අපේ රටේ රජ කළ දේශීය වෛද්‍ය ශිල්පය ගැන දස්කම් දැක්වූ බුද්ධදාස රජතුමා වැනි අතීත රජවරු හා ආයුර්වේද වෛද්‍ය විශාරදයෝ අපේ දේශීය ආයුර්වේද වෙදකම මගින් සුවිශේෂී වෛද්‍ය ක්‍රම හා රෝගීන් සුවපත් කරන ක්‍රම විධි රැසක් භාවිත කළහ. ඒ අනුව අපේ දේශීය වෙදකමට සුවිශේෂී ඉතිහාසයක් හා වටිනාකමක් තිබේ. නමුත් එය රැකගෙන දියුණු කිරීමට පසුගිය රජයන්ට එතරම් වුවමනාවක් තිබුණේ නැත. එසේ වුවත් වත්මන් රජය මගින් දේශීය වෙදකම දියුණු කිරීම උදෙසා දේශීය වෛද්‍ය විශ්වවිද්‍යාලයක් ගම්පහදී ආරම්භ කිරීමට දැන් සියලු වැඩකටයුතු යොදා තිබීම එම ක්ෂේත්‍රයේ සියලු දෙනාගේ සතුටට හේතු වී ඇත.
පසුගියදා පැවැති කැබිනට් මණ්ඩල රැස්වීමේදී මෙරට උසස් අධ්‍යාපන ක්ෂේත්‍රයේ විප්ලවීය ප්‍රවර්ධනයක් ඇති කරන වැඩපිළිවෙළක ආරම්භය සනිටුහන් කෙරිණි.
ඒ අනුව අපේ රටේ ප්‍රධාන සරසවි දෙකක හා උසස් අධ්‍යාපන ආයතන දෙකක් සංවර්ධනය මඟින් විශ්වවිද්‍යාලයට ඇතුළත්වීමට අපේක්ෂා කරන සිසු පරපුරට අපේක්ෂා මල්ඵල ගන්වන ව්‍යාපෘති හතරක් කැබිනට් මණ්ඩලය අනුමත කර ඇත. එම සියලු කැබිනට් පත්‍රිකා ඉදිරිපත් කර ඇත්තේ කවදත් අපේ සිසු පරපුර විද්වත් පිරිසක් බවට ජය කෙහෙළි නංවන්නට අත හිත දෙන උසස් අධ්‍යාපන, නවෝත්පාදන, තාක්ෂණ, තොරතුරු හා සන්නිවේදන තාක්ෂණ ඇමැති හා කැබිනට් ප්‍රකාශක ආචාර්ය බන්දුල ගුණවර්ධනයන් ය.
ඒ අනුව ඔහු මෙරට සම්ප්‍රදායික දේශීය වෛද්‍ය ක්‍රම අධ්‍යයනයට අපේ සිසු පරපුර උනන්දු කිරීමේ අරමුණින් හා දේශීය වෛද්‍ය ක්‍රම මගින් ආර්ථික හා අධ්‍යාපනික ප්‍රතිලාභ ලබාගැනීමේ අරමුණින් ගම්පහ වික්‍රමාරච්චි ආයුර්වේද විද්‍යායතනය මෙරට සාම්ප්‍රදායික දේශීය වෛද්‍ය ක්‍රම පිළිබඳ අංග සම්පූර්ණ විශ්වවිද්‍යාලයක් බවට පත් කළයුතු බවට කැබිනට් මණ්ඩලයට කළ යෝජනාව අනුමත වී තිබේ.
දැනට විශ්වවිද්‍යාල කොමිසන් සභාව යටතේ කැලණිය විශ්වවිද්‍යාලයට අනුබද්ධිතව උසස් අධ්‍යාපන ආයතනයක් ලෙස පවත්වාගෙන යන මෙම විද්‍යායතනය මෙරට සාම්ප්‍රදායික දේශීය වෛද්‍ය ක්‍රම අධ්‍යයනය කෙරෙහි ප්‍රමුඛතාව දක්වන විශ්ව විද්‍යාලයක් බවට පත්කරන බව ඇමැති බන්දුල ගුණවර්ධන මහතා පවසයි. ඒ අනුව දැනට වඩා දස ගුණයකින් මෙම විද්‍යායතනය මගින් උපාධි හා පශ්චාත් උපාධි ලබන සිසු සිසුවියන් පිටවනු ඇති බව ද බන්දුල ගුණවර්ධන ඇමැතිවරයා පවසයි.
මේ පිළිබඳව ‘සිළුමිණ’ ට විශේෂයෙන් කරුණු දැක්වූ විශ්වවිද්‍යාල ප්‍රතිපාදන කොමිසම් සභාවේ උප සභාපතිනි හා ගම්පහ වික්‍රමාරච්චි ආයුර්වේද විද්‍යායතනයේ නිසි බලධාරිනිය වන ශ්‍රී ලංකා විද්‍යාභිවර්ධන සංගමයේ (SLAAS) සභාපතිනි ජ්‍යෙෂ්ඨ මහාචාර්ය ජනිතා ඒ. ලියනගේ පවසන්නේ මේ වැඩපිළිවෙළ නිසා අපේ රටේ පාරම්පරික දේශීය වෙදකමට ස්වර්ණමය යුගයක් උදාවෙමින් පවතින බවයි.
මේ අනුව දැනට ගම්පහ වික්‍රමාරච්චි ආයුර්වේද වෛද්‍ය විද්‍යාලයට වසරකට ඇතුළත් කරගන්න සිසු පිරිස 120 සිට 500 වඩා වැඩි වනු ඇත. එමගින් අපේ දේශීය වෙදකම ඉහළ ඵලදායිතාවයක් ලැබෙන පරිදි සිදු කිරීමටත් රටට විදේශ විනිමයක් උපයීමටත් අවස්ථාව සැලසෙන බව ද නිසි බලධාරිතුමිය පවසන්නීය.
විශ්වවිද්‍යාල ප්‍රතිපාදන කොමිසම මගින් වික්‍රමාරච්චි ආයුර්වේද විද්‍යායතනයට සිසුන් තෝරා ගන්නවා. ඒ අයට දැනට උගන්වන්නේ DAMS ආයුර්වේද උපාධි පාඨමාලාව පමණයි.”
“වික්‍රමාරච්චි වෙද රාලහාමි පවත්වාගෙන ගිය ආයුර්වේද විද්‍යාලය දැන් කැලණිය සරසවියට අනුබද්ධ ආයුර්වේද විද්‍යායතනයක් ලෙසයි ක්‍රියාත්මක වෙන්නේ.”
මෙම විද්‍යායතනය විශ්වවිද්‍යාලයක් බවට පත් කිරීමෙන් අපි ප්‍රධාන ලෙස අපේ දේශීය වෙදකම නවීන විද්‍යානුකූලව පර්යේෂණ අනුව දියුණු කිරීමට එහි තත්ත්වය වටිනාකම් ප්‍රමිතිය වැඩි දියුණු කිරීමට අවශ්‍ය තවත් ආයුර්වේද උපාධි හා පශ්චාත් උපාධි පාඨමාලා ගණනාවක් ක්‍රියාත්මක කරන්න කටයුතු කරමින් ඉන්නවා.
“දේශීය වෙදකමේ ගුණාත්මක බව විද්‍යානුකූලව වැඩිදියුණු කරන පාඨමාලා ඒ අතර ප්‍රධාන ස්ථානයක් ගන්නවා. ඒ අනුව දේශීය වෙදකම පිළිබඳ මේ පාඨමාලා සඳහා අවශ්‍ය රෝහල් ඇති කිරීමටත් ඊට අදාළා කළමනාකරණ කාර්ය මණ්ඩලවලට උපදෙස් පාඨමාලා ඇති කිරීමටත් අපේක්ෂා කරනවා.
ඊට අමතරව දේශීය වෙදකමේ ඖෂධ නිපදවීම හා විද්‍යාත්මක ක්‍රම මගින් එම ඖෂධවලට අගය එකතු කර අලුත් වටිනාකමක් ලබාගෙන අපේ දේශීය ඖෂධ ලොව පුරා ජනප්‍රිය කරවීමට අවශ්‍ය උපාධි පාඨමාලාත් අපි මේ අලුත් විශ්ව විද්‍යාලයෙන් ආරම්භ කිරීමට සූදානම්. ඒ සමඟම දේශීය වෙදකම් හා ආයුර්වේද රෝහල්වල හෙද හෙදියන්ට අවශ්‍ය නව තාක්ෂණික දැනුම හා පාරම්පරික ආයුර්වේද දැනුම ලබාදෙන නව පාඨමාලා ගණනාවක් ආරම්භ කිරීමට සූදානම් වෙනවා.
අපේ රටේ දේශීය වෛද්‍ය ක්ෂේත්‍රයේ විද්වතුන්ගේ හා වෛද්‍යවරුන්ගේ හා ඒ පිළිබඳ කැමැත්ක දක්වන අය මේ වික්‍රමාරච්චි විද්‍යායතනය විශ්වවිද්‍යාලයක් කිරීම පිළිබඳව ඉතා අගය කරනවා. ඒ සඳහා කටයුතු කරන ජනාධිපතිතුමාටත් අගමැතිතුමාට හා බන්දුල ගුණවර්ධන ඇමැතිතුමාටත් ඒ සියලු දෙනා මෙන් ම අපිත් ස්තුතිවන්ත වෙනවා.
ජ්‍යෙෂ්ඨ මහාචාර්ය ජනිතා ලියනගේ පෙන්වා දෙන පරිදි මේ නව ආයුර්වේද විශ්වවිද්‍යාලය ඇති කිරීමෙන් අලුත් සිසු පරපුරකට දේශීය වෙදකම පිළිබඳව ඉහළම දැනුමක් ලබාදීමට හැකිවෙනවා. එමෙන් ම පිටරට සිසු දරුවන් මේ දේශීය වෛද්‍ය ක්‍රමය පිළිබඳව උනන්දුවක් දක්වන්නේ නම් ඒ අයටත් මේ පාඨමාලා හදාරන්න අපි අවස්ථාව ලබාදෙනවා.
දේශීය වෙදකම නවීන තාක්ෂණය හා විද්‍යානුකූලව දියුණු කිරීම මගින් ඇතිවෙන අලුත් රෝහල් හා දේශීය වෛද්‍ය විශ්වවිද්‍යාල සඳහා පිටරටවල වෛද්‍ය සංචාරකයන් ඇද ගැනීම මේ විශ්වවිද්‍යාලය ඇති කිරීමේ තවත් ප්‍රධාන අරමුණක් වෙනවා. දේශීය වෛද්‍ය ක්‍රම ජනප්‍රිය වී අප රටට විදේශ විනිමය ලැබෙන අතර ම ලොව පුරා අපේ දේශීය වෙදකම පිළිබඳව ප්‍රචාරයක් ලැබී රටේ පෞඪත්වය තවත් වැඩිවෙනවා.
මේ අනුව මේ නව විශ්වවිද්‍යාලය බිහිකිරීම මගින් අපේ රටේ දේශීය හා ආයුර්වේද වෛද්‍ය ක්‍රමයේ ස්වර්ණමය යුගයක් ඇතිවෙන බව කියන්න පුළුවන්.
විශ්ව විද්‍යාල ප්‍රතිපාදන කොමිසමේ නියෝජ්‍ය සභාපතිනි ජ්‍යෙෂ්ඨ මහාචාර්ය ජනතා ඒ. ලියනගේ පවසන්නීය.
මේ අනුව මින් ඉදිරියට වික්‍රමාරච්චි ආයුර්වේද විද්‍යායතනය අංගසම්පූර්ණ විශ්වවිද්‍යාලයක් කිරීම මගින් අලුතින් තවත් සිසු සිසුවියන් දහස් ගණනකට අපේ පාරම්පරික දේශීය වෙදකම පිළිබඳ විද්වත් දැනුමක් ලබාගැනීමට හැකිවේ. එතෙර සිසුන්ටත් ඒ අවස්ථාව ලැබෙන අතර එමගින් අපේ පාරම්පරික දේශීය වෙදකමේ වැදගත් සුවපත් වන ක්‍රම සුරැකීමට ද ඉඩ ලැබේ. රටට විදේශ විනිමය ගෙන ඒමටත් රටට උචිත වෛද්‍යවරු පිරිසක් බිහිවීමටත් මෙහි අතුරු ප්‍රතිලාභ අතරට ගැනේ.
මේ අතර ඉදිරියේදී රුහුණු විශ්වවිද්‍යාලය සහ චීනයේ ගයිෂෝ විද්‍යා ඇකඩමිය අතර ගිවිසුමකට එළඹීමට කටයුතු කරන බව ඇමැති බන්දුල ගුණවර්ධන පවසයි.
ඒ අනුව රුහුණු විශ්වවිද්‍යාලය සහ චීනයේ ගයිෂෝ විද්‍යා ඇකඩමිය (Guizhon Academy of Science) අතර අධ්‍යාපන හා පර්යේෂණ කටයුතු සඳහා අවබෝධතා ගිවිසුමකට එළඹීම සඳහා යෝජනාවී ඇත. යෝජිත අවබෝධතා ගිවිසුම මගින් දෙපාර්ශ්වය අතර හඳුනාගනු ලබන තොරතුරු හුවමාරු කර ගැනීම, පර්යේෂණ අරමුදල් සලසා ගැනීම සඳහා සහයෝගයෙන් කටයුතු කිරීම සහ ඒකාබද්ධ ප්‍රථම උපාධි/ පශ්චාත් උපාධි අධ්‍යයන පාඨමාලා ආරම්භ කිරීම සඳහා කටයුතු කිරීමට අපේක්ෂා කරනු ලබයි. ඒ අනුව, එකී අවබෝධතා ගිවිසුමට අත්සන් තැබීම පිණිස උසස් අධ්‍යාපන, තාක්ෂණ සහ නවෝත්පාදන අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරනු ලැබ ඇතැයි ඇමැතිවරයා කියයි.
ඒ සමඟම වයඹ පළාතේ සරසවි සිසුන් වෙනුවෙන් ඇති වයඹ විශ්වවිද්‍යාලයේ තාක්ෂණ පීඨය සඳහා යෝජිත ගොඩනැගිලි සංකීර්ණයක් රුපියල් ලක්ෂ 15605 ක වියදමින් ඉදිකිරීමටත් කටයුතු යොදා ඇත. ඒ පිළිබඳ කැබිනට් පත්‍රිකාව ඇමැති බන්දුල ගුණවර්ධන මහතා විසින් කැබිනට් මණ්ඩලයට ඉදිරිපත් කිරීමෙන් පසු එය ද අනුමත වී තිබේ.
ඒ අනුව එහි ඉදිකිරීම සීමාසහිත සතුට බිල්ඩර්ස් පුද්ගලික සමාගමට පිරිනමනු ඇති බව බන්දුල ගුණවර්ධන ඇමැතිවරයා පවසයි. මින් තාක්ෂණ විෂය ධාරාව යටතේ සරසවි ප්‍රවේශය අපේක්ෂා කරන සිසු පරපුරට ඉමහත් ප්‍රතිලාභ හිමිවේ.
ඊට අමතරව රත්මලාන තාක්ෂණ විශ්වවිද්‍යාලය සඳහා අඩුපාඩු රැසක් සපිරීමටත් සුදුසු කැබිනට් පත්‍රිකාවක් තොරතුරු සන්නිවේදන, උසස් අධ්‍යාපන තාක්ෂණ හා නවෝත්පාදන ඇමැති බන්දුල ගුණවර්ධන මහතා කැබිනට් මණ්ඩලයට ඉදිරිපත් කළ අතර කැබිනට් මණ්ඩලය ඒ සඳහා අනුමත කර ඇත.
ඒ අනුව රුපියල් ලක්ෂ 9273 ක ඇස්තමේන්තු ගත පිරිවැයක් යටතේ මෙම තාක්ෂණ විශ්වවිද්‍යාලය සඳහා නව නේවාසිකාගාරයක් වැඩපළක් හා නව ආපන ශාලාවක් සඳහා වෙන වෙනම ගොඩනැගිලි 3 ක් ඉදිකිරීම ළඟදීම අරඹනු ඇතැයි ඇමැතිවරයා පවසයි.
මේ අලුත් නව ව්‍යාපෘති ක්‍රියාත්මක වීම මගින් මෙරට උසස් අධ්‍යාපනය හදාරන සිසු පරපුරටත් ඒ අයගේ දෙමාපියන් ඇතුළු සහෝදර සහෝදරියන්ටත් ඉමහත් ප්‍රතිලාභ හිමිවේ.
ඒ තවත් අලුත් විවිධ දැනුම් ඇති උපාධිධාරින් බිහිවීම් හා ඒ පිළිබඳව ඒ පවුල්වලට ඇති පෞඪත්වයක් හේතු කොටගෙනය.
ගෝඨාභය රාජපක්ෂ ජනාධිපතිතුමාගේ සෞභාග්‍යයේ දැක්ම ප්‍රතිපත්ති රාමුව යටතේ ක්‍රියාත්මක මේ වැඩපිළිවෙළ මගින් අපේ සිසු පරපුර ඉදිරියේදී රට සුරකින ඉමහත් ප්‍රතිලාභ රැසක් හිමිවනු ඇත.
