මෙවර මහ මැතිවරණයේ පරාජය පිළිබඳව ඔබ මොනවද හිතන්නෙ?
ඇත්තට මේ පරාජයට හේතුව යහපාලන රජයට එරෙහිව පැති කීපයකින් ම එල්ල වී තිබූ චෝදනා කියලයි මම හිතන්නෙ. විශේෂයෙන් ජනාධිපති, අගමැති ලෙස එවක මෛත්‍රීපාල හා රනිල් අතර ඇතිව තිබූ කඹ ඇඳිල්ලෙන් රට අරාජික තත්ත්වයට ඇද වැටුණා කියල ජනතාව තුළ යම් මතයක් ගොඩනැඟුණා. ඒ වගේ ම ඇතැම් මාධ්‍ය ආයතන ආගමික හා ජාතික වශයෙන් වෛරී සංකල්ප ජනගත කරමින් ඒ පිළිබඳ චෝදනා යහපාලන රජයට එල්ල කරමින් සංවිධානාත්මක වැඩපි‍ළිවෙළක් දියත් කර තිබුණා. විශේෂයෙන් සහරාන්ගේ ප්‍රහාරය පාදක කරගෙන යුද සමයේදීවත් රටේ ඇති නොවූ ආගමික වෛරයක් රට තුළ නිර්මාණය කළා. මෙවැනි තත්ත්වයන් තුළ යහපාලන රජය රාජ්‍ය සේවකයාට මෙන් ම රටේ සමස්ත ජනතාව වෙනුවෙන් දියත් කර තිබූ සියලු යහපත් ක්‍රියාදාම අමතක කර ජනතාව යහපාලන රජය නියෝජනය කළ සියලු දෙනාට එරෙහිව පෙළ ගැසුණා.
අපේ පැරැණි කියමනක් තිබෙනවා වැපුරූ තරමට තමයි අස්වැන්න කියලා. මේ ප්‍රතිඵලයත් ඔබලා වැපුරූ දෙයට ලැබුණ ප්‍රතිඵලයක් කියල පිළිගන්නෙ නැද්ද?
මේ මැතිවරණයේදී අපේ පරාජය ඒ විදියට විග්‍රහ කරන්න බෑ. මොකද අපි තමයි රාජ්‍ය සේවක වැටුප් ඉහළ දැම්මෙ. සමෘද්ධි සහනාධාර ඉහළ දැම්මෙ. රට බංකොළොත් නොවී ආර්ථිකය 2015 තිබුණට වඩා දෙගුණයක් දක්වා දියුණු කළේ. අධ්‍යාපන, සෞඛ්‍යය යන ක්ෂේත්‍රවල වැදගත් වෙනස්කම් ඇති කළේ යහපාලනයේ සිටිය අපියි. එහෙම නම් වැපිරූ දේ අනුව ප්‍රතිඵල ලැබෙනවා නම් අපිට ජය ගන්න තිබුණා. නමුත් මෙවර මැතිවරණයේදී සිද්ධ වුණේ මාධ්‍ය ආයතන කීපයක් සංවිධානාත්මකව යහපාලනය නියෝජනය කළ සියලු දෙනාට එළව එළවා පහර දීමත් නිර්දය ලෙස විවේචනය කිරීමත් නිසා ජනතාව යහපාලනයට හවුල් වූ සියලු දෙනාට වෛර කරන්නට පෙලඹවීමයි. කුරුණෑගල රාජ සභා මණ්ඩපය ඩෝසර් කිරීම වැනි දෙයක් යහපාලන රජයෙන් සිදුවූවා නම් රජය පෙරළා දමන තත්ත්වයට රට තුළ උණුසුම්කාරී තත්ත්වයක් නිර්මාණය කරනවා. නමුත් ඉකුත් මාස නවය තුළ මේ රජය කළ කී දේ සම්බන්ධයෙන් ජන මනස අවදි කරන්නට කිසිවකු ඉදිරිපත් වුණේ නෑ. මේ නිසා ඉදිරියේදී මේ දේවල ප්‍රතික්‍රියාවන්ට මේ රජයට මුහුණ දෙන්න සිද්ධ වෙනවා.
ඇයි ඔබ පිළිගන්නෙ නැත්තේ එදා ඔබ නියෝජනය කළ යහපාලන ආණ්ඩුවේ ඇතැම් ඇමැතිවරු මහ සංඝරත්නයට බෞද්ධාගමට කළ අපහාස අවලාද ඔබලාට මේ ප්‍රතිඵලය ලබාගන්න හේතු වුණා කියලා?
ඔබ ඔය කියන විදියට සමහර ඇමැතිවරු නොවෙයිනෙ ආණ්ඩුව කියන්නෙ. රණවිරුවන් විදුලි පුටුවට ගෙන යනවා කීවා. එහෙම දෙයක් වුණාද? මේ විදියට මේ රටේ ඇතැම් මාධ්‍ය විවිධ කතා ගොතලා ජනතාව තුළ කම්පනයක් නිර්මාණය කළා. මේක එක්තරා විදියක සංවිධානාත්මක මාධ්‍ය කූට නාටකයක්. ඒ කූට නාටකයටම මේ ආණ්ඩුවටත් මුහුණ දෙන්න සිද්ධ වෙනවා. මේ ආණ්ඩුවට බලය අරන් දෙන්න කැපවූ ජාතිකවාදී බලවේග දැන් කියනවා පළාත් සභා අහෝසි කරන්න ඕනේ කියලා. මම කියන්නේ රජයට ඒක කරන්න බෑ. තනි සිංහල ආණ්ඩුවක් හදන්න මේ අයට පුළුවන්ද? බෑනේ. මේ නිසා ආණ්ඩුව තුළම මතවාද ගැටීමෙන් මේ රජයටත් අපිට මුහුණ දෙන්න සිද්ධ වූ කූට නාටකයට මුහුණ දෙන්න සිද්ධ වෙනවා. පරිසරය සම්බන්ධයෙන් මහ ආන්දෝලනයක් ඇති කළ මේ ආණ්ඩුව දැන් සංවර්ධන උපාය මාර්ග ලෙස විශාල වශයෙන් පරිසර පද්ධති විනාශ කරනවා. ආණ්ඩුව පළමු මාස කීපයට ඩොලර් මිලියන දහසක ණය අරන්. මොනවද කරල තියෙන්නෙ. කිසිම දෙයක් කරලා නෑ. දැන් රටේ ආර්ථිකය ඍණ අගයක පවතින්නෙ. මේ විදියට අපිට චෝදනා එල්ල කළ රජයට මේ චෝදනාවලටම මුහුණ දීලා ජනතාව ගෙන් ඉතා කෙටි කාලයක් තුළ ප්‍රතික්ෂේප වෙන්න සිද්ධ වේවි.
ජනතාව මේ රජයට තුනෙන් දෙකේ බලයක් ලබාදී ආණ්ඩු ක්‍රම ව්‍යවස්ථාව සංශෝධනය කර අලුත් ව්‍යවස්ථාවක් සම්පාදනයට අනුමැතිය ලබා දීම ඔබ දකින්නෙ කොහොමද?
මේ අය ජනතාවට කිව්වට ව්‍යවස්ථා සංශෝධනයක් වෙනවා කියල කවදාවත් අලුත් ව්‍යවස්ථාවක් හදන්නෙ නෑ. රාජපක්ෂවරුන්ගේ වුවමනා ඉටු කර ගන්න 19 සංශෝධනය වෙනස් කරල 20 වැනි සංශෝධනයක් ගෙනල්ලා සම්මත කර ගනියි. හැබැයි අලුත් ව්‍යවස්ථාවක් හදන්නෙ නෑ.
ඔබ එවැනි නිගමනයකට එළඹෙන්නෙ කුමන සාධක පදනම් කරගෙනද?
ඔබ දන්නවා 2012 දිත් මේ අයට තුනෙන් දෙකේ බලයක් පාර්ලිමේන්තුවේ ලබාගන්න පුළුවන්කම තිබුණා. ඒ කාලෙත් ව්‍යවස්ථාව වෙනස් කරනවා කියල කීවා. නමුත් කළාද? එදත් ඔය කට්ටිය කීවේ පළාත් සභා අහෝසි කරනවා කියලා. විධායක ජනාධිපති ධුරයත් අහෝසි කරනවා කීවා. නමුත් මොනවද කළේ. 18 වැනි සංශෝධනය ගෙනල්ලා තවත් අවුරුදු පහකට බලය ඉල්ලන්න අවස්ථාව හදා ගන්න එක විතරයි. මෙවරත් ඒ ටිකම කියනවා. ඔය කියන විදියට පුළුවන් නම් පළාත් සභා අහෝසි කරන්න කියන්න. මම කියන්නේ මේ අයට ඒක කරන්න බෑ කියලයි. ජාතිකවාදී බලවේග මේ වාගේ සුරංගනා කතා කියමින් තමනුත් රැවටෙන ගමන් ජනතාවත් රවටනවා.
ඔබ කියන්නේ ව්‍යවස්ථාවේ 13 වැනි සංශෝධනය තවදුරටත් ක්‍රියාත්මක විය යුතුයි කියලද?
මම කියන්නෙ නෑ 13 වැනි ව්‍යවස්ථා සංශෝධනය තවදුරටත් ක්‍රියාත්මක වෙන්න ඕනේ කියලා. දැන් යෝජනා වෙලා තියෙන්නෙත් ඒක අහෝසි කරන්න ඕනෑ කියලනෙ. මමත් කියන්නේ එය අහෝසි කරන්න කියලයි. නමුත් මේ ආණ්ඩුව ඒක අහෝසි කරන්නෙ නෑ. ආණ්ඩුවට ඒක කරන්නත් බෑ.
මහජන ඡන්දයකින් එකම නියෝජිතයෙකුවත් පත් කර ගන්න බැරි වූ එජාපයේ නායකත්වයට ඔබටත් යෝජනා ලැබුණා කියල ආරංචියි?
අනේ නෑ. ඒක පට්ටපල් බොරුවක්. එජාපය තවදුරටත් නායකයන් මාරු කරල ගොඩදාන්න පුළුවන් පක්ෂයක් නොවෙයි. නායකයෝ අලුතින් පත් වුණා කියලා පක්ෂය පුනර්ජීවනය වෙන්නෙ නෑනේ. දැන් එජාපය දේශපාලන වශයෙන් අවසන් ගමන් යන්න සූදානමින් ඉන්නෙ. ඒක වළක්වා ගන්න ඔය මොන දේ කළත් වැඩක් නෑ.
සමඟි ජන බලවේගය ආක්‍රමණය කරල එය ඔබලා යටත් කර ගන්න හදනවා කියල ඔබේම පක්ෂයේ අය කියනවා. ඒක බොරුවක්ද?
එජාපය නාමිකව වෙනම තරග කළත් එජාප පාක්ෂිකයින් 95% ක් ඡන්දය දුන්නෙ සමඟි ජන බලවේගයටයි. ඒ නිසා ජනතාවගේ පැත්තෙන් තවදුරටත් එජාපයක් අපේක්ෂා කරන්නෙ නෑ. ඒක රනිල් වික්‍රමසිංහ මහතා සමඟ අහෝසි වෙලා තිබෙන්නෙ. මින් ඉදිරියට එජාපය මැතිවරණ දේශපාලනයේ නෑ. එජාපය දේශපාලන වශයෙන් පරාජය වුණා නොවෙයි. ඒක නායයාමක්. ඒ නිසා නැවත එජාපය ගොඩ එයි කියල හිතන්න බෑ. කොයි මො‍ෙහාතක හෝ එජාපය සමඟි ජන බලවේගයේ සාමාජික පක්ෂයක් විදිහට කටයුතු කරන ඉල්ලීමක් ඉදිරිපත් වුණොත් ඒ ගැන ඒ වෙලාවේ හැටියට කතා කරලා සලකා බලන්න පුළුවන්. එජාපයට මේ ඉරණමට මුහුණ දෙන්න සිද්ධ වුණේ රනිල් වික්‍රමසිංහ මහතා නිසයි. ඔහු ඊට වගකිවයුතුයි. එවැනි නායකයින් සමඟි ජන බලවේගයට සම්බන්ධ කර ගන්න අපි සූදානම් නෑ. නමුත් පාක්ෂිකයින් සියලු දෙනාම අපි එකතු කර ගන්න කටයුතු කරනවා.
හෙළ උරුමය තමයි මේ රටේ ජාතිකවාදී දේශපාලනයට ආරම්භයක් දුන්නේ. එහෙම කළ ඔබලා මේ මැතිවරණවලදී ජාතිකවාදීව කටයුතු කරල ජයග්‍රහණය කළා යැයි ආණ්ඩුවට දොස් කියන්නෙ ඇයි?
අපි ජාතිකවාදී දේශපාලනය වැරදියි කියන්නෙ නෑ. අපි කියන්නෙ ඒ සඳහා තෝරාගෙන තිබෙන පුද්ගලයෝ ජාතිකවාදී නෑ. ඔවුන් සිංහලකමට හෝ බෞද්ධකමට අවංක නෑ. තව කෙටි කාලයකදී ජනතාව මේ සත්‍යය තේරුම් ගනීවි.
ජාතිකවාදී දේශපාලනයෙන් ඔබලට ජය ගන්න බැරි වුණේ ඇයි?
කවුද කියන්නෙ අපි ජයගත්තේ නෑ කියලා. ප්‍රභාකරන් පරාජය කරන්න මුල් වුණේ කාගේ දේශපාලනය ද? අපි ජාතිකවාදී දේශපාලනය මෙරට තුළ ක්‍රියාත්මක කරන්න පටන් ගත්තේ ඇත්ත අනතුරක තියෙන වේලාවකයි. කාලතුවක්කුවෙන් රට කඩල වෙන් කරන බලවත් අනතුරක් තිබෙන වේලාවක ජාතිකවාදී දේශපාලනය නිසා අපිට පුළුවන් වුණා ජනතාව තුළ මේ සිංහල අපේ රට කියන මතය ගොඩ නඟන්න. රණවිරුවන්ට ශක්තියක් වුණේ ඒක. ඒ ජාතිකවාදී දේශපාලනයේ ප්‍රතිඵලය තමයි අද වෙන කොට මෙරට සිංහල බෞද්ධ රටක් කියන මතවාදය ලෝක පූජිතව තිබෙන්නෙ. එදා අපේ ජාතිකවාදයයි. දැන් ජාතිකවාදය කරපින්නා ගත් අයගේ ක්‍රියාකාරකමුයි සංසන්දනය කරන්න බෑ. නමුත් පොහොට්ටුව ජාතිකවාදී රැල්ලක් නිර්මාණය කළා. නමුත් ඒක ප්‍රා‍යෝගිකව ක්‍රියාත්මක කරන්න බෑ. පුළුවන් නම් 13 වැනි සංශෝධනය අහෝසි කරන්න කියලයි මම කියන්නෙ. එහෙම කරනවා නම් අපිත් ඒකට සහය දෙනවා.
ජාතිකවාදී දේශපාලනයේ යථාර්ථය විදියට ඔබ පෙන්වා දෙන්නේ මොනවාද?
ජාතිකවාදී දේශපාලනය අපේ රටේ විටින් විට මතුවන ඇතැම් කරුණු පරාජය කරන්න හේතු වෙනවා. ප්‍රභාකරන් පරාජය කරන මානසිකත්වය වර්ධනය වුණේ ජාතිකවාදී දේශපාලනය නිසයි. අපේ රට පෙඩරල් රටක් බවට පත් කරන්න තිබූ ඇත්ත අනතුර එමඟින් විනාශ වුණා. ජාතිකවාදී දේශපාලනය තුළ වුවත් අපේ රටේ වෙනත් ජාතීන් හෝ ආගමිකයන් කොන් කිරීම සාධාරණ නෑ. ජවිපෙ කොන් කළාම ඔවුන් කැලෑ වැදිලා සටන් කළා. ඒ වාගේ මුස්ලිම් දෙමළ මේ කොයි ජාතිය කොන් කළත් අවසානයේ අරගල ඇති වෙන්න පුළුවන්.
ජනතා කේන්ද්‍රීය ආර්ථික රටාවක් සඳහා ආණ්ඩුව අලුතින් පත් කරපු ඇමැති මණ්ඩලය ශක්තිමත් කියල ඔබ හිතනවාද?
මේ ආණ්ඩුවේ ඇමැති මණ්ඩලය පත් කර තිබෙන ආකාරය පිළිබඳව අපිට හිනා යනවා. අලි වැට හා අගල් ඇමැති, මැටි ඇමැති වැනි මේ විදියේ ඇමැති මණ්ඩලයක් පත් කරලා ආණ්ඩුව ඇත්ත ප්‍රශ්නය යට කරලා ජනතාව රවට්ටන්න හදනවා. ඉස්සරත් අනෙකුත් අමාත්‍යාංශ හරහා ඔය දේවල් කෙරුණා. මීට පෙර තඹ කර්මාන්තය, වේවැල් කර්මාන්තය, මැටි කර්මාන්තය කෙරුණේ නැද්ද? එදා රජයේ ඇමැතිවරයෙක් විදියට මම ‘ගජ මිතු‍රෝ’ කියල සංවිධානයක් බිහි කළා. එමඟින් තමයි ඔය අලි වැටවල් අගල් කැපිලි සකස් කළේ. ඒ කටයුතු වනජීවී අමාත්‍යාංශය යටතේ කෙරුණා. ඒකට වෙනම ඇමැතිකමක් අවශ්‍ය වුණේ නෑ. එදා අමාත්‍යාංශ යටතේ තිබුණ ආයතන නමින් අද අමාත්‍යාංශ පිහිටුවලා. බලගතු අමාත්‍යාංශ සුළු පිරිසක් අතට අරගෙන අනෙක් අය සන්තෝෂ කරන්න මේ පුංචි පුංචි විෂයයන්ට ඇමැති කම් දීලා. මේ කිසිම කෙනෙක් තමන්ට ලැබුණු අමාත්‍යාංශයේ නමවත් තමන් ගේ ඡන්ද දායකයාට කියන්න ලජ්ජා වෙන තත්ත්වයකයි ඉන්නෙ. මේකෙන් ජනතා කේන්ද්‍රීය ආර්ථිකයක් ගොඩනඟනවාට වඩා ජනතා නියෝජිතයින් අවධානයකට පත් කර තිබෙන බව සඳහන් කරන්න ඕනේ.
පක්ෂ දේශපාලනයෙන් ඔබ්බට ගොස් ජාතික දේශපාලනය ගැන කතා කරද්දී කවදාද මේ දේශපාලන කඹ ඇදීම නැතිව රට ගැන හිතන දේශපාලනඥයින් බිහි කරන්නෙ?
යහපාලන රජය ඔබ කියන ජාතික දේශපාලනය මෙරටේ ස්ථාපිත කරන්න විශාල උත්සාහයක් ගත්තා. ශ්‍රීලනිප හා එජාප එකතුව ඒක කරන්න මග හදා ගත්තා. නමුත් ජනපති අගමැති අතර ඇතිවූ මතබේද දිග් ගැසීමෙන් මේ රටේ ජාතික දේශපාලනය වෙනුවට පක්ෂ දේශපාලනය සඳහා තවත් අලුත් පක්ෂයක් බිහි වුණා. ඒ තමයි ශ්‍රී ලංකා පොදුජන පෙරමුණ. අපි මේ රජය කරන හොඳ දේට සහය දෙනවා. අතුරු සම්මත ගිණුම අනුමත කරන්නත් අපි සහය දුන්නා. අපි කියන්නේ ජනතාවාදී රටට හිතැති ඕනෑම දේකට අපි රජයට සහය දෙන්න සූදානම් කියලයි.
