අපේ පාර්ලිමේන්තුවේ සමස්ත මන්ත්‍රිවරු ගණන 225කි. ඉන් මන්ත්‍රිවරුන් 196ක් සමානුපාතික ක්‍රමය යටතේ දිස්ත්‍රික් මට්ටමින් තේරී පත්වෙති. ඉතිරි 29 දෙනා පාර්ලිමේන්තුවට එන්නේ ඒ ඒ පක්ෂ ලැබූ ඡන්ද සංඛ්‍යාව අනුව ඉදිරිපත් කරන ජාතික ලැයිස්තුවේ සිටින පුද්ගලයන්ගෙනි.
මෙවර පාර්ලිමේන්තු මැතිවරණයේදි ජාතික ලැයිස්තුවට පොදු ජන පෙරමුණට වැඩිම ජාතික ලැයිස්තු මන්ත්‍රිවරුන් පිරිසක් ඉදිරිපත් කිරීමට අවස්ථාව ලැබී ඇත. ඒ ගණන 17කි.
මීට පෙර 2010 දී ද එජනිස ට මෙතරම් ගණනක් ජාතික ලැයිස්තුවට ඉදිරිපත් කිරීමට ඉඩලැබී තිබේ. සමගි ජන බලවේගයට මන්ත්‍රිවරු 7ක් දෙමළ ජාතික සන්ධානයට ජාතික ලැයිස්තු මන්ත්‍රි ධුර 1ක්ද ජාතික ජන බලවේගයට ජාතික ලැයිස්තු මන්ත්‍රි ධුර 1ක්ද, අහිල ඉලන්ගෙයි තමිල් කොන්ග්‍රසයට ජාතික ලැයිස්තු මන්ත්‍රිධුර 1ක්ද හිමිවී තිබිණි. ඊට අමතරව එක්සත් ජාතික පක්ෂයට එක් ජාතික ලැයිස්තු මන්ත්‍රි ධුරයක් ද අපේ ජන බල පක්ෂයට ජාතික ලැයිස්තු මන්ත්‍රි ධුරයක් හිමිවී තිබිණි.
මේ අතරින් පොදු ජන පෙරමුණට හිමි මන්ත්‍රි ධුර 17ට අදාළ නම් 17ක් එහි ලේකම් සාගර කාරියවසම් මහතා මඟින් මැතිවරණ මහලේකම් කාර්යාලය වෙත යැව්වේ පසුගිය 7 වැනිදාය. එනම් අවසන් ඡන්ද ප්‍රතිඵල නිකුත් වූ දිනයදීය. එම පෙරමුණින් කොට පරාජය වූ කිසිම අයකු මේ සඳහා නම් නොකිරීමට පොදු ජන පෙරමුණ අවධානය යොමු කර තිබිණි. එමෙන්ම මෙම ජාතික ලැයිස්තුවට මෙරට ප්‍රථම වරට මහාචාර්යවරු 4 දෙනෙක්, ආචාර්යවරු, ඉංජිනේරුවරු, වෛද්‍යවරු, සමාජ ක්‍රියාකාරිහු ඇතුළත් වූහ.
මෙවර ශ්‍රී ලංකා පොදු ජන පෙරමුණේ ජාතික ලැයිස්තුවට මහාචාර්ය තිස්ස විතාරණ, මහාචාර්ය චරිත හේරත් ද මහාචාර්ය ජී.ඇල්. පීරිස්, මහාචාර්ය රංජිත් බණ්ඩාර, නීතිඥ සාගර කාරියවසම්, අජිත් නිවාඩ් කබ්රාල්, ජනාධිපති නීතිඥ මොහොමඩ් අලි සබ්රි, ජනාධිපති නීතිඥ ජයන්ත වීරසිංහ, විශ්‍රාමික ගුරු උපදේශිකා මංජුලා දිසානායක, ගෙවිදු කුමාරතුංග, හිටපු පාර්ලිමේන්තු මන්ත්‍රි මොහොමඩ් මුසම්මිල්, ඉංජිනේරු යදාමිණි ගුණවර්ධන, ආචාර්ය සුරේන්ද්‍ර රාඝවන්, ව්‍යාපාරික ටිරාන් අලස් විශේෂඥ වෛද්‍ය සීතා අරඹේපොළ හිටපු පාර්ලිමේන්තු මන්ත්‍රි ජයන්ත කැටගොඩ යන මහත්වරු පත් කරනු ලැබූහ.
මෙම පොදු ජන පෙරමුණේ ජාතික ලැයිස්තුවේ ශ්‍රී ලංකා නිදහස් පක්ෂය වෙනුවෙන් ජාතික ලැයිස්තු මන්ත්‍රි ධුර දෙකක් වෙන්කර තිබිණි. ඉන් එක් මන්ත්‍රිවරයකු ලෙස නම් කර ඇත්තේ උතුරු මැද පළාතේ ආණ්ඩුකාරවරයකු ලෙස කටයුතු කළ සුරේන්ද්‍ර රාඝවන් මහතාය.
ආචාර්ය සුරේන්ද්‍ර රාඝවන් මහතා මෙවර පොදුජන පෙරමුණ ජාතික ලැයිස්තුවට නම් කර ඇත. ඔහු පිළිබඳව විපක්ෂයේ ඇතැමි අය ද්විත්ව පුරවැසියකු ලෙස හඳුන්වති. 19 වැනි ව්‍යවස්ථා සංශෝධනයට අනුව ද්විත්ව පුරවැසියකුට අපේ රටේ පාර්ලිමේන්තුවට තේරී පත්වීමට නොහැකිය. පොදුජන පෙරමුණේ ජාතික ලැයිස්තුව මැතිවරණ කොමසාරිස්වරයා වෙත එහි ලේකම් නීතිඥ සාගර කාරියවසම් යවා ඇත්තේ 2020 මාර්තු 12 වැනිදාය. නමුත් ඔහු 2020 ජුනි 3 වැනිදා සිය ද්විත්ව පුරවැසි බව ඉවත්කර තිබේ. ඒ අනුව සු‍ෙර්න්ද්‍ර රාඝවන් මහතාට ජාතික ලැයිස්තු මන්ත්‍රි ධුරයට පත්වීමට ගැටලුවක් නැති බව පෙනේ.
මීට අමතරව සමගි ජන බලවේගයේ ජාතික ලැයිස්තු මන්ත්‍රි ධුරවලට රංජිත් මද්දුම බණ්ඩාර, ඉමිටියාස් බකිර් මාකාර්, තිස්ස අත්තනායක, හරින් ප්‍රනාන්දු, ඉරාන් වික්‍රමසිංහ, මයන්ත දිසනායක හා ඩයනා ගමගේ යන මහත්ම මහත්මීහු පත්කර තිබේ. නමුත් සමගි ජන බලවේගයේ මුස්ලිම් හා දෙමළ පක්ෂවලට ජාතික ලැයිස්තු මන්ත්‍රි ධුර හිමිවී නැත. මුලින් එම පක්ෂ ජාතික ලැයිස්තු මන්ත්‍රි ධුර ඉල්ලුවත් ඒ අය නිශ්ශබ්දව සිටින්නේ ඇයි දැයි දැන් ගැටලුවකි.
ජාතික ජන බලවේගය මඟින් ජාතික ලැයිස්තුවට ඉදිරිපත් කර ඇති ආචාර්ය හරිනි අමරසූරිය විවෘත විශ්ව විද්‍යාලයේ ජ්‍යෙෂ්ඨ කථිකාචාර්යවරියෙකි.
ඊට අමතරව ඉලංගෙයි තමිල් අරසු කච්චි පක්ෂයෙන් තවරාජ තලෙයි අරයන් හා අහිල ඉලන්ගෙයි තමිල් අරසු කොන්ග්‍රසයෙන් සෙල්වරාජා ගජේන්ද්‍රන් යන මහත්වරු මෙවර ජාතික ලැයිස්තුවට නම් කර ඇත.
කෙසේ වුවත් එජාපය හා අපේ ජන බල පක්ෂය මඟින් තවම සිය ජාතික ලැයිස්තුවට හිමි එකම මන්ත්‍රිවරයාවත් නම් කර නොමැත.
අ‍ෙප් ජනබල පක්ෂයේ එකම මන්ත්‍රි ධුරය පිළිබඳව එහි ලේකම් වේදිනිගම විමලතිස්ස හිමි හා හිටපු පාර්ලිමේන්තු මන්ත්‍රි අතුරලියේ රතන හිමි හා ගලගොඩඅත්තේ ඥානසාර හිමි අතර විවිධ මතවාද රැසක් පවතී.
මේ අතර අපේ ජනබල පක්ෂයේ මන්ත්‍රි ධුරය ගලගොඩඅත්තේ ඥානසාර හිමියන්ටම ලබාදිය යුතු යැයි ඉල්ලමින් එම පක්ෂයේ දකුණු පළාතෙන් අපේක්ෂකයෙකු ලෙස ඉදිරිපත් වූ පුද්ගලයෙකු උපවාසයක් ආරම්භ කර ඇති බවද වාර්තා වෙයි.
ජාතික ලැයිස්තු මන්ත්‍රි ධුරයට නම් කිරීමේ අවසන් දිනය වූයේ පසුගිය සිකුරාදාය.
1988 මැයි 29 වැනිදා ආණ්ඩුක්‍රම ව්‍යවස්ථාවේ 19 වැනි සංශෝධනය කරනු ලැබීය. එහිදී පාර්ලිමේන්තුවට පත්කර ගන්න මන්ත්‍රිවරු සංඛ්‍යාව 225 දක්වා වැඩි විය.
ඒ අනුව 1988 එක් එක් පක්ෂවලට තරග නොකරන නමුත් එක් එක් පක්ෂවලදි නම් කරන පුද්ගලයන් 29 දෙනකුට මැතිවරණ වලදි එක් එක් පක්ෂ ලබාගන්න ඡන්ද අනුපාතය අනුව ජාතික ලැයිස්තුව මඟින් පාර්ලිමේන්තු මන්ත්‍රිවරුන් ලෙස කටයුතු කිරීමට අවස්ථාව ලැබිණි.
ජාතික ලැයිස්තුව මඟින් රටේ සිටි මහාචාර්යවරුන්ට ආචාර්යවරුන්ට සහ විවිධ ක්ෂේත්‍රවලට අයත් විශාරදයන්ට මැති සබයට පැමිණීමට අවස්ථාව ලබාදීම මෙම වැඩපිළිවෙළෙහි ප්‍රධාන අරමුණ විය.
ඔවුන් තුළ ඇති බුද්ධිමත් බව කාර්ය ශූරත්වය හා ජාතිකමය හැකියාව රට සංවර්ධනයට යොදා ගැනීම මෙන්ම කාර්යක්ෂම හා විධිමත් පාර්ලිමේන්තුවක් ස්ථාපිත කිරීම මෙම ජාතික ලැයිස්තු ක්‍රමයේ අනෙක් අරමුණු අතර වෙයි.
1988 දි මහත් බලාපොරොත්තු තබාගෙන හඳුන්වා දුන් මේ ක්‍රමය අනුව 1989 සිට ජාතික ලැයිස්තු මන්ත්‍රිවරු 29ක් පාර්ලිමේන්තුවට ඒ ඒ පක්ෂවලින් නම් කෙරිණි. 1989 - 2010 අතර කාලයේ බොහෝ විට සිදුවී ඇත්තේ දේශපාලන පක්ෂ නායකයන්ගේ සමීප හිතවතුන්ම ජාතික ලැයිස්තුව හරහා පාර්ලිමේන්තුවට පිවිසීමට අවස්ථාව උදා කිරීමයි. ඊට පසු ඒ සමහර දෙනා ඊළඟ මැතිවරණවලදි ක්‍රියාකාරී දේශපාලනයට පිවිස ඡන්දය ඉල්ලා යළිත් පාර්ලිමේන්තු ගොස් තිබේ.
1989 සිට 2020 දක්වා පැවැති මැතිවරණ 7ට අදාළ ජාතික ලැයිස්තුව මඟින් 200 දෙනෙක් පාර්ලිමේන්තුවට පිවිසී ඇත. ඉන් සමහර අය එම ක්‍රියාදාමයේ අරමුණු පසෙක දමා තම පුද්ගල ප්‍රවර්ධනයට එම මන්ත්‍රි ධුරය යොදාගෙන ඇති බව පෙනේ.
1989 දි එක්සත් ජාතික පක්ෂයෙන් ප්‍රථම වරට ඉදිරිපත් කළ ජාතික ලැයිස්තු මන්ත්‍රි නාමාවලියට 15 දෙනෙක් ඇතුළත් වූහ. එස්. තොණ්ඩමන්, රංජන් විජේරත්න, කේ. එන්. චොක්සි, ඒ.එච්.එම්. අස්වර්, ඒ.ආර්. මන්සූර්, කාලිංග ඔබේවංශ හා ඒ.ජේ. රණසිංහ යන මහත්වරු ද ඇතුළත් වූහ.
1989 වසරේදි ශ්‍රීලනිපයට හිමිවූ ජාතික ලැයිස්තු මන්ත්‍රි ධුර ගණන 9කි. මෛත්‍රිපාල සේනානායක, මර්වින් සිල්වා, අනුරුද්ධ රත්වත්තේ, හලිම් ඉෂාක්, සෝමසිරි දිසානායක යන මහත්වරු ඇතුළු පිරිසක් එම ජාතික ලැයිස්තුවට ඇතුළත් වූහ.
මහජන එක්සත් පෙරමුණේ ජාතික ලැයිස්තුවට ගීතාංජන ගුණවර්ධනද, මුස්ලිම් කොන්ග්‍රසයේ ජාතික ලැයිස්තුවට එන්.එම්. බදුර්දීන් ද ද්‍රවිඩ එක්සත් විමුක්ති පෙරමුණෙන් ජාතික ලැයිස්තුවට එම්.එස්. සේනාධිරාජා ද ඇතුළත් වූහ.
මෙලෙස ඒ ඒ පක්ෂවලින් ජාතික ලැයිස්තුව මඟින් පාර්ලිමේන්තුවට ගිය ඉහත අප නම් සඳහන් කළ සියලු දෙනා පසුව මැතිවරණවලදි මන්ත්‍රි ධුර සඳහා මහ මැතිවරණයට ඉදිරිපත් වූහ.
ඒ අනුව අනුරුද්ධ රත්වත්තේ මහතා 2001 මැතිවරණයේදී මහනුවරට පොඑපෙන් තරග කර මනාප 102906ක් ලබා පාර්ලිමේන්තු ගියේ එම ලැයිස්තුවේ ප්‍රථමයා වෙමිනි.
පසුව 2000 මැතිවරණයෙහි එන්. තොන්ඩමන් මහතාගේ පුත් ආරුමුගම් තොණ්ඩමන් මහතා මනාප 61779ක් ලබා නුවරඑළියෙන් පාර්ලිමේන්තුවට පත්විය. ජාතික ලැයිස්තු මන්ත්‍රිවරුන් හැමටම විමධ්‍යගත අරමුදල් ඇතුළු ඡන්දයෙන් පත්වූ මන්ත්‍රිවරුන්ට ලැබෙන සියලු ප්‍රතිපාදන හා වරප්‍රසාද ලැබෙන අතර ඒ අනුව ඔවුන්වත් යම් මැතිවරණ බල ප්‍රදේශයකට සේවය කිරීමට ඉඩකඩ සැලසිණි. ඒ අනුව ඒ ප්‍රදේශයේ ජනතාවගේ මනාප ලබාගෙන යළි මැතිවරණයක් මඟින් පාර්ලිමේන්තුවට යාමට ඔවුන්ට පසුකාලීනව අවස්ථාව ලැබී තිබුණි.
1994 මහ මැතිවරණයේදි ජය ගත්තේ පොදු ජන එක්සත් පෙරමුණයි. ඒ අනුව පොදු ජන එක්සත් පෙරමුණ මඟින් ඔවුන් ජාතික මන්ත්‍රි ලැයිස්තුවට විවිධ ක්ෂේත්‍රවල පුද්ගලයන් 12 දෙනෙකු නම් කරන ලදි. සිරිමාවෝ බණ්ඩාරනායක, මහාචාර්ය ජී.ඇල්. පීරිස්, ධර්මසිරි සේනානායක, ලක්ෂ්මන් කදිරගාමර්, මහාචාර්ය විශ්වා වර්ණපාල, අලවි මවුලානා, බැටී වීරකෝන්, වයි.පී. ද සිල්වා, කේ.ජී. සිල්වා, රවී කරුණානායක, කේසර ලාල් ගුණසේකර හා කේ.බී. රත්නායක යන මහත්ම මහත්මීහු ඒ අතර වූහ.
පසුකාලීනව ඒ අයගෙන් රවී කරුණානායක, කේසර ලාල් ගුණසේකර, මහාචාර්ය විශ්වා වර්ණපාල, මහාචාර්ය ජී.ඇල්. පීරිස් යන මහත්වරු ඊළඟ මැතිවරණ සඳහා තරග කර ජයගත්හ. රවී කරුණානායක මහතා 2000 දි කොළඹින් තරග කර මනාප 145593 ලබා ජය ගත්තේය.
1994 දි එජාප ජාතික ලැයිස්තුවට එස්. තොණ්ඩමන්, අර්ල් ගුණසේකර, ජයලත් ජයවර්ධන, ජී.ඇම්. ප්‍රේමචන්ද්‍ර, රාජිත සේනාරත්න, ආරිය බී රැකව ඇතුළු නම් 13ක් ඉදිරිපත් කර තිබුණි. ඉහත නම් සඳහන් සියලු දෙනා පසුව ක්‍රියාකාරි දේශපාලනයට පිවිසිනි. ජයලත් ජයවර්ධන මහතා 2000 දි මනාප 82130 ලබා පාර්ලිමේන්තුවට තේරී පත්විය. රාජිත සේනාරත්න මහතා තවමත් ක්‍රියාකාරි දේශපාලනයේ නිතර වීම විශේෂත්වයකි. ඔහු 2001 වසරේ කළුතරින් එජාපයට තරග කර 2 වැනි ස්ථානය ලබා මනාප 102919 ක් ලබා පාර්ලිමේන්තුවට පිවිසිනි. 1994 දි මුස්ලිම් කොන්ග්‍රසයට ද ජාතික ලැයිස්තු මන්ත්‍රි අවස්ථා 3ක් ලැබිණි. ඒ අනුව ඒ. රාවුෆ් හකීම්, ඒ අසිත පෙරේරා හා මොහමඩ් සුහයිර් යන මහත්වරු ඒ සඳහා නම් කර තිබුණි. ඒ අතර සිටි හකීම් මහතා තවමත් ක්‍රියාකාරි දේශපාලනයේ නිරත වේ. ඔහු 2001 මැතිවරණයේදි මහනුවරට එජාපයෙන් තරග කර මනාප 71094ක් ලබා එජාප මඟින් පාර්ලිමේන්තුවට තේරී පත්වී ඇත.
2000 මහ මැතිවරණය ජය ගත්තේ පොදු ජන එක්සත් පෙරමුණයි. ඒ අනුව ඔවුනට ජාතික ලැයිස්තු මන්ත්‍රි ධුර 13ක් ලැබුණි. රොනී ද මැල්, විජයපාල මැන්ඩිස්. මහාචාර්ය ලෙස්ලි ගුණවර්ධන, මර්වින් සිල්වා යන මහත්වරු ඇතුළු 13 දෙනෙකුගේ නම් ජාතික ලැයිස්තුවෙන් පාර්ලිමේන්තුවට ඉදිරිපත් කෙරිණ. පසුව ඉහත නම් සඳහන් අය සක්‍රීය දේශපාලනයට පිවිසි අතර මහාචාර්ය ලෙස්ලි ගුණවර්ධන මහතාට විද්‍යා තාක්ෂණ ඇමැති ධුරය ද ලැබිණ.
2001 ඔක්තෝබර් මස පොදුජන එක්සත් පෙරමුණේ පිරිසක් එජාපයට යාම නිසා 2001 දී තවත් මහ මැතිවරණයක් පැවැත්වීමට සිදුවිය. ඒ අනුව එක්සත් ජාතික පක්ෂයට ලැබුණු ජාතික ලැයිස්තු මන්ත්‍රී ගණන 12 කි. පොදුජන එක්සත් පෙරමුණට ජාතික ලැයිස්තු මන්ත්‍රී ධූර 11 ක් ලැබුණි. ඒ අනුව එක්සත් ජාතික පක්ෂය ජාතික ලැයිස්තුවට ඇස්.බී. දිසානායක, මහාචාර්ය ජී.ඇල්. පීරිස්, තිලක් මාරපන, ආර්. යෝග රාජා ද ඇතුළු පිරිසක් ඇතුළත් වූහ.
පොදුජන වත්මන් පෙරමුණු ජාතික ලැයිස්තුව සුවිශේෂී එකක් විය. එය දි.මු. ජයරත්න, රොනී ද මැල්, මහින්ද අමරවීර, ඩිලාන් පෙරේරා, අතුල නිමලසිරි ජයසිංහ (ලොකු අතුල) යන මහත්වරු පොදුජන පෙරමුණෙන් ඉදිරිපත් කර තිබුණි. ඒ අය සියලු දෙනා පසුකාලීන මැතිවරණවලදී පාර්ලිමේන්තු මැතිවරණවලට ක්‍රියාශීලීව ඉදිරිපත් වූහ. ඒ අනුව දි.මු. ජයරත්න මහතා 2004 මැතිවරණයේදී මහනුවරින් එජනිසයෙන් ඡන්දය ඉල්ලා මනාප 64317 ලබා පාර්ලිමේන්තුවට පත්විය. මහින්ද අමරවීර 2004 මැතිවරණයේදී හම්බන්තොටින් එජනිසයෙන් ඡන්දය ඉල්ලා මනාප 63118 ලබා ජය ගත්තේය. ඩිලාන් පෙරේරා මහතා 2004 මැතිවරණයේදී බදුල්ලෙන් ඡන්දයට ඉදිරිපත් වී මනාප 64665 ක් ලබා පාර්ලිමේන්තුවට තේරී පත් විය.අතුල නිමලසිරි ජයසිංහ 2004 දී ගම්පහින් එජාපයෙන් ඉදිරිපත් වී මනාප 12900 ක් ලබා පරාජය විය.
2004 මහ මැතිවරණයේදි යළි ජය ලැබුවේ එක්සත් ජනතා නිදහස් සන්ධානයයි. ඒ අනුව විජයදාස රාජපක්ෂ, රත්නසිරි වික්‍රමනායක, ගීතාංජන ගුණවර්ධන ඇතුළු 13 දෙනෙක් ජාතික ලැයිස්තුවට ඇතුළත් වූහ. විජයදාස රාජපක්ෂ මහතා ද පසුව 2010 මැතිවරණයේදී කොළඹ දිස්ත්‍රික්කයෙන් එජාපයෙන් ඉදිරිපත්වී මනාප 60030 ක් ලබා පාර්ලිමේන්තුවට තේරීපත් විය.
2004 මැතිවරණයේදී එක්සත් ජාතික පක්ෂයට ජාතික ලැයිස්තු මන්ත්‍රීවරු 11 ක් හිමි විය. ඒ අතර සිටි නවීන් දිසානායක මහතා 2015, මැතිවරණයට එජාපයෙන් නුවරඑළියෙන් ඉදිරිපත් විය. මනාප 66716 ක් ලබා පාර්ලිමේන්තුවට තේරී පත්විය.
2010 මහ මැතිවරණයේදී ජයගත් ගත්තේ ද එක්සත් ජනතා නිදහස් සන්ධානයයි. ඒ අනුව 2010 දී ජාතික ලැයිස්තු මන්ත්‍රීවරු 17 දෙනෙකු පත් වූහ. ඒ ප්‍රමාණය ජාතික ලැයිස්තු මන්ත්‍රී ධුර 17 ක සංඛ්‍යාවක් එක් පක්ෂයකට ලැබුණු ප්‍රථම අවස්ථාවයි. දී.මු. ජයරත්න ගීතාංජන ගුණවර්ධන, මුත්තු සිවලිංගම් යන මහත්වරු ඇතුළු පිරිසක් පත්වුණ එම ජාතික ලැයිස්තු මන්ත්‍රී ලේඛනයට ප්‍රවීණ නිළි මාලින‍ි ෆොන්සේකාත් ශ්‍රීලනිපයේ විශාල කාලයක් ක්‍රියාකාරී නායිකාවක වූ කමලා රණතුංගත් ඇතුළත්වීම විශේෂත්වයකි. මෙම ජාතික ලැයිස්තු මන්ත්‍රී ධුර වලට පත්වූ ඩලස් අලහප්පෙරුම මහතා 2020 මාතර දිස්ත්‍රික්කයෙන් තරග කර මනාප 103534 යළි පාර්ලිමේන්තුවට පත් විය.
2010 ජාතික ලැයිස්තුවෙන් එජාපයෙන් නම් කළ පිරිස නව දෙනෙකි. ඒ අතර සිටි හර්ෂ ද සිල්වා මහතා 2020 මැතිවරණයෙන් කොළඹ දිස්ත්‍රික්කයෙන් ජාතික ජනබලවේගයෙන් තරග කර මනාප 182845 ක් ලබා ගෙන මෙවර පාර්ලිමේන්තුවට තේරී පත් වී ඇත.
ජාතික ලැයිස්තු මන්ත්‍රී ධුර ලයිස්තුවලින් පාර්ලිමේන්තු ගිය පුද්ගලයන්ගේ අභිමානයට විශාල කැළලක් වූයේ 2015 දී එක්සත් ජනතා නිදහස් සන්ධානය ඉදිරිපත් කළ ජාතික ලැයිස්තු මන්ත්‍රී ධුර ලේඛනයයි. එම ලැයිස්තුවේ 60% ක් තිබුණේ එම මැතිවරණයේදී පරාජයට පත් පිරිසකි. ලක්ෂ්මන් යාපා අබේවර්ධන, එස්.බී. දිසානායක, ඒ.එච්.එම්. ෆවුසි, මහින්ද සමරසිංහ, ගාමිණි විජිත් විජයමුණි සොයිසා, තිලංග සුමතිපාල යන අය ඒ අතර වූහ.
ඊට අමතරව එම ලැයිස්තුවට ඩිලාන් පෙරේරා, අංගජන් රාමනාදන් යන අය ද එක්ව සිටියහ. එම ජාතික ලැයිස්තුවට නම්කර සිටි අය අතුරින් ඩිලාන් පෙරේරා මහතා 2020 මැතිවරණයට බදුල්ල දිස්ත්‍රික්කයෙන් පොහොට්ටුවෙන් ඉදිරිපත්වී මනාප 53081 ක් ලබා පස් වැනියා බවට පත් වී පාර්ලිමේන්තුවට යාමට අවස්ථාව උදාකරගෙන ඇත.
ඊට අමතරව 2015 ජාතික ලැයිස්තුවට පරාජය ලැබූ අපේක්ෂකයන් ලෙස එක්වූ අතුරින් මෙවර පාර්ලිමේන්තුවට ඡන්දයෙන් තේරී පත්වී ඇත්තේ තවත් දෙදෙනෙක් පමණි. ඒ මහින්ද සමරසිංහ මහතා හා එස්.බී. දිසානායකය. ඒ අනුව මහින්ද සමරසිංහ මහතා කළුතරින් මෙවර ඉදිරිපත්වී මනාප 58514 ක් ලබා එහි අට වැනියා ලෙස පාර්ලිමේන්තුවට තේරී පත්විය. එස්.බී. 2020 දී නුවරඑළියෙන් මනාප 66045 ක් ලබා පාර්ලිමේන්තුවට තේරී පත්විය.
2015 දී එක්සත් ජාතික පෙරමුණේ ජාතික ලැයිස්තුවට නම් කළ සරත් ෆොන්සේකා, 2020 මහ මැතිවරණයට ගම්පහ දිස්ත්‍රික්කයෙන් සමගි ජනබලවේගයෙන් ඉදිරිපත් වී මනාප 110553 ක් ලබා සමගි ජනබලවේගයේ ප්‍රථමයා වීම ද විශේෂත්වයකි.
මේ අනුව සමස්ත ලෙස බලන විට 1988 දී මේ ජාතික ලැයිස්තු සංකල්පය ඉදිරිපත් කිරීමේ මූලික අරමුණු හරියට ඉටුවී ඇත්තේ මෙවර 2020 ශ්‍රී ලංකා පොදුජන පෙරමුණ ඉදිරිපත් කළ ශ්‍රී ලංකා ජාතික ලැයිස්තු නාමාවලියෙන් පමණක් බව කිව යුතු ය. එයට හේතුව එය මහාචාර්ය වරු 4 දෙනෙක්ගෙන් ජනාධිපති නීතිඥවරයෙක් ගෙන් ආචාර්යවරුන්ගෙන් විශේෂඥ වෛද්‍යවරුන්ගෙන් ඉංජිනේරුවරුන්ගෙන් හා සමාජ ක්‍රියාකාරිකයන්ගෙන් ද සමන්විත වීම නිසා ය. ඒ අනුව මේ ජාතික ලැයිස්තුවට මුල් අරමුණ අනුව විද්වතුන් පමණක් ඉදිරිපත් කරන්නේ නම් එය රටේ ප්‍රගතියට ඉමහත් සෙතක් ම වනු ඇත. එසේ නැතිව ජාතික ලැයිස්තුවට පත්කරන අයත් දේශපාලනඥයන් පමණක් වුවහොත් එය රටට වැඩක් නැති වනු ඇත.
