙගුලාසි ප්‍රතිසමාලෝචනය කර ඒවා නිසි පරිදි සැකසිය යුතු බවට යෝජනාව ජනාධිපති කාර්ය සාධක බළකායේ ප්‍රධානී බැසිල් රාජපක්ෂයන් ඉදිරිපත් කරන ලදී.
වීඩියෝ තාක්ෂණය මඟින් එක්සත් ජාතීන්ගේ මහ මණ්ඩලයේ 75 වැනි රාජ්‍ය නායක සමුළුව අමතා ජනාධිපති ගෝඨාභය රාජපක්ෂයන් මෙසේ ප්‍රකාශ කළේය.
“ශ්‍රී ලංකාව කිසිවෙකුට ගැති නැති මධ්‍යස්ථ විදේශ ප්‍රතිපත්තියක් අනුගමනය කරනවා. ප්‍රජාතන්ත්‍රවාදී ලෙස තේරීපත් වූ ආණ්ඩුවලට සහය වීම එක්සත් ජාතීන්ගේ වගකීමක්. දශක තුනකට ආසන්න කාලයක් බෙදුම්වාදයෙන් හා ත්‍රස්තවාදයෙන් බැට කෑ ශ්‍රී ලංකාව සෑම ආකාරයකම ත්‍රස්තවාදය හෙළා දකිනවා.”
අගමැති මහින්ද රාජපක්ෂ ප්‍රධානත්වයෙන් උත්සව වැඩි වශයෙන් ඉකුත් සති‍ෙය් නොපැවැති අතර පාර්ලිමේන්තුව තුළ සාමකාමි මෙන්ම කලහකාරි තත්වයක් උද්ගත නොවීම සඳහා අවශ්‍ය පරිසරය ගොඩනැඟීමට ඔහු කටයුතු කළේය.
අගමැති මහින්ද රාජපක්ෂ විසින් රට පුරා ජල ගැටලුව විසඳීමේ පොදු යාන්ත්‍රණයක් සකස් කිරීම වෙනුවෙන් කමිටුපත් කිරීමට පියවර ගනු ලැබීය.
ශ්‍රී ලංකාවේ පොදු දියබෙත්ම කළමනාකරණය ප්‍රවේශයක් ක්‍රියාත්මක කිරීම උදෙසා වන උපාය මාර්ගික යාන්ත්‍රණයක් සකස් කිරීමට අදාළ ආයතන හමුවක් අගමැති ලේකම් ගාමිණි සෙනරත්ගේ ප්‍රධානත්වයෙන් අරලියගහ මන්දිරයේදී පැවැත්වුණි.
කුඩා සහ මධ්‍ය පරිමාණ ව්‍යවසායකයන් මඟින් කෙරෙන අපනයනවල ගෝලීය ප්‍රතිශතයේ සාමාන්‍ය ඉහළ නැංවීමට රජය සහයෝගය දක්වන බව අගමැතිවරයා අවධාරණය කළේය.
හම්බන්තොට මාගම් රුහුණුපුර ජාත්‍යන්තර සම්මේලන මධ්‍යස්ථානයේදී ඉකුත් 20 වැනිදා පැවැති කුඩා සහ මධ්‍ය පරිමාණ ව්‍යවසායක සංවර්ධන සම්මන්ත්‍රණයට සහභාගි වෙමින් අගමැතිවරයා එසේ කීය.
ජනාධිපති කාර්ය සාධක බළකායේ සභාපති බැසිල් රාජපක්ෂ ඉකුත් සතියේ අවස්ථා තුනකදී අරලියගහ මන්දිරයේදී සාකච්ඡා තුනකට සහභාගි විය.
උඳු භාවිතා කර ආහාර නිෂ්පාදනය කරන දේශීය උඳු වගාව සඳහා යොමු විය යුතු බව පපඩම් හා කුළුබඩු නිෂ්පාදන කර්මාන්තකරුවන් සමඟ දීර්ඝ වශයෙන් සාකච්ඡා කළ අතර ගෙවතුවගාව තුළින් දේශීය කෘෂි කර්මාන්තය නංවන ආකාරය පිළිබඳව බැසිල් රාජපක්ෂ මහතාගේ සාකච්ඡා පැවැත්විණි.
වර්තමාන ජනමාධ්‍ය ඇමැති කෙහෙළිය රඹුක්වැල්ලගේ උපන්දිනය සැප්තැම්බර් 21 වැනිදාය. එදින උදෑසනම ඔහුට කතා කළේ අගමැති මහින්ද රාජපක්ෂය. “ඔබට සුභ උපන් දිනයක් මැතිතුමා. ඔබගේ සියලු වැඩකටයුතු සාර්ථක වේවාකියලා මා ප්‍රාර්ථනා කරනවා.” මෙහිදී අගමැතිවරයා පැවසීය.
කෙහෙළිය උපන් දිනයට පැළ සිටුවයි
උපන් දිනය දා ඇමතිවරයා කොළඹින් බැහැර විය. ඔහු අනුරාධපුර ප්‍රජා නගරයේ බෞද්ධ වතාවන්වල නිරතවීමෙන් පසු රුක් රෝපණ වැඩසටහනට එක් විය. අනතුරුව දානමය පිංකමට ද ඔහු සහභාගි විය.
ජනතා විමුක්ති පෙරමුණේ ප්‍රචාරක ලේකම් ටිල්වින් සිල්වා මහතාගේ මෑණියන්ගේ දේහයේ අවසන් කටයුතු සඳහා බේරුවල නිවසේ තැන්පත් කර තිබූ අතර ඒ සඳහා දේශපාලනඥයන් රැසක් ද අවසන් ගෞරව දැක්වීම සඳහා පැමිණ සිටියේය.
ජනාධිපති ගෝඨාභය රාජපක්ෂ ඊට සහභාගි වූ අතර එම අවස්ථාවේ හිටපු පාර්ලිමේන්තු මන්ත්‍රී වජිර අබේවර්ධන, විජිත හේරත්, සුනිල් හඳුන්නෙත්ති අතර එම නිවසේදී සුහද කතාබහක් ද ඇති විය.
විපක්ෂ නායක සහ සමගි ජන බලවේගයේ නායක සජිත් ප්‍රේමදාස පසුගිය සති අන්තය ගත කරනු ලැබුවේ ගාල්ල සහ මාතර දිස්ත්‍රික්කවලය.
‘දිනමු’ පිහිටුවීමේ වැඩසටහනට සමගාමීව සජිත් ඒ ඒ දිස්ත්‍රික්කවල විහාරස්ථානවලට ගොස් නායක හිමිවරු හමුවූයේ පාර්ලිමේන්තුව තුළ විපක්ෂයේ කාර්යභාර්ය ඉටුකරන ආකාරය සහ පක්ෂයේ ඉදිරි වැඩපිළිවෙළ පිළිබඳව සාකච්ඡා කිරීමටය.
සජිත් ගාල්ල - මාතර පන්සල්වලට යයි
“ඔබතුමා පාර්ලිමේන්තුවේදී විපක්ෂයේ කාර්ය භාරය හොඳින් ඉටු කරනවා. පාර්ලිමේන්තුවේදී ආණ්ඩුව හිතුවක්කාරී ආකාරයට කටයුතු කරන එකට බාධා වෙලා තියෙන්නේ. ඔබතුමන්ලා ශක්තිමත් විපක්ෂයක් විදියට කෙළින්ම ඉන්න නිසයි” හිමිවරුන් කිහිපදෙනකුම සජිත්ට එසේ ප්‍රකාශ කළහ.
“19 වැනි සංශෝධනයේ තියෙන නරක ඉවත් කරලා හොඳ දේවල් ඇතුළත් කරන ‘නයින්ටීන් ප්ලස්’ ගැන තමයි අපි ඉදිරිපත් කරන්නේ අපේ හාමුදුරුවනේ” සජිත් ස්වාමීන් වහන්සේලා හමුවේ පැහැදිලි කළේය. මේ පිළිබඳව සිවිල් සමාජ ක්‍රියාකාරීන් ද සජිත්ගේ කටයුතු අගය කරමින් කතා කර තිබුණි.
මේ අතර 20 වෙනි සංශෝධනයට විරුද්ධව ක්‍රියා කරන ආකාරය පිළිබඳව සමගි ජන බලවේගය කොළඹදී මෙන්ම කොළඹින් පිටතදී සාකච්ඡා කිහිපයක්ම පවත්වනු ලැබීය.
“මේක සම්මත කළහොත් අදට වඩා මතු පරම්පරාව අපිට ශාප කරයි. ඒ නිසා මේ දවස පාර්ලිමේන්තු ඉතිහාසයේ තීරණාත්මක දවසක්” රාජිත සේනාරත්න කීවේය.
“ආණ්ඩුව යන මේ ඒකාධිපති ගමන වහාම නතර කරන්න ඕන. අපි ඊට එරෙහිව සටන් කරන්න ඕන.” මරික්කාර් සඳහන් කළේය.
“අපි විස්සට විරුද්ධව වෙන්නේ පුද්ගල කේන්ද්‍රීය හේතුවකට නොවෙයි. විස්ස කියන්නේ මේ රටේ ප්‍රජාතන්ත්‍රවාදය අවසන් කරන ව්‍යවස්ථා සංශෝධනයක් නිසා. මේ රටේ ප්‍රජාතන්ත්‍රවාදය අගය කරන සියලු දෙනා වෙනුවෙන් අපි අරගල කරමු” සජිත් නායකත්වය ගෙන සිය සගයන්ට කීවේය.
එක්සත් ජාතික පක්ෂ නියෝජ්‍ය නායක ලෙස පත්වූ රුවන් විජේවර්ධන එම පක්ෂයේ තිබූ සීතල යුද්ධය නිමා කිරීමට කටයුතු ක්‍රියාත්මක කළේය.
“රුවන් පක්ෂ‍ෙය් සෙසු අය එක්ක කතා කරලා පක්ෂයේ අනාගතය ගැන සැලසුම් මෙන්ම උපක්‍රම පිළිබඳව වාර්තාවක් හදලා පක්ෂයට ඉදිරිපත් කරන්න තීන්දු කරලා තිබෙනවා. එම වාර්තාව මට ලැබුණම මගේ අදහස් ද ඇතුළු කරලා කෘත්‍යාධිකාරි මණ්ලයට ඉදිරිපත් කරනවා. එතනදි තවත් ප්‍රයෝජනවත් අදහස් මතු වුවහොත් ඒවට ඇතුළු කරන්න පුළුවන්.” යැයි එක්සත් ජාතික පක්ෂයේ නායක රනිල් වික්‍රමසිංහ ඉකුත් බ්‍රහස්පතින්දා සිරිකොතේදී පැවැති හමුවකදී කීවේය.
“දැන් රවි, නවීන් වගේ නායකයන් රුවන්ට විරුද්ධ වූ අය මොනවගේ තීන්දුවක් ගනීවිද? ඔවුන් ඔබතුමා සමඟ සාකච්ඡා කළේ නැද්ද? මෙහිදී කිහිපදෙනකුම රනිල්ගෙන් විමසා සිටියේය.
“මට නම් කතා කළේ නෑ. රවි, නවීන් මොනවා කරයිද කියලා මම දන්නේ නෑ. ඒ අයයි තවත් කණ්ඩායමකුයි එකතු කරගෙන ඉදිරියට යන එක දැන් නව නියෝජ්‍ය නායකගේ වගකීම බව රනිල් තම ස්ථාවරය සඳහන් කළේය.
