ශ්‍රී ලාංකිකයෝ ලෙස අපි බොහෝ අඳුරු, අවාසනාවන්ත කාල පරිච්ඡේදයන්ට මුුහුණ දී ඇත්තෙමු. දශක තුනකට අධික කාලයක් පැවති රුදුරු ත්‍රස්තවාදී ක්‍රියාකාරකම් හේතුවෙන් රටට අහිමි වූ ජීවිත සහ දේපළ බොහෝය. යුද ගිනි දැල් නිවී රට අලුතින් හුස්ම ගන්නට පටන් ගද්දි කවුරුත් සැනසුම් සුසුම් හෙළුවේ එය මහා අස්වැසිල්ලක් කරගෙනය. එහෙත් ඉකුත් මැයි 9 වැනිදා ප්‍රචණ්ඩත්වය, භීෂණය සහ අනීතිය යළිත් රට තුළ රජ කරවන්නට ඇතැම් පිරිස් කටයුතු කළහ. ඒ වන විට පැවති ආණ්ඩුවටත් එහි මැති ඇමතිවරුන්ටත් එල්ල වී තිබූ ජනතා විරෝධය පුපුරා ගියේ රට පුරා ප්‍රචණ්ඩකාරී සිදුවීම් දාමයකට මඟ සලසමිනි. පොදු ජන පෙරමුණ නියෝජනය කළ මහජන නියෝජිතයන්ට අයත් පෞද්ගලික නිවාස, යානවාහන රැසක් එහිදී විනාශයට පත් විය.
පාර්ලිමේන්තු මන්ත්‍රී, නීතිඥ ප්‍රේම්නාත් සී. දොලවත්ත ද එදින එවැනි සිදුවීමකට මුහුණ දුන්නේය.
"අනිත් සිදුවීම් එක්ක බලද්දි මම පොඩ්ඩක් විතර වාසනාවන්තයි. මගේ නිවෙස ගිනි තැබීමකට ලක්වුණේ නැහැ. නමුත් කඩලා බිඳලා විනාශ කරලා තිබුණා."
ඔහු අපේ කතාබහට එක්වෙමින් ඒ අඳුරු සඳුදාවේ මතක ආවර්ජනය කළේය.
"මගේ එකම දියණියට ඒ වෙද්දි වයස අවුරුද්දයි මාසයයි. මැයි 8 වැනිදා මගේ දුව අසනීප වෙලා පෞද්ගලික රෝහලක ප්‍රතිකාර ලබමින් හිටියේ. මහින්ද රාජපක්ෂ හිටපු අගමැතිතුමා ධුරයෙන් ඉවත් වීම වෙනුවෙන් පැවැත්වූ එතුමාට සමුදීමේ උත්සවයට සහභාගී වීමට මම 9 වැනිදා උදෑසන 11.30-12.00 අතර අරලියගහ මන්දිරයට ගියා.
ඒ වෙද්දි අවසන් කතා කිහිපය පැවැත්වෙමින් තිබුණේ. ඒක අවසන් වෙලා මම අගමැතිතුමාට සමුදීලා එතැනින් එන්න පිටත් වුණා. ඒ වෙද්දි එළියේ වෙන දේවල් ගැන මට ලොකු අවබෝධයක් තිබුණේ නැහැ. ඇඳිරි නීතිය දාලා තියලා දැනගත්තෙත් මඟදියි. මම රාජගිරියෙන් ගෙදරට අවශ්‍ය බඩු ටිකකුත් අරගෙන පාර්ලිමේන්තුව පැත්තෙන් ගෙදර යන්න එනකොට මගේ රියැදුරාට දුරකථන ඇමතුමක් ඇවිත් තිබුණා ආණ්ඩුවේ මැතිඇමතිවරුන්ට පහර දීම් සිදු වෙනවා, මන්ත්‍රීතුමාව පරෙස්සමින් එක්කගෙන යන්න කියලා. අපි වෙනදා වගේ සාමාන්‍යයෙන් යන පාරේ ගියා නම් අතුකෝරල මන්ත්‍රීතුමාට සිදු වුණ දේම තමයි මටත් වෙන්නේ. රට පුරා මිනිස්සුන්ට පහර දීම්, මැති ඇමතිවරුන්ගේ ගෙවල්, වාහන ගිනි තැබීම් ගැන දැනගන්න ලැබුණා. මම ගෙදරට ආව ගමන් මගේ පාක්ෂිකයෝ කතා කරලා ඇහුවා, ගෙදරට එන්න ද? ඔබතුමාට ප්‍රශ්නයක් ද කියලා. එහෙම බයක් සැකයක් මගේ හිතේ තිබුණේ නැති නිසා මම එහෙම අවශ්‍ය නැති බව ඔවුන්ට කිව්වා. මම හැමදාමත් මිනිස්සු ගැන විශ්වාස කළා. මිනිස්සුන්ට හිත රිදෙන වචනයක් කතා කරලා නැති මට එහෙම කරදරයක් වෙයි කියලා හිතුවේ නැහැ. ඒ වගේම හැම වෙලාවකදීම මම අනිත් අයගේ මත දැරීමේ නිදහසට ගරු කරන, ඒ වෙනුවෙන් කතා කරන කෙනෙක්. ඒ නිසා මම ගෙදරට වෙලා හිටියා."
එහෙත් ඒ සියල්ල වෙනස් වීමට ඒ හැටි කාලයක් ගත නොවුණු බව ද හෙතෙම කීවේය.
"හවස 4ට විතර මට ජනාධිපති කාර්යාලයෙන් කෝල් එකක් ආවා. අතුකෝරල මන්ත්‍රීතුමාව මහමඟදීම ඝාතනය කරලා කියලා. ඒ වෙලාවේ මම තේරුම් ගත්තා මොකක්හරි ප්‍රශ්නයක් ඇති වෙන්න පුළුවන් කියලා. මම බිරියට කිව්වා අපි ගෙදරින් යමු කියලා. ඒ වෙලාවේ එයා ඒකට කැමති වුණේ නැහැ. මොකද බබාට අසනීප නිසා එයාට හැමදාම උදේට බෙහෙත් එකක් දෙන්න තිබුණා. ඒ බෙහෙත් එක ෆීසර් එකේ තියලා දෙන්න ඕන එකක්. කොහොමහරි බිරියගේ අකමැතතෙන් වුණත් අපි ලෑස්ති වෙලා වාහන දෙකකින් හවස 6.15ට විතර ගෙදරින් පිටත් වුණා. ඒත් එක්කම වගේ විදුලියත් විසන්ධි වුණා. අපි පිටත් වෙලා විනාඩි 5ක් යන්න කලින් මට ආරංචි වුණා අපේ ගෙදරට පහර දෙනවා කියලා. ඒ වෙද්දි මගේ මවුපියන් සහ සහ මල්ලි කෙනෙක් ගේ ඇතුළේ හිටියා. ගෙට ඇතුළු වුණු පිරිස දොර ජනෙල් කඩා බිඳ දාලා විශාල අලාභයක් කරලා තිබුණා. ගෙනියන්න පුළුවන් දේවල් අරගෙන ගිහිල්ලත් තිබුණා. වටේ පිටේ සෙනඟ මගේ ගෙදරට එකතු වෙන කොට කලහකාරී පිරිස ඉක්මනින් විසිරිලා ගිහින් තිබුණා."
ප්‍රචණ්ඩකාරීන් විසින් එසේ නීතිය සියතට ගනිමින් එදින රැය පහන් වන තුරාම රට පුරා සිදු කළ ප්‍රචණ්ඩකාරී සිදුවීම් බොහෝය. මෙකී සිදුවීමට සම්බන්ධ වූවන් සම්බන්ධයෙන් නීතියේ පිළිසරණක් ලැබුණි දැයි අපි මන්ත්‍රීවරයාගෙන් විමසුවමු.
"මේ වගේ සිදුවීමකට මුහුණ දෙන්න වෙයි කියලා මම කවදාවත් හිතුවේ නැහැ. සැකකරුවන් කවුද කියලා හොයන්නවත් මම උනන්දු වුණේ නැහැ. සෑහෙන කාලෙකට පස්සේ තමයි සැකකරුවන් ඇල්ලුවේ. මේ සිදුවීම සංවිධානාත්මක පිරිසක් විසින් සිදු කළ කාර්යක් බව දැන් වැටහෙනවා. විශේෂයෙන් මේක තරුණ පිරිස් මුළා කරමින් සංවිධාන්තමකව සිදු කළ කාර්යක්. පොලිසිය හරියටම ක්‍රියාත්මක වුණා නම් මේ දේ වෙන්නේ නැහැ. බෝමිරිය මධ්‍ය මහා විද්‍යාලය ඉදිරිපිට පිහිටි මගේ නිවෙස අයිති වෙන්නෙ නවගමුව පොලිස් වසමටයි. ඒ පොලිස් වසමටම ඉන්න එකම පාර්ලිමේන්තු මන්ත්‍රීවරයා වන මගේ නිවෙස ආරක්ෂා කරගන්න පොලිසියට බැරි වීම කනගාටුවට කරුණක්. මගේ නිවෙස අවුරුදු 100-110ක් පැරණි නිවෙසක්. ගෙදර තිබුණු දේවල් ගොඩක් විනාශ කරලා. මට තියෙන එකම සැනසීම ගෙට ගිනි තිබ්බෙ නැති එක විතරයි. ඒ වගේම මගේ පොත්වලට ලොකු හානියක් වෙලා තිබුණෙත් නැහැ. විනාශ කරපු, නැතිවුණු බඩු භාණ්ඩවල වටිනාකමත් එක්ක බලද්දි මට රුපියල් ලක්ෂ 135ක විතර පාඩුවක් වෙලා තියෙනවා.
සාමකාමී ජන අරගලයට මුවාවී මැයි 9 වැනිදා රට පුරා සිදු කළ ප්‍රචණ්ඩකාරී සිදුවීම් දාමයට වගකිවයුත්තන් පිළිබඳ අපි පාර්ලිමේන්තු මන්ත්‍රී, නීතිඥ ප්‍රේම්නාත් සී. දොලවත්තගෙන් විමසුවෙමු.
"මේක එක් හුදෙකලා සිදුවීමක් නෙවෙයි. රට පුරාම ඒ විදිහේ සිදුවීම් රාශියක් සිදු වුණේ සංවිධානාත්මක ක්‍රමවේදයක් තුළ සිදු කළ දෙයක් නිසයි. එහෙම යාන්ත්‍රණයක් තියෙන්න පුළුවන් කාටද කියලා මේ රටේ ජනතාව හොඳින්ම දන්නවා. පැවති ආණ්ඩුවේ මන්ත්‍රීවරයෙක් වුණත් මම ආණ්ඩුවේ හරි දේ හරි විදිහටත් වැරදි දේ වැරදි විදිහටත් දැකපු ආණ්ඩුවට ඒ කරුණු කාරණා පැහැදිලි 
කරදීමට කටයුතු කළ කෙනෙක් විදියට මැයි 9 වැනිදා සිදු වුණු සිදුවීම ගැන කනගාටුවක් තියෙනවා. වෘත්තිකයෙක් විදිහට මට දේශපාලනයෙන් උපයාගන්න දෙයක් නැහැ. මේ දක්වා ආණ්ඩුවේ එක වාහනයක් පාවිච්චි කරලා නැහැ. 2022 අප්‍රේල් 12 වැනිදා දක්වා පෞද්ගලික ආරක්ෂාවට එක පොලිස් නිලධාරියෙක්වත් යොදගෙන නැහැ. මොකද නීතිඥයෙක් විදිහට මම දන්නවා අපේ රටේ පොලිස් නිලධාරින්ගේ සංඛ්‍යාව ප්‍රමාණවත් නැති බව.
ඒ වගේම සමහර අවස්ථාවල උද්ඝෝෂකයන්ට පහර දීම සම්බන්ධයෙන් මම අවස්ථා කිහිපයකදීම නීතිය හා සාමය පිළිබඳ ඇමතිවරයා සමඟ එකම වේදිකාවේ අදහස් දක්වා තිබෙනවා. ඇතැම් අවස්ථාවල පෙරටුගාමීන් සහ ජවිපෙ පාක්ෂිකයන් පොලිස් අත්අඩංගුවට ලක්වුණු අවස්ථාවල අපි මැදිහත් වෙලා බේරගත්ත අවස්ථා තිබුණා. මට විරුද්ධව කිසිම දූෂණ චෝදනාවක් නැහැ. මේ සිදුවීමෙන් පැහැදිලිව දකින්නට ලැබුණේ පැසිස්ට්වාදයට ඉඩ දෙනවාද කියන කාරණාවයි. අපි බහුතරයක් තෝරගත්ත ජනාධිපතිවරයාට අපි බලාපොරොත්තු වූ ප්‍රමාණයට මේ රට දේශපාලනිකව පාලනය කිරීමේ හැකියාවක් තිබුණේ නැහැ. ඒ පත්කිරීම සම්බන්ධයෙන් දේශපාලකයන් විදිහට ජනතාවට අපේ වගකීමක් තිබෙනවා. මම විශ්වාස කරන්නේ මේ අවස්ථාවේදී ස්ථාවර ආණ්ඩුවක් රටට අවශ්‍ය බවයි. එවැනි ස්ථාවර ආණ්ඩුක් ගෙනයමින් රට ගොඩදාන්න පුළුවන් කෙනෙක් විදිහට මම රනිල් වික්‍රමසිංහ ජනාධිපතිතුමාව දකිනවා."
පාර්ලිමේන්තු මන්ත්‍රී, නීතිඥ ප්‍රේම්නාත් සී. දොලවත්ත පැවසුවේ මහජන නියෝජිතයකුගේ සැබෑ වගකීම සිහිපත් කරමිනි. කඩුවෙල බෝමිරියේ පදිංචි ඔහු ප්‍රාථමික අධ්‍යාපනය ලබා ඇත්තේ ඉහළ බෝමිරිය කනිෂ්ඨ විද්‍යාලයෙනි. ශිෂ්‍යත්ව විභාගය සමත්ව කොළඹ ඩී.එස්. සේනානායක විද්‍යාලයට ඇතුළත්ව විද්‍යා අංශයෙන් උසස් පෙළ විභාගය සමත් වුවද ඔහුගේ සිත යන්නේ නීතිඥ වෘත්තියටය. නීති විද්‍යාල ප්‍රවේශය සමත්ව නීති විද්‍යාලයට ඇතුළත් වන ඔහු අවසන් වසරේ විභාගය සමත් වන්නේ දෙවැනි පන්තියේ සාමාර්ථයක් සහිතවය. 2008 වසරේදී නීතිඥයකු ලෙස දිවුරුම් දුන් ඔහු මේ වන විට කොළඹ විශ්වවිද්‍යාලයේ නීතිවේදය පිළිබඳ පශ්චාත් උපාධිය හදාරමින් සිටී. නීතිඥ ප්‍රේම්නාත් සී. දොලවත්ත දේශපාලනට ප්‍රවිශ්ට වන්නේ 2015 ජනාධිපතිවරණයෙන් මහින්ද රාජපක්ෂ පරාජයට පත්වීමත් සමඟය.
"පරාජයට පත්වීමෙන් පසු එතුමා සහ පක්ෂය වෙනුවෙන් පෙනී සිටින්න කිසිවකු නැති අවස්ථාවකයි මම දේශපාලනයට එන්නේ. ඒකට හේතුව ඒ පරාජය අසාධරණ පරාජයක් බව මගේ හැඟීම වූ නිසයි. නීතිඥයකු විදිහට මම දන්නවා ඕනෑම සැකකාරයකුට වුවත් තමා වෙනුවෙන් කරුණු කියන්න අවස්ථාවක් ලැබෙනවා. ඒත් මහින්ද රාජපක්ෂ මහතා සහ එතුමාගේ පාර්ශ්වය නියෝජනය කළ ඒකාබද්ධ විපක්ෂය වෙනුවෙන් පෙනී ඉන්න, අඩුමතරමේ ලියුමක් ලියන්නවත් ලෝයර් කෙනෙක්වත් නැති අවස්ථාවක තමයි මම ඒ වෙනුවෙන් ඉදිරිපත් වෙන්නේ. ඒ අවස්ථාවේ ඇතැම් අය මට කිව්වා, ඕක කෝට් එකත් ගැලවෙන වැඩක් , ඒ අවදානම ගන්න එපා කියලා. නමුත් මම ඒ අවදානම අරගෙන එතුමා වෙනුවෙන් පෙනී හිටියා. එතකොට අනිත් අයටත් වැටහුණා එහෙම පෙනී හිටියට ප්‍රශ්නයක් නැහැ කියලා. ඊටපස්සේ ජ්‍යෙෂ්ඨ නීතිඥවරු පවා ඉදිරිපත් වුණා. මම ඔවුන්ට අවස්ථාව දීලා අවශ්‍ය උදව් ලබාදීම දිගටම කරගෙන ගියා. ඊට අමතරව යහපාලන ආණ්ඩුව තුළ සිදු වූ අසාධාරණකම්, දූෂණ එළිදරවු කිරීමට විපක්ෂයේ නීති උපදේශකයා ලෙසත් කටයුතු කළා. සත්‍ය ගවේෂකයෝ සංවිධානය ස්ථාපිත කළා. ඒ ආණ්ඩුවට විරෝධය පළ කරමින් මමත් සරත්.එන්. සිල්වාත් රට පුරා යමින් සම්මන්ත්‍රණ රාශියක් පවත්වමින් ජනතාව දැනුම්වත් කළා. 
වියත් මඟ සංවිධානය බිහිවෙන්නෙත් ඊට පසුවයි. ඒ සංවිධානයේ සම්මන්ත්‍රණවලටත් මම දේශන පැවැත්වූ අවස්ථා තිබුණා. නමුත් මම මැතිවරණයට ඉදිරිපත් වූ අවස්ථාවේ ඔවුන් මට විරුද්ධව යම් යම් ප්‍රචාර ගෙන ගියත් මම එයින් කම්පාවට පත්වුණේ නැහැ. ඒ වසර කිහිපය තුළ විවිධාකාර ප්‍රශ්න, ගැටලුවලට මුහුණ දුන්නත් යහපාලන ආණ්ඩුව බිඳ දැමීමේ පළවැනි මිටි පහරවල් 5 ගැසූ පුද්ගලයන් අතර මමත් සිටියා. ඒ වගේම රූපවාහිනි වැඩසටහන් තුළින් පක්ෂයේ මතය ජනතාව අතරට ගෙන ගියා. මහින්ද රාජපක්ෂ අගමැතිතුමාගේ මාධ්‍ය ප්‍රකාශක විදිහට පත්වීම් ලැබූවාට පසුව මැතිවරණය සඳහා ඉදිරිපත් වීමට අවස්ථාව ලැබුණා."
2020 මැතිවරණය සඳහා ඔහුට නාම යෝජනා ලැබෙන්නේ මැද කොළඹ ආසනය සඳහාය. කලක් තිස්සේ එජාප බල කඳවුරක් බවට පත්ව තිබූ මැද කොළඹ එජාප සංවිධායකවරයා වූයේ වත්මන් ජනාධිපති රනිල් වික්‍රමසිංහයන්ය. සමගි ජන බලවේගයේ සංවිධායකවරයා සජිත් ප්‍රේමදාසය. 
එහෙත් මැතිවරණයට ඉදිරිපත් වූ පළමු අවස්ථාවේදීම මනාප 70,000තට ආසන්න සංඛ්‍යාවක් ලබාගනිමින් ප්‍රේම්නාත් සී. දොලවත්ත පාර්ලිමේන්තු මන්ත්‍රී අසුනක් දිනා ගන්නේ ඔහුගේ දර්ශනය හා ප්‍රතිපත්ති ජනතාව විසින් පිළිගත් නිසාය.
‘ජනතාව මා කෙරෙහි තැබූ විශ්වාසයට මම හැකි උපරිමයෙන් සාධාරණයක් ඉෂ්ට කළා කියලා මම විශ්වාස කරනවා. යහපාලන ආණ්ඩුව ගෙනා අහිතකර පනත් කෙටුම්පත් කිහිපයක් ම මගේ මැදිහත්වීමෙන් ඉවත් කරන්න කටයුතු කළා. ඒ වගේම අපේ ආණ්ඩුව තුළ සිටිමින්ම ආණ්ඩුව සාධනීය තත්ත්වයකට ගේන්න අවශ්‍ය මැදිහත් වීමත් කළා. එහි ප්‍රතිඵලයක් විදිහට වෙන්නත් පුළුවන්, මේ දක්වා මට පොදු ජන පරෙමුණේ දේශපාලනය කරන්න ආසනයක් ලැබිලා නැහැ. මැයි 9 වැනිදා සිදුවීමෙන් මගෙ ගෙදර දොර ජනෙල් සියල්ල විනාශ වෙලා තිබුණා. දොර ජනෙල් නැති ගෙදරකට තමයි අපි ආවේ. සතියකට විතර පස්සේ ඉන්න වෙන තැනක් ලැබුණා. ඒ සිදුවීම නිසා මමත් බිරියත් විශාල මානසික පීඩාවකට පත්වුණා.
මොකද ඒ වෙද්දි අසනීපෙන් හිටපු අපේ දරුවට බෙහෙත් ටික දෙන්න බැරි වුණා. ඒ බෙහෙත් ෆීස් කරන්න විදිහක් තිබුණේ නැති නිසා. කඩලා බිඳලා දාපුවා අස්කරගෙන ආපහු ගෙදර පදිංචියට ආවත් ගේ හැමතැනම වීදුරු කටු. ඒ වීදුරු කටුවලට බබාගේ කකුල් කැපුණු අවස්ථාත් තියෙනවා.
මේ වගේ සිදුවීමකට මම කවදාවත්ම මුහුණ දීලා නැහැ. වෘත්තිකයකු හැටියට මට දේශපාලනයෙන් උපයන්න දෙයක් නැහැ. මම වාහන තුනම ගත්තේ නීතිඥයෙක් විදිහට සහ ව්‍යාපාරිකයෙක් විදිහට උපයාගත් ධනයෙන්. මේ වගේ සිදුවීම් නිසා ඇයි මම දේශපාලනය කරන්නේ කියන ප්‍රශ්නයත් මගේ හිතට නැඟුණා. නමුත් මේ පැසිස්ට්වාදී දේශපාලන ආක්‍රමණයට ඉඩ දිය යුතු නැහැ.
දේශපාලනඥයන් විදිහට අපි බැලිය යුත්තේ අපේ ඉදිරි දේශපාලන අනාගතය ගැන හෝ බලය ලබා ගැනීම ගැන නෙවෙයි. පක්ෂ, පාට භේද නොතකා එකතැන පල්වෙන මේ දේශපාලන ක්‍රමවේදය වෙනස් කරලා රට ආර්ථික වශ‌ෙයන් ගොඩනැඟීමේ අභියෝගය අපි ඉදිරියේ තිබෙනවා. ඒ සඳහා සියලුම දේශපාලනඥයන් එකට එක්විය යුතුයි. මහජනතාවටත් වගකීමක් තිබෙනවා මැයි 9 වැනිදා සිදුවූ අවාසනාවන්ත සිදුවීම් යළි සිදු නොවීමට වගබලා ගැනීමට.
“මේ රට දැන් තියෙන්නේ කාල බෝම්බයක් උඩ. ඒක පුපුරන්න නොදී රට රැකගැනීමේ වගකීමෙන් මිදෙන්න දේශපාලනඥයන්ට වගේම මහජනතාවටත් බැහැ.”
අවසාන වශ‌ෙයන් පාර්ලිමේන්තු මන්ත්‍රී, නීතිඥ ප්‍රේම්නාත් සී. දොලවත්ත පැවසුවේ ඒ වගකීම ඉටුකිරීමට දායක වීමේ යුතුකම අවධාරණය කරමිනි.
