මෙරට ව්‍යවස්ථාදායකයේ කේන්ද්‍රස්ථානය වූ පාර්ලිමේන්තු සංකීර්ණය පසුගියදා සැදි පැහැදි සිටියේ තවත් පස් වසරක ප්‍රජාතන්ත්‍රවාදී පරිච්ඡේදයක සමාරම්භය සනිටුහන් කරන්නටය. පසුගිය 20 වැනිදා දින ගණනාවක විවේකයෙන් අනතුරුව පාර්ලිමේන්තුව නැවතත් පණ ලබන්නට වූයේ 9 වැනි පාර්ලිමේන්තුවේ පළමු මංගල සැසිවාරයටය.
මෙවර මැති සබය නියෝජනය කරන විවිධ පක්ෂ පාටින් යුතු දිදුලන ධජ පතාක වලින් පාර්ලිමේන්තු පිවිසුම් මඟ අභිමානවත් විය. වෙනදා නොතිබූ නිහඬත්වය මඳකට වෙනස් කරමින් සැවොම සැදි පැහැදී සිටියේ නවවැනි පාර්ලිමේන්තුවට තේරී පත්වූ නවක මැති ඇමැතිවරුන් පිළි ගන්නටය. මෙදා පාර්ලිමේන්තුව නියෝජනය සඳහා පැමිණි බොහෝ දෙනෙක් නවක යන් වූ නිසාම ඒ අත්දැකිම සමීප කර ගන්නට ඔවුන් පැමිණ සිටියේ සිය සමිප හිතවතුන් සමඟය. මේ නිසා වෙනදාටත් වඩා පාර්ලිමේන්තු සංකීර්ණය මෙදා අතිශයින්ම කාර්ය බහුල විය. උදෑසන 9.30 ට ගණ පූරණ සීනුව නාද වීමෙන් අනතුරුව නව වැනි පාර්ලිමේන්තු සභා ගර්භය වෙනදා නොතිබු උද්යෝගයකින් මැති ඇමැතීන්ගෙන් පිරෙන්නට වූයේ නව රාජකාරි රැසක ආරම්භය සනිටුහන් කරමිනි.
මෙවර පාර්ලිමේන්තුවට තේරී පත්වූ බොහෝ දෙනෙක් තරුණ මන්ත්‍රීවරු විය. මේ අතර පාර්ලිමේන්තුවට නුහුරු අලුත් මුහුණු 81 ක් විය. මෙවර කාන්තා මන්ත්‍රීවරියන් 12 දෙනෙක් තේරී පත් වූ අතර ඔවුන් සියල්ලම මෙවර මැති සබයට පැමිණ සිටිනු දක්නට ලැබුණි. පාර්ලිමේන්තු ආරම්භක දින මන්ත්‍රිවරුන්ට අසුන් පැනවීමේදි කිසිදු විශේෂත්වයක් සිදු නොවූයෙන් ඔවුහු තම හිතමිතුරන් සමඟ රිසි ස්ථාන වල අසුන් ගත්හ.
 |
| තේ පැන් සංග්‍රහයේදී අගමැතිතුමා මන්ත්‍රීන් පිරිසක් සමඟින් |
උදැසන 9.30 පාර්ලිමේන්තු ගණ පූරණ සීනුව නාද වීමත් සමඟ පාර්ලිමේන්තුවේ ආරම්භය සනිටුහන් වූයේ සුපුරුදු පරිදි වේත්‍රධාරි විසින් සභා ගැබට සෙංකෝලය ගෙන ඒමත් සමඟය.
සෙංකෝලය පහළ අසුනේ තැන්පත් කෙරුණේ ඒ වන විටත් නව කථානායක පත් කර නොතිබූ හෙයිනි. පාර්ලිමේන්තු මහ ලේකම් ධම්මික දිසනායකගේ නිවේදන වලින් අනතුරුව නව පාර්ලිමේන්තු සැසි වාරයේ අතිශයින්ම වැදගත් කටයුත්ත වූ නව කථානායකවරයා පත්කර ගැනීම පෙ.ව 9.40 ට සිදුවිය. 9 වැනි පාර්ලිමේන්තුවේ අභිනව කතානායකවරයා තෝරා පත්කර ගැනීම නිවේදනය කිරීමෙන් අනතුරුව ඇමැති දිනේෂ් ගුණවර්ධන නැඟී සිටිමින් නව කතානායකවරයා ලෙස පාර්ලිමේන්තු මන්ත්‍රි මහින්ද යාපා අබේවර්ධනගේ නම යෝජනා කළ අතර ස්ථීර කිරීම සමගි ජන බලවේගයේ රංජිත් මද්දුමබණ්ඩාර විසින් සිදු කළේය. වෙනත් නම් නොතිබුණෙන් 9 වැනි පාර්ලිමේන්තුවේ 26 වන නව කථානායවරයා ලෙස මහින්ද යාපා අබේවර්ධන පත්වූ අතර පාර්ලිමේන්තු මහ ලේකම් ධම්මික දසනායක විසින් නව කථානායකවරයා ලෙස මහින්ද යාපා අබේවර්ධනගේ නම ප්‍රකාශයට පත් කළේ සියලු දෙනාගේ අත්පොළසන් මධ්‍යයේය. අනතුරුව යෝජනා ස්ථිර කළ මන්ත්‍රීවරුන් දෙපළ විසින් නව කථානායකවරයා කථානායක අසුන වෙත කැඳවාගෙන යාම සම්ප්‍රදායට මුල් තැන දෙමින් සිදුවිය.
නව කථානායක මහින්ද යාපා අබේවර්ධනට පාර්ලිමේන්තුවේ සිවු දෙසින්ම සුබ පැතුම් ගලා එන්නට විය. මුලින්ම සුබ පැතුම් එක්කළේ අගමැතිවරයාය. ඉන් අනතුරුව සමගි ජන බලවේගයෙ නායක සජිත් ප්‍රේමදාස, දෙමළ ජාතික සංධානයේ නායක ආර්. සම්බන්ධන් , මුස්ලිම් කොන්ග්‍රස් නයක රවුෆ් හකීම්, ඊළාම් ජනතා පක්ෂයේ ඩග්ලස් දේවානන්ද, ජනතා විමුක්ති පෙරමුණු නායක අනුර කුමාර දිසානායක, ශ්‍රී ලංකා නිදහස් පක්ෂය වෙනුවෙන් මෛත්‍රිපාල සිරිසේන, ඇමැතිවරුන් වන විමල් වීරවංශ, උදය ගම්මන්පිල ,සමස්ත ලංකා මුස්ලිම් කොංග්‍රසය වෙනුවෙන් රිෂාඩ් බදියුදීන්, ප්‍රජාතාන්ත්‍රික වාමාංශික පෙරමුණ වෙනුවෙන් වාසුදේව නානායක්කාර, සිවනේෂතුරේයි චන්ද්‍රකාන්ත හෙවත් පිල්ලෙයාන්, මෙන්ම සි.වී විග්නේශ්වරම් ඇතුළු පාර්ලිමේන්තු පක්ෂ නියෝජිතයින් රැසකගේ සුභාශිංසන පැයක කාලයක් පුරාවටම පිරිනැමුණි.
නවවන පාර්ලිමේන්තුවේ නියෝජ්‍ය කථානායකවරයා ලෙස පාර්ලිමේන්තු මන්ත්‍රි රංජිත් සියඹලාපිටිය පත් කරගත්තේ ඉන් අනතුරුවය.
ඇමැති මහින්ද අමරවීර විසින් ඔහුගේ නම යෝජනා කළ අතර රාජ්‍ය ඇමැති නිමල් ලන්සා විසින් ඒ යෝජනාව ස්ථීර කරන ලදී. නිමල් සිරිපාල ද සිල්වා සහ දුමින්ද දිසානායක යන මන්ත්‍රීවරුන්ගේ යෝජනා ස්ථිරත්වයෙන් නියෝජ්‍ය කාරක සභා සභාපතිවරයා ලෙස පාර්ලිමේන්තු මන්ත්‍රී අංගජන් රාමනාදන් පත්විය. පළමු සැසි වාරයේ පළමු දින පාර්ලිමේන්තු ඉතිහාසයට සුවිශේෂි දිනයකි. දේශපාලන පක්ෂ 12 ක මහජන නියෝජිතයින් 222 දෙදෙනෙක් මෙදා පළමු සැසි වාරයට එක්විය. මේ වන විට බන්ධනාගාර ගතව සිටින රත්නපුර දිස්ත්‍රීක් පාර්ලිමේන්තු මන්ත්‍රි ප්‍රේමලාල් ජයසේකර පාර්ලිමේන්තුවට පැමිණ නොසිටි අතර එක්සත් ජාතික පක්ෂයෙන් හා අපේ ජන බල පක්ෂයෙන් ජාතික ලැයිස්තු මන්ත්‍රීධුර පත් කර නැති නිසා ඒ අඩුවත් පැහැදිලිව පෙනෙන්නට විය. කෙසේ වෙතත් වසර 73 කට පසු එක්සත් ජාතික පක්ෂ මන්ත්‍රීවරයෙකු නොසිටි පාර්ලිමේන්තුවක් දක්නට ලැබීම පාර්ලිමේන්තු ඉතිහාසයේ සුවිශේෂි ලක්ෂණයක් විය. මේ අතර රක්ෂිත බණ්ධනාරගතව සිටින සිවනේෂතුරේයි චන්ද්‍රකාන්ත හෙවත් පිල්ලෙයාන් පාර්ලිමේන්තුවට පැමිණ සභා ගැබ ඇමතීම සුවිශේෂිය.
9 වැනි පාර්ලිමේන්තුවේ මංගල සැසිය ආරම්භ වූයේ සවස 2.45 ටය. ආචාර වෙඩි මුර ඇතුළු අනවශ්‍ය වියදම් අවම කරමින් ජනාධිපති ගෝඨාභය රාජපක්ෂයන් හා එම මැතිනියගේ සම්ප්‍රාප්තිය සිදුවූයේ චාම් හා අභිමානවත් අන්දමින් පාර්ලිමේන්තු සම්ප්‍රදාය සුරකිමිනි. 9 වැනි පාර්ලිමේන්තුවේ මංගල සැසිය සඳහා සපැමිණි ජනාධිපතිවරයා පිළිගනු ලැබූයේ නව කතානායකවරයා විසින් මඟුල් බෙර මධ්‍යයේය. මෙවර විශේෂත්වය වූයේ ජනාධිපතිවරයා වෙනුවෙන් කිසිදු අශ්වාරෝහක කණ්ඩායමක් හෝ අමතර වාහන කිසිවක් සහභාගි කර නොගැනීමයි.
9 වැනි පාර්ලිමේන්තුවේ මංගල සැසිය උත්සවාකාරයෙන් විවෘත කිරීමේ අවස්ථාව සනිටුහන් වූයේ පස්වරු 3 ටය. ඒ ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජනාධිපතිවරයා විසින් නව රජයේ ප්‍රතිපත්ති ප්‍රකාශය පාර්ලිමේන්තුවට ඉදිරිපත් කිරීමත් සමඟය. මුලින්ම නව තනතුරුවලට පත්වු කථානායක ඇතුළු පිරිසට සුබ පැතුම් එක් කළ ජනාධිපතිවරයා කොවිඩ් වසංගත කාලයේ ලොව සියලු රටවල් පරදවමින් එම අභියෝගයට රජය සාර්ථකව මුහුණ දුන් ආකාරය ප්‍රකාශ කළේය. ඉන් අනතුරුව නව රජයේ ප්‍රතිපත්ති ප්‍රකාශය ඉදිරිපත් කරමින් කතා කළ ජනාධිපතිවරයා රටේ සැම අංශයක්ම ආවරණය කරමින් ඉදිරියේදි ක්‍රියාත්මක කිරීමට අපේක්ෂිත සංවර්ධන සැලැස්ම විස්තර කළේය.
නව සැසිවාරයේ කටයුතු අවසන් වූයේ සතුටු සාමිචි මැද ගෙවුණු තේ පැන් සංග්‍රහයකින් අනතුරුවය.
මේ අතර පාර්ලිමේන්තුවේ ස්ථාවර නියෝග 114 හි විධිවිධාන ප්‍රකාරව නව වැනි පාර්ලිමේන්තුවේ පළමු සභාවාරයේ සේවය කිරීම සඳහා කථානායක මහින්ද යාපා අබේවර්ධන ගේ සභාපතීත්වයෙන් සාමාජිකයන් 12 දෙනෙකුගෙන් සමන්වත තේරීම් කාරක සභාවක් පත්විය. නිමල් සිරිපාලද සිල්වා, දිනේෂ් ගුණවර්ධන , ජොන්ස්ටන් ප්‍රනාන්දු, ඩග්ලස් දේවානන්ද, ඩලස් අලහප්පෙරුම, විමල් වීරවංශ, ප්‍රසන්න රණතුංග, ලක්ෂ්මන් කිරිඇල්ල, ගයන්ත කරුණාතිලක, රවුෆ් හකීම්, විජිත හේරත්, සෙල්වම් අඩෛක්කලනාදන් යන මැති ඇමැතිවරු මීට ඇතුළත්ය. මේ අතර සමගි ජන බලවේගයේ පාර්ලිමේන්තු මන්ත්‍රි මනූෂ නානායක්කාර කථානායකවරයාගෙන් ඉල්ලා සිටියේ මන්ත්‍රී සී. වි විග්නේශ්වරම් කතාවේ ඇතුළත් ජාතිවාදී කොටස් හැන්සාඩ් ගත කිරීමෙන් වළකින ලෙසයි.
සේයාරු - ගයාන් පුෂ්පික, දුෂ්මන්ත මායාදුන්න, සුලෝචන ගමගේ
