අභිමානවත් මාතරට මිරිස්ස යන නාමය එක්කර තිබුණේ ඉහළ ආර්ථික වටිනාකමකි. මිරිස්ස කී සැණින් සැමගේ මතකයට නැඟෙන්නේ සුන්දර සංචාරක ප්‍රදේශයයි. එහෙත් එම සුන්දර බවට අසුන්දරත්වයක් මෙන්ම හා මාතර අභිමානයට කැළලක් එක්වූයේ ඉකුත් පහළොස් වැනිදාය. ඒ මාධ්‍ය වාර්තා මඟින් හෙළිවූ ඈත දියඹේදී බාලවයස්කාර දරුවෙකුට අමානුෂික ලෙස වද හිංසා පැමිණවීම පිළිබඳ කතාවත් සමඟය. එය පසුගිය සතිය මුළුල්ලේම කා අතරත් කතාබහට ලක්වූ පුවතක් බවට පත්ව තිබුණේ එහි වූ ආකාරුණික බව නිසාමය.
මෙරට සිදුවූ තවත් බාල අපචාරයක් ලෙස පොලිස් පොතට මෙම සිදුවීම එක්වූයේ පසුගිය මාස දහ අට තුළ නීතිපතිවරයා විසින් ළමා අපයෝජන සිද්ධීන් දොළොස්දහස් නවසිය හැට අටක විමර්ශන අවසන් කර නඩු අටසිය පනස් එකක් දක්වා අඩුකර තිබියදීය.
ඒ ඉකුත් සෙනසුරාදා (15දා) දිනයයි. මෙරට රූපවාහිනී නාළිකාවල මධ්‍යහන පුවත් හා රාත්‍රී පුවත් මඟින් ප්‍රචාරය වූ නෙතට කඳුළක් එක්කළ පුවත් වාර්තාවකින් කියැවුණේ මිරිස්ස බණ්ඩරමුල්ල ප්‍රදේශයේ බාලවයස්කාර දරුවකු මුහුදු රැකියාව සඳහා ගෙනගොස් ඈත දියඹ මුහුදේදී දින හතළිස් පහක් පුරා අමානුෂික ලෙස පහරදීමට ලක්කර සිරුර පුරා තුවාල සිදු කර ඇති බවයි. අදාළ දරුවා ගොඩබිමට පැමිණීමෙන් පසු දැඩි ලෙස රෝගී තත්ත්වයෙන් පසුවූ නිසා මවුපියන් විසින් මාතර රෝහලට ඇතුළත් කර ඇති බව ද ඉන් කියැවිණි.
මහ මුහුදේදී ධීවරයන්ගේ අමානුෂික පහරදීම්වලට එලෙස ලක්ව සිටියේ මිරිස්ස බණ්ඩරමුල්ල පදිංචි ශෙෂාන් ප්‍රමෝද් නම් වයස අවුරුදු දහසයයි මාසයක් පමණ වූ බාලවයස්කාර දරුවෙකි. දින හතළිස්පහක් පුරා මහ මුහුදේ කඳුළු අතර ජීවත් වූ ශෙෂාන් යළි ගොඩබිමට පැමිණ ඇත්තේ ඉකුත් 12 වැනිදා ය. අදාළ පහරදීම පිළිබඳ ශෙෂාන්ගේ පියා කොටවිල පොලීසියට පැමිණිලි කරන්නේ අගෝස්තු මස 13 දින රාත්‍රී 10.15 ට පමණය. ඒ වන විට දරුවා මාතර රෝහලේ නේවාසිකව ප්‍රතිකාර ලබමින් සිටියේය.
 |
|
නි‍ෙවසට ගොස් සොයා බලන මහජන නියෝජිතයන් වන මහින්ද යාපා අබේවර්ධන,
කංචන විජේසේකර හා පියල් නිශාන්ත
|
ලද පැමිණිල්ල මත පොලිස් පරීක්ෂණ අරඹන කොටවිල පොලීසියේ ස්ථානාධිපති ප්‍රධාන පොලිස් පරීක්ෂක රොෂාන් චමින්ද හෙට්ටිආරච්චි මහතා දරුවාගෙන් ලබාගත් තොරතුරු මත වහා පරීක්ෂණ අරඹද්දී ශෙෂාන්ට පහර දුන් සැකකරුවන් ප්‍රදේශයෙන් පලා යන්නට උත්සාහ දරමින් සිට ඇත. තමන්ට ලද තොරතුර පිළිබඳ ප්‍රධාන පොලිස් පරීක්ෂක හෙට්ටිආරච්චි මාතර කොට්ඨාස භාර ජ්‍යෙෂ්ඨ පොලිස් අධිකාරී චන්දන හේරත් සහ දකුණු පළාත් ජ්‍යෙෂ්ඨ නියෝජ්‍ය පොලිස්පති රොහාන් යන අයට දැනුම් දීමෙන් පසු සැකකරුවන් සොයා පොලිස් කණ්ඩායම් පහක් මෙහෙයුම් සඳහා යෙදවිණ.
පොලිස් පරීක්ෂණ කඩිනම් වෙද්දී බාලවයස්කාර දරුවාට අමානුෂික ලෙස පහරදුන් සැකකරුවන් හතරදෙනා සහ බෝට්ටුවේ හිමිකරු ද පොලිස් අත්අඩංගුවට පත්වූයේ සූක්ෂම මෙහෙයුමක ප්‍රතිඵලයක් ලෙසිනි. ඒ අතර මාතර කොට්ඨාස ළමා හා කාන්තා කාර්යාංශයේ ස්ථානාධිපතිනි, ප්‍රධාන පොලිස් පරීක්ෂිකා රසිකා දමයන්ති ප්‍රමුඛ පොලිස් කණ්ඩායමක් පහරදීම පිළිබඳ අදාළ දරුවාගෙන් තොරතුරු විමසමින් සිටියහ.
මාතර කොට්ඨාස ළමා හා කාන්තා කාර්යාංශයේ පොලිස් සැරයන් චන්දනගේ මනෝවිද්‍යාත්මක මඟපෙන්වීම ඔස්සේ ශෙෂාන් පොලීසියට ලබාදුන් තොරතුරුවලට අනුව ඔහු මුහුදු රැකියාව සඳහා පොලඹවාගෙන ඇත්තේ බෝට්ටුවේ ස්කීපර් ලෙස කටයුතු කළ සැකකරුය. 2004 ජූලි මස 01 දින මාතර මහ රෝහලේදී ඉපදී ඇති ශෙෂාන්ගේ වයස අනුව මුහුදු රැකියාව සඳහා යොදවාගත නොහැකි බැවින් ස්කීපර් විසින් උප්පැන්න සහතිකයේ උපත 2001 ජූලි මස 01 දින ලෙස වෙනස්කර අවශ්‍ය නීත්‍යානුකූල පසුබිම සකස්කර දී ඇත. ඒ අනුව ශෙෂාන් අැතුළු පස්දෙනෙකුගෙන් සමන්විත කණ්ඩායම බහුදින ධීවර යාත්‍රාවකින් මුහුදු රැකියාව සඳහා මිරිස්ස ධීවර වරායෙන් පිටව ගොස් ඇත්තේ පසුගිය ජූනි මස 28 වැනිදා රාත්‍රී නවයයි තිහට පමණය.
දින දෙකක දීර්ඝ මුහුදු ගමනකින් පසු ගැඹුරු මුහුදට පැමිණ ඇති ධීවර කණ්ඩායම මසුන් ඇල්ලීමට පටන්ගෙන ඇත. ඒ ජූලි මස පළමුවැනිදාය. ධීවර රැකියාවේදී ශෙෂාන්ට පවරා ඇත්තේ මුහුදට දැල් දැමීම, මන්ද ගැසීම හා මන්ද ඇදීමයි. මාළු අල්ලාගැනීමට එළුෑ දැල නැවත බෝට්ටුවට අදිමින් සිටියදී කිලෝ අටක තරම් බර බල මාළුවකු ශෙෂාන්ගේ අතින් ගිලිහී නැවත මුහුදට වැටී ඇති අතර ඉන් කේන්ති ගත් ධීවරයන් ශෙෂාන්ට පහරදීමට පටන්ගෙන ඇත. එදා සිට දින හතළිස් පහක් පුරා මහ මුහුදේ ගතකරද්දී ශෙෂාන් දිගින් දිගටම පහරදීම්වලට ලක්ව ඇති අතර ඇතැම් අවස්ථාවලදී කුඹ ගසේ ගැටගසා පද්දමින් සිට ඇත. අවස්ථා කීපයක් මුහුදට ද දමා ඇත.
“මගේ පුතා මුහුදු ගියේ ගෙදර තිබූ අගහිඟකම් නිසා. ගෙයක් හදාගන්න එයාට ලොකු ආශාවක් තිබුණා. අනේ දුප්පත්කමට ගියාම මෙහෙම වධ හිංසා කරනවද? මගේ පුතාගෙ අතින් බලයා මාළු කූරියෙක් මුහුදට වැටුණා කියලා තමයි ගහන්න පටන් අරන් තියෙන්නේ. දැල් වලින්, මාළුන්ගෙන් පවා ගහලා තියෙනවා. වැඩියෙන් කෑවා කියා නෑඹිලියකින් ඔළුවටත් ගහලා. අනේ ළමයි බිස්කට්වලට ආසයිනේ. බඩගින්නට චොක්ලට්, බිස්කට් එකක් කෑව කියල කටට අතදාල දෙපැත්තට ඇදලා; කටත් තුවාලයි; පුතා ගෙදර ආවේ ගිය විදියට නොවෙයි; ඇවිදගන්නවත් බැරුව.මගේ පුතාට පුදුම දුකක් දීල තියෙන්නේ” ශෙෂාන්ගේ මව වූ චන්දිමා ප්‍රියදර්ශනී හැඬූ කඳුළින් පැවසුවාය.
 |
| ශෙෂාන්ගේ දෙමවුපියන්, සහෝදර සහෝදරියන් හා ඔවුන් ජීවත්වන නි‍ෙවස |
රෝහල් ගතකර සිටින ශෙෂාන්ට ප්‍රතිකාර කරන අතර පොලීසිය ඊළඟට සැකයේ ඇස යොමුකර තිබුණේ දරුවාට ලිංගික හිංසනයක් ද සිදුව ඇති ද ගැනය. ඒ සම්බන්ධයෙන් මාතර මහ රෝහලේ අධිකරණ වෛද්‍ය නිලධාරී මඟින් පරීක්ෂණයක් කළ ද එවැනි ලිංගික හිංසනයක් සිදුව නැති බව කොටවිල පොලීසිය පැවසුවේය.
ශෙෂාන් පස් දෙනෙකුගෙන් සමන්විත පවුලේ වැඩිමහල් දරුවාය. ඔහුට එක් මල්ලී කෙනෙකු හා නංගිලා තිදෙනෙකු සිටිති. තාත්තාට ස්ථිර රැකියාවක් නැත.
ශෙෂාන්ට සිදුව ඇති අමානුෂික පහරදීම පිළිබඳ මාධ්‍ය වාර්තා පළවීමත් සමඟ ඇතිවී තිබෙන තත්ත්වය පිළිබඳ සොයාබැලීම සඳහා රාජ්‍ය අමාත්‍යවරුන් වන කංචන විජේසේකර සහ පියල් නිශාන්ත මහත්වරු හා පොලිස් මූලස්ථානයේ ළමා හා කාන්තා අපයෝජන නිවාරණ කාර්යාංශයේ ජ්‍යෙෂ්ඨ පොලිස් අධිකාරීණී බිම්ෂානි ජාසිංහආරච්චි පසුගිය (16) දින මාතර මහ රෝහලට පැමිණියහ. එහිදී ශෙෂාන්ට සිදුකර ඇති අමානුෂික ප්‍රහාර පිළිබඳ සොයා බැලූ අමාත්‍යවරු ශෙෂාන් රැකියාව සඳහා මුහුදු ගිය ධීවර යාත්‍රාවේ බලපත්‍රය අහෝසි කිරීමටත් එම වරදකරුවන් අත්අඩංගුවට ගෙන අධිකරණයට ඉදිරිපත් කිරීමටත් අවශ්‍ය පියවර ගෙන ඇති බවත් පැවසූහ. දරුවාගේ ප්‍රතිකාර කටයුතු සහ අවශ්‍යතා පිළිබඳ කටයුතු සිදු කිරීමටත් මෙවැනි සිදුවීම් ඉදිරියට සිදු නොවීමට අවශ්‍ය පියවර ගන්නා බවත් අමාත්‍යවරු එහිදී වැඩිදුරටත් පැවසූහ.
අනතුරුව අමාත්‍ය පියල් නිශාන්ත, පාර්ලිමේන්තු මන්ත්‍රී මහින්ද යාපා අබේවර්ධන දරුවා ජීවත්වන මිරිස්ස බණ්ඩරමුල්ලේ නිවසටද ගොස් පරීක්ෂා කර බලා එම පවුලේ අනාගත සුරක්ෂිතතාව සම්බන්ධයෙන් කළ හැකි ආධාර උපකාර පිළිබඳව ද සොයා බැලූ අතර, එහිදී පියල් නිශාන්ත අමාත්‍යවරයා කියා සිටියේ නව නිවසක් ඉදිකර ගැනීමට හා දරුවන්ගේ ඉදිරි අධ්‍යාපන කටයුතු සඳහා උපකාර කරන බවයි.
