●ජනතා විමුක්ති පෙරමුණ 20 වැනි සංශෝධනය එපා කියන්නේ ඇයි?
ජේ.ආර්. ජයවර්ධන 78 ව්‍යවස්ථාව ගෙන ආවේ කොල්ලකාරී ආර්ථිකය බලහත්කාරයෙන් ජනතාවට පටවන්න. පසුගිය කාලයේ එය අසාර්ථක වුණා. ලංකාවේ පමණක් නොවෙයි එය මුළු ලෝකය පුරාවටම අසාර්ථක වුණා. ඒ තත්ත්වය ලංකාව තුළත් අපි දැක්කා. නැවත එවැන්නක් තමයි සිද්ධ වෙන්න යන්නේ.
මේ ර‍ෙට් ණය ආර්ථිකයට කඩා වැටී ඇති ආර්ථිකයට උත්තරයක් නැහැ. මෙන්න මේ නිසා බලහත්කාරය පාවිච්චි කරන්න සිද්ධ වෙනවා. බලහත්කාරය පාවිච්චි කරන්න නීතියක් ඕන වෙනවා. අන්න ඒ අර්ථයෙන් තමයි නැවත ඒකාධිපති ව්‍යවස්ථාවක් ඕන වෙලා තියෙන්නේ.
20 වැනි සංශෝධනය අපේ රටේ ප්‍රජාතන්ත්‍රවාදය මළගමකට යාමක් හැටියට පෙන්වා දිය හැකියි.
මෙය ඇත්තටම ඒකාධිපති පාලනයක් සඳහා යාමක්. එක් පුද්ගලයෙකුට බලය පැවරීමට මේ රටේ ජනතාව කැමැති නැහැ. මොකද ප්‍රජාතන්ත්‍රවාදයට තමයි ජනතාව කැමැති. එය ලෝකයේ ඕනෑම රටකට පොදු කාරණයක්. මෙන්න මේ කාරණාවලට ජනතාව කැමැති නෑ කියන එක අපි දන්නවා. මේ අර්ථය නිසා තමයි අපි විසිවෙනි සංශෝධනයට අකමැති වගේම විරුද්ධවන්නේ. මේ මගින් කිසිසේත්ම රටට යහපතක් නොවන බව අපි ජනතාවට වගකීමෙන් යුතුව කියන්න කැමැතියි.
●ඔබ කෙසේ කීවත් රජය ප්‍රකාශ කර සිටින්නේ ජනතාව තමන්ට තුනෙන් දෙකක බලයක් ලබාදී තිබෙන්නේ ව්‍යවස්ථා සංශෝධනය සඳහා බවයි. පාර්ලිමේන්තු තුළ මෙම පනත ජයගන්න බැරිවෙයි කියල ඔබ විශ්වාස කරනවාද?
ජනතාවට තුනෙන් දෙකක බලයක් දුන්නේ ජනතාවගේ බඩ ගින්න, විරැකියාව වගේ ම අන්ත අසරණකම ආර්ථික අපහසුකම් නිසායි.
ඒ වගේම අධ්‍යාපන සෞඛ්‍ය වගේම ආරක්ෂාව සපයන්න. තනි පුද්ගලයෙකුට ලබාදුන් බලයක් නොවෙයි. එක කඳවුරක එක හවුලක බලය තහවුරු කරන්න නොවෙයි. රටේ අභිලාෂය එකක් පවුලේ අභිලාෂය තව එකක්. දැන් මේ තිබෙන්නේ ජනතා අභිලාෂයට පයින් ගහලා පවුලේ අභිලාෂය ඉටු කර ගන්න දරන උත්සාහයක්.
පාර්ලිමේන්තුවේ ඔළු ගෙඩිවලින් මේක සම්මත කරගන්න පුළුවන් වෙයි. හැබැයි තව අවුරුද්දක් දෙකක් යන කොට මේකට ඡන්දය දීපු ආණ්ඩු පක්ෂයේ මන්ත්‍රීවරුන්ට තේරෙනවා තමන් ගන්නේ ලොකු වැරැද්දක් කියලා. රටේ ජනතාවටත් තේරෙනවා මේක බරපතළ අපරාධයක් කියලා.
●ඔබ පවුලේ අභිලාෂය කියන එකෙන් අදහස් කරන්නේ කුමන පවුලක් ගැනද?
වෙන පවුලක් ගැන නොවෙයි. රාජපක්ෂ පවුල ගැන. සංශෝධනයෙන් පසු බැසිල් රාජපක්ෂට හොඳ ඇමැතිකමක් ලබාදේවි. මොවුන් මේ උත්සහය ජනතාව ඉතා ඉක්මනින් හඳුනා ගන්නවා.
●ඔබ රජයට චෝදනා කරනවා මේ ව්‍යවස්ථා සංශෝධනය ගෙන එන්නේ බැසිල් රාජපක්ෂ මහතා නැවත පාර්ලිමේන්තුවේ ගෙන එන්න කියලා කොහොමද එහෙම කියන්නේ.
ඔව් පැහැදිලිවම අපි කියනවා. ද්විත්ව පුරවැසි භාවය කියන එක උසස් නිලධාරීන්ට පවා ලබා නොදිය යුතුයි කියලා.
අද තානාපති සේවයට ඇමෙරිකන් පුරවැසිභාවය තිබෙන අය පවා යනවා. ඇමෙරිකානු පුරවැසිභාවය කියන්නේ ඇමෙරිකාවේ පුරවැසිභාවය වෙනුවෙන් ඇමෙරිකාවේ සිටින පුද්ගලයන් ඕනෑම දෙයක් කරනවා. එලෙසම ඔවුන් ඇමෙරිකාව වෙනුවෙන් ඕනෑම දෙයක් සිදු කරනවා. මොකද ඒ වෙනුවෙන් දිවුරුම් දීලා ඉන්නේ.
●කෝප් කමිටුවට සභාපති තෝරා ගැනීමේදී මෙතෙක් ඉතිහාස වෙනස් කරමින් ආණ්ඩු පක්ෂයට ලබාදී තිබෙනවා. එය ඔබලාගේ පක්ෂය දැඩි විවේචනයක් එල්ල කරනවා. අපි මාධ්‍ය තුළින් දුටුවා. ඇයි එලෙස විරුද්ධ වන්නේ?
මේ ආණ්ඩුව සම්පූර්ණයෙන් ම යන්නේ ඒකමතික තීරණ ගනිමින්. රටේ ජනතාවට කෝප් කමිටු තීරණ දැනගත යුතුයි. රජය අද ජනතාවට එය ද නැති කරලා.
ඇත්තටම ඉතිහාසය පුරාවටම මේකේ සභාපතිකම දුන්නේ විපක්ෂයේ මන්ත්‍රීවරයෙකුට. අද එය ආණ්ඩු පක්ෂයේ මන්ත්‍රීවරයෙකුට දීලා.
කුමන ආණ්ඩුවක් තිබුණත් ඒ ආණ්ඩුව සිදු කරන මූල්‍ය වංචා මුර බල්ලෙකු වගේ ක්‍රියා කරමින් පරික්ෂා කරන්න කෝප් කමිටුවට හැකියාවක් තිබුණා. අද එය ආණ්ඩු පක්ෂයටම ලබාදීලා. මේ තුළින් පෙන්නුම් කරන්නේ ආණ්ඩුව තමන්ගේ වැරදි වහගන්න කෝප් කමිටුවට තමන්ගේ ම කෙනෙක් සභාපති කර තිබෙනවා.
අනෙක් කාරණය තමයි මෙතෙක් කල් කෝප් කමිටුව මාධ්‍යයට විවෘතව තිබුණා. මින් ඉදිරියට එය මාධ්‍යයට ලබා නොදෙන්න ආණ්ඩුව තීරණය කරලා තිබෙනවා.
මින් ඉතා පැහැදිලි කාරණයක් ලෙස පෙන්වාදිය හැක්කේ රජයට අවශ්‍යවෙලා තිබෙන්නේ වුවමනා වෙලා තිබෙන්නේ මූල්‍ය වංචා මෙන් ම අකටයුතුකම් සිදු කිරීමයි කියන එක. ජනතාව මේ පිළිබඳව දැන ගැනීම නතර කරන්න තමයි මාධ්‍යයට බාධා එල්ල කර තිබෙන්නේ.
●පාර්ලිමේන්තුව තුළ මන්ත්‍රී ආසන තුනක් තිබෙන ජනතා විමුක්ති පෙරමුණට කිසිම දෙයක් පාර්ලිමේන්තුව තුළ කළ නොහැකි බව මාධ්‍යයෙන් අසන්නට ලැබෙනවා. මේ පිළිබඳව ඔබගේ අදහස?
ජනතාව ජනතා විමුක්ති පෙරමුණ කෙරෙහි තැබූ විශ්වාසය කිසිම අඩුවක් වෙලා නැහැ. ඔවුන් ජනතා විමුක්ති පෙරමුණ අයුක්තියට අසාධාරණයට විරුද්ධව දිගින් දිගටම හඬ නඟන බව පෙනී සිටින බව දන්නවා.
පාර්ලිමේන්තු මන්ත්‍රී ධුර ගණන තුනක් වුණත් එකක් වුණත් අපි අපගේ වගකීම ජනතාව වෙනුවෙන් ඉටු කරනවා කියන එක ජනතාව හොඳින් දන්නවා.
●පළාත් සභා මැතිවරණය අවශ්‍ය බව එක් පිරිසකගේ මතයයි. තවත් පිරිසක් පළාත් සභා අවශ්‍ය නොවන බව කියනවා. ජනතා විමුක්ති පෙරමුණ මින් කුමන කණ්ඩායමේද?
පළාත් සභා ක්‍රමය ගෙන එන්නේ මේ රටේ ජාතික ප්‍රශ්නයට විසඳුමක් ලබාදෙන බව කියමින් එහෙම විසඳුමක් ඉන් ලැබුණේ නැහැ. ජනතා විමුක්ති පෙරමුණ හැටියට අපි මේක ගෙන එන දවසේ ඉඳලා විරුද්ධයි. අදත් ඒ මතය එසේමයි.
දැන් තිබෙන තත්ත්වය ස්ථිර නෑ. ඇමැතිවරු ඔවුන්ගේ මතය ප්‍රකාශ කරනවා විතරයි. ආණ්ඩුව කියන්න ඕන පළාත් සභා මැතිවරණය පවත්වනවාද නැද්ද කියන කාරණය.
●අලුත් මුහුණු අසූ එකක් මෙවර පාර්ලිමේන්තුවට පැමිණිලා තිබෙනවා. මේ පිළිබඳව ඔබලාගේ අදහස?
ලොකු වෙනසක් නෑ. අලුත් මුහුණු කියලා මේ අසූ එක්දෙනා අතර වැඩි දෙනකු මූල්‍ය වංචාකරුවන්, නොයෙක් දූෂණ චෝදනා එල්ල වුණ අපරාධකාරයන් තමයි පාර්ලිමේන්තුවට තේරීපත්ව සිටින්නේ.
කප්පම් කරුවන්, දූෂිතයන්, බාර් ලයිසන් තිබෙන පුද්ගලයන් මේ ඔක්කොම අලුතෙන් ඇවිත් ඉන්නවා. ඒ අතරතුර එක් අයෙකු දෙදෙනකු ඔය කියන හොඳ අය අතරට ඉන්නවා.
