වගා ක්ෂේත්‍රයේදී බෝග සමඟ තරඟ වදින වල්පැළෑටි මර්දනය කරගැනීම සඳහා යාන්ත්‍රික කෘෂි උපකරණ භාවිතාකළ හැකිය. මිනිස් බලයෙන් ක්‍රියාකරන හා යාන්ත්‍රික බලයෙන් ක්‍රියාකරන යන දෙවර්ගයෙන්ම මෙම කෘෂි උපකරණ දැකිය හැක. මෙම ක්‍රියාවලිය අතුරුයත් ගෑම ලෙසද (Inter - tillage) මෙය හඳුන්වයි. වල් පැළෑටි වල වර්ගය හෝ ස්වරූපය, භෝග පේළි අතර පරතරය, ක්‍රියාකරවන ආකාරය හා පාංශු සංරක්ෂණ ස්වරූප මත මේ උපකරණවල ප්‍රමාණය හා හැඩය වෙනස් වේ.
අත් උපකරණ (Hand Tools)
බිම හිඳගෙන කරනු ලබන වල් පැළෑටි මර්දන ක්‍රියාවලියට 10 – 20cm දක්වාවු කෙටි හැඬලය සහිත මෙම උපකරණය භාවිතා කළ හැක. භෝග වගා කරන ලද ක්ෂේත්‍ර කටයුතු සඳහා භාවිතා කළ හැකි සැහැල්ලු උපකරණයි.
චොපින් හෝව
සාමාන්‍යයෙන් උදැල්ලක හැඩය ගන්නා මෙය වගා භූමියේ කානුවැටි, පාත්ති හා ඇලි මං තනා ගැනීමට වල් මර්දනය කරගැනීමට භාවිතා කරගත හැක. කැපුම් පළල 150mm මෙහිබර 02 km පමණවේ.
තනි පේළියේ වල් නෙළනය
(Single Row Weeder)
බෝග පේලි අතර ඉදිරියට තල්ලු කිරීමේදී වල් පැළ ඉදිරීයන අතර පසුපසට අදිනවිටදී එම පැල පසට යටවීම යන අයුරින් මෙම වල් නෙළනය නිර්මාණය කර තිබේ. වල්මර්දනය කරන කැපුම් පළල 110mm වේ. වඩා සුදුසුවන්නේ වී වගාව සඳහාය. සාමාන්‍යයෙන් 2kg සිට 2 ½kg බරකින් යුක්තවේ. තනි පුද්ගලයකුට පහසුවෙන් හැසිරවිය හැකි සැහැල්ලු උපකරණයකි.
අතුරු යත් ගෑමේ උපකරණය
(Inter cultivator)
ගොඩ බෝග වගාවේ පේළි අතර වල් මර්දනයට යොදා ගත හැකි සැහැල්ලු උපකරණයක් ලෙස හැඳින්විය හැක. වල් මර්දනය කිරීමට අමතරව පස බුරුල් වීම හා පසට පොහොර හොඳින් මිශ්‍ර වීම නිසා බෝගය හොඳින් වර්ධනය වීමක්ද සිදුවන අතර එමඟින් හොඳ අස්වැන්නක් ලබා ගත හැකි වේ.
පෙට්‍රල් ඉන්ධන වලින් ක්‍රියා කරන භාවිතය පහසු වීම නිසා එක් කම්කරුවෙකුට දිනකට අක්කර 1/2ක වල් මර්දනය කළ හැකිය. ගොඩ බෝග වගාවට උචිත උපකරණයක් ලෙස සැලකිය හැක.
රොටරි වල් නෙළනය
(Rotary Weeder)
බෝග පේළි අතර ඉදිරියට තල්ලු කිරීමෙන් වල් පැළ ගැලවෙන අතර පසුපසට ඇදීමෙන් එම පැළ පසට හො මඩට යටවන අයුරින් මේ වල් නෙළනය නිර්මාණය කර ඇත. වල් මර්දනය කරන කැපුම් පළල 150 mm කි. සාමාන්‍ය බර කි.ග්‍රැ 4කි. තනි පුද්ගලයකුට පහසුවෙන් හැසිරවිය හැකිය.
උපදෙස්- කෘෂිකර්ම දෙපාර්තමේන්තුව
මදාරා මුදලිගේ
