2020 අගොස්තු මස 05 වැනිදා මැතිවරණ දිස්ත්‍රික්ක 22 සඳහා ඡන්ද කොට්ඨාශ 160ක් යටතේ පවත්වනු ලැබූ පාර්ලිමෙන්තු මැතිවරණයේදී ශ්‍රී ලංකා පොදුජන පෙරමුණ ප්‍රමුඛ සන්ධානය 2/3 ඓතිහාසික ජයක් වාර්තා කළේය. මෙය එක්තරා විදියකට 1951දී ශ්‍රී ලංකා නිදහස් පක්ෂය ආරම්භ කර පස් වසරක් ඇතුළත පාර්ලිමේන්තු බලය ලබාගැනීමට සමාන තත්ත්වයකි. මෙලෙස 09 වැනි පාර්ලිමේන්තුවට තේරී පත් වීම සඳහා ශ්‍රී ලංකා පොදු ජන පෙරමුණ යටතේ විවිධ සංවිධාන හා පක්ෂ ගණනාවක් තරග කළේය. එලෙස තරග වැදුණු වියත්මග සංවිධානය හා සෙසු පක්ෂවලින් තේරී පත් වූ අපේක්ෂකයන්, දිස්ත්‍රික්ක මට්ටමින් ලැබූ මනාප සහ හිමි කරගත් ස්ථාන සැකැවින් විමසා බලමු.
නව වැනි පාර්ලිමේන්තුව සඳහා විද්වත් නියෝජනයක් අපේක්ෂාවෙන් ජනාධිපති ගෝඨාභය රාජපක්ෂ මහතාගේ අනුදැනුම ඇතිව පිහිටුවන ලද වියත්මග සංවිධානයෙන් අපේක්ෂකයන් 11 දෙනකු ඉදිරිපත් කරනු ලැබීය. ඒ අය අතරින් නවදෙනකු මහ මැතිවරණයට තරග කළ අතර දෙදෙනකු ජාතික ලැයිස්තුවට ඇතුළත් කෙරිණි. මහ මැතිවරණයට ඉදිරිපත් වූ 09 දෙනා අතරින් එක් අයෙකු හැර ඉතිරි නියෝජිතයන් 08 දෙනාම ජයග්‍රහණය කර ශ්‍රී ලංකා ප්‍රජාතාන්ත්‍රික සමාජවාදී ජනරජයේ උත්තරීතර පාර්ලිමේන්තුවට තේරී පත් විය. මෙහි ඇති විශේෂත්වය වන්නේ මොවුන් සියලු දෙනාම ප්‍රථමවරට පාර්ලිමේන්තු මැතිවරණය සඳහා තරග කර ඉහළ මනාප ලැබ තේරී පත් වීමය.
ආචාර්ය සරත් වීරසේකර මනාප 3,28,092ක් ලබාගනිමින් කොළඹ දිස්ත්‍රික්කයෙන් පළමු වැනි තැනට තේරී පත් වූ අතර මහාචාර්ය ගුණපාල රත්නසේකර මනාප 1,41,991ක් ලබාගනිමින් කුරුණෑගල දිස්ත්‍රික්කයෙන් තුන්වැනි තැනට තේරී පත් විය. ආචාර්ය නාලක ගොඩහේවා මනාප 3,25,479ක් ලබාගනිමින් ගම්පහ දිස්ත්‍රික්කයෙන් පළමු වැනි ස්ථානය හිමිකර ගත් අතර, මහාචාර්ය චන්න ජයසුමන මනාප 1,33,980ක් ලබාගනිමින් අනුරාධපුරය දිස්ත්‍රික්කයෙන් දෙවැනි ස්ථානය හිමිකර ගත්තේය. ඉංජිනේරු නාලක කෝට්ටගොඩ මනාප 71,404ක් ලබාගනිමින් මාතලේ දිස්ත්‍රික්කයෙන් දෙවැනි තැනට පත් වූ අතර, වෛද්‍ය උපුල් ගලප්පත්ති මනාප 63,369ක් ලබාගනිමින් හම්බන්තොට දිස්ත්‍රික්කයෙන් පස්වැනි ස්ථානය හිමිකර ගත්තේය.
වෛද්‍ය තිලක් රාජපක්ෂ මනාප 54,203ක් ලබාගනිමින් දිගාමඩුල්ල දිස්ත්‍රික්කයෙන් 03 වැනි ස්ථානයට පත් වූ අතර, නීතීඥ උදයන චාමින්ද කිරිඳිගොඩ මනාප 39,904ක් ලබාගනිමින් මහනුවර දිස්ත්‍රික්කයෙන් 08 වැනි ස්ථානයට පත් විය. පරාජයට පත්වූයේ කොළඹ දිස්ත්‍රික්කයෙන් තරග කළ වරලත් ගණකාධිකාරී අනුර ප්‍රනාන්දුය. ඔහු ලබාගත් මනාප සංඛ්‍යාව 32858 වූ අතර පරාජිත ලැයිස්තුවේ 06 වැනි ස්ථානය හිමි කරගෙන තිබේ. වියත්මග ඉදිරිපත් කළ 11 දෙනාගෙන් ජාතික ලැයිස්තුවෙන් ඇතුළත් කළ දෙදෙනා වන්නේ හිටපු මහ බැංකු අධිපති අජිත් නිවාඩ් කබ්රාල් සහ වෛද්‍ය සීතා අරඹෙපොළ ය.
මෙවර මහ මැතිවරණයේදී ශ්‍රී ලංකා පොදුජන පෙරමුණ යටතේ ජාතික නිදහස් පෙරමුණේ අපේක්ෂකයන් 11 දෙනකු ඉදිරිපත් කළ අතර, ඉන් 06 දෙනෙකු මෙවර පාර්ලිමේන්තුවට තේරී පත් විය.
ඒ අනුව නායක විමල් වීරවංශ මනාප 2,67,084ක් ලබා ගනිමින් කොළඹ දිස්ත්‍රික්කයෙන් දෙවැනි ස්ථානය හිමි කර ගත් අතර, ජාතික සංවිධායක ජයන්ත සමරවීර මනාප 1,00356ක් ලබාගනිමින් කළුතර දිස්ත්‍රික්කයෙන් පස්වැනි ස්ථානයට තේරී පත් විය. දේශපාලන මණ්ඩලයේ සාමාජික නිමල් පියතිස්ස මනාප 51,225ක් ලබාගනිමින් නුවරඑළිය දිස්ත්‍රික්කයෙන් 05 වැනි ස්ථානය හිමි කර ගනිද්දී, උද්දික ප්‍රේමරත්න මනාප 1,33,550ක් ලබාගනිමින් අනුරාධපුර දිස්ත්‍රික්කයෙන් තුන්වැනි ස්ථානය හිමි කර ගත්තේය.
ගාමිණි වලේබොඩ මනාප 85,840ක් ලබාගනිමින් රත්නපුර දිස්ත්‍රික්කයෙන් හතරවැනි ස්ථානය හිමි කර ගත් අතර, ජාතික නිදහස් පෙරමුණේ ප්‍රචාරක ලේකම් ලෙස කටයුතු කළ මොහොමඩ් මුසම්මිල් ජාතික ලැයිස්තුවෙන් පාර්ලිමෙන්තුවට තේරී පත් විය. ජාතික නිදහස් පෙරමුණේ අපේක්ෂක ලැයිස්තුවෙන් ඉදිරිපත් වූ නිරෝෂන් ප්‍රේමරත්න මනාප 57,686ක් ලබාගනිමින් මාතර දිස්ත්‍රික්කයේ පරාජිත ලැයිස්තුවේ දෙවැනි ස්ථානය හිමි කරගද්දී, උදය ශාන්ත ගුණසේකර මනාප 41,740ක් ලබාගනිමින් මොණරාගල දිස්ත්‍රික්කයෙන් පරාජය හිමි කරගත්තේය.
මෙවර මහ මැතිවරණය සදහා ශ්‍රී ලංකා නිදහස් පොදුජන සන්ධානය යටතේ තරග කළ ශ්‍රී ලංකා නිදහස් පක්ෂයේ අපේක්ෂකයන් 32 දෙනා අතුරින් 14 දෙනෙකු මෙවර පාර්ලිමේන්තුවට තේරී පත් වූ අතර, ජාතික ලැයිස්තුවෙන් දෙදෙනකු නම් කර තිබූ අතර ඉන් එක් අයකු තේරී පත් විය.
පක්ෂයේ නායකයා ලෙස හිටපු ජනාධිපති මෛත්‍රිපාල සිරිසේන මනාප 1,11,137ක් පොළොන්නරුව දිස්ත්‍රික්කය පළමුවැනි ස්ථානයට පත් වූ අතර, ජ්‍යෙෂ්ඨ උප සභාපති නිමල් සිරිපාල ද සිල්වා බදුල්ල දිසත්‍රික්කය නියෝජනය කරමින් මනාප 1,41,901 හිමි කරගනිමින් පළමු වැනි ස්ථානය හිමි කර ගත්තේය. දයාසිරි ජයසේකර කුරුණෑගල දිස්ත්‍රික්කයෙන් මනාප 1,12,452ක් ලබාගෙන සිවුවැනි ස්ථානයට පත්විය. ෂාන් විජේලාල් ද සිල්වා ගාල්ල දිස්ත්‍රික්කයෙන් මනාප 67,793ක් ලබාගනිමින් හයවැනි ස්ථානය දිනා ගත් අතර, ශාන්ත බණ්ඩාර කුරුණෑගල දිස්ත්‍රික්කයෙන් මනාප 52,086ක් ලබාගනිමින් දහවැනි ස්ථානයට පත් විය. දුමින්ද දිසානායක අනුරාධපුර දිස්ත්‍රික්කයෙන් මනාප 75,535ක් ලබාගෙන පස්වැනි ස්ථානයට පත් විය. හම්බන්තොට දිස්ත්‍රික්කයේ තරග බිමට පිවිසි මහින්ද අමරවීර මනාප 1,23,730ක් හිමි කරගෙන තුන්වැනි ස්ථානයට පත් වෙද්දී, රංජිත් සියඹලාපිටිය කෑගල්ල දිස්ත්‍රික්කයෙන් මනාප 1,03,300ක් ලබාගනිමින් දෙවැනි ස්ථානයට පත් විය. ලසන්ත අලගියවන්න ගම්පහ දිස්ත්‍රික්කයෙන් මනාප 73,061ක් ලබාගෙන දහවැනි ස්ථානයට පත් වූ අතර, ජගත් පුෂ්පකුමාර මොණරාගල දිස්ත්‍රික්කයෙන් මනාප 66,176 ක් ලබා ගනිමින් තුන්වැනි ස්ථානය හිමි කරගත්තේය. සාරතී දුෂ්මන්ත කෑගල්ල දිස්ත්‍රික්කයෙන් මනාප 58,306ක් ලබාගනිමින් පස්වැනි ස්ථානයට පත් වෙද්දී, කාදර් මස්තාන් වන්නි දිස්ත්‍රික්කයෙන් මනාප 13, 454ක් ලබා ගනිමින් පෙරමුණ ගත්තේය. මීට අමතරව අංගජන් රාමනාදන් ශ්‍රී ලංකා නිදහස් පක්ෂය යටතේ තරඟ කර යාපනය දිස්ත්‍රික්කයෙන් මනාප 36,365ක් ලබා ගනිමින් පළමුවැනි ස්ථානය හිමිකර ගනිමින් පාර්ලිමේන්තු වරම් දිනාගත්තේය.
මේ ජයග්‍රහණ පිළිබඳ අධ්‍යයනය කර බැලීමේදී පොළොන්නරුව හා බදුල්ල යන දිස්ත්‍රික්ක දෙකේම පොදුජන පෙරමුණු ලැයිස්තුවේ පළමු තැන ගැනීමට ශ්‍රීලනිපයට හැකිව තිබේ. ඒ ශ්‍රීලනිප නායක මෛත්‍රීපාල සිරිසේන හා ජ්‍යෙෂ්ඨ උප සභාපති නිමල් සිරිපාල ද සිල්වා විම විශේෂය.
ශ්‍රීලනීපය විසින් ජාතික ලැයිස්තු මන්ත්‍රීන් ලෙස මහාචාර්ය රෝහණ ලක්ෂ්මන් පියදාස හා ආචාර්ය සුරේන් රාඝවන් යෝජනා කර තිබුණ ද ශ්‍රී ලංකා පොදු ජන පෙරමුණට හිමි වූ ජාතික ලැයිස්තු මන්ත්‍රී ආසන 17න්, ශ්‍රීලනීපයට හිමි වූයේ එක් ආසනයක් පමණි. ඊට ආචාර්ය සුරේන් රාඝවන් පත් කෙරිණි.
මෙවර ශ්‍රී ලංකා පොදුජන පෙරමුණ යටතේ තරග කළ ලංකා සමසමාජ පක්ෂයේ අපේක්ෂකයන් තිදෙනාම පරාජයට පත් විය. කෑගල්ල දිස්ත්‍රික්කයට තරග බිමට පිවිසි වයි. ජී. පද්මසිරි මනාප 24,862ක් ලබා ගනිමින් පරාජිත ලැයිස්තුවේ පස්වැනි ස්ථානය හිමි කරගත්තේය. ගාල්ල දිස්ත්‍රික්කයට තරග කළ බද්දේගම සමිත හිමි මනාප 38,831ක් ලබාගනිමින් පරාජිත ලැයිස්තුවේ පස්වැනි ස්ථානය හිමි කර ගනිද්දී, මහනුවර දිස්ත්‍රික්කයට තරග කළ නීතිඥ චන්ද්‍රිකා සේනාරත්න මනාප 11,288ක් ලබාගනිමින් පරාජිත ලැයිස්තුවේ හත්වැනි ස්ථානය පත් වූවාය.
ශ්‍රී ලංකා කොමියුනිස්ට් පක්ෂයෙන් මාතර දිස්ත්‍රික්කයට තරග කළ වීරසුමන වීරසිංහ මනාප 77,967ක් ලබාගනිමින් ජයග්‍රාහක ලැයිස්තුවේ හයවැනි ස්ථානයට පත් වෙද්දී, එම පක්ෂයෙන් කොළඹ දිස්ත්‍රික්කයට තරග කළ මහේෂ් අල්මේදා මනාප 29,853ක් ලබාගනිමින් පරාජිත ලැයිස්තුවේ අටවැනියා බවට පත් විය. ශ්‍රී ලංකා කොමියුනිස්ට් පක්ෂයෙන් විශේෂඥ වෛද්‍ය ජී. වීරසිංහ ජාතික ලැයිස්තුවට යෝජනා කර තිබුණද ඒ සඳහා ඔහුට අවස්ථාවක් නොලැබුණි.
ශ්‍රී ලංකා පොදු ජන පෙරමුණ යටතේ ප්‍රජාතන්ත්‍රවාදී වාමාංශික පෙරමුණෙන් රත්නපුර දිස්ත්‍රික්කයට තරග කළ වාසුදේව නානායක්කාර මනාප 66,991ක් ලබාගනිමින් ජයග්‍රාහී ලැයිස්තුවේ හයවැනි ස්ථානයට පත්වද්දී, මොණරාගල දිස්ත්‍රික්කයට තරග කළ වෛද්‍ය ගයාෂාන් නවනන්දන මනාප 45,384ක් ලබාගෙන ජයග්‍රාහී ලැයිස්තුවේ පස්වැනි ස්ථානයට පත් විය.ශ්‍රී ලංකා මහජන පක්ෂයෙන් එහි නායක අසංක නවරත්න කුරුණෑගල දිස්ත්‍රික්කය සඳහා තරග වැදුණු අතර ඔහු මනාප 82,779ක් ලබා ගනිමින් ජයග්‍රාහී ලැයිස්තුවේ පස්වැනි ස්ථානය හිමි කරගත්තේය. ශ්‍රී ලංකා පොදුජන පෙරමුණේ ජාතික ලැයිස්තුවට ලංකා සමසමාජ පක්ෂයේ නායක මහාචාර්ය තිස්ස විතාරණ, කොමිනිස්ට් පක්ෂයේ වෛද්‍ය ගාමිණී වීරසිංහ හා ප්‍රජාතන්ත්‍රවාදී වාමාංශික පෙරමුණේ නීතිඥ නිමල් රණවක යන අයගේ නම් සඳහන් වී තිබුණද ඒ සඳහා තෝරා පත් කර තිබුණේ මහාචාර්ය තිස්ස විතාරණ පමණි.ශ්‍රී ලංකා පොදු ජන පෙරමුණට සහාය දක්වමින් තරග කළ ඩග්ලස් දේවානන්ද ඊලාම් ජනතා ප්‍රජාතන්ත්‍රවාදී පක්ෂයෙන් යාපනය දිස්ත්‍රික්කයෙන් මනාප 32,146 ලබාගනිමින් ජයගත්තේය.
