පොදුවේ සුබපැතුම්පත් යනු කුඩා හතරැස් කාඩ් පතක් වන අතර එය ලියුම් කවරයක බහා අවශ්‍ය පුද්ගලයා වෙත යොමු කළ යුතුයි. සුබ පැතුම්පත් යැවීමේ දී තැපැල් සේවය සම්බන්ධ වන්නේ රටක් තුළ හෝ රටකින් රටකට සුරක්ෂිතව සුබපැතුම් පත්‍ර ගෙන යෑමේ මාධ්‍යයක් ලෙසිනි. අලුත් අවුරුදු සැමරීමට තෑගි මලු සංසරණය වූ අතීත යුරෝපයේ තැපැල් මුද්දරය හඳුන්වාදීම (ක්‍රි.ව. 1840) හා තැපැල් ගාස්තුවල ලාභදායි බව නිසා නව අවුරුදු සුබ පැතුම්පත් භාවිතය බෙහෙවින් ප්‍රචලිත විය.
2019 නව වසර උදාවට තව දින දෙකක කාලයක් ඉතිරිව ඇත. එහෙත් ඔබට ලැබෙන නව අවුරුදු සුබ පැතුම්වල අඩුවක් නැතුවාට සැක නැත. දෙසැම්බර් 31 වැනි දා මධ්‍යම රාත්‍රිය තරම් වසරක දුරකථන පණිවුඩ භාවිතා වන කාල සීමාවක් නැති තරම් ය. එකිනෙකා පරයමින් නව අවුරුදු සුබ පැතුම් යොමු කිරීමේ ප්‍රථමයා වීමට දරන උත්සාහය එයට හේතු වේ. තමන්ට වැදගත් යැයි හැ‍ඟෙන සියල්ලන්ටම සුබ පැතීමට හැකිවීද යන සැකය මත තොග වශයෙන් යොමු කෙරෙන කෙටි පණිවුඩ සුබ පැතුම් නිසා සෑම ජනවාරි පළමු වෙනි දා දවස පුරා අපගේ ප්‍රථම හෝ එකම රාජකාරිය වනුයේ කෙටි පණිවුඩ යැවීම හෝ ඊට පිළිතුරු යැවීමයි.
අන්තර්ජාලයේ මුහුණු පොත හෝ වෙන යම් පණිවුඩ හුවමාරු ක්‍රමවේදයක් මඟින් සුබ පැතුම් එක් කරන විට දී එය හුදෙක් වචනයට සීමා වූ පණිවුඩයක් පමණක් නොව සජීවී අත්දැකීමක් බවට පත්වේ. තමන්ගේ ආදරණීයයන්ගේ හෝ වැදගත් යැයි හැ‍ඟෙන අයෙකුගේ ඉදිරි වර්ෂයේ සාර්ථකත්වය පතා කරනු ලබන ප්‍රාර්ථනාව වඩාත් හෘදයාංගමව ඉහළ ප්‍රමිතියකින් යුතුව යොමු කිරීමට අප දරන උත්සාහය මේ සියල්ලෙන් අපට හොඳින් දිස් වේ. සුප පැතුම සුබ පැතුම් පතක් දක්වා විකාශනය වීමට හේතු වූයේ ද මිනිසා තුළ පවත්නා මේ යහපත් උත්සාහයයි.
සුබ පැතුම්පතක් යනු යමෙකුට සුබ ප්‍රාර්ථනා එක් කරමින් අලංකාර වාක් ඛණ්ඩයකින් යුතුව හොඳ ප්‍රමිතියකින් යුතු කඩදාසියක සකස් වූ විචිත්‍ර නිර්මාණයකි. වෙසක් හෝ නත්තල් වැනි ආගමික උත්සවවලට, අලුත් අවුරුදු වැනි සංස්කෘතික උත්සවවලට මෙන් ම වැලන්ටයින් දිනය වැනි බොහෝ දෙනෙකු උත්සවාකාරයෙන් සමරනු ලබන අවස්ථාවලට සමගාමීව සුබ පැතුම්පත් නිර්මාණය වන අතර ඒ ඒ කණ්ඩායම් අතර එම සුබ පැතුම්පත් බොහෝ විට තැපැල් මඟින් හුවමාරු වනු දැකිය හැකිය. උපන් දින සුබ පැතුම්පත් ද වඩාත් ප්‍රචලිත කාඩ්පතකි.
යුරෝපය ප්‍රමුඛ බටහිර රටවලින් ලද දායාදයක් ලෙස සැලකිය හැකි මෙම ‘greeting Card’ නමින් හඳුන්වන කාඩ්පතක් මඟින් සුබ ප්‍රාර්ථනා කිරීම මේ වන විට කර්මාන්තයක් ලෙස ද ස්ථාපිතව පවතියි. සුබපැතුම් පත් නිර්මාණය කිරීම සුවිශේෂ කාර්යයකි. චිත්‍ර හා ආකර්ෂණීය වැකි නිර්මාණය කිරීමට මෙන්ම හොඳ නිමාවකින් යුතුව මුද්‍රණයෙන් එළිදැක්වීම ද සුබ පැතුම්පත් කර්මාන්තය හා බැඳී පවතින ක්‍රියාවලින් අතර වේ.
අද වන විට සුබ පැතුම්පත් විශාල වශයෙන් නිෂ්පාදනය කෙරෙන ප්‍රසිද්ධ සමාගම් රාශියක් ලොව පුරා සිටින අතර ජාත්‍යන්තර වශයෙන් එම සමාගම් සංවිධානගතව ද ක්‍රියා කරනු දැකිය හැකිය. “Greeting Card Association” සංවිධානය එවැනි එක් ජාත්‍යන්තර වෙළෙඳ සංවිධානයකි. එහි හිටපු සභාපති ජේන් බිඩර් මහතා මෙසේ පවසයි.
“තමන් නොසිතූ අවස්ථාවක තැපෑලෙන් සුබ පැතුම් පතක් ලැබුණොත් ඕනෑම අයෙකුට එය හදවතට තදින් දැනෙන මිහිරක් ගෙන එනු නොඅනුමානය. මගේ හැඟීම නම් සුවිශේෂ වූ ප්‍රාර්ථනයක් කිරීමට නම් සුබ පැතුම් පතකට වඩා වෙනත් යමක් නැත. මා මෙම කර්මාන්තයේ නියැළීමෙන් සතුටුවන්නේ හුදෙක් පණිවුඩ ලබාදීමෙන් නොවේ. සුවිශේෂ අවස්ථාවක අපේ භාෂාවේ සුන්දර බව හා විචිත්‍රත්වය භාවිතා කරමින් තම හැඟීම් පළ කිරීමට සැමට සහය වන්නට හැකිවීම නිසාය.
ඔහුගේ ඒ ප්‍රකාශය සුබ පැතුම්පතක සැඟවුණු හෘදයාංගම බව හා සජීවී බව පෙන්වන කදිම නිදසුනකි.
අවුරුද්දට සුබ පතමින් සුබ පැතුම්පත් නිර්මාණය වීමේ ඉතිහාසය ලොව පළමු සුබ පැතුම්පත් භාවිතා කිරීම සම්බන්ධව ලැබී ඇති වාර්තා තරම් පැරැණිය. කඩදාසිය නිෂ්පාදනය ලොවට හඳුන්වා දුන් චීන ජාතිකයන් සුබ පැතුම් පත් නිර්මාණය කර ඇත්තේ ඔවුන්ගේ නව අවුරුදු සැමරීමේ සාම්ප්‍රදායික චාරිත්‍රවල දී නව වසරට සුබ ප්‍රාර්ථනා එක් කිරීමටය. 15 වැනි ශත වර්ෂයේ මුල් භාගයේ දී යුරෝපයේ අතින් නිර්මාණය කරන ලද සුබපැතුම් පත් භාවිත වූ බවට වාර්තා පවතියි. විශේෂයෙන් ලී කැටයම් සහිතව මුද්‍රණය වූ නව අවුරුදු සුභ පැතුම්පත් ජර්මන් ජාතිකයින් අතර භාවිතා වී ඇත.
සුබපැතුම්පත් අතරින් වඩාත් ජනප්‍රිය හා ප්‍රචලිත නත්තල් සුබපැතුම් පත් බව නොකිවමනාය. එයට ඇත්තේ කතෝලික එනම් ආගමික පසුබිමකි. එහෙත් කතෝලික නොවූ අන්‍ය ආගමිකයන්ට මෙන්ම ක්‍රිස්තියානි ආගම සම්බන්ධ වූ සංකේතවලින් පරිබාහිරව සුබ ප්‍රාර්ථනා අවැසි පිරිස්වලට ද එම අවශ්‍යතාව සම්පූර්ණ කරගැනීමට නව අවුරුදු සුබ පැතුම්පත් කරලියට පැමිණ ඇති බව අතීතය දෙස බැලිමේදී පැහැදිලි වේ.
එළඹෙන වසර තුළ සංතුෂ්ටිය, සෞඛ්‍ය සම්පන්න භාවය, පරිපූර්ණත්වය හා සාර්ථකත්වය වැනි යහ සංකල්ප වර්ධනය වීමට කෙරෙන ප්‍රාර්ථනා නව අවුරුදු සුබ පැතුම්පත් අතර සුලභව දැකිය හැකිය. නව යුගයක උදාව පෙන්නුම් කෙරෙන චිත්‍ර හා සංකේත වලින් අවුරුදු සුබ පැතුම්පත් අලංකාර වෙයි. කතෝලික සංකේත නැතුවා ම නොවේ. එහෙත් ඒ සීත ඍතුවේ නිමාව දැක්වීම වැනි අදහසකින් විනා ආගමානුකූල අර්ථයකින් නොවේ. (උදා:- නත්තල් ගස) කෙසේ නමුත් සියලු ජන කොටස්වලට පොදුවේ සුබ පැතීමට නව අවුරුදු සුබ පැතුම්පත් භාවිතයෙන් අවකාශ ලැබී ඇත.
නව අවුරුදු උදාව සමරමින් නව අවුරුදු සුබ පැතුම්පත් යොමු කෙරුණ ද ඒ හා බැඳුණු වෙනත් පරමාර්ථ ද නැත්තේ නොවේ. තම ජාතිකත්වය ලොවට ගෙන හැර පෑමට යුදෙව් ජාතිකයන් නව අවුරුදු සුබ පැතුම්පත් මඟින් සමත් වූ බව යුරෝපීය ඉතිහාසය පරීක්ෂා කිරීමේදී පැහැදිලි වේ. යුදෙව් නව අවුරුදු සුබ පැතුම්පත් ඊට නිදසුනකි.
පැරැණි සෝවියට් දේශය ද තම රාජ්‍යයේ සශ්‍රීකත්වය හා දියුණුව ලොවට කියා පෑමට නව අවුරුදු සුබපැතුම් පත් භාවිත කර ඇත. අද ද වෙළෙඳ හෝ දේශපාලනික හෝ වෙන අරමුණු පෙර දැරි කරගෙන අප වෙත ලැබෙන සුබ පැතුම්පත් අනන්තය.
පොදුවේ සුබපැතුම්පත් යනු කුඩා හතරැස් කාඩ් පතක් වන අතර එය ලියුම් කවරයක බහා අවශ්‍ය පුද්ගලයා වෙත යොමු කළ යුතුයි. සුබ පැතුම්පත් යැවීමේ දී තැපැල් සේවය සම්බන්ධ වන්නේ රටක් තුළ හෝ රටකින් රටකට සුරක්ෂිතව සුබපැතුම් පත්‍ර ගෙන යෑමේ මාධ්‍යයක් ලෙසිනි. අලුත් අවුරුදු සැමරීමට තෑගි මලු සංසරණය වූ අතීත යුරෝපයේ තැපැල් මුද්දරය හඳුන්වාදීම (ක්‍රි.ව. 1840) හා තැපැල් ගාස්තුවල ලාභදායි බව නිසා නව අවුරුදු සුබ පැතුම්පත් භාවිතය බෙහෙවින් ප්‍රචලිත විය. බ්‍රිතාන්‍ය සම්ප්‍රදායට හැඩ ගැසුණු අනෙකුත් යටත් විජිතයන් තුළද නව අවුරුදු සුබපැතුම්පත් කලඑළි බැස්සේ ඒ සමඟයි.
ලොව පුරා ව්‍යාප්ත ජාලයකින් සමන්විත වූ තැපැල් සේවය ඒ ඒ රටවල් අතර තැපැල් පරිපාලනයන් හි සුහදත්වය වර්ධනය සඳහා තම අවුරුදු සුබ පැතුම්පත් යොමු කිරීම සම්ප්‍රදායක් පැවතිණි . බ්‍රිතාන්‍ය යටත් විජිතයක්ව පැවති සමයේ මෙරට තැපැල් දෙපාර්තමේන්තුවේ ප්‍රධානියා වන තැපැල්පතිට ලෝකයේ විවිධ රාජ්‍යයන් වෙතින් ලැබුණු නව අවුරුදු සුබපැතුම් පත් එකතුවක් කොළඹ තැපැල් මූලස්ථානයේ පිහිටි තැපැල් කෞතුකාගාරයේ දී වර්තමානයේ ද ප්‍රදර්ශනය වේ.
ශ්‍රී ලංකාවද ඇතුළු රට රටවල තැපැල් සේවා ආයතනික මට්ටමින් නව වසරට සුබ පැතීමේ අරමුණෙන් සුබපැතුම් පත් යොමු කරනු දැකීම සාමාන්‍ය වුව ද ජපානයේ තැපැල් සේවය නව අවුරුදු තැපැල්පතක් සාමාන්‍ය ජනතාව සඳහා හඳුන්වා දී ඇත. “නෙන්ගාජෝ” (Nengajo) නමින් ප්‍රචලිත එම නව අවුරුදු සුබ පැතුම් පත ජනවාරි මස මුල් දෙසතිය තෙක් තැපැල් අලෙවි හල්වලින් ලබාගත හැකිය. ජනවාරි 25 දිනට ප්‍රථම තැපැල් කාර්යාලවලට ලබා දෙන සියලු “නෙන්ගාජෝ” පත් ජනවාරි පළමු වැනි දා නිවැරදි ලිපිනයට යොමු කිරීමට ජපාන තැපැල් සේවය යුහුසුළුව ක්‍රියා කරයි.
බටහිර “නත්තල් කාඩ්” සම්ප්‍රදාය වෙනුවට හඳුන්වා දී ඇති “නෙන්ගාජෝ” කාඩ්වල ජපානයට ආවේණික සාම්ප්‍රදායික ජ්‍යොතිෂ ලග්න සහිත රූප දක්නට ලැබෙන අතර තමන්ට අවශ්‍ය ආකාරයේ නිර්මාණයකට ද ඉඩකඩ සලසා ඇත.
දැන් අප භාවිතා කරන ජනවාරි 01 වැනි දා ආරම්භ වී දෙසැම්බර් 31 වැනි දා අවසන් වන “ග්‍රෙගරියානු කැලැන්ඩරය” ට අනුව වසර ආරම්භ වන්නේ ජනවාරි පළමු වැනි දා වුව ද බොහෝ රටවල් මෙම කැලැන්ඩරයට අනුව කටයුතු කරනුයේ පරිපාලන හා නීතිමය කටයුතු කිරීම සඳහා පමණි. එහෙත් විවිධ රටවල විවිධ සංස්කෘතීන් හා විවිධ ආගම්වල විශ්වාසයන්ට අනුව වර්ෂය ආරම්භ වන කාල වකවානු වෙනස් ය. ශ්‍රී ලාංකීය අපට සිංහල දෙමළ නව අවුරුදු උදා වන්නේ අප්‍රියෙල් මාසයේ බව අපි දනිමු. එහෙයින් ජනවාරි පළමු වැනි දා ඇරඹෙන නව වසරට සුබ පතමින් සුබපැතුම් පත් යොමු කිරීම හුදෙක් ඉදිරි වසරේ දෛනික කටයුතුවල සාර්ථකත්වය ප්‍රාර්ථනා කරමින් සිදු කෙරෙන නමුත් සංස්කෘතිකමය හෝ ආගමික බැඳීමක් ඉන් පිළිබිඹු නොවීම විශේෂයෙන් සැලකිය යුතුවේ.
අද තැපැල් මඟින් බෙදීමට යොමු වන්නේ ද හුදෙක් පාරිභෝගික හෝ ගනුදෙනුකරුවන් අතර සම්බන්ධතාව වර්ධනය කරගැනීමේ අරමුණ පෙරදැරිව විවිධ ආයතන හා සංවිධානයන් විසින් යොමු කරන අවුරුදු සුබ පැතුම්පත් පමණි. පෞද්ගලික මට්ටමින් යොමු වන නව අවුරුදු සුබපැතුම් පත් සීමිතය. සජීවී වීඩියෝ දර්ශන ද ඇතුළත් වූ ක්ෂණයකින් අන්තර්ජාලය හරහා තැපැල් වන, එමෙන්ම එකෙණෙහිම ප්‍රතිචාර ලැබෙන අවුරුදු සුබ පැතුම් නිර්මාණය වන මේ ඩිජිටල් යුගයේ තමන් පෞද්ගලිකව කළ සුබ පැතීම ලෝකයට විවෘත කර සැමගේ අදහස් ලබාගැනීමට ද හැකියාව ඇත.
වර්තමානයේ අවුරුදු සුබපැතුම් පත්වල ඉරණම මෙයාකාර වුව ද බොහෝ ස්වේච්ඡා සමාජ සුබසාධන සංවිධාන නිර්මාණශීලීව සකස් කරන ලද සුබපැතුම්පත් යොදා ගනිමින් මහජනතාව යහපත් අරමුණු කරා යොමු කිරීමට කටයුතු කිරීම ද දැකිය හැකිය. එළඹෙන වසරේ දී සමාජයේ සාර්ථක වීමට අසමත් වූවෙකුට සහය වීමට අවස්ථාවක් සැලසේ නම් සීමිතව හෝ හුවමාරු වන සුබපැතුම්පත් වලින් සුබ ප්‍රාර්ථනාවේ නියම අරුත පැහැදිලි වන්නේය.
රවින්ද්‍ර ගුණරත්න
