ඔබ පරිවර්තනය සාහිත්‍ය කෘති කිහිපයක්ම ඉදිරිපත් කොට තිබෙනවා. ඒ ගැන විස්තර කළ හැකිද? 
මෑතදීම මම එළිදක්වපු පරිවර්තන කෘතිය තමයි ලෝක පූජිත සිනමාකරු ස්ටීවන් ස්පීල්බර්ග් 2002 වසරේදී රිදී තිරයට නැඟූ සම්මානලාභි ‘Catch me If You Can’ කියන චිත්‍රපටයට පාදක වුණු ස්වයං චරිතාපදානය. චිත්‍රපටය නරඹපු වැඩිදෙනෙක් ස්පීල්බර්ග් චිත්‍රපටයට පාදක කරගත් චිත්‍රපටයේ කතා නායකයා වන ෆ්‍රෑන්ක් ඇබග්නේල් රචනා කළ ඔහුගේ ජීවිත කතාව දන්නේ නැහැ. එය තිරගත වුණේ 2002 දී වුණත් හැට හැත්තෑව දශකවලදි ලෝකේම හොල්ලපු සුදු අපරාධකරුවකු එහෙමත් නැතිනම් චෙක්පත් වංචාකරුවකු හා ව්‍යාජ අනන්‍යතාවලින් පෙනී හිටපු සුප්‍රකට රැවටිලිකාරයකු වූ ඇබග්නේල්ගේ ‘Catch me If You Can’ චරිතාපදානය නිකුත් වෙන්නේ 1980 දී. වයස අවුරුදු විස්සක් වන්නටත් කලින්ම, අඩුම තරමින් උසස් පාසල් අධ්‍යාපනය අවසන් වෙන්නත් පෙරම ගුවන්යානා නියමුවෙක්, ළමාරෝග විශේෂඥ වෛද්‍යවරයෙක්, නීතිඥයෙක් හා මහාචාර්යවරයෙක් විදිහට ජනතා ප්‍රසාදය හිමිකරගනිමින් භූමිකා රැසක් ජීවිත කරළියේ රඟදක්වපු කෙනෙක් විදිහට ඇබග්නේල් මේ පොත රචනා කරන්නේ වයස අවුරුදු තිස්දෙකේදී විතර. ඒ කරපු වැරදිවලට අවුරුදු හතරක සිර දඬුවමක් සම්පූර්ණ කරලා හිරෙන් නිදහස් වුණට පස්සෙයි. ‘පුළුවන්නම් අල්ලන්න‘ කියලා සරසවි ප්‍රකාශනයක් විදිහට මේ වසරේ මුලදී නිකුත්වුණේ ෆ්‍රෑන්ක් ඇබල්නේල්ගේ ඔය කියන ස්වයං චරිතාපදානයයි.
ඊට කලින් 2019 අවුරුද්දේත් මම චරිතාපදාන එකතුවක් එළි දැක්වුවා ගොඩගේ ප්‍රකාශනයක් විදිහට. ඒ ‘පහන් තාරකා‘. එය චරිතාපදාන විසිහතරක එකතුවක්. මොහොමඩ් අලි, ෆිදෙල් කස්ත්‍රෝ, නෙල්සන් මැන්ඩෙලා වගේ ප්‍රකට චරිත අතරට මිෂෙලා ප්‍රින්ස්, නීල් හාබිසන්, හෙන්රික් මචාඩෝ, බ්‍රයන් බොරොව්ස්කි, වගේ අප්‍රකට චරිතත් එයට ඇතුළත් කළා. ලෝකයේ අතිශය ප්‍රසිද්ධියට පත්වුණු පුද්ගලයන්ට පිටුපසින් හිඳිමින් ඒ ජයග්‍රහණවලට සෘජුවම උරදුන් මේ වගේ චරිතවලට අදටත් නිසි පිළිගැනීමක්, ගෞරවයක් හිමිවෙලා නැහැ. ඒ අය හරියට රාත්‍රිය වගෙයි. නිහඬවම එයාලගේ කාර්යය අකුරටම ඉටුකරලා ඒකේ කීර්තිය වෙනත් අයට ලබාදීලා, හඬක් නොනඟාම මෙලොවින් සමුඅරගෙන ගිහිල්ලා තියෙන්නේ එයාලගේ මතකය විස්මිත පිරිසකට විතරක් ඉතුරු කරලා.
පරිවර්තන සාහිත්‍යයේදී ඔබ විශේෂ තෝරාගැනීමක් කරනවාද ?
මම මේ වෙනකොට කළ පරිවර්තනවලින් වැඩිකොටසක් චරිතාපදාන. සාහිත්‍ය විෂයට අනුබද්ධ වඩාත් ජනප්‍රියම ධාරාවක් තමයි චරිතාපදාන සාහිත්‍ය කියන්නේ. මම දකින විදිහට චරිතකතා කියන්නේ ජීවිතයේ පසුබෑම්වලදී හා කඩාවැටීම්වලදී ඕනෑම කෙනෙකුට මානසික ඒකාග්‍රතාව පවත්වාගන්න උදවුවෙන සාහිත්‍යාංගයක්. චරිතාපදානවලට මගේ විශේෂ ඇල්මක් ඇතිවෙන්න මගේ තාත්තාගේ මඟපෙන්වීමත් රුකුලක් වුණා. පොඩිකාලේ ඉඳලම චරිත කතා කියවන්න කියලා මාව උනන්දු කළේ මගේ තාත්තා. ප්‍රබන්ධ හා මවාපෙන්වීම් තුළින් පාඨකයා අතරට යනවාට වඩා සත්‍යය තුළින් පාඨකයන්ට සමීප වීම වැදගත් කියලයි මට හැඟෙන්නේ. අද වගේ බොරුවට යටවෙච්ච, බොරුවට මුල්තැන දෙන, බොරුවෙන්ම මුළාවුණු කාලයක ඒක අභියෝගයක් වුණත් සත්‍යය කෙදිනක හෝ ජයගන්නවා කියන විශ්වාසය මතයි මම මේ නිර්මාණ සිදුකරන්නේ.
ලේඛන කලාවට අදාළව විශේෂයෙන් අවධානයට ලක්කරන කරුණු මොනවාද ?
ප්‍රබන්ධාත්මක සාහිත්‍යයට වඩා මම නැඹුරුවෙන්නේ හැකිතාක් සත්‍ය කරුණු මත පදනම් වුණු නිර්මාණ එළිදක්වන්නයි. 2015 දී ‘පුදුමයි ඒත් ඇත්තයි‘ කියලා මම මුලින්ම පරිවර්තනය කළේ හැට හැත්තෑව දශකවලදී විශ්ව සාහිත්‍ය තුළ අතිශය ජනප්‍රියත්වයක් හිමිකරගත් ‘Ripley’s Believe It or Not’ කෘති මාලාවේ වෙළුම් දෙකක්. ලෝකේ ඇත්තටම සිදුවෙච්ච, විශ්වාසයට ගැනීමට අතිශය අසීරු සිදුවීම් රැසක් තමයි මේ පොතට පාදක වෙලා තියෙන්නේ. ‘Ripley’s Believe It or Not’ අදටත් ඇමරිකාව හා යුරෝපය පුරාම අතිශය ප්‍රචලිත කලාත්මක, විනෝදාස්වාදාත්මක, ඓතිහාසිකමය විශේෂාංගයක් විදිහට ජනප්‍රියත්වය පවත්වාගන්න සමත්වෙලා තියෙන්නේ ප්‍රබන්ධයට වඩා සැබවින්ම විස්මිතවූ සත්‍යය දැනගන්න මිනිසාට තියෙන සහජ උනන්දුව නිසයි. 
මිනිස් ඉතිහාසය තරම්ම දීර්ඝ ඉතිහාසයක් හිමි චරිතාපදාන සාහිත්‍ය ධාරාවට අංශු මාත්‍රයකින් හෝ දායකත්වයක් ලබාදීම තමයි මගේ ලේඛන දිවියේ තවත් එක් අරමුණක්. ඒ අදහසත් හිතේ ඇතිව තමයි විශේෂයෙන්ම මම මගේ තුන්වන කෘතිය ‘පුළුවන්නම් අල්ලන්න‘ පරිවර්තනය කරන්නේ. සිය වංචාකාරීවූද, වික්‍රමාන්විතවූද අත්දැකීම් ගැන පැවසීම පවා ඔහුට විනෝදාස්වාදයක් ගෙනදුන් බවට මෙම මුල් චරිතාපදානයේ රචනා ශෛලිය සාක්ෂි දරනවා. ඒ හැඟීම එයාකාරයෙන් සිංහල පාඨකයාට ගෙන ඒම සඳහා ගැළපෙන රචනා හා ආඛ්‍යාන ශෛලියක් තෝරාගැනීම ගැනත් මම විශේෂ අවධානයක් යොමු කළා.
ඉදිරියට එළිදැකීමට නියමිත කෘති ගැන විස්තරයක් කළ හැකිද ?
දැන් මම කරමින් සිටින පරිවර්තනයත් චරිතාපදානයක්. ෆෝර්බ්ස් තක්සේරුගතකිරීම් අනුව දැනට ලොව සිටින වඩාත්ම ධනවත් පුද්ගලයා වගේම අනාගතය වෙනස් කිරීමට සමත් චරිතයක් විදිහට සැලකෙන එලන් මස්ක් ගැන ඈෂ්ලි වාන්ස් කියන ඇමරිකානු ලේඛකයා කරපු චරිතාපදානයක් මතයි මේ පරිවර්තනයට පාදක වෙන්නේ.
එලන් මස්ක් ලෝකයා හඳුනාගෙන තිබෙන්නේ නිර්දය ලෙස ඉලක්ක හඹායන, අරමුණු ඉෂ්ට කරගැනීමට ඕනෑම සීමාවක් ඉක්මවා යාමට දෙවරක් හිතන්නේ නැති, විද්‍යාව පරයා ගිය ආන්දෝලනාත්මක ප්‍රකාශ නිතර සිදුකරන, ටිකක් නෙමෙයි හොඳටම මුරණ්ඩු අහංකාර චරිතයක් විදිහටයි. PayPal හා Zip2 වගේ ප්‍රාථමික මට්ටමේ සමාගම්වලින් පටන් අරගෙන ස්පේස්එක්ස්, ටෙස්ලා, බෝරිං, නියුරාලින්ක්, OpenAI වගේ ලෝකේම ආධිපත්‍යය පතුරාගෙන ඉන්න විප්ලවීය මට්ටමේ සමාගම්වල සම නිර්මාතෘවරයෙකු වෙන්න ඔහු ජීවිතයෙන් කරපු කැපවීම සාමාන්‍ය පුද්ගලයෙකුට හිතා ගන්නත් බැරි තරම්. එලන් මස්ක් ඒ වගේ ආන්දෝලනාත්මක, රැඩිකල් චරිතයක් නොවුණා නම් ඒ තරම් දැවැන්ත ජයග්‍රහණ රැසක් ලබාගන්න ඔහුට නොහැකි වෙන්නත් තිබුණා. ලෝකයා තමන් ගැන මොන කතා කිව්වත්, මොන අවලාද නැඟුවත්, ඒවා තඹේකට මායිම් නොකර තමාගේ විශ්වාසය මත පදනම් වුණු තමාගේ ගමන යන්න තරම් ගැම්මක් ඔහුට තිබුණා. එවැනි චරිතයක් ගැන ලියැවුණු චරිතාපදානයක් තෝරා ගත්තේ එලන් මස්ක් කියන දැවැන්ත පෞරුෂයේ සැබෑ ස්වභාවය ලාංකීය ජන සමාජයට සමීප කරවන්නයි.
