- ගුවන් යානය පැහැර ගන්නේ නවදිල්ලියේ සිට ටෝකියෝ යද්දී
- මහාධිකරණයෙන් තෙවසරක සිර දඬුවමක්
ගුවන් යානා පැහැර ගැනීම් පිළිබඳව වාර්තා ලොකයේ විවිධ රටවලින් වරින් වර ඇසේ. මෙරටින් ද එවැනි පුවතක් පළමු වරට වාර්තා වන්නේ 1982 වසරේ දීය. ඒ අනුව අතිශය මානුෂීය හේතුවක් මත ගුවන් යානයක් පැහැර ගත් ප්‍රථම සහ එකම ශ්‍රී ලාංකිකයා ලෙස සේපාල ඒකනායකගේ නම ඉතිහාසයේ සටහන් වේ. 1949 වසරේ හක්මණ, කරතොට උපන් සේපාල ඒකනායක කරතොට පාසලෙන් ප්‍රාථමික අධ්‍යාපනය ලබා ඉන් පසු තිස්සමහාරාම, යෝධ කණ්ඩිය මහා විද්‍යාලයට ඇතුළත් වූයේය. එම විද්‍යාලයෙන් අපොස සාමාන්‍ය පෙළ විභාගයට පෙනී සිටි සේපාලගේ සිහිනය වූයේ කෙසේ හෝ ඉතාලියට ගොස් රැකියාවක් කිරීමය. මහත් පරිශ්‍රමයක් දරා ඉතාලියට යාමට සේපාල ඒකනායකට හැකි විය. ඉතාලි ගිය සේපාලට සිය 'ඉරණම්කාරිය' හමුවන්නේ ද එහිදීය. 
ඇය නමින් 'ඇනා' විය. ඇනාගේ සහ සේපාලගේ ප්‍රේම සබඳතාවට ඇනාගේ දෙමාපියන් විරුද්ධ නොවූ නිසා ඔවුන් දෙදෙනාගේ විවාහය ඉතාලියේ, 'මොඩෙනා' හිදී 1978 වසරේ සිදු විය. එහි ප්‍රතිඵලයක් ලෙස ඇනා පුතෙකු බිහි කළාය. එම දරුවාට 'ෆ්‍රි' යනුවෙන් නම තැබිණි.
කාලය මෙසේ ගෙවී යද්දී සේපාලගේ ඉතාලි පුරවැසිභාවය අහෝසි විය. මෙය සේපාලට ඉමහත් අභියෝගයක් විය. තමන්ගේ අහෝසි වූ ඉතාලි පුරවැසිභාවය යළි ලබා දෙන ලෙස ඔහු ඉතාලි රජයට ආයාචනය කළේය. එහෙත් ඉතාලි රජය ඔහුට දන්වා සිටියේ පුරවැසිභාවය නැවත ලබා ගැනීමට නම් ශ්‍රී ලංකාවට ගොස් එහි ඉතාලි තානාපති කාර්යාලයට ඉල්ලීමක් ඉදිරිපත් කළ යුතු බවය. ඒ අනුව සේපාල තම බිරියට සහ පුතුට තාවකාලිකව සමු දී මෙරටට පැමිණියේය. එහෙත් ඔහුගේ පුරවැසිභාවය යළි ලබා දෙන ලෙස ඉතාලි තානාපති කාර්යලයට ඉදිරිපත් කළ ඉල්ලීම ප්‍රතික්ෂේප විය. මෙයින් බලවත් චිත්ත සංවේගයට පත් වූ සේපාල අදිටන් කර ගත්තේ තමාට ඉතාලියට යාමට අවසර ලැබෙන්නේ නැතිනම් කෙසේ හෝ තම දරුවා සහ බිරිය තමා වෙත ගෙන්වා ගැනීමටය.
මේ සඳහා ඔහු සැලසුමක් සකස් කළේය. එම සැලැස්ම ක්‍රියාත්මක කිරීම සඳහා ඔහු 1982 වසරේ ජුනි මස අග භාගයේදී ඉන්දියාවේ නවදිල්ලියට ගියේය. ඔහු දින කීපයක් නවදිල්ලි නගරයේ රැඳී සිටියේය. ඒ තම සැලැස්ම ක්‍රියාත්මක කිරීමට සුදුසු අවස්ථාව එළඹෙන තෙක්ය. 1982 වසරේ ජුනි මස 30 වන දින සේපාලගේ ජීවිතයේ අතිශය තීරණාත්මක දිනයක් විය.
එදින ද වෙනදා මෙන්ම නවදිල්ලි ගුවන් තොටුපොළට කාර්ය බහුල දවසක් විය. ඒ වන විට ගුවන් යානා කීපයක් ගුවන් ගත කිරීමට නියමිතව තිබුණි. ඒ අතර ටෝකියෝ බලා පියාසර කිරීමට නියමිත 'අලිතාලියා' ගුවන් සේවයේ බෝයිං 707 යානය ද විය. එම යානයේ මගීන් 340 ක් සිටි අතර නියමුවා ලෙස කටයුතු කළේ කපිතාන් 'ජොර්ගෝ අමරෝසා'ය. යානය ගුවන් ගත වී ටික වේලාවකට පසු ලිපියක් අතැතිව ගුවන් සේවිකාවක කපිතාන් 'ජොර්ගෝ අමරෝසා' හමුවීමට පැමිණියාය. එය සේපාල ඒකනායකගේ අත් අකුරින් ලියන ලද ලිපියකි. එහි සඳහන් වූයේ තමන්ට බලවත් අසාධාරණයක් සිදු වී ඇති බවත් තමන්ගේ සාධාරණ ඉල්ලීම් කීපයක් ලබා ගැනීමට ගුවන් යානයේ පාලනය තමා යටතට ගන්නා බවත්ය. ඔහුගේ ලිපියේ සඳහන් වූ ප්‍රධාන ඉල්ලීම් දෙක වූයේ තමාගේ බිරිය සහ දරුවා තමා වෙත භාර දිය යුතු බව සහ ඩොලර් ලක්ෂ තුනක් තමන්ට ලබා දිය යුතු බවයි.
ගුවන් යානයේ පාලනය තමන්ගෙන් ගිලිහී ගොස් ඇති බව තේරුම් ගැනීමට කපිතාන් 'ජොර්ගෝ අමරෝසා'ට වැඩි වේලාවක් ගත වූයේ නැත. මේ අතර සේපාල ඒකනායක ගුවන් නියමුවාට ප්‍රකාශ කළේ තමාගේ ඉල්ලීම් ඉටු කිරීමට කටයුතු නොකරන්නේ නම් ගුවන් යානය පුපුරුවා හරින බවයි. සේපාල ඒකනායක කපිතාන් ජොර්ගෝට අණ කළේ ගුවන් යානය තායිලන්තයේ බැංකොක් නුවර ගුවන් තොටුපළට ගොඩ බස්සවන ලෙසය. සේපාලගේ අණට කීකරු වූ කපිතාන් ජොර්ගෝ ගුවන් යානය බැංකොක් නුවර ගුවන් තොටුපොළට ගොඩ බැස්සුවේය. එහෙත් ගුවන් යානය දෙසට පැමිණෙන කොමාන්ඩෝ බළකායක් සේපාලගේ උකුසු ඇස ට හසු විය. සේපාල ඒකනායක වහාම කපිතාන්වරයාට දැඩිව කියා සිටියේ කොමාන්ඩෝ බළකාය මැදිහත් වුවහොත් ගුවන් යානය පුපුරුවා හරින බවයි. එයින් මෙල්ල වූ කපිතාන් ජොර්ගෝ එම මැදිහත් වීම නොකරන ලෙස බලධාරීන්ට දැන්වූයේය. අවසානයේ දී සේපාලගේ ඉල්ලීම් ලබා දීමට ඉතාලි රජය එකඟ විය. ඒ අනුව ඉතාලි රජයේ නියෝජිතයින් විසින් සේපාලගේ බිරිය සහ දරුවා භාර දෙන ලදී. තවද ඩොලර් ලක්ෂ තුනක් ද සේපාලට ලබා දුන්නේය. මේ අතර සේපාල ඒකනායක හමු වූ එවකට තායිලන්තයේ මෙරට තානාපතිවරිය කියා සිටියේ සේපාලට ලංකාවට පැමිණීමට කිසිදු නීතිමය බාධාවක් නොමැති බවයි. 
ඒ අනුව සේපාල ඒකනායක සහ ඔහුගේ බිරිය ඇනා ද දරුවා වන 'ෆ්‍රි' ද 1982 වසරේ ජූලි දෙවන දින ලංකාවට පැමිණියහ. එදින ඔවුන් නවාතැන් ගත්තේ සිලෝන් ඉන්ටර්කොන්ටිනෙන්ටල් හෝටලයේය. මේ අතර සේපාල ඒකනායක සිද්ධිය රාජ්‍ය තාන්ත්‍රික අර්බුදයක් බවට පත් විය. ඉතාලි රජය ශ්‍රී ලංකා රජයෙන් ඉල්ලා සිටියේ සේපාල ඒකනායක අත්අඩංගුවට ගෙන තම රටට භාර දෙන ලෙසය. නමුත් සේපාල ඒකනායක අත්අඩංගුවට ගැනීමට කිසිම නීතිමය පදනමක් බැලූ බැල්මට නොවීය. එයට හේතුව ගුවන් යානා පැහැර ගැනීම පිළිබඳව වරදක් මෙරට නීතියේ නොවීමය. එහෙත් ඉතාලි රජය දිගින් දිගටම ඉල්ලා සිටියේ සේපාල තම රටට භාර දෙන ලෙසය. ඉතාලි රජයේ ඉල්ලීම පිළිබඳව පොලිස්පතිවරයා ප්‍රකාශ කළේ සේපාල ඒකනායක අත්අඩංගුවට ගැනීමට නම් ඔහුට එරෙහිව පැමිණිල්ලක් ඉදිරිපත් කළ යුතු බවයි. ඒ අනුව සිද්ධිය පිළිබඳව පැමිණිල්ලක් කිරීමට මෙරට ඉතාලි තානාපතිවරයා කටයුතු කළේය.
දින කීපයකට පසු සේපාල ඒකනායක සහ පවුලේ සාමාජිකයන් ඒකනායක පවුලේ නිවස බලා පිටත් වූ අතර ගාල්ලේ දී පොලිසිය විසින් සේපාල අත්අඩංගුවට ගන්නා ලදී. නමුත් සේපාලට එරෙහිව චෝදනා ගොනු කිරීම සඳහා කිසිම නීතිමය පදනමක් නොමැති නිසා මෙරට රජය ගුවන් යානාවලට එරෙහි අපරාධ නම් පනත අතීතයට ද බලපාන පරිදි පාර්ලිමේන්තුවේ දී සම්මත කළේය. එම පනතේ ප්‍රතිපාදන ප්‍රකාරව සේපාලට එරෙහිව අධිචෝදනා ගොනු කළ අතර කොළඹ මහාධිකරණය තීරණය කළේ සේපාල ඒකනායක එම සිද්ධියට වැරදිකරු බවයි. ඒ අනුව ඔහුට වසර පහක සිර දඬුවම් නියම කළේය. මෙම තීන්දුවට එරෙහිව සේපාල විසින් අභියාචනාධිකරණයට ඇපෑලක් ඉදිරිපත් කළේය. මෙහිදී විත්තියේ නීතිඥයින් තර්ක කළේ අදාළ වරද කරන අවස්ථාවේ එය මෙරට වරදක් ලෙස නොසැලකූ බව සහ ගුවන් යානා පැහැර ගැනීම්වලට එරෙහි අන්තර් ජාතික සම්මුතිවලට මෙරට රජය අත්සන් කළ ද එයින් ශ්‍රී ලංකා රජය නොබැඳෙන බවත්ය.
මෙහිදී කරුණු ඉදිරිපත් කළ රජයේ නීතිඥවරයා ප්‍රකාශ කළේ අහස් යානාවල සිදු කරන අපරාධ පිළිබඳව ටෝකියෝ සම්මුතියට 1963 වසරේදී අහස් යානා නීති විරෝධී ලෙස අත්පත් කර ගැනීම අහෝසි කිරීමේ හේග් සම්මුතියට ද 1970 වසරේදී ද සිවිල් ගුවන් යානාවල සිදු කරන නීති විරෝධී ක්‍රියා පිළිබඳව මොන්ට්‍රියල් සම්මුතියට 1971දී ද අත්සන් කර ඇති බවත් අන්තර්ජාතික නීතියට අනුව මෙරට එම සම්මුතිවලට බැඳෙන බවත්ය. මෙම තර්කය පිළිගත් අභියාචනාධිකරණය මහාධිකරණ තීන්දුව ස්ථිර කළේය. අභියාචනාධිකරණය දුන් තීන්දුවට එරෙහිව ද සේපාල ඒකනායක නැවත ශ්‍රේෂ්ඨාධිකරණයට අභියාචනාවක් ඉදිරිපත් කළ අතර ශ්‍රේෂ්ඨාධිකරණය අභියාචනාධිකරණය දුන් තීන්දුව තහවුරු කරන ලදී.
නීතිඥ එස්. එම්. ජයසූරිය
