ලක්ෂ්මන් පයාගලගේ දිය මත ලෙය
කෘතිය - දිය මත ලෙය
කර්තෘ - ලක්ෂ්මන් පයාගල
ප්‍රකාශක - කඩුල්ල ප්‍රකාශන, පහළ බියන්වල, කඩවත
මිල- රුපියල් 1000
විමසීම්- 077 2508605
තම උපන් ගමේ ස්වභාවික පරිසරය විනාශකාරි උවදුරු වලින් බේරා ගැනීම සඳහා වෙර දරන ග්‍රාමිය මිනිසුන් සහ ඔවුන් මුහුණ දෙන ආගමික, සාමාජයීය, ආර්ථික හා පවුල් ප්‍රශ්න පිළිබඳ එළිදැක්වීමටත්, ජන ගැටලු පිළිබඳ නිසි ලෙස වටහා නොගෙන ක්‍රියාකරන දේශපාලන බලධාරින් මෙන්ම පරිපාලන බලධාරීන්ගේ නොසැලකිල්ල නිසා සිදුවන ජීවිත කඩා වැටීම පිළිබඳවත් සියුම්ව සමාජගත කරන්නට ගත් සාර්ථක උත්සාහයක් වන්නේ ලක්ෂ්මන් පයාගලගේ දිය මත ලෙය කෘතියයි. කර්තෘවරයා පවසන්නේ තමන්ගේ මෙම කතාවට පාදක වී ඇත්තේ ඔහුගේ සිතේ මැවුණු ආරූඪ දුපතක වූ සත්‍ය සිදුවීමක් බවයි. ඔහු පවසන්නේ එවන් සිදුවීම් ලොව කොහේ හෝ තැනක සිදු නොවී තිබිය හැකි බවයි. වැලිඇල්ල ගම පාදක කරගනිමින් ගොඩ නැඟුණු මෙම නවකතාව සරලව ගැමි රසය ඉස්මතු වන ආකාරයෙන් පාඨක රසවින්දනය සඳහා ඉදිරිපත් කිරීමට කර්තෘවරයා ගෙන ඇති උත්සාහය සාර්ථකය.
ධර්මසිරි විජේරත්නගේ ඉතිහාසගත චරිත චිත්‍ර කතා පොත
කෘතිය - ඉතිහාසගත චරිත
කර්තෘ - ධර්මසිරි විජේරත්න
චිත්‍ර - ටී හෙන්රි බෙම්මුල්ල
ප්‍රකාශක - නිමන්සා ප්‍රකාශන, මීරිගම
මිල- රුපියල් 500
පුවත්පත් කලාවේදියෙකු වූ ධර්මසිරි විජේරත්න විසින් එදා රචිත ඉතිහාසගත චරිත චිත්‍ර කතා මාලාවට පණ පොවමින් ඉදිරිපත් වූ චිත්‍ර කතා එකතුවකින් මෙම ග්‍රන්ථය නිර්මිතය. එදා මෙම චිත්‍ර කතා චිත්‍රයට නැඟුවේ ටි. හෙන්රි බේම්මුල්ලය. ධර්මසිරි විජේරත්නගේ දියණිය වන ප්‍රබෝධනී සුරංගිකා වේලාතන්ත්‍රි සිය පියා විසින් එදා රචනා කළ මෙම ඉතිහාසගත චරිත පොතක් වශයෙන් නිර්මාණය කළේ අධ්‍යාපනය ලබන සුවහසක් දරුවන්ගේ නැණ නුවණ පාදන්නටය. එදා ඉතිහාසයට පණ දෙමින් මේ ගමන 1975 වර්ෂයේ ආරම්භ වූයේ සිත්තර චිත්‍රකතා පුවත්පත ඔත්සේය. මේ ග්‍රන්ථය හරහා චිත්‍රකතා ලෝලින්ගේ පමණක් නොව ඉතිහාසය පිළිබඳ දැනුම ලබා ගන්නවුන්ගේ නැණ නුවන වැඩීමටද මහඟු සේවයක් සලසන්නට සමත්ය.
සාමණේර බණ දහම් පොත
කෘතිය - සාමණේර බණ දහම් පොත
සංස්කාරක - ආචාර්ය පූජ්‍ය ඕමල්පේ සෝභිත නායක
මහා ස්ථවීර
සහය සංස්කාරක - ශාස්ත්‍රපති පණ්ඩිත පූජ්‍ය ඇඹිලිපිටියේ සුජාත ස්ථවීර
ප්‍රකාශක - ශ්‍රී බෝධිරාජ පදනම, ඇඹිලිපිටිය
විමසීම්- 047 2261399, 047 4931725
විනය පෝෂණය කිරීම සඳහා නුවර යුගයේ සිටම සාමණේර භික්ෂූන් උදෙසා විවිධාකාරයේ බණ දහම් පොත් නිකුත් විය. මෙම සාමණේර බණ දහම් පොතද සිංහල විනය ශාස්ත්‍රයට අලුතින්ම එකතු වන ග්‍රන්ථයකි. පැවිද්ද ඉල්ලීමේ වාක්‍යයේ පටන් සැදැහැවත් කුල පුත්‍රයෙකු සසුන්ගත කිරීමේ සාම්ප්‍රදායික ක්‍රියාවලිය හා සම්බන්ධ ක්‍රියාකාරකම් සියල්ලක්ම ඉතා සරලව මේ පොතේ රචනා කර ඇති අතර ඒ ඒ අවස්ථා වර්ණයෙන්ද නිරූපණය කර ඇත.
ජීවපද්ම සඳගෝමිගේ සයිබර් ප්‍රේමය
කෘතිය - සයිබර් ප්‍රේමය
කර්තෘ - ජීවපද්ම සඳගෝමි
ප්‍රකාශක - සී/ස සරසවි ප්‍රකාශකයෝ, නුගේගොඩ
මිල- රුපියල් 950
විමසීම්- 071 4178422
අන්තර් ජාල හා ජංගම දුරකතන නිසාවෙන් විදුලි වේගයෙන් වෙනස්වන මිනිසුන්ගේ හැසිරීම් රටාවන් ස්පර්ෂ කරමින් එහි අත්දැකීම් නිර්මාණාත්මක වපසරියට ගැනීමට ගත් උත්සාහයක් වන්නේ ජීවපද්ම සඳගෝමිගේ සයිබර් ප්‍රේමය කාව්‍ය නිර්මාණය යි. මොරටුව සරසවියේ ඉංජිනේරු උපාධිධරයෙකු, තොරතුරු හා සන්නිවේදන තාක්ෂණ ක්ෂේත්‍රයේ කළමනාකරණ වෘත්තිකයකු වන ජීවපද්මගේ පළමු කවි අස්වැන්න වූයේ මෙම කාව්‍ය නිර්මාණ සංග්‍රහයයි.
සිතුලිගේ සිර වූ කිරිල්ලිය
කෘතිය - සිර වූ කිරිල්ලිය
කර්තෘ - සිතුලි සඳගෝමි
ප්‍රකාශක - සරසවි ප්‍රකාශකයෝ, නුගේගොඩ
මිල- රුපියල් 380
කොළඹ මියුසියස් විදුහලේ අධ්‍යාපනය ලබන සිතුලිගේ නවතම කාව්‍ය සංග්‍රහය වන්නේ සිර වූ කිරිල්ලියයි. ජීවිතය හා සම්බන්ධ යම් යම් හැඟීම්, අවස්ථා පිළිබඳ මෙම කාව්‍ය නිර්මාණයට වස්තු විෂය වී ඇති අතර තවමත් කාන්තාවට සමාජයේ හිමි ව ඇති ස්ථානය, කාන්තාවට ලැබීමට ඇති නිසි ගෞරවය ලබා දෙන්නේ කෙසේද හා ඇයට සම තත්ත්වය ලබාදීමේ වෑයමට දායක වන්නේ කෙසේද යන්න මෙම නිර්මාණයට වස්තු විෂය වී ඇත.
