අලිගැටපේර (Avocado) මාංසල පලතුරකි. Plantae රාජධානියේ Lauracae පවුලට අයත් අතර, මෙය වැඩියෙන් වැවෙන්නේ මධ්‍යම පරිසරයේ මධ්‍යස්ථ උෂ්ණධාරී ප්‍රදේශවලයි. විශාල ඇට බීජයකින් හා මාංසලවලින් හෙබි මෙම පලතුර, පෝෂණය අතින් ඉතා ඉහළය. වැඩෙන ළමුන්ට ඉතා ගුණදායකය.
විටමින් A ඉතා වැඩිපුර අඩංගු වන බැවින් හා ප්‍රෝටීන 19%ක් අඩංගු වන බැවින් වැඩෙන ළමයිට ඉතා ගුණදායක ය. ප්‍රෝටීන , කැලරි මන්දපෝෂණය සහිත ළමයිට ඉතා අගනේය. තවද මෙහි අත්‍යාවශ්‍ය ඇමයිනෝ අම්ල අඩංගු බැවින් මන්දපෝෂණ ළමුන්ටද ඉතා කදිමය.
එමෙන්ම මෙය ඉතා රසැති පලතුරක් බැවින් බීම, පලතුරු සලාද, පිසින ආහාරවලටද දමා පිළියෙල කරගත හැකි බැවින් කදිම ආහාරයකි. තවද මෙය මල බද්ධය ඇති අයටද ඉතා ගුණදායකය. ඇස් පෙනීම දුර්වල අයට විටමින් A අඩංගු නිසා ඉතා කදිමය. ඊට අමතරව සමේ රෝගවලටද, වියළි සමක් ඇති අයටද, සමේ තෙල් ගතිය අඩු අයටද මෙය කදිම ඔසුවකි.
අලිගැටපේර බීම වීදුරුව ඉතා පෝෂ්‍යගුණදායක ශක්තිජනක ආහාරයකි. ක්‍රීඩකයන්ටද වැඩෙන ළමයිටද ඉතා අගනේය. කුඩා බඩගින්නකටද කදිමය. නමුත් කොලෙස්ටරෝල් තිබෙන අයට සහ තරබාරු අයට අලිගැටපේර කෑමට සුදුසු නැත. මන්ද මේවායේ තෙල් ගතිය අධික නිසා ය.
යශෝදා ඉන්දීවරී
උපදෙස්- වෛද්‍ය සෙලී ප්‍රනාන්දු,
ආහාර හා පෝෂණ විශේෂඥ
