ඔබතුමා ශ්‍රී ලංකා නිදහස් පක්ෂය හා එහි නායකත්වය සමඟ අර්බුදයක් හදාගෙන තිබුණා. දැන් එය නිම වෙලාද?
මම ශ්‍රී ලංකා නිදහස් පක්ෂයත් එක්ක කිසිම අර්බුදයක් නෑ. එහි නායක මෛත්‍රීපාල සිරිසේන සමඟ පමණයි මට අර්බුදයක් තිබුණේ. ඒක තවමත් නිම වී නෑ. රටට බොරු කියල බලය ලබා ගෙන රට විනාශ කරපු නායකයෙක් විදියට සිරිසේන පිළිබඳව මට තිබෙන්නෙ පිළිකුලක්. 2015 ජනාධිපතිවරණයට ඉදිරිපත් වීමේ සිට මෙවර ජනාධිපතිවරණය දක්වා ම ඔහු කළ කී දේ පිළිබඳව ඉවසා ගන්න බැරුව තමයි ඔහුට ගෑවුණ අයකුටවත් ඡන්දයක් දෙන්න එපා කියල මම කීවේ. ශ්‍රී ලංකා නිදහස් පක්ෂයෙන් දේශපාලනය ආරම්භ කරපු අපිට ඒ පක්ෂය සමඟ ප්‍රශ්නයක් නෑ. දැන් එහි බොහෝ පිරිසක් අපිත් එක්ක සුහදව කටයුතු කරනවා. අතීත අත්දැකීම් අනුව අනාගතයේ ඇති විය හැකි තත්ත්වයන් ගැන හිතලයි මම සිරිසේන හිටපු ජනාධිපතිවරයා සම්බන්ධයෙන් යම් යම් ප්‍රකාශ සිදු කළේ.
හිටපු ජනාධිපතිවරයෙක් පාර්ලිමේන්තුවේ සාමාන්‍ය මන්ත්‍රිවරයකු වීම ඔබ දකින්නෙ කොහොමද?
මහින්ද රාජපක්ෂයන් මේ විදියටම පාර්ලිමේන්තුවට ඇවිල්ලා විපක්ෂයේ කාර්යභාරය මැනවින් සිද්ධ කළා. සිරිසේන මහතාටත් දැන් ආණ්ඩු පක්ෂයත් සමඟ සහයෝගයෙන් කටයුතු කරන්න පුළුවන්. කොන්දේසි නොදා පාවාදීම් නොකර ඔහු කටයුතු කරයි කියල අපි විශ්වාසයෙන් බලාගෙන ඉන්නවා.
තුනෙන් දෙකේ බලයක් ඉල්ලාගෙන ව්‍යවස්ථාවේ 19 වන සංශෝධනය වෙනුවට 20 වැනි සංශෝධනය ගෙනෙන්න සූදානම් වෙන්නෙ හිටපු අමාත්‍ය බැසිල් රාජපක්ෂ පාර්ලිමේන්තුවට ගෙන එන්න කියන කතාව ඇත්තද?
ඔය කතාව විපක්ෂය හදපු අමූලික බොරුවක්. ඒ අය ජනතාවට බොරු කියල 19 වන සංශෝධනය ඉවත් කිරීම වළක්වා ගන්නයි ඔවුන් කටයුතු කරන්නෙ. 19 තිබුණොත් ඒ ආණ්ඩුවේ අගමැති හා ජනපති අතර ගැටුම් ඇතිවෙන බව මෛත්‍රි, රනිල් ගෙන් ඒ අය දන්නවා. ඒ විදියට අර්බුදයක් අපේ ආණ්ඩුවෙන් හැදෙනවාට ඔවුන් කැමතියි. 19 තිබ්බත් නැතත් අපේ ආණ්ඩුවේ එහෙම අගමැති ජනපති අතර අර්බුදයක් ඇති වෙන්නෙ නෑ. රටේ ජාතික ආරක්ෂාව ජනාධිපති යටතේ තිබෙන්න ඕනේ. නමුත් 19 වන සංශෝධනයෙන් ඒක ඉවත් කරලා. එදා යහපාලන රජයේ ජනාධිපති ව්‍යවස්ථා විරෝධිව අමාත්‍යාංශ දෙකක් තබාගෙන හිටියා. අපේ ජනාධිපති ව්‍යවස්ථා විරෝධීව කටයුතු කරන්න සූදානම් නෑ. ඒකයි ව්‍යවස්ථාව සංශෝධනය කරන්න හදන්නෙ. ඔබ සඳහන් කළ ආකාරයට බැසිල් රාජපක්ෂයන්ට පාර්ලිමේන්තු එන්න ජාතික ලැයිස්තුවේ මන්ත්‍රිවරු ඕනෑ කෙනෙක් ඉවත් වෙන්න සූදානම්. නමුත් එතුමා තිරය පිටුපස සිට රාජ්‍ය යාන්ත්‍රණයේ ක්‍රියාකාරීත්වය හදන්නෙ එතුමායි. එතුමා කරන ඒ සුවිශේෂ කාර්ය අප අගය කරන්න ඕනේ. එතුමාට පාර්ලිමේන්තුවට එන්න ඕනේ නම් 19 තිබුණත් නැතත් එන්න පුළුවන්.
ඔබත් බස්නාහිර පළාත් සභාවේ මහ ඇමැති ලෙස කටයුතු කළා. දැන් ඔබේ විපක්ෂයේ සමහරු කියනවා 13 වන ව්‍යවස්ථා සංශෝධනය ඉවත් කරන්න කියලා ඔබත් ඊට එකඟද?
මම කියන්නෙ 13 වන සංශෝධනයෙන් ස්ථාපිත කළ පළාත් සභා තියෙන්න ඕනෑ කියලයි. පළාත් සභා සුදු අලියෙක් වෙන්න වැඩ කරන්න බැරි මහ ඇමැතිවරු පත්වුණොත් විතරයි. අදටත් මට මිනිස්සු කතා කරන්නෙ මහ ඇමැති කියලා. මම ඒ ධුරය දරන කාලයේ තමයි ජනතාවට සමීපව විශාල වැඩක් කරලා තිබෙන්නෙ. සුදු අලියෙක් කියන එක මධ්‍යම රජයටත් වලංගුයි. 2015 - 2019 දක්වා පැවැති යහපාලන ආණ්ඩුවත් සුදු අලියෙක්. 13 න් නිර්දේශිත රාජ්‍ය පරිපාලනයට අදාළ බලය බෙදන්න ඕනේ. දේශපාලනිකව බලය බෙදා හැරීමට මගේ එකඟතාවක් නෑ. ඒ කියන්නේ රාජ්‍ය පාලන බලය නොබෙදා රාජ්‍ය පරිපාලන බලය බෙදන්න ඕනේ. මිනිස්සුන් ගේ හැම ප්‍රශ්නයම කොළඹ එනවට වඩා ඒ ප්‍රශ්නවලට ඒ ප්‍රදේශවලදීම විසඳුම් ලබාගත හැකි ක්‍රමයක් තිබෙන්න ඕනේ. මේ නිසා 13ට සංශෝධන එකතු කළාට කමක් නෑ. එය සම්පූර්ණයෙන් අහෝසි කරනවාට මම එකඟ නෑ.
මහ මැතිවරණයට පෙර බරපතළ අමාත්‍යංශයක වගකීම් පැවැරී තිබුණ ඔබට මැතිවරණයෙන් පසුව තටු කපාපු අමාත්‍යාංශයක් ද ලැබුණෙ?
නෑ මට තිබුණ අමාත්‍යාංශය එහෙමම තිබෙනවා. සංචාරක ගුවන් සේවා ආයෝජන පරිපාලන ආදි විෂයයන්ට අමතරව තවත් විෂයයක් මට වැඩිපුර දීලා. අමාත්‍යාංශයේ නම සංචාරක කියල කෙටි කරලා තිබුණත් මහ මැතිවරණයට පෙර තිබූ අමාත්‍යාංශයටත් වඩා වැඩි වගකීම් ඒ නව අමාත්‍යාංශ්‍ය යටතේ මට පැවරිලා. ඩි. වී. චානක මන්ත්‍රිවරයා මගේ රාජ්‍ය අමාත්‍යවරයා ලෙස පත් කරලා. අප දෙන්නා එකතුව හොඳින් වැඩ කරනවා. මැතිවරණයට පෙරත් මට නියෝජ්‍ය අමාත්‍යවරයෙක් හිටියා; කෙහෙළිය රඹුක්වැල්ල. එතුමා වෙනුවට මෙවර චානක පත් කරලා.
රටක ආර්ථිකයේ විශාල වගකීමක් සංචාරක විෂයයට පැවරෙනවා. ඒ අනුව ආර්ථිකය දියුණු කරන්න සංචාරක කර්මාන්තයේ ඉදිරි සැලසුම් මොනවාද?
පාස්කු ප්‍රහාරයත් කෝවිඩ් වසංගතයත් සමඟ සංචාරක ව්‍යාපාරය කඩා වැටිලා තිබුණා. රට සාමාන්‍ය තත්වයට පත්වූ පසු සංචාර ව්‍යාපාරය රටට රටේ ආර්ථිකයට ගැළපෙන ආකාරයට ක්‍රියාත්මක කළ යුතු ආකාරය වෙන් වෙන්ව හඳුනාගෙන තිබෙනවා. ඒ පිළිබඳව මම අමාත්‍ය මණ්ඩලයට වාර්තාවක් ඉදිරිපත් කරලා තිබෙනවා. ඒ අනුව රටට අහිතකර විදියට එකවර ගුවන් තොටුපළවල් ඇරලා සංචාරක ව්‍යාපාරය දියුණු කරනවා වෙනුවට විවිධ කාර්යයන්ගෙන් කාර්යයට සංචාරකයන් කණ්ඩායම් ලෙස ලංකාවට ගෙන්වා ගන්න අපේක්ෂා කරනවා. කණ්ඩායම් ක්‍රමයට සංචාරකයින් ගෙන්වා ගැනීමෙන් සෞඛ්‍යයට හානියක් නොවන ආකාරයට ඔවුන්ව පාලනය කරන්න පුළුවන්. නිරතුරුව කොවිඩ් කමිටුව සමඟ සෞඛ්‍යය බලධාරින් සමඟ සාකච්ඡා කරමින් ඔවුන්ගේ උපදෙස් අනුව ක්‍රම ක්‍රමයෙන් රට සංචාරකයින්ට සම්පූර්ණයෙන්ම විවෘත කරන්න කටයුතු කරනවා.
මීට පෙර පැවැති මැතිවරණවලදී ඔබ ගම්පහ දිසාවේ පළමු තැනට පත් වුණා. මේ මැතිවරණයේදී දෙවැනි තැන හිමි වුණේ ඇයි?
මගේ මැතිවරණ ව්‍යාපාරය දියත් කළේ මට ගම්පහ පළමු තැන ගන්න නොවෙයි. ගම්පහින් මන්ත්‍රිවරු 13 දෙනෙකු පත් කර ගන්නයි මම උත්සාහ කළේ. යුද්ධය ජයගත්තත් කිසිම මැතිවරණයකින් අපට මන්ත්‍රිවරු 13 දෙනෙකු ගම්පහින් පත් කරගන්න බැරි වුණා. ගම්පහින් ලක්ෂ පහක වැඩි ඡන්ද ගන්න මන්ත්‍රිවරු 13ක් පත්කර ගන්න හා තුනෙන් දෙකේ බලයක් සහිත මැතිවරණ ජයක් ගන්න තමයි මම මගේ මැතිවරණ ව්‍යාපාරය දියත් කළේ. මම කිසිම වේලාවක මට මනාපයක් ඉල්ලුවේ නෑ. මගේ කණ්ඩායම දිනවන්න කියලයි මම කීවේ. අවස්ථා දෙකකදි මහ මැතිවරණ වලින් ලක්ෂ තුනකට වඩා පිට පිටම ඡන්ද ලබා ගන්න පුළුවන් වුණේ මටත් මහින්ද රාජපක්ෂ අගමැතිතුමාටත් පමණයි. මගේ තැන එකද දෙක ද නොවෙයි. මගේ කණ්ඩායමේ වැඩි පිරිසක් පාර්ලිමේන්තුවට පැමිණීම තමයි මගේ සතුට.
තුනෙන් දෙකේ බලයක් තිබුණත් ආණ්ඩුවට එකතුව ඉන්න කණ්ඩායම් නොසතුටින්ද? ඔවුන් ගේ නොසතුට අළුයට ගිනිපුපුරු මෙන් කොයි හෝ මොහොතක මතු වෙයිද?
නෑ. එහෙම කිසිම දෙයක් නෑ. අපි දැන් එක කණ්ඩායමක් ලෙස එකට වැඩ කරගෙන යනවා. නාලක ගොඩහේවා ඇමැතිවරයත් මට වඩා ඡන්ද ගත්තා. එතුමත් මට නිරතුරුව කතා කරලා එකට වැඩ කරනවා. සමහරු ආණ්ඩුවට පිටින් ඉඳගෙන විවිධ මතවාද හදන්න උත්සහ කළත් ආණ්ඩුව එක කණ්ඩායමක් විදියට කටයුතු කරගෙන යනවා.
ජනාධිපතිවරයා අපේක්ෂා කරන ජනතා කේන්ද්‍රීය ආර්ථිකය ගොඩ නඟන්න අමාත්‍ය මණ්ඩලයේ සංයුතිය නිවැරදියි ප්‍රමාණවත් කියල ඔබ හිතනවාද?
ඔව් අනිවාර්යයෙන් ම මේ අමාත්‍ය මණ්ඩලය හරහා මෙරටේ ජනතා කේන්ද්‍රීය ආර්ථිකයකට ශක්තිමත් අත්තිවාරමක් දාන්න පුළුවන්. අපේ සම්පත්වලින් අපේම දේවල් නිපදවන්න ජනතාව පෙලඹුණේ කොවිඩ් 19 වසංගතය සමඟයි. එදා සිරිමාවෝ මැතිනිය ගේ වගා සංග්‍රාමය වැනි වැඩසටහන් දිගටම ක්‍රියාත්මක වුණා නම් අපිට අද මෙහෙම වෙන්නෙ නෑ. කොවිඩ් වසංගතය නිසා ඒ ක්‍රමය යළි රට තුළ ගොඩ නැගුණා. ඒ ගොඩනැගුණ ජනතා කේන්ද්‍රීය ආර්ථික වැඩපිළිවෙළ ශක්තිමත් කරන්න ඊට අවශ්‍ය පහසුකම් හදන්න පුළුවන් අමාත්‍ය මණ්ඩලයක් තමයි දැන් හදලා තිබෙන්නෙ. පිටරටින් ප්ලාස්ටික් ගෙනල්ලා අපේ පරිසරය විනාශ කරනවාට වඩා අපේ රටේ මැටිවලින් හදන පිඟන් කෝප්ප හැලි වළං භාජන අපි ප්‍රයෝජනයට ගන්න පුරුදු වුණොත් අපේ පරිසරය රැකෙනවා වාගේම අපේ මැටි කර්මාන්තය දියුණු වෙනවා. ඒ විදියටම බුලත්, කරාබුනැටි, කුරුඳු වගා කරන ගොවියෝ දැන් ඉස්සරට වඩා 500%ක උනන්දුවෙන් තම තමන්ගේ වගා බිම් සකස් කරනවා.
අලුත් ඇමැතිවරු පත් වුණාට ආයතන ප්‍රධානීන් අලුත් කරලා නෑ. සම්ප්‍රදාය නම් ඇමැතිවරයා අලුත් වෙන කොට ආයතන ප්‍රධානීනුත් අලුත් වෙන එකයි. මේක ඔබ කොහොමද දකින්නෙ?
සමහර ඇමැතිවරුන්ට ඔය කාරණය අර්බුදයක් ගැටලුවක් වෙන්න පුළුවන්. මට නම් එහෙම ගැටලුවක් නෑ. මතවාද ප්‍රශ්න ඇති වුණත් මම ඇමැතිවරයා විදියට ඒ ඒ අය ලවා රජයේ වැඩපිළිවෙළ ක්‍රියාත්මක කරන්න කටයුතු කරනවා. ආයතන ප්‍රධානීන් ඇමැතිවරයාගේ උපදෙස් හා මඟ පෙන්වීම අනුව රජයේ වැඩපිළිවෙළ ක්‍රියාත්මක කරන්න ඕනේ. එහෙම වැඩ කරන්න බැරි නම් වැඩ කරන්න බැරි හේතුව ඒ අය කියන්න ඕනේ.
සමගි ජන බලවේගය පාර්ලිමේන්තුවේ විපක්ෂ කාර්යභාර ඉටු කරනවා. ඒ ගැන සෑහීමකට පත් වෙන්න පුළුවන්ද?
විපක්ෂ නායක ලෙස සජිත් ප්‍රේමදාස පත්ව ඔහුගේ කණ්ඩායම සමඟ විපක්ෂයේ කාර්ය අවංකව හොඳින් කරයි කියලා අපිත් බලාගෙන ඉන්නවා. නමුත් දැන් එතුමාටත් අභියෝග තිබෙනවා. තමන්ගේ දේශපාලන ගමනට උපකාරි වූ අයව තල්ලු කරපු පිරිසක් තමයි සජිත් වටා ඉන්නෙ. කොයි මොහොතක හෝ සජිත්වත් ඔතනින් එළියට දාලා බලය ආක්‍රමණය කරන්න ඒ අයට බැරි කමක් නෑ ඒ නිසා සජිත්ට තමන්ගේ තනතුර බේරා ගෙන කටයුතු කරන්න මහන්සි ගන්න වෙනවා.
