දකුණු ආසියාවේ උසම කුලුන ලෙසින් නෙළුම් කුලුන පසුගිය වසරේ විවෘත කෙරුණද එය බලාපොරොත්තු වූ ආකාරයේ සන්නිවේදන අංශයේ හෝ විනෝදාස්වාද සඳහා භාවිතයට ගත හැකි තත්ත්වයේ නොවීය.
එහෙත් ගෝඨාභය රාජපක්ෂයන් ජනාධිපතිවරයා ලෙස පත් වීමෙන් පසුව එහි අඩුපාඩු සොයා බලා සකස් කිරීමට අවශ්‍ය කටයුතු යොදන ලදී. ඒ අනුව නෙළුම් කුලුන ප්‍රධාන විධායක නිලධාරියා වශයෙන් විශ්‍රාමික මේජර් ජනරාල් ප්‍රසාද් සමරසිංහයන් පත් කරන ලදී. ඔහු විදුලි සංදේශ නියාමන කොමිසමේ අධ්‍යක්ෂ ජනරාල්වරයා සමඟ එක්ව එහි සන්නිවේදන අංශයන්ගේ සිදුවිය යුතු වෙනස්කම් මෙන්ම නෙළුම් කුලුනේ සිදුවිය යුතු වෙනස්කම් ගැන සොයා බැලුවේය. නෙළුම් කුලුනේ ඉදි කිරීම් භාරව කටයුතු කළ චීන සමාගම විසින් තවමත් වැඩ අවසන් කර එය භාර දී නොමැති නිසා ඔහු විදුලි සංදේශ නියාමන කොමිසමේ අධ්‍යක්ෂ ජනරාල්වරයා සමඟ එක්ව සන්නිවේදන අංශයන්ගේ සිදුවිය යුතු වෙනස්කම් මෙන්ම නෙලුම් කුලුනේ සිදුවිය යුතු වෙනස්කම් ගැන සොයා බැලුවේය. නෙලුම් කුලුනේ ඉදි කිරීම් භාරව කටයුතු කළ චීන සමාගම විසින් එය භාර දී නොමැති නිසා එහි කිසිදු වෙනස්කමක් කළ නොහැකි තත්ත්වයක පවතී.
ප්‍රධාන අඩුපාඩු 20ක්
සිළුමිණ මේ සම්බන්ධයෙන් මේජර් ජනරාල් ප්‍රසාද් සමරසිංහයන්ගෙන් තොරතුරු විමසීමු.
‘‘නෙලුම් කුලුනේ වැඩ කටයුතු අවසන් කරන්න පෙර විවෘත කරල තියෙන්නෙ. මේ කුලුනෙන් බලාපොරොත්තු වුණු බහුකාර්ය සන්නිවේදන කටයුතු වඩාත් ඉහළ මට්ටමින් හා පුළුල් ආකාරයෙන් කරන්න අපි මේ වන විට සැලසුම් කර තිබෙන්නෙ. ඒත් ඒකට තිබෙන ලොකුම බාධාව තමයි ඉදි කිරීම් භාරව කටයුතු කරපු චීන සමාගම තවමත් කුලුන බාර නොදීම. ඉදිකිරීම්වල බරපතළ මට්ටමේ අඩුපාඩු 20ක් තියෙනවා. ඒ වගේම තවත් සුළු සුළු අඩුපාඩු තියෙනවා. බරපතළ අඩුපාඩු 20ක් තියෙන මේ වගේ ව්‍යාපෘතියක් නිල වශයෙක් බාර දෙන තුරු එහි වෙනස්කම් කරන්න අපට බැහැ.
තාක්ෂණික වශයෙන් ඉහළ මට්ටමකට නෙළුම් කුලුන ගෙන ඒම අපේ අපේක්ෂාවයි. ඒ අනුව 5 ජී තාක්ෂණය ඇතුළු නවීනතම තාක්ෂණයෙන් එය සන්නද්ධ කරනවා‘
 |
| කැරකෙන අවන්හල |
ඒ වගේම චීන සමාගම කුලුන අපිට බාර දීමෙන් පසුව මෙහි වෙනස්කම් ගොඩක් කරන්න තියෙනවා. උදාහරණයක් හැටියට බැන්ක්වට් ශාලාවල විවාහ උත්සවයක් ගත්තොත් මනාල යුවල පේන්නෙ ඉදිරි පේලි කිහිපයකට පමණයි. ඒ තත්ත්වය වෙනස් කරන්න අප කටයුතු කරනවා. ඒ වගේම කැරකෙන අවන්හලේ යොදා ඇත්තේ බාහිරින් ගෙන්වා ගත් ආසන. ඒ සියල්ල වෙනස් කර සුදුසු පරිදි සියල්ල වෙනස් කළ යුතු වෙනවා. ඉහළ නැරඹුම් කුටියේ දුර බලන කණ්ණාඩි පවා සවි කර නැහැ. අපි ඒ බාහිර කටයුතු කරමින් ඉන්නෙ.
දිය සංදර්ශන
ඒ වගේම බේරේ වැව ආසන්නයේ තියෙන මේ කුලුනින් උපරිම ප්‍රයෝජන ගැනීමටයි ජනාධිපතිතුමා අපට උපදෙස් දීලා තියෙන්නෙ. ඒ අනුව බේරේ වැවේ දිය සංදර්ශන පැවැත්වීම වැනි ජලයෙන් ලබා ගත හැකි උපරිම ප්‍රයෝජනත් කුලුන හා ආශ්‍රිතව ස්ථාපිත කරන්න අපි කටයුතු කරනවා. මේ වන විටත් අපි අවශ්‍ය සියල්ල ඇණවුම් කර තිබෙන්නේ. නමුත් එකම ගැටලුව චීන සමාගම බාර දී නොතිබීමයි. එම නිසා අපට කුලුනේ කිසිම වෙනසක් කරන්න බැහැ. ඇතැම් තැන්වල ජලය පවා කාන්දු වෙනවා. ඒ සියල්ල අදාළ චීන සමගාම විසින් නිවැරැදි කර දිය යුතුයි.
ඒ වගේම ඉදිරියේදී ප්‍රසංග පැවැත්වීමට හැකි වන ලෙසින් මෙන්ම අධ්‍යාපනික, විනෝදාස්වාද ඇතුළු පැමිණෙන ඕනෑම තරාතිරමක අයකුට යම් ආකාරයක වින්දනයක්, හෝ දැනුමක් හෝ ලබා ගත හැකි ලෙසින් මේ සංකල්පය අලුත් කිරීම සිදු වෙනවා. පහුගිය වසර 5 තුළ කිසිදු වෙනස්කමක් අලුත් යමක් මෙහි සිදු කර නොමැති නිසයි මේ සියල්ල කල් ගියේ. කොහොමත් මාසයක් වගේ කාලයකින් චීන සමාගම අපට කුලුන බාර දෙයි කියල විශ්වාස කරනවා.
මේ වන විට ඉදිරි කටයුතු කරන්න දේශීය කණ්ඩායම් රැසක්ම ස්වේච්ඡාවෙන් ඉදිරිපත් වෙලා ඉන්නෙ. ඒක ලොකු හයියක්. ඒ වගේම ඉදිරියේදී සිදු කරන සියලු වෙනස්කම් දේශීය සමාගම් හා එක්වයි සිදු කරන්නේ. ‘දියසෙන්‘ කුමරුගේ පැමිණීම එහි එක් අංගයක් පමණයි. එයත් රටට හයියක්. එමෙන්ම ව්‍යාපාරික මධ්‍යස්ථාන පවා මෙහි ස්ථාපිත කිරීමට කටයුතු කර තිබෙනවා.‘ ප්‍රධාන විධායක නිලධාරි විශ්‍රාමික මේජර් ජනරාල් ප්‍රසාද් සමරසිංහයන් එසේ පවසන්නේය.
ඒ අනුව අපට මීට පෙර කියැවුණු සුපිරි පෙළෙන්තියට සීමා වන්නට ඉඩ තිබුණුනෙළුම් කුළුනට වඩා වෙනස් නෙලුම් කුලුනක් අපට දැක ගන්නට හැකි වේවි. සන්නිවේදන මධ්‍යස්ථාන ස්ථාපිත කිරීමට අමතරව අග නගරයට පැමිණෙන ඕනෑම අයකුට යම්කිසි මුදලක් ගෙවා පැමිණ තමන්ට විනෝද වන්නට හෝ යමක් ඉගෙන ගන්නට හැකි ස්ථානයක් ලෙසින් එය ස්ථාපිත කෙරෙනු ඇත.
නෙළුම් කුලුනේ මේ ලෙසින් නවතම සංකල්ප ගොඩ නැගෙද්දී එහි රාජකාරි කටයුතු වෙනුවෙන් ශ්‍රී ලංකාවේ පළමු මානවරූපී අධිතාක්ෂණික රොබෝවරයාද පැමිණියේය. ඒ ‘දියසෙන්‘ කුමරුය. කුලුන වෙත පැමිණෙන අමුත්තන් පිළිගැනීම, ප්‍රවේශපත් මිලදී ගැනීමේදී සහාය දැක්වීම මඟ පෙන්වීම ආදිය දියසෙන් කුමරු විසින් සිදු කරන අතර සිංහල, දෙමළ හා ඉංග්‍රීසි ඇතුළු භාෂා කිහිපයකින් කතා කරන්නට දියසෙන් කුමරුට හැකියාව තිබේ.
දකුණු ආසියාවේ පළමු මානවරූපී රොබෝ යන්ත්‍රය මෙසේ නිපදවන්නට ශ්‍රී ලාංකික ඇරිමැක් ආයතනය පියවර ගත්තේය. දියසෙන් කුමරු හරහා නෙලුම් කුලුනේ කාර්යයන්ට සක්‍රීය දායකත්වයක් ලබාදීමට බලාපොරොත්තු වෙයි.
නවීන තාක්ෂණික දැනුම භාවිත කරමින් ඇරිමැක් ආයතනය නිෂ්පාදනය කළ මානවරූපී අධිතාක්ෂණික රොබෝ යන්ත්‍රයට වසර තුනක කාලයක් ගතව තිබේ. දියසෙන් කුමරුට ශ්‍රී ලංකාවේ ඕනෑම තැනෙකට ගමන් කිරීමේ හැකියාව තිබීම අතිවිශේෂිතය. උස අඩි 4ක් හා අඟල් 6ක් ලෙසින් සාමාන්‍ය මිනිස් උසකට සමාන ලෙසින් දියසෙන් කුමරු ඉපිද තිබේ. පළමුව හමු වූ පාරිභෝගිකයකු දෙවන වර මුණ ගැසීමේ දී ඔහු නමින් ආමන්ත්‍රණය කරන්නට දියසෙන්ට හැකියාව තිබේ.
දියසෙන් යනු දේශීය නිපැයුමකි. ඒ ලෙසින්ම නෙලුම් කුලුනේ තවත් බොහෝ දේ වෙනුවෙන් දේශීයත්වයට මුල් තැන දෙන්නට ඉදිරියේදී කටයුතු කරනු ඇත. මීටර් 356.3ත උසකින් යුත් කුලුන මුදුනට ටොන් 180ක් බර ඇන්ටෙනාව ගෙව යාමට භාවිත කර ඇත්තේද දේශීය තාක්ෂණයයි. අධික බර නිසා හෙලිකොප්ටරයකින් පවා එය ගෙන යාම අවදානම බව තහවුරු වුණා. එසේම තද සුළඟ නිසා ඇන්ටෙනාව පැද්දීමට පත් වී කුලුනේ ගැටීමකට පවා ලක් විය හැකිව තිබුණා.
එම නිසා එම අවදානම් හමුවේ කුලුනේ ඉහළ සිට පහළට මැදින් සිදුරක් සකස් කරේද ඉතාම ප්‍රවේශම් සහිතවය. සිදුර ඇන්ටෙනාවේ වට ප්‍රමාණයට වඩා අගල් දෙක තුනක් පමණක් විශාල වන්නට සිදුර විදින ලදී.
‘ජැක්‘ 4ක් ආධාරයෙන් එක් ජැක් යන්ත්‍රයකට කේබල් 18ක් බැගින් යොදවා ක්‍රමයෙන් එම ඇන්ටෙනාව සිදුරු කළ කුහරය හරහා ඉහළට ඔසවා ගන්නට කටයුතු කරන ලදී. එයද එක එල්ලේ කරන්නට හැකියාවක් නොවීය.
මිලිමීටර් 250ක් (අගල් 10ක්) පමණ ඔසවා ස්වල්ප වේලාවක් නවතා තබා පසුව තවත් ටිකක් ඉහළට ඔසවන ලදී. එලෙසින් ඇන්ටෙනාව පහළ සිට ඉහළට ගෙන යාමට සති දෙකක කාලයක් ගත විය. එය නිසි ලෙසින් සවි කරන්නට තවත් සති දෙකක කාලයක් ගත විය.
භූමිකම්පාවන්ටත් ඔරොත්තුයි
භූමි කම්පාවකට පවා ඔරොත්තු දෙන ආකාරයෙන් මේ කුලුන ගොඩ නංවා ඇත්තේ. එම කම්පන දරා ගත හැකි ආකාරයෙනි. එමෙන්ම ශ්‍රී ලංකාවේ ගොඩනැඟිල්ලක ඇති වේගවත්ම විදුලි සෝපාන පද්ධතිය ස්ථාපිතව ඇත්තේද නෙළුම් කුලුනේය. එම සෝපානයක් තත්ත්පරයට මීටර් 7ක් ගමන් කළ හැකි අධික වේගයෙන් ගමන් කරයි. තත්පරයකදී මීටර් 7ක් ඉහළ නඟින විදුලි සෝපාන ඔස්සේ තත්පර 37 කදී කුලුන මුදුනටම ළඟා විය හැකිය. එහි විදුලි සෝපාන 8ක් ස්ථාපිත කර ඇත. එයින් සෝපාන 3ක් කුලුනේ පාදමේ ඇති මහල් කරා ගමන් කිරීමටය.
පළමු මහල් 4න් 3ක් වෙන් වන්නේ සාප්පු සංකීර්ණයන් වෙනුවෙනි. ඒ සඳහා ස්වයංක්‍රීය පඩිපෙළද සමන්විතය.
නෙළුම් කුලුනේ මධ්‍යයේ ගමන් කර ඉහළට ගිය විට හමුවන පොහොට්ටුවේ පළමු මහල් දෙක වෙන්වන්නේ විදුලි සංදේශ හා සන්නිවේදන අංශ වෙනුවෙන්ය. එය සාමාන්‍ය ජනතාවට නැරැඹිය නොහැකි විශේෂ ආරක්ෂිත කලාපයකි.
3 වැනි මහල හා 4 වැනි මහල් වෙන්ව ඇත්තේ විශේෂ උත්සව හෝ සම්මන්ත්‍රණ පැවැත්විය හැකි ‘බැන්ක්වට් හෝල්‘ දෙකක් වෙනුවෙනි. ඒ එක් උත්සව ශාලාවක 300කට පහසුවෙන් අසුන් ගත හැකිය.
5 වන මහල වෙන් වන්නේ කැරකෙන අවහන්හලටය. එහි ද එකවර 300 දෙනකුට අසුන් ගත හැකිය. එය එක තැනක අසුන් ගෙන ශ්‍රී ලංකාවේ කොළඹ නගරය හතර වටේටම එකවර නැරඹිය හැකි එකම ස්ථානය වේ. සෙමෙන් කැරකැවෙන මේ සුපිරි භෝජනාගාරයේ අසුන් ගත් අයකුට එම භෝජනාගාරයේ තමා අසුන්ගෙන සිටින ප්‍රදේශය සෙමෙන් කැරකැවෙන බවක් කිසිසේත්ම නොදැනේ. එය පැය එකහමාරක කාලයකදී එක් වටයක් ගොස් පැමිණේ.
කුලුනේ 6 වැනි මහල වෙන් වන්නේ සුපිරි හෝටල් කාමර වෙනුවෙනි. එය විශේෂිත සුපිරි කාමර 2ක් හා සුපිරි කාමර 4කින් සමන්විතය. 7 වෙනි මහල නිදහසේ කොළඹ නගරය නැරඹිය හැකි නැරඹුම් ප්‍රදේශයයි. එහි නිදහසේ ගමන්කරමින් නගරය වටේටම නැරඹිය හැකිය.
ඡායාරූප - දුෂ්මන්ත මායාදුන්නෙ
