මැතිවරණයෙන් අන්ත පරාජයක් ලැබූ එජාපය මේ වන විට අර්බුද රැසකට මුහුණ දී සිටිනවා. මේ තත්වය හිටපු මහ ලේකම් විදියට ඔබ දකින්නෙ කොහොමද?
ඇත්තටම ඉතාම කනගාටුදායක තත්වයක්. මෙරටේ තිබුණු දැවැන්ත දේශපාලන විපක්ෂය අද පත්ව ඇති තත්වය ඉතාම කනගාටුදායකයි. රනිල් වික්‍රමසිංහ එජාප නායකත්වය අතහැරලා සජිත් ප්‍රේමදාස මහතාට පක්ෂය බාර දුන්නා නම් එහෙම වෙන්නෙ නෑ. ජනතාවත් මැතිවරණයේදී ලබා දී තිබෙන්නේ ඒ පණිවිඩයමයි. ඒක නොසලකා ආත්මාර්ථකාමීව කටයුතු කිරීමෙන් එජාප පාක්ෂිකයින් ගම්වල හුදෙකලා වී සිටිනවා. බහුතරයක් මේ වන විටත් සමගි ජන බලවේගයට එකතුව සිටියත් තවමත් සමහර පාක්ෂිකයෝ එජාපය නැවත ගොඩ එයි කියල බලාගෙන ඉන්නවා.
දැන් සිදුවන දේවල් කොළේ වහලා සිදුවන දේවල් කියලයි කියන්නේ. ඔබලත් දැනුවත්ව රජයට එරෙහි දැවැන්ත බලවේගයක් හදන උපක්‍රමයක් ද මේ ක්‍රියාත්මක වෙන්නෙ?
එජාපයට හා සමගිජන බලවේගයට එකට වැඩ කළ හැකි නම් ඔබ කියන ආකාරයට රජයට එරෙහි පුළුල් ජනබලයක් හදන්න පුළුවන්. මොකද රජයත් මේ වන විට ජනතා අප්‍රසාදයට ලක්වෙමින් තිබෙන්නෙ. අපිත් විමසිල්ලෙන් රජයේ කටයුතු දෙස බලාගෙනයි ඉන්නෙ. අපි සමගිජන බලවේගය ශක්තිය වැඩි කරගෙන විරුද්ධ පක්ෂයේ සියලු පක්ෂ සමඟ එක්ව රජය කරන ජනතා විරෝධි කටයුතුවලට එරෙහි පුළුල් ජනබලයක් ගොඩනඟමින් ඉන්න බව සැබෑවක්. සමගිජන බලවේගය හා එක්වීමට කිසිම බාධාවක් නෑ. එජාප නායකත්වය සජිත් ප්‍රේමදාසට බාර දීලා දෙපාර්ශ්වයට එක්ව එකට වැඩ කරන්න පුළුවන්.
එජාපයත් සමගිජන බලවේගයත් රෝ සංවිධානයේ න්‍යාය පත්‍රයට අනුව රජය අර්බුදයකට යොමු කිරීමේ කුමන්ත්‍රණයකට හවුල් බවට චෝදනා එල්ල වෙනවා නේද?
ඔය කියන කාරණය ගැන නම් මම කිසිම දෙයක් දන්නෙ නෑ. එජාපය කිසි කලෙක ඔවැනි සංවිධාන සමඟ සබඳතා පැවැත්වූවාද කියල මට නම් විශ්වාස කරන්න බෑ. මෙරටේ වෙනත් දේශපාලන පක්ෂ එවැනි සබඳතා පවත්වන බවට පසුගිය කාලේ කථාබහ පැතිර ගියා.
* කරු ජයසූරිය එජාප නායකත්වය අපේක්ෂා කළත් එය ප්‍රතික්ෂේප වී තිබෙන පසුබිමක සජිත් කරුට සමගිජන බලවේගයට ආරාධනා කරන්නේ එජාපය ආක්‍රමණය කරන්නද?
ඔව්. අපේ අරමුණ එජාපය ආක්‍රමණය කරලා එය සමගිජන බලවේගයට සම්බන්ධ කර ගැනීමයි. මොකද එජාපය කෘත්‍යාධිකාරි මණ්ඩලයේදී යෝජනා ස්ථිර කරගෙන බිහිවූ සමගිජන බලවේගය එජාපයෙන් නෙරපීම යුක්ති සහගත නෑ. ඒ නිසා අපි නිරතුරුවම උත්සහ කරන්නේ එජාපය එකතු කර ගැනීමටයි.
මෙරටේ, ක්‍රියාත්මක වන පුද්ගල කේන්ද්‍රීය දේශපාලනය අතහැර ප්‍රතිපත්තිමය දේශපාලන ක්‍රියාදාමයක් සඳහා ඔබලා කැප නොවන්නේ ඇයි?
ඔබ කියන කාරණය පැහැදිලියි. මෙරටේ ප්‍රධාන දේශපාලන පක්ෂ දෙකටම ජනතාව ඡන්දය දෙන්නෙ පුද්ගල කේන්ද්‍රීය දේශපාලනය නිසයි. පොහොට්ටුවට ඡන්දය දුන්නෙ මහින්ද රාජපක්ෂ චරිතය නිසයි. සමගිජන බලවේගයට ඡන්දය දුන්නෙ සජිත් ප්‍රේමදාස චරිතය නිසයි. මේක තමයි ඇත්ත. නමුත් ඔබ සඳහන් කරන ආකාරයට ප්‍රතිපත්ති කේන්ද්‍රීය දේශපාලනයක් සඳහා ජනතාව පෙළ ගැස්විය යුතුයි. නමුත් මේ පවතින ක්‍රමය අනුව ඒක කරන්න කොතරම් කාලයක් අවශ්‍ය වේදැයි අනුමාන කරන්නත් අමාරුයි.
ඔබත් එජාප මහලේකම් තනතුර දරමින් පක්ෂය මාරු කළා. ඊට හේතුවත් පෞද්ගලික කාරණයක්. ඒ ආකාරයට ඔබ වැනි උගත් අත්දැකීම් සහිත දේශපාලනඥයන්ගේ හැසිරීම අංකුර දේශපාලනඥයන්ට ලබා දෙන ආදර්ශය කුමක්ද?
ඇත්තම එදා ජනාධිපතිවරණයට එජාපයෙන් ජය ගත හැකි අයෙකු ඉදිරිපත් කරන්නට අපි ගත් ක්‍රියාමාර්ගය ගැන අදත් ජනතාව ප්‍රසාදයෙන් කතා කරනවා. පක්ෂය බේද භින්න වෙලා තිබුණ විදියට එදා රනිල් සජිත් එකම වේදිකාවකට නංවා ගන්න නොහැකිව තිබියදී අපි කැපවෙලා ඒ අය සමගි කළා. එදා උල්ලංඝනය වුණේ පක්ෂයේ ප්‍රතිපත්තියක්. ඒකට එරෙහි වුණේ මම පක්ෂයේ මහලේකම්වරයා විදියටයි. ඒක ගැන අමනාප වූ අන්තවාදී කණ්ඩායම් මට එදා එරෙහි වුණා. ඒ අනුවයි මම දේශපාලන තීන්දුවක් ගත්තේ. 2015දි මම කිව්ව දේවල් අදටත් වලංගුයි.
ඔබ වැනි උගතුනුත් පුද්ගල කේන්ද්‍රීය දේශපාලනය සඳහා පක්ෂ දේශපාලනයේ හිඟ වී සිටිනවා නම් ප්‍රතිපත්ති දේශපාලනය ක්‍රියාවට නංවන්න පුළුවන්ද?
මම ඔබේ කතාවට සියයට සීයක්ම එකඟයි. ප්‍රතිපත්ති දේශපාලනය අපේ රටට අත්‍යවශ්‍යයයි. අසල්වැසි ඉන්දියාවත් ප්‍රතිපත්ති දේශපාලනය අනුව තමයි වැඩසටහන් සංවිධානය කරන්නෙ. ලෝකයේ හුඟක් රටවල් ජාතික ප්‍රතිපත්ති හදලා ඒ අනුව තමයි කටයුතු කරන්නෙ. කවුරු බලයට පත් වුණත් ඒ ප්‍රතිපත්ති වෙනස් වෙන්නෙ නෑ, අපේ රටේ ඇමැතිවරු මාරු වුණාමත් ඒ අමාත්‍යාංශයේ ප්‍රතිපත්ති වැඩසටහන් වෙනස් වෙනවා. සමහරවිට ඇමැතිගේ කාමරයේ පුටුව මේසය පවා වෙනස් වෙනවා. මේක කනගාටුදායකයි. එහෙම නැතුව රට හදන්න බෑ. සෑම පක්ෂයකටම ප්‍රතිපත්ති මත පදනම් වූ වැඩපිළිවෙළක් අවශ්‍යයයි. ලංකාවේ එවැනි තත්වයක් නෑ. තුනෙන් දෙකේ බලයක් සහිත වත්මන් ආණ්ඩුවට ඒ ජනතාවාදී ප්‍රතිපත්ති වැඩපිළිවෙළක් හදන්න පුළුවන්. රට වෙනුවෙන් රටට ගැළපෙන ප්‍රතිපත්ති හදනවා නම් අපි සහය දෙනවා. පෞද්ගලික න්‍යාය පත්‍ර අනුව කටයුතු කරනවා නම් අපිට ඊට එරෙහි වෙන්න සිද්ධ වෙනවා.
මේ දක්වා පාර්ලිමේන්තුවේදී සමගිජන බලවේගය ප්‍රධාන විරුද්ධ පක්ෂය විදියට කථානායක පත් කිරීමේදී හා රාජාසන කථාව අනුමත කිරීමේදී රජයට සහය දී තිබෙනවා. ඉදිරියටත් මේ ආකාරයෙන් කටයුතු කරනවාද?
අපි කිසිවිටකත් රටට හිතකර කිසිම දේකට එරෙහි වෙන්නෙ නෑ. ජනාධිපතිවරයා රාජාසන කථාවේ ඉදිරිපත් කළ වැඩපිළිවෙළ ප්‍රායෝගිකව දකින්න අපි බලාගෙන ඉන්නවා. කියන දේ නොකර නොකියපු දේවල් කරලා පෞද්ගලික අරමුණු ඉටුකර ගන්න අපට ඉඩ දී බලාගනෙ ඉන්න බෑ. හරි දේ කළොත් අපි හැමදාම ඒවාට සහය දෙනවා. වැරදි දේ කළොත් ඒවාට විරුද්ධ වෙනවා.
පාර්ලිමේන්තු පළමු සැසියේදීම විග්නේශ්වරම් මන්ත්‍රිවරයා ජාතිවාදය අවුළුවන්න උත්සහ කළා. ඒක සම්බන්ධයෙන් සමගිජන බලවේගයේ ස්ථාවරය කුමක්ද?
අපි දැනටමත් අපේ ස්ථාවරය ප්‍රකාශ කරලා තියෙනවා. අපේ ස්ථාවරය තමයි නැවත මේ රට තුළ ජාතිවාදි ආගම්වාදි අදහස් ප්‍රකාශ කරලා රට අර්බුදවලට තල්ලු කරන්න ඉඩ දෙන්න බෑ. වසර තිහක යුද්ධයක අත්දැකීම් අපිට තියෙනවා. ඒ ඇතිවූ වේදනා සිත් රිදීම් තවම පහවෙලා නෑ. එවැනි පසුබිමක අපි කරන ප්‍රකාශ ගැන සැලකිලිමත්ව නැවත වර්ගවාදී ගැටුම්වලට උඩගෙඩි දෙන ප්‍රකාශ කිරීමෙන් වැළකී සිටින්න ඕනේ. අපි අපේ ස්ථාවරය අපේ මන්ත්‍රිවරුන් හරහා ප්‍රකාශ කරලා තිබෙනවා.
ජාතික හා දේශප්‍රේමය ගැන වැඩිපුර කථා කරන ආණ්ඩුව විග්නේෂ්වරම් ගේ ප්‍රකාශය ගැන ලිහිල්ව කටයුතු කරන එක ගැන අපි අද පුදුම වෙනවා.
පාර්ලිමේන්තු මාර්ගය උත්සව මාර්ගයක් වූ අවස්ථාවක මාර්ග නීති අදාළ වෙන්නෙ නෑ. සමගිජන බලවේගයේ මන්ත්‍රිවරුන්ට මේ සාමාන්‍ය දැනීම පවා නොමැතිව ජනතාව නොමඟ යවන්න උත්සහ කිරීම ගැන ඔබ මොනවද හිතන්නෙ
ඇත්තටම අපි ප්‍රවේශම් විය යුතුයි. මම පුද්ගලයෙක් ගැන විවේචනය කරන්න හෝ අඩුපාඩු කථා කරන්න කැමති නෑ. අපි පාර්ලිමේන්තුවේදී ඉටු කළ යුතු කාරණා මොනවද කියල තේරුම් ගන්න ඕනේ. පාර්ලිමේන්තුවේදී අපිට පැවරෙන ප්‍රධාන කාරණා දෙකක් තියෙනවා. එකක් තමයි ජනතාව වෙනුවෙන් නීති සම්පාදනය කිරීම. අනෙක් කාරණය තමයි ජනතාවගෙන් එකතු කරන බදු මුදල හරියට භාවිතා කිරීම. මේ මූලික කරුණු ගැන අවධානය යොමු නොකර අවැදගත් කාරණා ගැන වාද විවාද කරමින් පාර්ලිමේන්තුව තුළ කලහකාරි ලෙස හැසිරීම ජනතාව අපෙන් අපේක්ෂා කරන්නෙ නෑ. අපි මේ අඩුපාඩු හදා ගන්න ඕනේ. පසුගිය කාලේ පාර්ලිමේන්තුව තුළ මන්ත්‍රිවරුන්ගේ හැසිරීම නිසා ජනතාව පාර්ලි‍ෙම්න්තු මන්ත්‍රිවරු ප්‍රතික්ෂේප කරන තත්වයට පත්වුණා.
වරදක් වුණා කියල ඔවුන් සදාකාලිකව ඉවත් කරන්න හොඳ නෑ. වැරදි හදාගෙන ඉදිරියට ගන්න ඕනේ. හරින් ප්‍රනාන්දු අපේ මන්ත්‍රිවරයා අගරදගුරු සම්බන්ධ කරගෙන කරපු ප්‍රකාශය ආන්දෝලනයට ලක්වුණා. පක්ෂයේ නායකයා විදියට සජිත් ප්‍රේමදාස හරින් සමඟ අගරදගුරු හිමියන් හමුවේ සමාව ගත්තා. එහෙම වැරදි නිවැරැදි කරගෙන යන අයට ජනතා ප්‍රසාදය හිමි වෙනවා. වරදක් වුණාම ඒක “හෝද හෝදා මඩේ දාන්න” හොඳ නෑ.
සාම්ප්‍රදායික විපක්ෂයේ කාර්යභාරය වෙනුවට අලුත් පක්ෂයක් විදියට පාර්ලිමේන්තුවේ විපක්ෂය නියෝජනය කරන සමගිජන බලවේගය අලුතින් යමක් කරන්න හිතනවාද?
ජනතාව ආණ්ඩුවේ විපක්ෂයේ අපි හැමෝම පාර්ලිමේන්තුවට පත්කරල එවා තිබෙන්නෙ රට වෙනුවෙන් කටයුතු කරන්නයි. මේ අනුව සාම්ප්‍රදායික විපක්ෂයක් ලෙස අපි ආණ්ඩුවේ හැමදේටම විරුද්ධ වෙන්න සූදානම් නෑ. ජනතාවාදි කටයුතුවලදී අපි ආණ්ඩුව සමඟ කටයුතු කරනවා. නමුත් 19 වන ආණ්ඩුක්‍රම ව්‍යවස්ථාව සංශෝධනය සම්බන්ධයෙන් ආණ්ඩුව කටයුතු කරන ආකාරය සම්බන්ධයෙන් අපි අවදියෙන් සිටින්නෙ. 19 වන සංශෝධනය ඉතා හොඳ රටට රටේ ප්‍රජාතන්ත්‍රවාදයට හිතකර බොහෝ දේවල් තිබෙනවා. ඒ කරුණු අහෝසි කරන්න අපි ඉඩ දෙන්නෙ නෑ. නමුත් හැමදේටම විරුද්ධ විය යුතුයි කියන මතයේ ඉඳගෙන අපි කටයුතු කරන්නෙ නෑ.
