- රුපියල් ලක්ෂ විස්සක රන් මුදල් භාණ්ඩ උස්සලා
- පොලිසියට හසුවන්නේ හෝකන්දර අමරගොඩ පාරේදී
- ග්‍රිල් නැති ජනේල අරින්නේ නියනෙන් විනිතා මානෙල් ගමගේ
“අර යන මෑන් ගැන මොකද හිතෙන්නෙ..?“ 
“කැමරාවෙ හිටිය එකාගෙ ෂේප් එක තියෙනවනෙ...“
“මටනං හිතෙන්නෙ ඌම තමයි...“
“කොයිකටත් කිට්ටු කරල බලමු...“
හෝකන්දර, අමරගොඩ පාරේ, අතුරු පාරක ගමන් කරමින් සිටි පුද්ගලයෙකු වෙත අතුරුගිරිය පොලිසියේ නිලධාරින්ගේ අවධානය යොමු වී තිබුණේ එම නිලධාරීන් එදින උදැසනින්ම අපරාධ විමර්ශන රාජකාරියේ නිරතව එම මාර්ගයේ සැරිසරමින් සිටියදීය.
“අඩමානයක් නෑ. මිනිහම තමයි...“ 
ටී ෂර්ට් එක යට කරලා... අත්ඔරලෝසුව බැඳලා... ඩෙක් ෂුෂ් දාලා.. මාස්ක්... හැට් දාලා... බෑග් එක පිටේ එල්ලගෙන යන ගමනත් අර විදිහම තමයි. ආයි දෙකක් නෑ. 'බඩුම තමයි.“ එක් නිලධරයකු සෙසු අයට එසේ කීවේය.
අතුරුගිරිය පොලිසියේ අපරාධ විමර්ශන අංශයේ ස්ථානාධිපති පොලිස් පරීක්ෂක ප්‍රේමලාල්, වීරසිංහ, උප පොලිස් පරීක්ෂක රොෂාන්, සැරයන් 36709 සුකුමාරන්, කොස්තාපල්වරුන් වන 84898 හර්ෂ, 928 සුසන්ත, 92515 රජිත් හෙට්ටිගේ, 92523 ප්‍රියංකර ඇතුළු පිරිස මේ පුද්ගලයා ලුහුබැඳ ගොස් පරීක්ෂා කරන්නේ ඒ අනුවය. ඒ පසුගිය මාස පහක හයක කාලය තුළ දිවා කාලයේ එක දිගට අතුරුගිරිය පොලිස් වසමේ සිදු වූ ගෙවල් බිඳුම් මාලාවක සීසීටීවී කැමරා දර්ශන අනුව හඳුනාගත් සැකකරු මේ පුද්ගලයාම බවට අනුමාන කිරීමෙන් අනතුරුවය. එම ස්ථානයේදීම ඔහුව පරීක්ෂා කර බැලීමට පොලිස් කණ්ඩායම ඉක්මන් වූයේ 'සැකයේ වාසිය' උරගා බැලීම සඳහාය.
මෙම පරීක්ෂාවේදී අදාළ පුද්ගලයා පිටේ එල්ලාගෙන සිටි ගමන් බෑගයේ පැති සාක්කුවක තිබී මත්කුඩු ගුලියක් සොයා ගැනීමට පොලිසියට අපහසු වූයේ නැත. වැඩිදුරටත් ඔහුගේ බෑගය පරීක්ෂා කිරීමට පොලිස් නිලධාරීන් උත්සුක වූයේ එබැවිනි. යකඩ කපන අඬුවක් සහ ඉස්කුරුප්පු නියං දෙකක් එහි තිබුණේ මෙතෙක් කලක් තමන් සොයමින් සිටි 'සොර දෙටුවා' මේ පුද්ගලයාම විය යුතු බවට තවත් සාක්ෂියක් එකතු කරමිනි.
“විස්තර හරියටම කතා කරමු ගිහිල්ලම...“ පොලිස් නිලධාරීන් සැකකරු පොලිසියට කැඳවාගෙන යන්නේ එසේ පවසමිනි. සැකකරුගෙන් ප්‍රශ්න කිරීම ඇරඹෙන්නේ සීසීටීවි කැමරා ද නැවත නරඹන අතරය. ඒ සැකකරු පවසන කරුණු ඒ හා සැසදේදැයි බලමිනි. අතුරුගිරිය පොලිස් වසම ඇතුළත පසුගිය කාලයේ සිදු කරන ලද ගෙවල් බිඳුම් හයක් පිළිබඳ තොරතුරු අනාවරණය වන්නේ ඒ අනුවය. වසර විසි පහකට පමණ පෙර අතුරුගිරිය ප්‍රදේශයේ පදිංචිව සිට ඇති මේ පුද්ගලයා මව මියගිය පසුව නතර වන්නේ තම බිරියගේ ගම වන අවිස්සාවේල්ල, කොස්ගොඩ නිවෙසේය. අතුරුගිරිය ප්‍රදේශයේ අස්සක් මුල්ලක් නෑර ඇවිද පාරවල් හොඳින් දන්නා නිසා මොහු සියලුම සොරකම් සිදු කරන්නේ එම ප්‍රදේශයේය. ඔහු ඒ සඳහා බසයක නැගී අතුරුගිරියට එන්නේ උදේ කාලයේය. ඉන්පසු ඉබාගාතේ ඇවිද යන මේ පුද්ගලයා නිවෙස්වලට තට්ටු කර පාරක් හෝ ලිපිනයක් ගැන විමසන අතර කිසිවෙකු නොමැති බව සහතික කරගත් ‘ග්‍රිල්‘ ගසා නොමැති නිවෙස්වල දොර ජනෙල් ඉස්කුරුප්පු නියනක ආධාරයෙන් කඩා ඇතුළුවීම මොහුගේ සිරිතය. සොරා ගන්නා ලද දේපළ කොස්ගොඩ ප්‍රදේශයේ පුද්ගලයෙකුට උකස් කර ලබා ගන්නා මුදල් වියදම් කරන්නේ බොරැල්ල ප්‍රදේශයෙන් මත්කුඩු ලබා ගැනීම සඳහාය. මත්කුඩු මිලදී ගෙන ආපසු එන අතරේ අතුරුගිරිය ප්‍රදේශයේ වටයක් කැරකෙන ඔහු තවත් 'ගොදුරක්' පසුපස ලුහු බඳින්නේ අනාගත ආයෝජනය සැලසුම් කරගෙනය. 
සොරකමක් සිදු කර පසු දින එම බඩු උකස් කිරීමත් ඒ මුදල්වලින් බොරැල්ලෙන් කුඩු මිලදී ගෙන ආපසු එන අතර අතුරුගිරියේ තවත් නිවෙසක් කොල්ලකෑමත් මොහුගේ දින චරියාවේ සුවිශේෂී අංග බව පැහැදිලිය. පොලිසියට ඔහු කොටු වන්නේද කුඩු ග්‍රෑම් 06 මිලි ග්‍රෑම් 770 ක් සමඟය. ඒ හෝකන්දර, මාලසිංහගොඩ, කැතරින් වත්තේ නිවෙසකට සුද්දයක් දැමීමෙන් ලබා ගත් දේපළ අලෙවියෙන් පසුවය.
විදේශගතව සිටි මෙම නිවැසියන් මීට සතියකට පමණ පෙර මෙරටට පැමිණ ඇති අතර ඒ එන විට ඔස්ට්‍රේලියාවෙන් සාදවාගෙන පැමිණි 'රෝස් ගෝල්ඩ්' පවුම් 31/2 ක වළල්ලක්, පවුම් 1 1/2 ක මාලයක්, පවුමට තරමක් අඩු පෙණ්ඩනයක් රැගෙන ආ අතර ඒවා හා සුවඳ විලවුන් සපත්තු ඇතුළු දෑ සොරකම් කර ඇති බවට අතුරුගිරිය පොලිසියේ පැමිණිල්ලක් සටහන් කළේ වටිනාකම ලක්ෂ 18 ක් වන බව පවසමිනි.
එමෙන්ම රුපියල් ලක්ෂයක සහ හැටදහසක දේපළ සොරකම් කර ඇති බවට තවත් පැමිණිලි දෙකක් ලැබුණේ සති දෙකකට පමණ පෙරය. මෙම පැමිණි පිළිබඳ සීසීටීවී කැමරා පරීක්ෂා කිරීමේදී සියලුම සොරකම් සිදු කර ඇත්තේ 'එකම පුද්ගලයා' බවට හඳුනා ගැනීමේ ප්‍රතිඵලයක් ලෙස සැකකරු අත්අඩංගුවට ගැනුණ අතර ඔහු සොරකම් කළ ස්වර්ණාභරණ සහ විදුලි උපකරණ, බ්ලෙන්ඩර්, විදුලි ස්ත්‍රික්ක, රූපවාහිනි ඇතුළු දේපළ පොලිසිය විසින් සොයා ගනු ලැබිණි.
නුගේගොඩ කොට්ඨාස භාර ජ්‍යේෂ්ඨ පොලිස් අධිකාරි ජේ.පී. එස්. ජයමහගේ උපදෙස් පරිදි අතුරුගිරිය පොලිස් ස්ථානාධිපති ප්‍රධාන පොලිස් පරීක්ෂක ශාරද ප්‍රනාන්දු ඇතුළු නිලධාරින් විසින් මෙහි විමර්ශන සිදු කළහ.
