හිරු නොබසින අධිරාජ්‍යයේ හිරු පසුගිය 19 වැනිදා මුළුමනින්ම බැස යාම වෙනුවෙන් පැවැත්වුණු රාජකීය අවමංගල උත්සවය ගැන මුළු ලෝකයේත් මෙරට දේශපාලන ක්ෂේත්‍රයේත් වැඩි අවධානයක් යොමු වී තිබුණි.
දෙවන එලිසෙබෙත් මහ රැජින පසුගිය සැප්තැම්බර් 08 වැනිදා අභාවප්‍රාප්ත වීමෙන් අනතුරුව දේශපාලන ක්ෂේත්‍රයේත් බොහෝ දෙනෙකු කතා කරන්නට වූයේ මහ රැජිනගේ පාලන කාලයන් පිළිබඳවයි.
ජනපති රනිල් ඉතිහාස පොතට ගිය හැටි
ජනාධිපති රනිල් වික්‍රමසිංහ හට මහා බ්‍රිතාන්‍යයේ සහ ලංකාවේ ඉතිහාස පොතට එකතු වීමට අවස්ථාව උදා වූවේ ඉකුත් සතියේදී ය. එනම් එලිසබත් මහරාජිනියගේ රාජාභිෂේකයට සහභාගී වූ දෙමාපියන්ගේ දරුවකු ලෙස රැජිනියගේ අවමංගල්‍යයට සහභාගී වීමට අවස්ථාව උදාකර ගනිමිනි. බ්‍රිතාන්‍ය රජයේ ආරධනාවකට අනුව ජනපති රනිල් ඉකුත් ඉරිදා ලන්ඩනයට පැමිණියේය.
ඔහුත් සමඟ ජනාධිපති බිරිය මහාචාර්ය මෛත්‍රී වික්‍රමසිංහ, ජනාධිපති පෞද්ගලික ලේකම් සැන්ඩ්‍රා පෙරේරා, ජනාධිපති ජාත්‍යන්තර කටයුතු අධ්‍යක්ෂ දිනුක් කොළඹගේ, ආරක්ෂක නිලධාරීන් දෙදෙනකු සහ නිල වෛද්‍යවරයා ද ගමනට එක්ව සිටියහ. ජනාධිපති බිරිය ගුවන් ටිකට්පත ඇගේ පෞද්ගලික මුදලින් ලබා ගෙන තිබීම ද විශේෂත්වයකි.
ජනාධිපති ඇතුළු දූත පිරිස වෙනුවෙන් විශේෂ රාත්‍රී භෝජන සංග්‍රහයක් ලන්ඩන් මහකොමසාරිස් කාර්යාලයේ දී පැවැත්වූවේ බටහිර යුරෝපයේ විශේෂ ජනාධිපති නියෝජිත නෙරන්ජන් දේවාදිත්‍ය විසිනි. ඊට එක්සත් රාජධානියේ ශ්‍රී ලංකා මහකොමසාරිස් සරෝජා සිරිසේන ද එක්ව සිටියාය.
රාජකීය අවමංගලෝත්සවයට සහභාගී වන්නන් වෙන් කර තිබුණේ කණ්ඩායම් කිහිපයක් ලෙසය. පළමුව රජ පවුලට ද ඉන්පසු යූරෝපීයයන්ට ද, තුන්වනුව ආසියාතිකයන්ට ද, හතර වෙනුව අනෙකුත් රාජ්‍යයන් ලෙස වෙන් කර තිබුණි. ජනපති රනිල් අසලින් එක් පසෙක අසුන්ගෙන සිටියේ ඉන්දීය ජනාධිපතිනියය. අනෙක් පසින් මැලේසියාවේ රජතුමා ද පිටුපසින් මාලදිවයින් ජනාධිපතිවරයා ද අසුන් ගෙන සිටියේය. එම පිරිසට පසුපසින් අමෙරිකානු ජනාධිපති ජෝබයිඩන් ඇතුළු රාජ්‍ය නායකයෝ අසුන් ගෙන සිටියෝය.
චාල්ස් රජු රනිල්ගෙන් විමසුවේ කුමක්ද?
රැජිනියගේ දේහයට අවසන් ගෞරව දැක්වීමෙන් පසු ජනාධිපති රනිල්ට එදින සවස තුන්වන චාල්ස් රජු විසින් අමුත්තන් පිළිගැනීම වෙනුවෙන් සංවිධානය කර තිබූ රාත්‍රී භෝජන සංග්‍රහයට එකතු වීමට ද අවස්ථාව උදා විණි. ජනපති රනිල්ට තුන්වන චාල්ස් රජු හමු වී කතා බස් කිරීමට ද හැකිවූ අතර චාල්ස් රජු ශ්‍රී ලංකාවේ වර්තමාන තත්ත්වය ගැන එහිදී විමසා සිටියේ ජනපති රනිල්ගෙනි. පළමුව සිහසුනට පත්වීම ගැන ඔහු වෙත සුබ පැතුම් එක්කළ ජනාධිපතිවරයා වේල්සයේ කුමරු ලෙස ලංකාවට පැමිණි ගමන ගැන ද සිහිපත් කිරීමට අමතක නොක‍ළේය.
“එදා 50 වෙනි නිදහස් උත්සවයට ඔබතුමා පැමිණියේ වේල්සයේ කුමරු ලෙසයි. අපේ 75 වෙනි නිදහස් සමරුවට අපි නව වේල්සයේ කුමරුට ආරාධනා කරනවා.” ජනාධිපති රනිල් කීවේ සිනහසෙමිනි.
“ඔහුට ලොකු වගකීමක්, අභියෝගයක් තියෙනවා වේල්සයේ නව කුමරු ලෙස කටයුතු කරන්නේ කෙසේද කියලා. මේ අභියෝගය දක්ෂ ලෙස කරන්න හැකියාවක් ඔහුට තිබෙන බව මම විශ්වාස කරනවා.” චාල්ස් රජුගේ ප්‍රතිචාරය එය විය.
සුහද කෙටි පිළිසඳරකින් පසු රනිල් ඉන් සමු ගනිද්දී චාල්ස් රජු කීවේ ලංකාව පත්ව සිටින තත්ත්වයෙන් මුදවා ගැනීමට අවශ්‍ය සහයෝගය දෙන බවය.
බ්‍රිතන්‍ය විදේශ ලේකම් විසින් සංවිධානය කර තිබූ රාජ්‍ය නායකයන් පිළිගැනීමේ අවස්ථාවට ද ජනාධිපති රනිල් සහභාගී වූවේය. ඊට ඇමරිකානු ජනාධිපති, ප්‍රංශ ජනාධිපති, ඇතුළු රාජ්‍ය නායකයන් රැසක් ද එක්ව සිටියහ. ජනාධිපති රනිල් සිටි කොටසේ ඉන්දීය ජනාධිපතිනිය, චීන උප ජනාධිපති සිටි අතර රනිල් ඔවුන් සමඟ මෙන්ම අනෙකුත් රාජ්‍ය නායක‌ෙයා් සමඟ ද සුහද පිළිසඳරේ නිරත විණි.
පොත් ප්‍රදර්ශනයේ දී රනිල් පොත් ගැන කීවේ මොනවාද?
ජනාධිපති රනිල් ඉකුත් බ්‍රහස්පතින්දා පෙරවරුවේ බණ්ඩාරනායක සම්මන්ත්‍රණ ශාලාව වෙත ගියේ ජාත්‍යන්තර පොත් ප්‍රදර්ශනය නැරඹීමටය. කුමන රාජකාරිය තිබුණත් ජාත්‍යන්තර පොත් ප්‍රදර්ශනයට සහභාගී වීම රනිල් වික්‍රමසිංහ අතපසු කරන්නේ නැත.
ඒ අනුව ඔහු මෙවරද පොත් ප්‍රදර්ශනය නැරඹීමට ගියේ ඉකුත් බ්‍රහස්පතින්දාය. පොත් ප්‍රදර්ශනය වෙත ගිය ජනාධිපතිවරයා විජිත යාපා, විදර්ශන යනාදී පොත් කුටි වෙත ගමන් කරමින් පොත් මිල දී ගැනීමට කටයුතු කළේය.
පොත් මිල දී ගෙන යන අතරතුරදී ජනතාව සමඟ සුහද සාකච්ඡාවන්ට ද මැදිවන්නට සිදු වුණේ ඔවුන් පැමිණ සෙල්ෆි ඡයාරූප ගැනීමට උත්සුක වීම නිසාවෙනි.
ජාත්‍යන්තර පොත් ප්‍රදර්ශනය අගය කළ ජනාධිපතිවරයා “පොත් බලන්න ඕනේ. පොත් කියවන්න ඕනේ. හැබැයි පොත් ගිනි තියන්න හොඳ නෑ.” කියා කියද්දී අසල සිටි සැවොම සිනාසුණහ.
දිනේෂ්ගේ රස මතක අවදි කළ මාධ්‍යවේදීන්ගේ හමුව
අගමැති දිනේෂ් ගුණවර්ධන පසුගිය බ්‍රහස්පතින්දා (22) පාර්ලිමේන්තු සංකීර්ණයේදී , 'ශ්‍රී ලංකා පාර්ලිමේන්තු ජනමාධ්‍යවේදීන්ගේ සංගමයේ' සාමාජිකයන් හමුවිය. මුද්‍රිත, විද්‍යුත්, වෙබ් ආදි සියලු මාධ්‍ය ආයතන නියෝජනය කරමින් පාර්ලිමේන්තු මාධ්‍යවේදීහු ඊට එක්වූහ. දිනේෂ්, අගමැති වූ පසු මෙසේ ජනමාධ්‍යවේදීන් පිරිසක් එක විට හමුවූ පළමු අවස්ථාව මෙය විය.
සංගමයේ සභාපති ප්‍රවීණ මාධ්‍යවේදී ප්‍රගීත් පෙරේරා, අග්‍රාමාත්‍යවරයා ශාලාවට ඇතුළු වන විට ම ඔහු හා කතාබහ ආරම්භ කළේය. ජනමාධ්‍ය අමාත්‍ය ආචාර්ය බන්දුල ගුණවර්ධන, ජනමාධ්‍ය රාජ්‍ය අමාත්‍ය ශාන්ත බණ්ඩාර මෙන්ම පාර්ලිමේන්තු මන්ත්‍රී යදාමිණි ගුණවර්ධනද, අග්‍රාමාත්‍යවරයා මෙම හමුවට එක්කරගෙන සිටියහ.
මාධ්‍යවේදීන් අසුන් ගෙන සිටි මේසයෙන් මේසයට ගිය දිනේෂ්, සියල්ලන් සමඟ ම කතා කළේය. ඒ අතර ප්‍රවීණ පාර්ලිමේන්තු මාධ්‍යවේදී දයා පෙරේරාද සිටියේය.
" ආ.. දයා..කොහොමද ?"
" ඔබතුමා අගමැති විදියට ජනමාධ්‍යවේදීන් හමුවෙන එක දකිද්දි, 1983 අතුරු මැතිවරණයෙදි කොට්ටාව මාකුඹුර රැස්වීමෙ සිද්ධියක් මතක් වෙනවා" දයා කීවේය.
අගමැති නැවතී සිනාමුසුව ඊට සවන් දුන්නේය.
" එදාත් පත්තර වාර්තාකරුවෙක් විදියට මම රැස්වීම වාර්තා කරමින් හිටියා. පොඩි වැස්සක් ආවා. නෝට් බුක් එක තෙමෙද්දි ම මම දිගට ම රාජකාරිය කරගෙන යද්දි, එක නෝනා කෙනෙක් ඇවිල්ලා, මට කුඩේ ඇල්ලුවා."
"තෙමි තෙමී රාජකාරිය කරන්න බෑනෙ, ඇය එහෙමයි කිව්වෙ. අන්තිමට මම ඇහුවා, ඔබතුමිය කවුද කියලා, එතකොට කිව්වා මම දිනේෂ් මහත්තයාගෙ නෝන, රමණි වත්සලා කොතලාවල කියලා"
දැනට ජීවතුන් අතර නැති සිය බිරිය ගැන මතකය අවදි වෙද්දී, අගමැතිවරයා දයාගේ පිටට තට්ටු කර ඉතැනින් ඉවත් වන විට ම, තවත් ප්‍රවීණ මාධ්‍යවේදියකු වන ජේ. ටී. ද සිල්වා ළං වී " ඔබතුමා තමයි මෙහෙම පාර්ලිමේන්තු මාධ්‍යවේදීන් හමුවූ පළමු අගමැති" කීවේය.
මේ අතර AP විදෙස් පුවත් සේවයේ භාරත මලවඅරච්චි අමුතු ප්‍රශ්නයක් ඇසීය. " දැන් ඔය රාජ්‍ය තාන්ත්‍රික කතා යන අස්සේ, ජනාධිපතිතුමායි, ඔබතුමයි පාසලේ පන්තියෙ හිටිය කාලෙ පරණ සිද්ධි මතක් කරන්නෙ නැද්ද ?"
" මොකද නැත්තෙ, ඒව ජනාධිපතිතුමා මතක් කරනවා, නිතර "
ආගමික ස්ථානවලට සහනයක් දෙන්න මහින්දගේ අවධානය
ආණ්ඩු පක්ෂයේ මන්ත්‍රී කණ්ඩායම් රැස්වීම අග්‍රාමාත්‍ය දිනේෂ් ගුණවර්ධනගේ ප්‍රධානත්වයෙන් පසුගියදා රැස්විය.
එහිදී පළමුව කතා කළේ අණ්ඩු පක්ෂ ප්‍රධාන සංවිධායක, අමාත්‍ය ප්‍රසන්න රණතුංගය.
ඔහු සඳහන් කළේ" 20 වැනිදා සිට 23 දක්වා සියලුම කැබිනට් හා රාජ්‍ය අමාත්‍යවරුන්ට පාර්ලිමේන්තුවේ රැඳී සිටීම අනිවාර්ය කර ඇති බවය."
පාර්ලිමේන්තුවේදී ඉදිරිපත් කරන ප්‍රශ්න සඳහා ප්‍රශස්ත මට්ටමින් මැදිහත්වීම හා විවාදවලදී සක්‍රිය දායකත්වය ලබාදීමේ අරමුණින් මෙම තීරණය ගෙන ඇතැයිද ඔහු පැවසීය.
අනතුරුව අගමැතිවරයා ජාතික සභාව සම්බන්ධයෙන් අදහස් දැක්වීය.
" පාර්ලිමේන්තුව නියෝජනය කරන ඇතැම් දේශපාලන පක්ෂවලට ඉන්නෙ මන්ත්‍රීවරුන් එක්කෙනයි නැත්නම් දෙන්නයි. ඒක නිසා පාර්ලිමේන්තුව නියෝජනය කරන සියලුම දෙනාට අවස්ථාව ඕන කියල මතයක් ආවා. විරුද්ධ පක්ෂයත් මේ ගැන කතා කළා."
ජාතික සභාවේ මන්ත්‍රී නියෝජනය ඉහළ දැමීමට සිදුවීම පිළිබඳව අගමැතිවරයා එලෙස පැහැදිලි කළේය.
" යම්කිසි කාරණයක් සම්බන්ධයෙන් තීරණයක් ගන්නව නම් ජාතික සභාවෙ ඔක්කොම දෙනා එයට එකඟ වෙන්න ඕන. එහෙම නැතුව තනි මතයට වැඩ කරන්නේ නෑ. අගමැතිවරයා වැඩිදුරටත් කීවේය.
විහාරස්ථානවල විදුලි බිල ඉහළ යෑමත් සමඟ මහා සංඝරත්නය ආණ්ඩුව සමඟ පසුවන්නේ එතරම් හිත හොඳකින් නොවේ.
ජගත් කුමාර මන්ත්‍රීවරයා ඒ ගැන කතා කළේය.
" පන්සල්වල ලයිට් බිල වැඩිවීම ඉස්සරහට ලොකු ප්‍රශ්නයක් වේවි. ඒක නිසා මේකට සහනයක් දෙන්න බලන්න "
" අපි ඒ ගැන කංචන ඇමතිතුමා එක්කයි, විදුලිබල මණ්ඩලය එක්කයි කතා කරමු."
හිටපු අගමැති මහින්ද රාජපක්ෂ කීවේය.
" දැන් කුඹුරුවල අස්වැන්න නෙළනවා. ඒත් වී ගන්න රාජ්‍ය බැංකු සල්ලි දෙන්නෙ නෑ කියල කෘෂිකර්ම ඇමතිතුමා කියනව. මෙහෙම ගිහිල්ලා ගොවිය ශක්තිමත් කරන්නේ කොහොමද ?"
ජගත් කුමාර මන්ත්‍රීවරයා යළි කීවේය.
" ඉල්ලපු මුදලින් යම් ප්‍රමාණයක් ලැබුණ නේද ?"
මුදල් රාජ්‍ය ඇමති රංජිත් සියඹලාපිටිය කෘෂිකර්ම ඇමති මහින්ද අමරවීරගෙන් විමසීය.
"නෑ.. කීයක්වත් ලැබුණෙ නෑ"
අමරවීර කීවේය.
" මේක පිටිපස්සෙ ඉන්නෙත් මහා පරිමාණ වී මෝල් හිමියෝ. මගේ කාලෙත් මෙහෙම වුණා. මහා පරිමාණ ව්‍යාපාරිකයන්ට සල්ලි දෙනවා. වී අලවි මණ්ඩලයට දෙන්නෙ නෑ.."
හිටපු කෘෂිකර්ම ඇමති මහින්දානන්ද අලුත්ගමගේ සඳහන් කළේය.
" දැනටමත් සති දෙක තුනක් පරක්කුයි. වී ටික ගන්න සල්ලි දෙන්න "
අමරවීර නැවත කීවේය.
මහින්දානන්දගේ ෆයිල් මිටිය
අනතුරුව සාකච්ඡාවට ලක්වූයේ බදු ආදායම වැඩි කර ගැනීම පිළිබඳවය. ඒ සම්බන්ධයෙන් මන්ත්‍රීවරුන් දැනුවත් කිරීමට මුදල් අමාත්‍යාංශ ලේකම්වරයාද කැඳවා තිබුණේය.
" බදු ආදායම වැඩි කර ගන්න අපිට අලුතෙන් බදු ගෙවන පිරිස් ලක්ෂ 20 - 25ක් අපි එකතු කරගන්න ඕන. ලබන මාසේ 1වැනිද ඉඳලා ඒ සඳහා වැඩපිළිවෙළක් ක්‍රියාත්මක කරනවා."
මුදල් රාජ්‍ය අමාත්‍ය රංජිත් සියඹලාපිටිය පැවසීය. මහින්දානන්ද අලුත්ගමගේ හිටපු ඇමතිවරයා ආණ්ඩු පක්ෂ කණ්ඩායම් රැස්වීමට පැමිණ සිටියේ ලිපිගොනු රැසක් ද සමඟය. ඒ ලිපිගොනුවල තිබුණේ මෙරට බදු ආදායම පිළිබඳ විස්තරයි.
සියඹලාපිටියගේ කතාවෙන් පසුව මහින්දානන්ද රජයේ බදු ආදායම වැඩි කර ගැනීම ගැන කතා කරන්නට පටන් ගත්තේ මේ ලිපි ගොනු එකින් එක පෙන්වමිනි
" මහා පරිමාණ ව්‍යාපාරිකයන් බදු වංචා කරනවා. බදු වංචා කරන පිරිසට එරෙහිව දැඩි දඬුවම් දෙන්න අලුතින් නීති ගේන්න ඕන. අපෙන් පටන් ගමු. පාර්ලිමේන්තු මන්ත්‍රීවරුන්ට බදු ෆයිල් එක ගානේ අරිමු "
අපේ රටේ මත්පැන් බලපත්‍ර පන්දාස් ගාණක් තියෙනවා. දවසක ලාභය 50,000 ක්. හැබැයි අවුරුද්දටම ගෙවන්නෙ ලක්ෂ එකහමාරයි. ඉන්ධන පිරවුම්හලක් ගන්න එක බවුසරයකින් 94,000 ක් ලාභයි.
හැබැයි බදු ගෙවන්නෙ මාසෙකට වැඩිම ලක්ෂ 02 යි. මේ වසර වෙනකොට ලංකාවේ බදු ගෙවන අය ඉන්නේ 59,000 ලක්ෂ100 ට වඩා බදු ගෙවන්නෙ 80 දෙනයි. 28,000 ක්ම ගෙවන්නෙ 10,000 ට අඩුවෙන්. 22,000 ක් ගෙවන්නෙ ලක්ෂයට අඩුවෙන්" මහින්දානන්ද කීවේය. "විදුලිබල මණ්ඩලයේ ඉන්නවා ලක්ෂ 30 ට වඩා වැඩි පඩි ගන්න 18,000 ක්. සිංගප්පූරුව වගේ රටවල්වල බදු ගෙවන්නේ නැති අයට විරුද්ධව කටයුතු කරන්නේ අපරාධ නීතිය හරහා. අපේ රටෙත් ඒ වගේ නීති නීතිරීති ක්‍රියාත්මක කරන්න ඕනෑ" මහින්දානන්ද යෝජනා කළේය. ඔහු කී කතාවට මන්ත්‍රීවරුන්ගේ ප්‍රසාදය හිමි විය.
ප්‍රසන්න සංවේදී වෙයි
"පොදුජන පෙරමුණ ගමින් ගමට" වැඩසටහනේ මිනුවන්ගොඩ ආසනයේ රැස්වීම ඇමති ප්‍රසන්න රණතුංගගේ ප්‍රධානත්වයෙන් පසුගිය ඉරිදා උඩුගම්පොළ, රෙජී රණතුංග සමරු ශාලාවේ පැවත්විණ. ඉකුත් මැයි මස 9 වැනිදා සිදුවූ කලහකාරී තත්ත්වයෙන් පසුව පොදුජන පෙරමුණ පැවැත්වූ පළමු ජනහමුව මෙයයි. මේ සඳහා ශ්‍රී ලංකා පොදුජන පෙරමුණ නියෝජනය කරන ගම්පහ දිස්ත්‍රික්කයේ පළාත් පාලන මන්ත්‍රීවරුන් විශාල පිරිසක් සහභාගී වූහ.
" මැයි 9 වැනිදා කෝලහාලයෙන් වැඩිම හානි වුණේ මගේ මිනුවන්ගොඩ ආසන්නයේ මිනිස්සුන්ටයි."
ඇමති ප්‍රසන්න සංවේදීව කීවේය.
" ඔව් ඉදිරියේදි පක්ෂය ඔබ ගැන බලනවා. සියලුම තොරතුරු අපි ළඟ තියෙනවා"
එයට සහභාගී වූ මන්ත්‍රී මහාචාර්ය රංජිත් බණ්ඩාර පැවසීය.
" මේ ගේ ලියල තිබුණේ ආර්චනා දුවගේ නමට. දුවගේ වෙඩින් එකට දින නියම වෙලා තිබුණේ මැයි 11. මේ කුමන්ත්‍රණකාරයො නිසා ගේත් නැති වුණා. දුවගේ වෙඩින් එකත් කල් ගියා"
ඇමති ප්‍රසන්න යළි කීවේය.
"මොන අභියෝග පැමිණියත් අපි පක්ෂය දාල යන්නෙ නෑ. " මෙයට එක්වූ පළාත් පාලන මන්ත්‍රීවරුන් එක හඬින් කීහ.
ඔළු තුනේ බූරුවා කවුද?
පාර්ලිමේන්තුවේ පසුගිය 22 වැනිදා යම් උණුසුම්කාරී තත්ත්වයක් ඇති වූයේ බූරු කතාවක් නිසාය. එය නිකම්ම නිකන් බූරු කතාවක් නොවේ. ඔළු තුනේ බූරු කතාවකි.
ඔළු තුනේ බූරු කතාව කරලියට පැමිණියේ ඩලස් අලහප්පරුම පාර්ශ්වයට අසාධාරණයක් වන බව මහාචාර්ය ජී.එල්. පීරිස් පාර්ලිමේන්තුවේදී සිදු කළ ප්‍රකාශයක් සමඟිනි.
ජී. එල්. පීරිස්ට පිළිතුරු දුන් ආණ්ඩු පක්ෂයේ ප්‍රධාන සංවිධායක, නාගරික සංවර්ධන හා නිවාස අමාත්‍ය ප්‍රසන්න රණතුංග විමසා සිටියේ ස්වාධීන වූ මන්ත්‍රීවරුන් සිටිය යුත්තේ කොහොමද? කියාය. “පාර්ලිමේන්තුවේ තියෙන්නේ වෙස්ට් මිනිස්ටර් ක්‍රමය. ආණ්ඩු පක්ෂයටයි විරුද්ධ පක්ෂයටයි තමයි මන්ත්‍රීවරුන් බෙදිලා ඉන්නේ.
ස්වාධීන වුණු මන්ත්‍රීවරුන් හරියට ඔළු තුනේ බූරුවන් වගේ කියලා එදා කියලා තියෙන්නේ ආචාර්ය කොල්වින් අර්. ද සිල්වායි. මං නෙවේ කියලා තියෙන්නේ කොල්වින් ආර්. ද සිල්වා මහතායි”එහෙම කියලා තියෙන්නේ යනුවෙන් ප්‍රසන්න රණතුංග කියා සිටියේය.
මේ සමඟම මැතිසබය උණුසුම්කාරී වූ අතර ඊට පිළිතුරු දීමට නැගී සිටියේ ගාල්ල දිස්ත්‍රික් පාර්ලිමේන්තු මන්ත්‍රී චන්දිම වීරක්කොඩිය.
“බූරුවා කවුද? කියලා මේ රටේ ජනතාව තීන්දු කරයි” යනුවෙන් තරමක වේගයෙන් කතා කළේ චන්දිම වීරක්කොඩිය.
“මං බූරුවා කියලා කිව්වේ නැහැ. මං කිව්වේ කොල්වින් ආර්.ද සිල්වා මහත්තයා කියපු කතාවක්. ඔබතුමා බූරුවා කවුද කියලා කොල්වින් ආර්. ද සිල්වා මහත්තයට අපහාස කරන්න එපා.” යනුවෙන් ප්‍රසන්න රණතුංග ප්‍රකාශ කළ අතර දෙදෙනා අතර ඇතිවූ වාදය නිසා මැතිසබය උණුම්කාරී මෙන්ම ඝෝෂාකාරී ද විය.
ඇමති ආචාර්ය බන්දුල රාජ්‍ය ඇමැතිට කාර්යාලයත් දන් දෙයි
ජනාධිපතිවරයා පසුගියදා සිදු කළ රාජ්‍ය ඇමැති පත්කිරීම අනුව බන්දුල ගුණවර්ධන අමාත්‍යවරයාගේ අමාත්‍යාංශය යටතට රාජ්‍ය ඇමැතිවරුන් සිව් දෙනකු පත්කර ඇත. ප්‍රවාහන රාජ්‍ය ඇමති ලෙස ලසන්ත අලගියවන්නත් ජනමාධ්‍ය රාජ්‍ය ඇමැති ලෙස ශාන්ත බණ්ඩාරත් මහා මාර්ග විෂයට සිරිපාල ගම්ලත්, ග්‍රාමීය මාර්ග විෂයට (සිවනේසතුරෙයි චන්ද්‍රකාන්තන්) පිල්ලෙයාන් පත්කළ අතර ඉන් සිරිපාල ගම්ලත් හැර අනෙක් තිදෙනා ම වැඩ බාර ගත්තේ බන්දුල අමාත්‍යවරයා රුසියාවට ගොස් සිටින අතරතුරයි.
රාජ්‍ය අමාත්‍ය පිල්ලෙයාන්ට කාර්යාලයක් පිළිබඳව ප්‍රශ්නයක් පැවතීම හේතුවෙන් ඔහු ධුරයේ වැඩ බාර ගත්තේ ද බන්දුල අමාත්‍යවරයාගේ නිල කාර්යාලය තුළදීමයි.
රුසියාවේ සිට යළි දිවයිනට පැමිණි අමාත්‍යවරයාට ඔහුගේ මාධ්‍ය ලේකම්වරයා විසින් මේ පිළිබඳව දැනුම් දී තිබුණේ මීට කඩිනම් විසඳුමක් ලබා දිය යුතුම වූ බැවිනි. ඒ අනුව ඒ මොහොතේම පිල්ලෙයාන් රාජ්‍ය අමාත්‍යවරයා දුරකථනයෙන් ඇමතූ බන්දුල ගුණවර්ධන අමාත්‍යවරයා ප්‍රකාශ කළේ සෙත්සිරිපාය ගොඩනැඟිල්ලේ තම කාර්යාලයේ සිට සිය නිල කටයුතු නිදහසේ කරගන්නා ලෙසයි. "ඉඳ හිටලා හරි එන වෙලාවට මටත් පොඩි ඉඩක් දුන්නොත් ඇති.." අමාත්‍ය බන්දුල ගුණවර්ධන සිය කාර්යාලය පිල්ලෙයාන් අමාත්‍යවරයාට බාර දෙමින් සිදු කළ ඉල්ලීම එයයි.
අන්තර්ජාතික වශයෙන් පිදෙන"වසරේ හොඳම ගුරුවරයා සම්මානය 2022"
ඉන්දියාවේ පැවැති Education Icon Awards "Best Teacher of the Year" ජාත්‍යන්තර තරගයට අපේ රට නියෝජනය කරමින් සහභාගී වූ අසිත් මුතුකුමාරණ ගුරුතුමා ජයග්‍රහණය කරනු ලැබීය.
අසිත් මුතුකුමාරණ කීර්තිමත් ගුරුවරයෙකි. ගුරු වෘත්තියට පිවිස අවුරුදු 7 ක් වැනි කෙටි කලකදී හා වයස අවුරුදු 32 දී ඔහු 2018 වසරේ ලංකාවේ විශිෂ්ටතම ගුරුවරයා වන්නේ අනිකුත් ගුරුවරු අතරිනි.
2019 වසරේදී ඔහු අවංකතම රාජ්‍ය සේවකයන් 10 දෙනා අතරට පිවිසෙන්නේ ද ගුරුවරයකු වශයෙන් ලබා දුන් සිය දායකත්වය නිසාවෙනි.
ලොව දිනූ ගුරුවරයා අසිත්ට සජිත්ගෙන් අතහිත
(Education Icon Awards)මෙවර පැවැත්වුණේ ඉන්දියාවේදීය. එම උත්සවයට යාමට අසිත්ට අපහසු බව සජිත්ට වාර්තා විය. මේ පිළිබඳව සොයා බැලූ සජිත් අදාළ ප්‍රශ්නය She පදනමට දැනුම් දුන්නේය. She පදනම යනු සමාජ සත්කාරමය වැඩසටහන්වලට සම්බන්ධ වන සංවිධානයකි.
එය ජලනි ප්‍රේමදාසගේ සංකල්පයකි.
මීට වහාම මැදිහත් වූ ජලනි ප්‍රේමදාස අසිත්ට අවශ්‍ය ගුවන් ටිකට්පත් ලබා ගැනීම සඳහා අවශ්‍ය සියලු පහසුකම් සැලසීය.
ඒ අනුව දින දෙකක් ඇතුළත අසිත්ගේ අවශ්‍යතාව සම්පූර්ණ විය.
ලොව හොඳම ගුරුවරයා සම්මානය ලබා ගැනීම උදෙසා යාමට අවශ්‍ය මුදල් ලබා දීමට සජිත් මැදිහත් වූයේ එහෙම ය. "ලෝකයේ හොඳම ගුරුවරයා වෙලා රටට කීර්තියක් ගේන්න"
සජිත් ඔහුට සුබපැතුම් එක් කළේය.
රනිල්ගේ ලන්ඩන් ගමනේ ව‍ටිනාකම වජිර කියයි
සිරිකොතෙහි පැවැත්වෙන මහජන හමුවට සම්බන්ධවීම සඳහා පසුගිය බදාදා උදෑසනම එක්සත් ජාතික පක්ෂයේ සභාපති පාර්ලිමේන්තු මන්ත්‍රී වජිර අබේවර්ධන සිරිකොත එකසත් ජාතික පක්ෂ මූලස්ථානයට පැමිණියේය. වජිර අබේවර්ධන එහි පැමිණෙන විටත් පාක්ෂිකයන්, ක්‍රියාකාරීන් ඇතුළු විශාල පිරිසක් සිරිකොතට පැමිණ සිටියහ.
කාර්යාලයේ රැඳී සිටින වජිර අබේවර්ධන හමුවීමට පක්ෂයේ ක්‍රියාකාරීන් කිහිප දෙනකු ඔහුගේ කාමරය වෙත පැමිණි අසුන් ගත්තේය. ඒ පිරිස සභාපති වජිර අබේවර්ධන සමඟ කතා බහ ආරම්භ කළේ රටේ වර්තමාන තත්ත්වය සහ ආණ්ඩුවේ ඉදිරි ගමන් මඟ විමසමින්ය.
“සර් ජනාධිපතිතුමා එංගලන්තයේ මහ රැජිනගේ අවමංග්‍ය උත්සවයට සහභාගී වුණු එක ගැන රටේ මිනිස්සු විවිධ කතා කියනවා. සමාජ මාධ්‍ය තුළත් මේ ගමන ගැන බොහෝ දේවල් ශෙයාර් වුණා. රාජ්‍යතාන්ත්‍රික මට්ටමේ සම්බන්ධතා පිළිබඳ අවබෝධයක් තිබෙන අය නම් මේ ගැන මධ්‍යස්ථව කතා කරලා තිබුණා.
අලුතින් පත්වුණු චාල්ස් කුමාරයත් සමඟ අපේ ජනාධිපති රනිල් වික්‍රමසිංහ ජනාධිපතිතුමා සාකච්ඡා කරන පින්තූරය නම් ෆේස්බුක් එකේ ගොඩක් ශෙයාර් වුණා. සර්ගේ ෆේස්බුක් පේජ් එකේ දාලා තිබුණු පින්තූරයටත් වැඩිපුරම තිබුණේ සුබවාදී කමෙන්ටස්. ඇත්තටම සර් මේ සංචාරය අපේ රටට බලපාන්නේ කොහොමද?” යැයි පැමිණ සිටි එක් අයෙක් වජිර අබේවර්ධනගෙන් විමසුවේය.
“ඇත්තටම ඒක හොඳ කාරණයක්, අපේ මිනිස්සු හොයන්නේ බලන්නේ නැතිව කතා හදනවා. තව කෙනෙක් කියන දෙයක හොඳ නරක බලන්නේ නැහැ. එක පාරම පිළිගන්නවා. ඔබතුමා කිව්ව විදිහට ජනාධිපති රනිල් වික්‍රමසිංහ මැතිතුමාට තිබෙන රාජ්‍ය තාන්ත්‍රික මට්ටමේ පිළිගැනීම පිළිබඳව අවබෝධයක් ලබාගැනීමට මේ සංචාරය හොඳ උදාහරණයක්.
එතුමා ජාත්‍යන්තරය පිළිගත් නායකයෙක්. චාල්ස් කුමාරයත් සමඟ මේ විදිහට සාකච්ඡාවක නිරත වෙන්න හැම රටකම රාජ්‍ය නායකයන්ට අවස්ථාව ලැබෙන්නේ නැහැ. ඒ විතරක් නෙමෙයි තවත් කතාවක් තිබෙනවා ඔබතුමාලා නොදන්න. දෙවන එලිසබත් මහ රැජිනට ඔටුනු පලන්ද අවස්ථාවේ තිබුණු රාජකීය උත්සවයට වර්තමාන ජනාධිපති රනිල් වික්‍රමසිංහ මැතිතුමාගේ පියා වන එස්මන්ඩ් වික්‍රමසිංහ මැතිතුමත්, එම මැතිනිය වන නාලිනී වික්‍රමසිංහ මැතිනියත් එදා සම්බන්ධ වුණා.
මෙවර රාජකීය අවමඟුල් උත්සවය සඳහා එතුමාගේ පුත්‍ර රත්නය වුණු ජනාධිපති රනිල් වික්‍රමසිංහ මැතිතුමා සහභාගී වුණා. මෙය අපේ රටට ඉතා වැදගත් අවස්ථාවක් වගේම ඓතිහාසික අවස්ථාවක් වෙනවා.
රට පවතින තත්ත්වයෙන් ගොඩ ගන්න නම් අනිවාර්යයෙන්ම අපිට ජාත්‍යන්තර සහයෝගය අවශ්‍යයයි. ජාත්‍යන්තර සහයෝගය නැතිව අපිට ඉදිරියට යන්න බැහැ. ඒ නිසාම තමයි ජනාධිපති රනිල් වික්‍රමසිංහ මැතිතුමා මේ මාසේ අග වෙනකොට ජපානය බලා පිටත්ව යන්නේ. අපේ ණයකරුවන් සහ අපට ආධාර දෙන කණ්ඩායම් දෙපාර්ශ්වයම එකඟ කරවා ගෙන රට නැවත ස්ථාපනය කිරීමේ ක්‍රියාවලිය තමයි ජනාධිපති රනිල් වික්‍රමසිංහ මැතිතුමා ක්‍රියාත්මක කරමින් ඉන්නේ.”යනුවෙන් වජිර අබේවර්ධන විසින් පෙන්වා දෙන ලදි.
