මාධ්‍යයේ හා දේශපාලනයේ බොහෝ සමානකම් තියෙනවා. ඔබ එය හඳුනාගෙන තිබෙනවාද?
ඇත්තටම ඔබ කියූ ආකාරයට මම මාධ්‍යකරුවෙක් විදියට දේශපාලනයට යොමු වෙන්නත් එක් හේතුවක් තමයි මේ දෙක අතර තිබෙන බොහෝ සමානකම්. මාධ්‍යවේදියා සමාජ ශෝධකයකු ලෙස කටයුතු කරනවා වගේම දේශපාලකයන් සමාජ ශෝධකයකු හා සමාජ ප්‍රගමනයේ නියමුවකු ලෙස කටයුතු කරන්න ඕනේ. මම හිතන්නේ මාධ්‍යවේදියකු ලෙස මම සමාජයට කරන්න උත්සහ කළ මෙහෙවර දෙතුන් ගුණයකට වැඩියෙන් දේශපාලනඥයෙක් ලෙස ඉටු කරන්න පුළුවන් කියලයි.
පවතින දේශපාලන සංස්කෘතිය තුළ ඔබේ අපේක්ෂාව ඉටු කරගන්න පුළුවන් කියල ඔබ විශ්වාස කරනවාද?
අපේ රටේ විතරක් නොවෙයි. ලෝකයේ ම දේශපාලනය දූෂිත තත්ත්වයට පත්වෙලා. නමුත් ඒ අතර ඇතැම් දේශපාලනඥයන් තමන්ගේ කාර්ය අවංකව ඉටු කරනවා. මඩගොහොරුවක නෙළුම් මල් පිපුණට නෙළුම් මලේ මඩ තැ‍වරෙන්නෙ නෑනේ. ඒ වගේ මම උත්සාහ කරන්නෙ මේ පවතින දේශපාලන සංස්කෘතිය තුළ අපි අපිටම අවංකව හෘදය සාක්ෂියට එකඟව කටයුතු කරන්නයි. ඒක කරන්න ටිකක් අමාරු වෙයි. එහෙම වුණත් ඒ දේ කරන්න මම කැප වෙනවා.
ඔබත් පිළිගන්න මේ දූෂිත දේශපාලන සංස්කෘතිය වෙනස් කරන්න බැරිද?
ඇත්තටම බැරි කමක් නෑ. ඒකට ඉවසීමෙන් හා උපක්‍රමශීලීව කටයුතු කරන්න ඕනේ. ජනාධිපති ගෝඨාභය රාජපක්ෂ දැනටමත් ඒ සඳහා එතුමාගේ කටයුතුවලින් ම ආදර්ශ සපයමින් ඉන්නවා. එතුමා ජනාධිපතිවරණයේදීවත් ඉන්පසුවවත් තමන්ගේ විරුද්ධවාදීන් විවේචනය කරලා අතීත වැරදිවලට ඔවුන්ට ඇඟිලි දිගු කරලා කාලය කා දමන්නෙ නෑ. ගෝඨාභය රාජපක්ෂයන් තමන්ගේ ප්‍රතිපත්තිය ගැන ජනතාව දැනුම්වත් කරමින් ඒ අනුව කටයුතු කරමින් රටටත් ජනතාවත් නිවැරැදි සංවර්ධන මාවතකට ගෙන එන්න උත්සාහ කරනවා. මේ මැතිවරණයේදී අපි ජනතාවගෙන් ඉල්ලන්නේ ජනාධිපතිවරයාගේ ඒ උත්සාහයට සහය දෙන්න කියලයි. එහෙම වුණොත් දේශපාලන ආර්ථික සමාජයීය සංස්කෘතික, අධ්‍යාපනික යන මේ හැම ක්ෂේත්‍රයකම විශාල වෙනස්කම් ඇති කරලා රට නිදහස් නිවහල් ස්වෛරී සෞභාග්‍යවත් රටක් බවට පත් කිරීමේ දැවැන්ත කාර්යය මල්ඵල ගන්වා ගන්න පුළුවන්.
පොරොන්දු දේශපාලනයෙන් එහා ගිය ප්‍රතිපත්ති දේශපාලනය තුළ ඔබගේ අනාගත අපේක්ෂාව කුමක්ද?
ඇත්තටම මම දේශපාලනයට ඇවිල්ල කළුතර දිස්ත්‍රික්කය තෝරා ගත්තේ මේ දිස්ත්‍රික්කයේ ජනතාව මුහුණදී ඇති ගැටලුවලට විසඳුමක් දෙන්න පුළුවන් කියල හිතාගෙනයි. අගමැති මහින්ද රාජපක්ෂයන්ගේ ආශිර්වාදයෙන් කළුතර දිස්ත්‍රික්කය නියෝජනය කරන ශ්‍රී ලංකා පොදුජන පෙරමුණේ අපේ කණ්ඩායම සමඟ එකතු වෙලා කළුතර ජනතාව ගේ ඇත්ත ප්‍රශ්නවලට විසඳුම් හොයන්න ඕනේ. මම විශ්වාස කරනවා අපිට මේ මැතිවරණයෙන් ජයගෙන කළුතරට මෙතෙක් ඉටු නොවූ සේවාවක් කරන්න පුළුවන් කියලා. මොකද මම දන්නවා අගමැති ජනපති දෙදෙනාම කළුතර ගැන වැඩි අවධානයක් යොමු කරලා මේ දිස්ත්‍රික්කයේ ජනතා ප්‍රශ්න විසඳන්න පියවර ගන්නවා කියලා.
කළුතර දිස්ත්‍රික්කයේ සංචාරක කර්මාන්තය නංවාලන්න ඔබට වැඩපිළිවෙළක් තියෙනවාද?
ජනාධිපති ගෝඨාභය රාජපක්ෂයන්ගේ සෞභාග්‍යයේ දැක්ම ප්‍රතිපත්තිය ඇතුළෙ මෙරට සංචාරක කර්මාන්තය දියුණු කිරීම පිළිබද ප්‍රායෝගික මඟපෙන්වීම් කරලා තියෙනවා.ඒ අනුව මුළු රටේම සංචාරක කර්මාන්තය දියුණු කරන්න රජය සැලසුම් සකස් කරද්දී අපිත් ඊට මැදිහත් වෙලා කළුතර සංචාරක කර්මාන්තය නැවත නඟා සිටුවන්න අපි මැදිහත් වෙනවා.ඒ වාගේම කොවිඩි 19 වසංගතය නිසා අපේ රටේ කෘෂිකර්මය නැවත පුනර්ජීවයක් ලැබුවා. මේ තත්ත්වය දිගටම පවත්වා ගෙන යන්න අපි ස්ථිරසාර වැඩ පිළිවෙලක් හදනවා. ඒ වාගේම කළුතර මැණික් කර්මාන්තය හා සුළු හා මධ්‍යම පරිමාණයේ කර්මාන්ත වැඩි දියුණු කරල දිස්ත්‍රික්කයේ උගත් තරුණ තරුණියන්ට රැකියා අවස්ථා සුලබ කරන්නත් අපි පියවර ගන්නවා.
ඔබ ඔය කියන කොයි දේ කරන්නත් පාර්ලිමේන්තුවේ බහුතරය ලබා ගන්න ඕන. ඔබේ තක්සේරුව අනුව දිවයිනේම කොපමණ ආසන ප්‍රමාණයක් ශ්‍රී ලංකා පොදුජන පෙරමුණට ලබා ගන්න පුළුවන්ද?
බහුතරය ගැන නොවෙයි අපේ තක්සේරුව තිබෙන්නේ. අපි මේ මැතිවරණයෙන් තුනෙන් දෙකක බලයක් ලබා ගන්නවා.ඒකයි අපේ තක්සේරුව. සමහරු කියනවා අපිට තුනෙන් දෙකක බලය ලබා ගන්න බෑ කියල. නමුත් 2018 පළාත් පාලන මැතිවරණයේ ප්‍රතිථල හා 2019 ජනාධිපතිවරණයේ ප්‍රතිඵල සංසන්දනාත්මකව බලල අපිට පුළුවන් නිගමනයකට එන්න. ඒ මැතිවරණවල ප්‍රතිඵල අනුව අපි මෙවර අනිවාර්යයෙන්ම පාර්ලිමේන්තුවේ තුනෙන් දෙකක බලය ලබා ගන්නවාමයි.
