සර්ව පාක්ෂික ආණ්ඩුවක් ගැන දිගින් දිගටම කතා කෙරුණද සර්ව පාක්ෂික ආණ්ඩුවක් ප්‍රායෝගික නිර්මාණය කිරීමට අපහසු නිසා ජාතික ආණ්ඩුවක් හෝ බහු පාක්ෂික ආණ්ඩුවක් පිහිටුවීම රජයේ අවධානය යොමු වී තිබේ. මේ අතර නව කැබිනට් මණ්ඩලය සහ නව රාජ්‍ය අමාත්‍යවරුන් පත් කිරීම බොහෝ දුරට ලබන සතිය ඇතුළත සිදුකිරීමට නියමිතයි. ශ්‍රී ලංකා පොදුජන පෙරමුණ ඇතුළු රනිල් වික්‍රමසිංහ ජනාධිපතිවරයාට සහයෝගය දක්වන දේශපාලන පක්ෂ නායකයින් ඇතුළු නියෝජිතයන් ඉල්ලා ඇත්තේ අකමැති අය පැත්තකට තබා කැමති පිරිසෙන් නව ආණ්ඩුව නිර්මාණයකොට කඩිනමින් රට යථා තත්ත්වයට පත්කිරීමට ක්‍රියා කළ යුතු බවයි. 
ගෝඨාභයට ආපහු එන්න කියන්නේ කවුද?
පසුගිය 18 වැනි බ්‍රහස්පතින්දා පොහොට්ටුවේ රැස්වීමක් පැවැත්වූයේ ශ්‍රී ලංකා පොදුජන පෙරමුණේ ජාතික සංවිධායක, හිටපු අමාත්‍ය බැසිල් රාජපක්ෂගේ ප්‍රධානත්වයෙනි. වර්තමාන දේශපාලන තත්ත්වය සම්බන්ධයෙන් ද මෙහිදී කතාබහ වූ අතර බැසිල් රාජපක්ෂ කියා සිටියේ ගෝඨාභය රාජපක්ෂ ජනාධිපතිට Gota Go Home කියපු කට්ටියම දැන් Gota Come Home කියන බවයි.
“ගෝඨාභය රාජපක්ෂ ජනාධිපතිතුමා අමාරුවේ දාලා යවන්න මුලින්ම උත්සාහ කරපු කට්ටියම දැන් ඔහුට ආපහු ලංකාවට එන්නලු. ඒක තමයි ලොකුම විහිළුව. මං දැක්කා ගම්පහ පැත්තේ දේශපාලඥයෙකුත් මේ ගැන කතා කරනවා.” යනුවෙන් බැසිල් ඉඟියකින් කිව්වේ ගම්පහ දිස්ත්‍රික්කය නියෝජනය කරන පොහොට්ටුවේ පාර්ලිමේන්තු මන්ත්‍රීවරයෙකු ගැනය.
“දැන් රාජපක්ෂවරුන්ට අයින්වෙන්න කියලා කිව්වා. අයින්වෙන්න කියලා කියපු කට්ටිය දැන් කියනවා, ආපහු එන්න කියලා.මං නම් ආපහු පාර්ලිමේන්තුවට එන්නේ නැහැ. පොහොට්ටුව ශක්තිමත් කරන වැඩේ මේ රටේ පොදු මහජනතාව වෙනුවෙන් කරනවා” යනුවෙන් බැසිල් රාජපක්ෂ කියා සිටියේය.
හිටපු ජනාධිපතිවරයා මෙරටට පැමිණි පසු ඔහු නවාතැන් ගනු ලබන නිවස සම්බන්ධයෙන්ද මෙහිදී සාකච්ජා විය. මෙහිදී එස්.බී. දිසානායක කියා සිටියේ තමාට රජයෙන් හිමිව තිබෙන නිල නිවස ගෝඨාභය රාජපක්ෂ හිටපු ජනාධිපතිවරයා වෙනුවෙන් ලබාදීමට තමා සූදානම් බවයි.
රනිල් - බැසිල් පැයක හමුවක්
රනිල් වික්‍රමසිංහ ජනාධිපතිවරයා සහ බැසිල් රාජපක්ෂ හිටපු අමාත්‍යවරයා අතර විශේෂ හමුවක් පසුගිය 18 වැනිදා සවස 6.30 සිට රාත්‍රී 7.30 දක්වා පැවැත්වුණි. රනිල් වික්‍රමසිංහ සහ බැසිල් රාජපක්ෂ අතර පමණක් මෙම සාකච්ජාව පැවැත්වුණු අතර වෙනත් කිසිවෙකු එම අවස්ථාවට සහභාගී නොවීමද විශේෂත්වයකි. ගෝඨාභය රාජපක්ෂ හිටපු ජනාධිපතිවරයා මෙරටට පැමිණීම පිළිබඳ මෙහිදී දීර්ඝ වශයෙන් සාකච්ජා වූ බව දේශපාලන අභ්‍යන්තර ආරංචි මාර්ගවලින් වාර්තා වේ. අනතුරුව ජනාධිපති ලේකම් කාර්යාලයේදී රාත්‍රී 7.00 ට පමණ ශ්‍රී ලංකා පොදුජන පෙරමුණ සහ රනිල් වික්‍රමසිංහ ජනාධිපතිවරයා අතර සාකච්ජාවක් පැවැත්වුණි. මෙයට බැසිල් රාජපක්ෂ, ප්‍රසන්න රණතුංග, ජොන්ස්ටන් රෝහිත, පවිත්‍රා, නාමල්, සාගර කාරියවසම් සහ සංජීව එදිරිමාන්න පොහොට්ටුව නියෝජනය කළ අතර ජනපති රනිල් ප්‍රමුඛව සාගල රත්නායක, වජිර අබේවර්ධන, රුවන් විජේවර්ධන සහ ශමල් සෙනරත් ජනාධිපතිවරයාගේ පාර්ශ්වය නියෝජනය කළහ.
මේක ඉතාම වැදගත් රැස්වීමක්, මම ඔබට අවස්ථාව දෙනවා කතා කරන්න. ජනපති බොහොම කෙටියෙන් රැස්වීම ආරම්භය කළා...
ඊට පස්සෙ කතා කළේ බැසිල් රාජපක්ෂ ...
ජනාධිපතිතුමනි ඔබතුමාට මේ ආර්ථික ප්‍රශ්නය විසඳල රට ගොඩනඟන්න අපි බොහොම අවංකව ඉදිරියටත් උදව් කරන බව මුලින්ම කියන්න කැමතියි. දෙවෙනි කාරණය තමයි හිටපු ජනාධිපතිතුමාට ආරක්ෂිතව නැවත ලංකාවට එන්න අවස්ථාව සැලසීම අත්‍යාවශ්‍යයි කියල අපි ඔබතුමාට යෝජනා කරනව...
බැසිල් රාජපක්ෂ මතු කළ කාරණා දෙකම ජනාධිපතිවරයා ඉතාම බැරෑරුම් විදිහට අවධානයට ගත්තේය.
ආණ්ඩුවට එන්න කැමති අයව අපි එකතු කරගම්මු. ඒක ගැන කාගෙවත් විරෝධයක් නෑ. හැබැයි 225ම එකතු වෙනකම් මහන්සි වෙන්න ගියොත් නම් දොඩංගොඩ බදාගත්ත වගේ වෙයි. ඒ නිසා ඒ ගැන පරිස්සමෙන්...
බැසිල් එහෙම කියද්දි ජනාධිපති රනිල් ඒ අදහසට එකඟ බවක් සභාවට ඉඟි කළේය.
රනිල්ගේ දැනුම ගැන පුදුම වෙයි
වසර දෙකකට පසු ජනතා සහභාගීත්වයෙන් පැවැති මහනුවර දළදා පෙරහැර නැරඹීමට ජනාධිපතිවරයා ද ඉකුත් සතියේ සහභාගී වූවේය. සාම්ප්‍රදායිකව පෙරහැර ආරම්භය සනිටුහන් කරමින් වෙඩි මුර පත්තු වෙද්දීම ජනාධිපතිවරයා ද නුවර ජනාධිපති මන්දිරයෙන් එළියට බැස්සේ පෙරහැර නැරඹීමට යාමටය. පෙරහැර නැරඹීමට ක්වින්ස් හෝටලයට යාමට මත්තෙන් ඔහු දින දෙකක් තිස්සේ පෙරහැර නැරඹීමට නන් දෙසින් පැමිණ සිටි දහස් සංඛ්‍යාත ජනතාව අභිමුවට පැමිණියේ ඔවුන් වෙත ආචාර කිරීමටය.
“ජනාධිපතිතුමා ඔබතුමා නිසා අපට මේ සැරේ පෙරහැර බලන්න ලැබුණා. පින් සිදුවේවා.“ පැමිණ සිටියවුන් හුන් තැනින් නැඟිට ආචාර කරද්දී “ මම විතරක් නොවෙයි ඔබතුමන්ලත් සහාය දුන් නිසා තමයි හැමෝටම නිදහසේ පෙරහැර බලන්න ලැබුණේ.“ ජනාධිපති රනිල් ප්‍රකාශ කරමින් හෝටලය දෙසට පිය නැඟුවේය. ජනාධිපති රනිල් සමඟ ඇමති විජයදාස, කාර්ය මණ්ඩල ප්‍රධානී සාගල රත්නායක හා මධ්‍යම පළාත් හිටපු මහඇමති සරත් ඒකනායක ක්වින්ස් හෝටලයේ පළමු මහලේ සඳලුතලයේ සිට පෙරහැර නැරඹීය.
රනිල්ගේ කතාවට ඉන්දීය නාවුක නිලධාරීන්ගෙන් ප්‍රශංසා
සඳුදා දහවල් කටුනායක ගුවන් හමුදා කඳවුර වෙත ජනාධිපති රනිල් පැමිණියේ විශේෂ අවස්ථාවකට සහභාගී වීමටය. ඒ ඉන්දියාවෙන් ආධාරයක් ලෙස ලැබෙන සමුද්‍රීය නිරීක්ෂණ විශේෂ පහසුකම් සහිත “ඩෝනියර්“ යානය පිළිගැනීමටය. එය ලබා ගැනීමත් අපූරු කටයුත්තකි.
ජනාධිපතිවරයා අගමැතිධූරය දැරූ 2018 වසරේදී සමුද්‍රීය පරීක්ෂණ වෙනුවෙන් ඔහු විශේෂ ඩෝනියර් ගුවන් යානා දෙකක් ලබා දෙන ලෙස ඉන්දීය අගමැති නරේන්ද්‍ර මෝදිගෙන ඉල්ලා තිබුණේ ඉන්දියානු සාගර කලාපීය සමුළුවට සහභාගී වූ අවස්ථාවේදීය.
ඩෝනියර් ගුවන් යානය පිළිගැනීමට ගිය ජනාධිපතිවරයා ඇතුළු පිරිසට දිවා ආහාරය සුදානම් කර තිබුණේ කටුනායක ගුවන් හමුදා කඳවුරේ නිලධාරී නිල නිවෙසේ දීය. උත්සවයෙන් පසු ජනාධිපතිවරයා ගුවන් හමුදා කඳවුරට යද්දී ඉන්දීය නාවුක හමුදා නිලධාරීන් ද එහි පැමිණ සිටියහ. ජනාධිපති රනිල් ඔවුන් අසලට ගොස් එදිනට යෙදී තිබූ ඉන්දීය ජනරජ දිනය ගැන විමසා සිටියේය.
“ජනරජ දිනය සහභාගී වෙන්න දිල්ලියේ ඉන්නේ නැතුව මෙහේට එන්න වුණා නේද?“ ජනාධිපතිවරයා විමසූවේ මඳ සිනහවකිනි.
“සර් ගේ කතාව ඇහුවට පස්සේ නම් දිල්ලියේ ඉන්න නොහැකිවීමේ කනගාටුව නම් නැතිවුණා. ලංකාවෙයි ඉන්දියාවෙයි සම්බන්ධය ගැන අපිත් හුඟක් දේවල් දැන ගත්තා. ඒක ඉතාම වටිනා කතාවක්. දිල්ලියේ ඉන්නේ නැතුව මෙහේ ආපු එකට පාඩුවක් වුණේ නෑ.“ ඉන්දියානු නාවුක නිලධාරීන් ජනාධිපතිගේ කතාව අගය කළේ එලෙසිනි.
සිරිකොත අලින්ගෙන් පිරේ
ජනාධිපතිවරයා මුණ ගැසීමට එක්සත් ජාතික පක්ෂ නිලධාරීන් පැමිණියේ ලබන 06 දාට යෙදෙන එක්සත් ජාතික පක්ෂ 76 වන සම්මේලනය ගැන සිහිපත් කිරීමටය. එහෙත් එම සාකච්ඡාව දිගට ඇදී ගියේ පක්ෂ කටයුතු ගැන ද පිරිස ජනාධිපති රනිල්ගෙන් උපදෙස් ගැනීමට යාම නිසාවෙනි.
“සිරිකොත දැන් හැමදාම ජනතාවගෙන් පිරිච්ච තැනක් වෙලා. මට මතක් වෙන්නේ 2015 කාලය. අද මම සිරිකොතට ගියා. මට හුස්ම ගන්නවත් වෙලාවක් තිබුණේ නෑ.“ ජාතික සංවිධායක සාගල කීවේ සිනාසෙමිනි.
“විනය පරීක්ෂණ තියන්න ලියුම් යවපු පළාත් පාලන නියෝජිතයෝ සමාව අරන් පක්ෂයට ආවා.“ මහලේකම් රංගේ ද කීවේය.
“අපෙන් ඈත් වෙච්ච කට්ටිය වගේම අලුත් කට්ටියත් එකතු කර ගන්න ඕනේ. පක්ෂය ඉදිරියට ගෙන යන්න අලුතින් හිතන්න ඕනේ. තරුණ මුහුණු පක්ෂයට ගෙන්න ඕනේ. රට වෙනසක් ඉල්ලනවා. ඒ වෙනසට ගැළපෙන පිරිසක් අපි දෙන්න ඕනේ. මට රටේ කටයුතු බලන්න තියෙන නිසා ඔයාලා පක්ෂයේ කටයුතු බලන්න.“ නායක රනිල් වික්‍රමසිංහ ගේ අදහස එය විය.
“තරුණ පිරිස එකතු කර ගන්න පුළුවන් හොඳම තැන තමයි ජනාධිපතිතුමා එදා ඇති කරපු යොවුන් පාර්ලිමේන්තුව. එතන දාහකට වැඩි පිරිසක් ඉන්නවා. ඒ ගැන බලන්න.“ පක්ෂ නියෝජ්‍ය නායක රුවන් විජයවර්ධන සිටියේ එවැනි මතයකය.
ඉන් පසුව පිරිස පක්ෂ සම්මේලනය පවත්වන ආකාරය ගැන කතා බහ කළහ. සම්මේලනය පැවැත්වෙන ස්ථානය වගේම එය පැවැත්විය යුතු ආකාරය ගැන ද ඔවුන් දීර්ඝ ලෙස සාකච්ඡා කළේය. රුවන් විජයවර්ධනගේ ප්‍රධානත්වයෙන් සම්මේලන සංවිධාන කමිටුවක් පත් කිරීමට ද එහිදි තීන්දු කෙරිණි.
“සර් දැන් අපිට පළාත් පාලන ඡන්දයට සුදානම් වෙන්න වෙයි නේද?“ රංගේ බණ්ඩාර විමසා සිටියේ සමාජයේ පවතින කතාබහක් ගැනය.
“ඊට කලින් කරන්න වැඩ ගොඩක් තියෙනවා. මොනවා කරන්නත් කලින් ආර්ථිකය හදාගෙන ඉන්න එපැයි.“ ජනාධිපතිගේ ප්‍රතිචාරය එය විය.
“සර් මේ වෙලාවේ මිනිස්සු ඡන්දයක් ඉල්ලන්නේ නෑ. මිනිස්සු මේ වෙලාවේ ඉල්ලන්නේ රට හදන්න කියලායි. ඡන්දය ඉල්ලන්නේ විපක්ෂ කණ්ඩායම්. සර් ආර්ථිකය හදන්න කලින් රට ඡන්දයකට අරන් ගියොත් ඒකේ වාසිය ගන්න තමයි විපක්ෂය බලන්නේ.“ වජිර කී විට සියල්ලෝම සිනාසුණහ. පසුගිය සිකුරාදා උදෑසන ජනාධිපතිවරයා පැමිණියේ ජැක්සන් ඇන්තනි කලාකරුවාගේ සුවදුක් විමසා බැලීමටය. අනතුරුව පවුලේ ඥාතීන් සමඟද කතා බස් කොට ඉන් පිටව ගියේ ඔහුට ඉක්මන් සුවය පතමිනි.
චීන නෞකාවේ ගැටලුව විසඳීමට මහින්ද මැදිහත් වෙයි
චීනයට අයත් යුවාන් වෑන්ග් නෞකාව හම්බන්තොට ජාත්‍යන්තර වරායට සේන්දුවීමට ඉන්දියාව ඇතුළු ජාත්‍යන්තර මාධ්‍යයේ විශේෂ අවධානයක් යොමු වී තිබුණි. චීන නෞකාවට කිසිදු ගැටලුවක් නොමැතිව හම්බන්තොට වරායට සේන්දුවීමට හැකිවිය. එම නෞකාවේ ගැටලුව විසඳීමට මහින්ද රාජපක්ෂ හිටපු අග්‍රාමත්‍යවරයා ක්‍රියා කළ ආකාරය බොහෝ දෙනෙකුගේ පැසසුමට ද ලක්විය.
සජිත්ගෙන් දිගටම ඩීල් කතා
විපක්ෂ නායක සජිත් පසුගිය සතියේ ආරම්භ කළේ රත්නපුර දිස්ත්‍රික්කයේ ආසන කිහිපයක වැඩසටහන් සහ බල මණ්ඩල රැස්වීම් වලට එකතු වෙමිනි.
"දැන් හැමෝගෙම ඩීල් එළි වෙලා තියෙන්නෙ. හැමෝම රාජපක්ෂලාට යටවෙලා. ඉතිරිවෙලා ඉන්නේ ඔබතුමා විතරයි. සමඟි ජන බලවේගය නම්, මේ ආණ්ඩුව එක්ක දීග කන්න යන්න එපා"
රැස්වීමට එක්ව සිටි භික්ෂූන් වහන්සේ නමක් සජිත්ට කීවේය. මේ අතර සජිත් හේශා විතානගේ විසින් සංවිධානය කරනු ලැබූ ගැබිණි මව්වරුන්ට පෝෂණ මලු ප්‍රදානය කිරීමේ අවස්ථාවට ද එක් විය.
"මං අනාවැකියක් කියන්නම්. සජිත් ප්‍රේමදාස මහත්තයා හැමදාම කිව්වේ ජනතාවගේ ආශිර්වාදයෙන් බලය ගන්නවා කියලා. එතුමා ඇතුළු සමඟි ජන බලවේගය අපි ඊළඟ මැතිවරණයේ මැතිවරණයේ ජයග්‍රහණය කරනවා. ඒ ජයග්‍රහණය කරනවා විතරක් නෙවෙයි. සජිත් ප්‍රේමදාස මහත්තයා මේ රටේ නිදහසින් පස්සේ ඉතිහාසයේ වැඩිම කලක් රට පාලනය කරපු නායකයා බවට පත්වෙනවා." ගයන්ත කරුණාතිලක කීවේය.
"මේ අය එක පැත්තකින් සර්ව පාක්ෂික ආණ්ඩු හදන්න කතා කරනවා.අනෙක් පැත්තෙන් අපේ දහයක් යනවා 12ක් යනවා 18ක් යනවා විස්සක් යනවා කියලා නිවුස් ප්ලාන්ට් කරනවා. හැබැයි ගිය කෙනෙකුත් නෑ. යන කෙනෙකුත් නෑ." හේෂා විතානගේ කීවේය.
මංගල මුද්දක් ගැන අසා ප්‍රසන්නට දිගටම ඇමතුම්
පසුගිය සෙනසුරාදා උදෑසන සිට ඇමති ප්‍රසන්න රණතුංග මහතාගේ ජංගම දුරකථනයට මැති ඇමතිවරුන්ගෙන් මෙන්ම හිතවතුන්ගෙන්ද ලැබෙන ඇමතුම්වල කෙළවරක් නොවීය. ඒ ඔහුගේ වැඩිමහල් දියණිය යාල වනෝද්‍යානයේ සංචාරයක නිරත වීමේදී ඇයගේ රුපියල් ලක්ෂ 25ක් පමණ වටිනා මංගල මුදුව සොරකම්කර ඇති බවට එදින සමාජ මාධ්‍ය ඔස්සේ ප්‍රචාරය වීම හේතුවෙනි. අමාත්‍යවරයා තමන්ට දුරකතන ඇමතුම් ලබාදෙන සියල්ලන්ටම පැවසුවේ “ මගේ දුව තවම කසාද බැඳලා නෑ. ඉතින් එයාගේ මඟුල් මුද්දක් නැති වෙන්නෙ කියන එක මටත් ප්‍රශ්නයක්. මගේ දුවට මඟුලක් ජෝඩුකරලා, මුද්දකුත් දාලා, ඒකත් නැතිකරල මේක මාර වැඩක්නේ” යනුවෙනි.
අනතුරුව අමාත්‍යවරයා ඔවුන්ට මෙලෙස ද පිළිතුරු දුන්නේය.
“මගේ දුව යාළුවෝ කට්ටියක් එක්ක යාල ගියපු එක ඇත්ත. මේ නැතිවෙලා තියෙන්නෙ දුවගේ යාළුවෙක්ගෙ මුද්දක්.”
කෙසේ වෙතත් තවමත් අවිවාහක සිය වැඩිමල් දියණිය සතුව තිබූ මඟුල් මුදුවක් නැතිවී ඇති බවට ප්‍රචාරය වීමත් සමඟ අමාත්‍යවරයා මෙන්ම ඇය විවාහ වීමට සිටි පාර්ශ්වයද යම් තරමකට කලබල විය. එබැවින් අමාත්‍යවරයා යාල සංචාරයක නිරතව සිටි සිය දියණියටද දුරකතන ඇමතුමක් ගෙන මෙම මුදු සිද්ධියේ ඇත්ත නැත්ත විමසා බැලීය. මේ සම්බන්ධයෙන් පසුව කළ සොයා බැලීමේදී අනාවරණය වූයේ ඇමතිවරයාගේ දියණියගේ මුදුවක් නැතිවූ බවට පොලීසියට පැමිණිල්ලක් හෝ ලැබී නැති බවය. ඒ බව කිරින්ද පොලීසියද සනාථ කර තිබුණි.
රනිල් රැකගත යුතු බව වජිර දැඩිව කියයි
එක්සත් ජාතික පක්ෂයේ මහජන හමුව පසුගිය සතියේ අඟහරුවාදා සහ බදාදා දින සිරිකොත පක්ෂ මූලස්ථානයේදී පැවැත්විණි. එම අවස්ථාවට සජබයට එකතු වී සිටි පිරිසක් ඇතුළුව 400 කට අධික පිරිසක් සහභාගී වී සිටියහ. නියෝජ්‍ය නායක රුවන් විජේවර්ධන, සභාපති වජිර අබේවර්ධන සහ පක්ෂ මහලේකම් රංගේ බණ්ඩාර යන අය ඔවුන් අමතා අදහස් ප්‍රකාශකර තිබුණි.
එම අදහස් ප්‍රකාශ කිරීමේදී වජිර අබේවර්ධන කියා සිටියේ “සියලු දෙනාගේ එකඟතාවය මත ලෝකයේ සිටින ජ්‍යේෂ්ඨම නායකයෙක් වසර 28 කට පසුව අපේ රටේ ජනාධිපති වෙලා තිබෙනවා. දැන් ඔබ සියලු දෙනාගේම යුතුකම තමයි පරණ වාද භේද අමතක කර දමා කොන්දේසි විරහිතව සියලුම දෙනා නැවත පක්ෂයට එකතු වෙන එක. ඒ සඳහා ජනාධිපති රනිල් වික්‍රමසිංහ මැතිතුමාද අපට උපදෙස් ලබාදී තිබෙනවා”. ඒ වගේම රනිල් වික්‍රමසිංහ මැතිතුමා ආරක්ෂා කරන්න ඕන. එහෙම වුණොත් තමයි මේ රට රැකෙන්නේ.“ රුවන් විජේවර්ධන, රංගේ බණ්ඩාර, ෂාමල් සෙනරත් ඇතුළු පිරිසද ඔවුනට කොන්දේසී විරහිතව පක්ෂයට එකතු වන ලෙස අරාධනා කර සිටියහ.
