නවසීලන්තයේ ක්‍රිස්ටෝල්ස් වෙරළ තීරයට කිත්මීත් (12) තම වැඩිමහල් සොහොයුරු කල්යා ( 14) එදින ගියේ පාරු පැදීම සඳහාය. කිත්මි නොසිතූ මොහොතක එක්වරම මුහුදට ඇද වැටිණි. රළ පෙළ වේගයෙන් ඇදෙන්නට විය. කිත්මී දියඹට ගසාගෙන යමින් සිටියේය. පිහිනීමට දක්ෂයකු වූ කිත්මිට එදින මුහුදේ රළු ස්වභාවයත් සමඟ සටන් කිරීමට නොහැකි විය. දෙසොහොයුරන් අතරින් වැඩිමහල් සහෝදරයා කල්යා පිහිනා වෙරළට පැමිණියත් ඔහුගේ බාල සහොදරයා කිත්මි වෙරළට පැමිණ නොසිටියේ ය. එය දැනගත් වහාම කල්යා හීයක වේගයෙන් මුහුදට පැන්නේය. සහෝදර බැම්ම මුහුදේ රළ වේගයට වඩා ශක්තිමත් විය. එය දුටු වහාම කිත්මිගේ වැඩිමහල් සොහොයුරා කල්යා මුහුදේ ගසාගෙන යමින් සිටි සිය සහෝදරයා බේරා ගැනීමට හීයක වේගයෙන් වතුරට පිහිනා ගියේය.
කිත්මි වෙත ළංවීමට කල්යාට මීටර 60ක පමණ දුරක් වේගයෙන් පිහිනා යාමට සිදු විය. කල්යා සිය බාල සොහොයුරා මුහුදේ ඈතට ගසාගෙන යද්දී දැඩි සීතලත් වෙහෙසත් දරා ගනිමින් ඒ දෙසට තව තවත් වේගයෙන් පිහිනා යන්නට විය. “මල්ලි ඈතට ගහගෙන යනවා මට බලාගෙන ඉන්න බැරි වුණා” කල්යා කීවේය. ඉතින් මම මුහුදට පැනලා පිහින ගෙන ගිහින් දැඩි වෙහෙසක් දරා මගේ මල්ලි නැවත ගොඩබිමට රැගෙන ආවා. ඔහු සිය සොහොයුරා බේරා ගැනීමට වේගයෙන් මුහුදට පිහිනා යන්නේ තමාට යළි ඒමට නොහැකි වුවත් සිය බාල සහෝදරයා බේරාගන්නා බව මවට ද පවසමිනි.” 
මේ බිහිසුණු සිදුවීම සිදුවූයේ පසුගිය වසරේ අගෝස්තු මස 27 වැනිදා නවසීලන්තයේදීය. ශ්‍රී ලාංකික දරුවන් දෙදෙනකු වූ කල්යා සහ කිත්මි නවසීලන්තයේ දකුණු දිවයිනේ ගිනිකොන දිග ප්‍රදේශයේ ක්‍රිස්ටෝල්ස් වෙරළ දී සුපුරුදු පාරු පැදීම් අතරතුර මෙය සිදු විය. මුහුදේ ගසාගෙන යමින් සිටි බාල සොහොයුරු බේරා ගැනීමට කල්යා නම් වැඩිමහල් සහෝදරයා මීටර් 60ක පමණ දුරක් වේගයෙන් පිහිනා ගොස් ඇත. දැඩි පරිශ්‍රමයක් දරා ඔහු නැවත බාල සහෝදරයා ගොඩබිමට රැගෙන ආවේය.
“මම ඔහුට ස්තූති කරනවා යැයි තමාව බේරා ගැනීම ගැන කිත්මි කිවේය” මේ සහෝදර ප්‍රේමය නිසා සිය ජීවිතය ගැන නොසිතා සිය සොහොයුරාගේ ජීවිතය බේරා ගත් කල්යා දැක්වූ මෙම වීරත්වය පසුගියදා රටවල් 56කින් සමන්විත, බිලියන 2.4ක ජනගහනයක් ඇති පොදු රාජ්‍ය මණ්ඩලීය රටක වසරකදී සිදු කළ විශිෂ්ටතම ජීවිතාරක්ෂක වීර ක්‍රියාවට හිමි ඇගයීම වන මවුන්ට් බැට්න් පදක්කම දිනාගැනීමට නවසීලන්තයේ පදිංචි ශ්‍රී ලාංකික දරුවකු වූ කල්යා කන්දේගොඩ ගමගේ සමත්වී තිබේ. එනම් 2022 වසරේ කැපී පෙනෙනම වීර ක්‍රියාවට හිමි සම්මානයට 14 හැවිරිදි කල්යා කන්දේගොඩ ගමගේ නම් මේ ශ්‍රී ලාංකික දරුවා පාත්‍ර විය. ඒ අනුව සිය සහෝදරයා බේරා ගත් කල්යාට රාජකීය ජීවිතාරක්ෂක සංගමය විසින් මවුන්ට් බැට්න් පදක්කම පිරිනමනු ලැබීය.
පොදු රාජ්‍ය මණ්ඩලය යනු ස්වාධීන සහ සමාන ස්වෛරී රාජ්‍ය 56කින් යුත් ස්වේච්ඡා සංගමයකි. එහි ඒකාබද්ධ ජනගහනය බිලියන 2.5ක් වන අතර, එයින් සියයට 60කට වැඩි ප්‍රමාණයක් වයස අවුරුදු 29 හෝ ඊට අඩු අය වෙති. පොදු රාජ්‍ය මණ්ඩලය ලොව පුරා විහිදෙන අතර දියුණු ආර්ථිකයන් සහ සංවර්ධනය වෙමින් පවතින රටවල් මෙයට ඇතුළත් වේ. මෙහි සාමාජිකයන්ගෙන් රටවල් තිස් තුනක් කුඩා රාජ්‍ය වන අතර ඒවායෙන් බොහොමයක් දූපත් රටවල් වේ. මෙවැනි ලොව පුරා විහිදුණු රටවල් අතුරින් ජයග්‍රහණයක් ලබා ගැනීම නිසා කල්යා මෙම පදක්කම දිනාගැනීම වඩා වැදගත් වෙයි. එසේම මේ සම්මානය ලබාගත් ළාබාලතම පුද්ගලයා බවට පත්වීමත් ඉතිහාසගත වෙයි.
කල්යා දකුණු ඔටාගෝ හි ශ්‍රී ලාංකික පිහිනුම් ක්‍රීඩකයකු වෙයි. තම බාල සොහොයුරා රළ පහරකින් ගසාගෙන යද්දී නිර්භීත ලෙස බේරා ගැනීම වෙනුවෙන් ඔහුට මෙම සම්මානය හිමි විය. ඔහුගේ දක්ෂකම රටවල් 56ක් පුරා පැතිරී ගියේය. දක්ෂතම පිහිනුම් ක්‍රීඩකයෙකු වූ කල්යාට සිය සොහොයුරු කිත්මි නැවත ගොඩබිමට ගෙන ඒම සිදු කළේ රළ පහර සමඟ පොර බැඳීමෙනි. තම සොහොයුරා වෙරළෙන් බොහෝ ඈතට දියඹට ඇදී යන විට පිහිනීමෙන් සහ සීතලෙන් දැඩි විඩාවට පත්වුවද තම සහෝදරයා බේරා ගැනීමේ අදහස අත නොහැරි බව කල්යා පවසයි.
දැඩි සීතල රළ පහර සමඟ පොර බඳිමින් වෙරළේ සිට මීටර් 60ක් පමණ දුරින් සිටින තම සහෝදරයා වෙත යන ගමනේදී තමා බිය නොවූ බව ද කල්යා පවසයි. තමාට සහ සහෝදරයාට නැවත වෙරළට එන්නට නොහැකි වනු ඇතැයි ඔහු සිතුවේය. නමුත් දැඩි සීතල දරා ගනිමින් සොහොයුරාගේ ජීවිතය බේරා ගැනීමේ සටනක ඔහු නිරත විය. එදා ඔවුන් රැල්ලට ගසාගෙන නොයාම ගැන තමන් සතුටු වන බව ඔහු පවසයි. මේ සහෝදරයන් දෙදෙනාම ඔවුන්ගේ අත්දැකීම්වලින් පසුව මුහුද සම්බන්ධයෙන් වඩාත් සැලකිලිමත් සහ පරිස්සම් වූ බවද කල්යා පවසයි.
එරට රාජකීය ජීවිතාරක්ෂක සංගමයේ සඳහන් කරන ආකාරයට එම ප්‍රදේශයේ පොලිස් නිලධාරියකු ප්‍රකාශ කර ඇත්තේ ‘කල්යා සිය බාල සහෝදරයා බේරා ගත් එම ජල තීරයේ කිසිවෙක් රළ පහරට හසුවී නැවත බේරී නැති බවත්, එය අතිශයින්ම භයානක ස්ථානයක් බව අනිවාර්‍යෙන්ම කිවයුතු බවත් ය. කල්යාගේ නිර්භීත ක්‍රියාව නිසා එදා ඔහුගේ සහෝදරයාගේ ජීවිතය බේරුණු බව ඔවුහු සඳහන් කරති”.
කල්යා අනාගතයේදී ව්‍යාපාරයක් ආරම්භ කිරීමට හෝ ඉංජිනේරුවකු වීමට අපේක්ෂා කරයි. එසේම ඔහු තම මව් රට වන ශ්‍රී ලංකාවේදී පුහුණු කළ සිය පිහිනුම් කුසලතා සහ ජීවිතාරක්ෂක පුහුණුව වැඩි දියුණු කිරීමට අපේක්ෂා කරන බවද පවසයි. කල්යාගේ මේ ජීවිතාරක්ෂක කුසලතාව නිසා වසරකට පොදු රාජ්‍ය මණ්ඩලයේ එක් සාමාජිකයකුට පමණක් ප්‍රදානය කරන මවුන්ට් බැටන් පදක්කම හිමි විය. ඔහු මේ නිර්භීත සම්මානය දිනාගත් ළාබාලතම පුද්ගලයා බවට පත්වීම සුවිශේෂත්වයකි. ඒ නිසාම කල්යා දැනට ඉගැනුම ලබන නවසීලන්තයේ මිල්ටන් හි පිහිටි ටොකොමයිරිරෝ උසස් පාසලේ විශේෂ පාසල් රැස්වීමකදී කල්යාට විශේෂ පදක්කම පිරිනැමූ අතර, ඔහුගේ විදුහල්පති ඩෙක්ලාන් ෂෙරිඩන් පවසන්නේ කලයාගේ ජයග්‍රහණ පිළිබඳව පාසල ඉතා ආඩම්බර වන බවයි. එසේ ම කල්යා ඔහුගේ මව් රට වන ශ්‍රී ලංකාවට ද ඔහු මහත් ගෞරවයක් සහ ආඩම්බරයකි.
