කරාපිටිය ශික්ෂණ රෝහලේ නේවාසික ප්‍රතිකාර ලබන තම පියා බැලිම සඳහා පුතකු තම මව සමග රෝහලට පැමිණියේය. මව සිය දැත්වල රන්මුදු මුදු කිහිපයක් හා ගෙල රන් මාලයක් පැළද සිටියාය. ජැන්ඩියට ඇද පැළද සිටි තරුණයකු රෝහලේ වාට්ටුව තුළ ඒ මේ අත ගමන් කරමින් සිටියේය. මොහු ප්‍රියමනාප තරුණයකු වු අතර වාට්ටුවේ සිටි කොයිකවුරුත් මොහු වෛද්‍යවරයකු යැයි සිතුවේය. කාන්තාව පැළද සිටි රන්මාල හා මුදු දෙස එකවරම මොහුගේ නෙත ගැටුණි. මොහු මෙකී මව හා පුතු පැත්තකට කැඳවාගෙන යනු ලැබිය. ඔයගොල්ලෝ දන්නවාද තාත්තාට තියෙන රෝගය. තවම රෝගය හඳුනාගෙන නැහැ. ඉතා භයානක රෝගයක් තමයි තාත්තාට තියෙන්නේ ලේ ඥාතීන් නිසා රුධිර පරික්ෂයක් කරන්න වෙනවා; මොහු පුතුට කීවේය.
හරි එහෙනම් ඔයා එන්න එසේ කී මෙකී තරුණයා නේවාසික ප්‍රතිකර ලබන රෝගියාගේ පුතු සායනයක් වෙත කැඳවාගෙන ගොස් එතැන සිටින ලෙස කීවේය. තරුණයා ඒ අසල තිබු ශල්‍යාගාරයට දමා ඔහු දෙස බලා මොහු කඩිමුඩියේ මව සිටින තැනට ගියේය. අම්මේ මෙතනට එන්න, එසේ කී මොහු මව ඇදක හාන්සි කරවා ලේ පරික්ෂණයක් කිරීමට තිබෙන බව කීවේය. මව පැළද සිටි රන් භාණ්ඩ ගලවා බෑගයක දමන ලෙස කී තරුණයා හෙමින් සිරුවේ එ් රන්භාණ්ඩ රැගෙන මාරුවී ගොස් තිබුණි. තමන් වංචාකාරයකුට හසුවී ඇති බව මෙකී මවට හා පුතුට පසුව අවබෝධ විය. ඒ වනවිට සියල්ල සිදුවී හමාරය.
මෙකී මව හා පුතු ගාල්ල පොලිසියේ අපරාධ විමර්ශන අංශය වෙත ගොස් මේ ගැන පැමිණිලි කරනු ලැබීය. මෙය මිට මාස කිහිපයකට පමණ පෙර වූ සිද්ධියකි. පසුගිය දින 10වැනිදින ගාල්ල කරාපිටිය ශික්ෂණ රෝහලේ වකුගඩු සායනයට තම සැමියාට ප්‍රතිකාර ගැනීම සඳහා පැමිණි කාන්තාවක් මෙවැනිම ඉරණමකට ගොදුරු වුවාය. ඕ 70 හැවිරිදි වියේ පසුවූ අක්මීමන ප්‍රදේශයේ පදිංචි කාන්තාවකි. ඉකුත් 10 වැනි දින වකුගඩු රෝගියෙන් පෙලෙන තම සැමියාට ප්‍රතිකාර ගැනීම සඳහා ඇය ගාල්ල කරාපිටිය ශික්ෂණ රෝහලේ වකුගඩු සායනය වෙත පැමිණියේය. වකුගඩු රෝගියා වූ සැමියා 75 හැවිරිදි වියේ පසුවිය. සැමියා රුධිර කාන්දු පෙරණයට ලක්කළ යුතු නිසා උදේ රැයින්ම මොවුන් වකුගඩු රෝග සායනයට පැමිණ සිටියහ. මෙම යුවළ වකුගඩු සායනයේ දොරටුව අසල සිටියදි ජැන්ඩියට හැද පැළදගෙන සිටි තරුණයකු වකුගඩු සායනය වෙත පැමිණියේය. මෙකි අඹුසැමි යුවළ අසලට කිට්ටු වූ මෙම තරුණයා ලොකු දොස්තර මහත්තයා එනතෙක් ඔය දෙන්නාට පරික්ෂණයක් කරන්න තියෙනවා යැයි කියා කිවේය. මොහු වකුගඩු ඒකකයේ වෛද්‍යවරයකු යැයි වයස්ගත යුවළද සිතන්නට වුහ.
මෙකී වයස්ගත යුවළ රෝහලේ භෞතික චිකිත්සක කාමරය වෙත කැඳවාගෙන යනු ලැබීය. කාන්තාව ඇදක හාන්සි කරනු ලැබිය. අම්මාට පී. සී. ආර්. පරික්ෂණයක් කරන්න තියෙනවා. ඒ නිසා එම පරික්ෂණය කරන්න ඉස්සෙල්ලා අම්මා පැළද සිටින රන්භාණ්ඩ ටික ගලවන්න ඕන. තියෙන රන්භාණ්ඩවල තොරතුරු කොළයක ලියලා බැගයක දමලා මහත්තයාට දෙන්න තරුණයා කිවේය. ඒ අනව කාන්තාව පැළද සිටි මුදු තුනක් ගෙලබැඳි රන්මාලය හා සුරය ගලවා සැමියාට දුන්නේය. හරි මහත්තයාත් අතන තියෙන ඇදේ හාන්සි වෙන්න තරුණයා කිවේය. ඔහු ඇදේ හාන්සි විය. තව පොඩි වෙලාවකින් පරික්ෂණය කරනවා තරුණයා කිවේය. මෙකී යුවළට එසේ පැවසු ජැන්ඩියට හැදපැළද සිටි තරුණයා හෙමින් සිරුවේ මෙකී යුවළට නොපෙනෙන ලෙස ස්වර්ණාභරණ දමා තිබූ බෑගය රැගෙන වකුගඩු සායනයෙන් මාරුවී ගියේය. රන්භාණ්ඩවල වටිනාකම තුන්ලක්ෂ විසිපන්දහසක් විය.
ඉකුත් වසරේ අගෝස්තු මාසයේ සිට මේ දක්වා කාලය තුළදී මේ අයුරින් රන්භාණ්ඩ වංචා කිරීමේ සිද්ධි සම්බන්ධයෙන් පැමිණිලි 08ක් ගාල්ල පොලිසිය වෙත වාර්තා වී තිබුණි. මින් පැමිණිලි 07ක් ගාල්ල කරාපිටිය ශික්ෂණ රෝහල තුළදී වූ රන් භාණ්ඩ වංචා කිරීමේ සිද්ධීන් වන අතර එක් පැමිණිල්ලක් ලැබී තිබුණේ ගාල්ල මහමෝදර රෝහල තුළදී වූ රන් භාණ්ඩ වංචා කිරීමේ සිද්ධියක් සම්බන්දයෙනි. වෛද්‍යවරකු ලෙස පෙනී සිටිමින් මොහු රෝහලට පැමිණෙන රෝගින්ගේ රන්භාණ්ඩ වංචාකොට තිබුණි.
ආරක්ෂක නිලධාරියකුගේ පරික්ෂාවට
මේ ආකාරයට රෝගීන්ගේ රන් භාණ්ඩ වංචා කිරීම පිළිබඳ පැමිණිලි ලැබීම පොලිසියට ද මහත් ප්‍රශ්නයක් විය. එක් අවස්ථාවකදි මෙකී තරුණයා කරාපිටිය ශික්ෂණ රෝහලේ ගෙට්ටුවේ සිටි ආරක්ෂක නිලධාරියකුගේ පරික්ෂාවට ලක්විය. මම වෛද්‍ය සිසුවෙක් තරුණයා කීවේය. එහෙනම් කෝ බලන්න ඔයාගේ හැඳුනුම්පත ආරක්ෂක නිලධාරියා විමසන්නට විය. මහත්තයෝ රෝහලට එනවිට කවුද හැඳුනුම්පත් අරගෙන එන්නේ එ්ක කාමරයේ තියෙනවා. ඔයාට පෙන්වන්න අවශ්‍ය නම් එන්න කාමරයට යන්න මොහු කීවේය. හරි එහෙනම් යමු ආරක්ෂක නිලධාරියා කීවේය. ඔහු මොහුගේ පිටුපසින් ගියේය. නමුත් මෙකී පුද්ගලයා ඉක්මන් ගමනින් ගොස් ආරක්ෂක නිලධාරියා මග හැරයන්නට ගියේය.
රෝහලේ ආරක්ෂක අංශ මගින්ද සායන සඳහා පැමිණෙන රෝගින්ගේ රන්භාණ්ඩ ආරක්ෂා කරගන්න ලෙස නිරන්තරයෙන් රෝගීන් දැනුවත් කිරිමට කටයුතු කර තිබුණි. එක් දිනක් ආරක්ෂක අංශයේ නිලධාරියකු විසින් මේ ගැන රෝගීන් දැනුවත් කරමින් සිටියදි තරුණයකු ඔහු අසලට පැමිණියේය. මහත්තයාගේ බැජ් එකේ අයෙක් ඉන්නවා නේද කොළඹ ඔහු නමක් සඳහන් කොට කීවේය. මට හරියට මතක නැහැ, ආරක්ෂක නිලධාරියා කීවේය. එදින මොහු ඒ අයුරින් ආරක්ෂක නිලධාරියා වෙත කථා කර ඇත්තේ තමන් ගැන ආරක්ෂක අංශවලට ඉව වැටී ඇති බවට සැකහැර දැනගැනීම සඳහාය.
මොහු තැනට උචිත ලෙස විවිධ උපක්‍රම අනුගමනය කරමින් ඉතා සුක්ෂම ලෙස රෝහලට පැමිණෙන රෝගී කතුන්ගේ රන්භාණ්ඩ වංචා කිරීම සිදුකරගෙන ගියේය. මේ අතර ගාල්ල ජ්‍යෙෂ්ඨ පොලිස් අධිකාරි විකුම් ගිණිගේ, ගාල්ල මුලස්ථාන පොලිස් පරික්ෂක කපිල සේනාපතිද සිල්වා යන නිලධාරීන් විසින් මේ පිළිබඳ විමර්ශනය කොට සැකකරු අත්අඩංගුවට ගැනීම සඳහා ගාල්ල පොලිසියේ අපරාධ අංශයේ ස්ථානාධිපති පොලිස් පරික්ෂක ඩි.ජි ආනන්ද මහතා වෙත උපදෙස් ලබා දුන්නේය. පොලිස් පරික්ෂක ආනන්ද අපරාධකරුවන් පසුපස හඹගොස් ඔවුන් කොටු කරගැනීමට සමත් දක්ෂ නිලධාරියෙකි.
ඔහු මේ පිළිබද විමර්ශන කටයුතු ආරම්භ කරනු ලැබීය. මෙකී සැකකාර තරුණයාට ඇඹිලිපිටිය රෝහලට පැමිණි කාන්තාවකගේ රන්භාණ්ඩ වංචා කිරීමේ සිද්ධියක් සම්බන්ධව ඇඹිලිපිටිය අධිකරණයේ නඩුවක් පැවතියේය. පොලිස් පරික්ෂක ආනන්ද ඇතුළු පොලිස් නිලධාරීහු සැකකරු කොටු කරගැනීම සඳහා එදින අධිකරණය වෙත ගියහ. නමුත් මොහු එදින අධිකරණය වෙත නොපැමිණියේය. ඔහුට අධිකරණය මගින් සිතාසි නිකුත් කිරිමට කටයුතු කර තිබුණි. පසුව පොලිස් පරික්ෂක ආනන්ද ඇතුළු පොලිස් නිලධාරින් මොහුගේ නඩුගොනු පිරික්සමින් සැකකරුගේ තොරතුරු ලබා ගත්තේය. මොහු හෝමාගම පිටිපන ප්‍රදේශයේ කුලී නිවසක පදිංචිව සිටින බවට පොලිසිය විසින් තොරතුරු අනාවරණය කරගනු ලැබිය. ඒ විතරක් නොව මොහු පිළිබඳ දුරකථන විශ්ලේෂණ වාර්තා පොලිසිය මගින් ලබාගෙන තිබුණේය. පොලිස් පරික්ෂක ආනන්ද පොලිස් නිලධාරින් කණ්ඩායමක් සමඟ පසුගිය දිනෙක සැකකරු අත්අඩංගුවට ගැනීම සඳහා හෝමාගම පිටිපන ප්‍රදේශයට ගියහ. එහෙත් ඔහු නිවසේ නොසිටියහ. මොහු නිවසට එන තෙක් පොලිස් නිලධාරින් මගරැක සිටියහ. අලුයම 5.00ට පමණ සැකකාර තරුණයා නිවසට පැමිණි අතර ඒ සමඟ ඔහු පොලිස් අත්අඩංගුවට පත්විය.
සැකකාර තරුණයා පොලිස් අත්අඩංගුවට පත්වීමෙන් පසු වසර තුන හතරක පමණ කාලයක සිට තමන් සිදු කළ රන්භාණ්ඩ වංචාකිරිමේ ජාවාරම් පිළිබඳ මොහු එකින් එක වැමෑරියේය. සැකකාර තරුණයා වෛද්‍යවරයකු ලෙස පෙනී සිටිමින් දිවයිනේ විවිධ ප්‍රදේශවල රෝහල් සදහා ප්‍රතිකාර ගැනීමට පැමිණී කතුන් රවටාගෙන රන්භාණ්ඩ වංචා කළ බව පරික්ෂණවලදි අනාවරණය විය. සැකකාර තරුණයා 30 හැවිරිදි වියේ පසුවන විවාහකයෙකි. ඔහු අනුරාධපුර ප්‍රදේශයේ පදිංචිකරුවෙකි. මොහු පවුලේ එකම පිරිමි දරුවාය. මොහු වාණිජ්‍ය අංශයෙන් අ.පො ස උසස්පෙළ හදාරා තිබේ. මොහුට සහෝදරියන් තිදෙනෙකි. එක් සහෝදරියක් ඔස්ට්‍රේලියාවේ පදිංචිව සිටින අතර අනික් සහෝදරියන් දෙදෙනා රැකියාවල නිරතව සිටිති. මොහු කුඩා කාලයේ සිටම නාහෙටනාහන දඩබ්බරයෙකි. තම එකම පුතුගේ දඩබ්බර වැඩ නිසා පියා තම බිරිද පුතු හා ඔහුගේ බිරිද සමඟ අනුරාධපුරයේ තිබු ඉඩකඩම් විකුණා 2013 වර්ෂයේදී හෝමාගම ප්‍රදේශයට පැමිණි කුලී නිවසක පදිංචිව සිටියහ. පියා කරවල අලෙවි කිරිමේ ව්‍යාපාරයක් කරගෙන ගියේය. හෝමාගමට පැමිණියද පුතුගේ දඩබ්බර වැඩවල අඩුවක් නොවීය.
පි. සි.ආර්. පරික්ෂණ මුවාවෙන් රෝගීන් රවටලා
සැකකාර තරුණයා විවාහ වි සිටියේ පවුලේ ඥාති කාන්තාවක් සමඟය. මොහුන් දෙපළට දරුවන් නොමැති අතර වංචා කරනු ලැබු රන්භාණ්ඩ උකස්කොට ලබාගන්නා මුදල් වියදම් කොට මොහු සල්ලාල ජිවිතයක් ගත කළේය. හේ නිරතුරුව රාත්‍රී සමාජ ශාලා වෙත ගියේය. කැසිනෝ සුදුවට ද යොමු විය. ඒ විතරක් නොව හේ ගණිකාවන් ඇසුරු කළේය. වංචා කරනු ලැබූ රන්භාණ්ඩ උකස්කොට දිනකට රුපියල් ලක්ෂ 05ක මුදලක් ලබා ගත්තද එක රැයකින් සියල්ල වියදම් කළේය. හේ අතදිගහැර මුදල් වියදම් කළේය. මොහු වසර තුන හතරක කාලයක සිට ඉතා සුක්ෂ්ම අයුරින් මෙකි ජාවාරම කරගෙන ගියේය. ඔහු මේ සඳහා විවිධ උපක්‍රම භාවිත කරනු ලැබීය. රෝගීන් සායන සඳහා අලුයම සිට පැමිණෙන අතර මොහුද මෙකී ජාවාරම කරගෙන යෑම සඳහා උදේ රැයින්ම රෝහල් වෙත පැමිණියේය. එක් අවස්ථාවකදි වෛද්‍යවරයකු ලෙස පෙනී සිටින මොහු තවත් අවස්ථාවකදි වෛද්‍ය සිසුවකු ලෙස පෙනී සිටින්නේය. රෝහලේ උපස්ථායකවරයකු හෙදියක ඇතැම් අවස්ථාවලදි මොහු ගැන තොරතුරු විමසීමේ දි මොහු පෙනී සිට ඇත්තේ වෛද්‍ය සිසුවෙක් නැතහොත් වෛද්‍යවරයකුගේ ඥාතියකු බව පවසමිනි.
සැකකාර පුද්ගලයා ජැන්ඩියට හැදපැළද රෝහල්වෙත ගොස් හෙදියන් සාත්තු සේවකයන් නොමඟ යවා වයස්ගත රෝගීන් ඉතා සුක්ෂම අයුරින් රවටා පරීක්ෂණයක් සිදු කිරීමට බව පවසා රැගෙන ගොස් රන් භාණ්ඩ වංචාකොට ඇති බව විමර්ශනවලදී අනාවරණය වී ඇත. පසුගිය කාලයේ මෙකී සැකකරු විසින් පි. සි.ආර්. පරික්ෂණ පවත්වන මුවාවෙන් රෝගීන් රැගෙන ගොස් රන්භාන්ඩ වංචාකොට ඇති බව විමර්ශනවලදි අනාවරණය වී තිබේ. සැකකාර පුද්ගලයා වෛද්‍යවරයකු ලෙස පෙනී සිටිමින් ඇඹිලිපිටිය, නුවරඑළිය, රත්නපුර ඇහැලියගොඩ පුත්තලම කැගල්ල , රාගම, හැටන් හම්බන්තොට කුරුණැගල ආදි ප්‍රදේශවල රෝහල්වලට ගොස් මේ අයුරින් රෝගීන් රවටා රන්භාණ්ඩ සොරකම්කොට ඇති බව විමර්ශනවලදි අනාවරණය වී ඇත.
සැකකාර පුද්ගලයා විසින් 2019 වර්ෂයේ සිට ගාල්ල කරාපිටිය, මහමෝදර රෝහල්වලදි රන්භාණ්ඩ වංචා කිරීම් සිද්ධි 08කට සම්බන්දව වංචාකරණු ලැබු රන්භාණ්ඩ හා පුත්තලම ප්‍රදේශයේ රෝහලක දි වංචාකරනු ලැබු රන්භාණ්ඩ ගුලි පවුම් 15ක් ගෙලබැඳි රන්මාලයක් හා අත්පළදනාවක් නුවර රජින විදියේ ස්වරණාභරණ හලකට අලෙවිකොට තිබියදී පොලිසිය මගින් සොයාගනු ලැබිය. දැනට සොයාගත් රන් භාණ්ඩවල වටිනාකම රුපියල් ලක්ෂ 20ක අධික බව පොලිසිය පවසයි. මෙකී රන්භාණ්ඩ උණුකොට තිබු අතර එකි ස්වර්ණාභරණ වෙළදසැල් හිමියාද පොලිස් අත්අඩංගුවට ගනු ලැබීය.
ගාල්ල ජ්‍යෙෂ්ඨ පොලිස් අධිකාරි විකුම් ගිණිගේ, ගාල්ල මුලස්ථාන පොලිස් පරික්ෂක කපිල සේනාපතිද සිල්වා යන නිලධාරීන්ගේ අධික්ෂණය යටතේ ගාල්ල පොලිසියේ අපරාධ අංශයේ ස්ථානාධිපති පොලිස් පරික්ෂක ඩි.ජි ආනන්ද.උ පො ප උමයංගන උ පොප සංජිව පො සැ 58970 බණ්ඩාරිගො පො සැ31951 රෝහණ පො කො 778258 ගිතප්‍රිය යන නිලධාරින් විසින් සැකකරුවන් අත්අඩංගුවට ගනු ලැබීය.
