එම්මානුවෙල් මැක්‍රෝන් නැමති තරුණයා තම රට පාලනය කිරීම සම්බන්ධයෙන් තමන්ගේ කිසිදු අකමැත්තක් නොමැති බව ප්‍රංශ ජනතාව පසුගියදා යළිත් තහවුරු කර සිටියහ. ඒ පසුගියදා පැවති ප්‍රංශ ජනාධිපතිවරණයෙන් දෙවැනි ධූර කාලයක් මැක්‍රෝන්ට ලබා දෙමිනි.
මැක්‍රෝන් දෙවැනි ධූර කාලයක් සඳහා ජනාධිපතිවරණයට තරග වැදුණේ ප්‍රබල ප්‍රතිවාදී අපේක්ෂිකා මාර් ලෙ පෙන් ගෙන් අභියෝගයක් එල්ල වෙමින් පැවතියදීය. සාමාන්‍යයෙන් එක් ධූරකාලයක් අවසානයේ බොහෝ පාලකයන් ජනතාවගේ අප්‍රසාදයට පත්වන අතර විශේෂයෙන් කොවිඩ් වසංගතය හේතුවෙන් රටවල් රැසකම පාලකයෝ ජනතාවගේ ප්‍රතික්ෂේප වූහ. මෙවැනි තත්ත්වයක් යටතේ එම්මානුවෙල් මැක්‍රෝන් දෙවැනි ධූර කාලය සඳහා ද තරග වැදුණු අතර ඔහුගේ ජයග්‍රහණය පිළිබඳ සැක සහිත අනාවැකි ද ප්‍රකාශයට පත් විය. එහෙත් ජනාධිපතිවරණයේ ප්‍රතිඵල නිකුත් වීමෙන් පසුව පැහැදිලි වූයේ ප්‍රංශ ජනතාව මැක්‍රෝන් කෙරෙහි තවමත් විශ්වාසය තබා ඇති බවයි.
ප්‍රකාශීත ඡන්ද සංඛ්‍යාවෙන් සියයට 58.2ක පැහැදිලි බහුතරයක් ලබා ගැනීමට සමත් වූ මැක්‍රෝන් ප්‍රබල තරගකාරියක ලෙස හඳුනාගත් මාරියා ලෙ පෙන් පහසුවෙන් පරාජයට පත් කර තිබිණී.
එම්මානුවෙල් මැක්‍රෝන් යනු සැබවින්ම අනාගතවාදී නායකයකු ලෙස හැඳන්විය හැකිය.
ලෝකයේ බොහෝ රටවල ජනතාව තරුණ නායකයන්ට කැමැත්ත පළ කරමින් සිටින රැල්ලක ආරම්භක සාමාජිකයකු ලෙස එම්මානුවෙල් මැක්‍රෝන් හඳුන්වා දිය හැකිය. මැක්‍රෝන් දේශපාලන පොර පිටියට පිවිසෙන විට ඉතා තරුණ වියේ පසුවූ අතර ඔහු ප්‍රංශය වැනි බැරෑරුම් රටක් බාර ගන්නා විට ඔහුගේ වයස අවුරුදු හතළිහක් පමණක් විය.
කොවිඩ් වසංගතය මධ්‍යයේ වුවද මැක්‍රෝන් තම ජනප්‍රියත්වය ආරක්ෂා කර ගැනීමට සමත් වූ අතර යුරෝපා සංගමයෙන් බ්‍රිතාන්‍ය ඉවත් වීමෙන් සහ ඇන්ජෙලා මර්කල් ගේ විශ්‍රාම ගැනීමෙන් පසුව යුරෝපා සංගමයේ රටවල පරිණතම නායකයා ලෙසින්ද මැක්‍රෝන් නිරායාසයෙන්ම නාමකරණය වී තිබේ.
