දියවන්නාවට නිතරඟයෙන් යන්න හදන බදුල්ලේ කටකාරයාට කරදරයිලු
කොළ පාටියේ ගොඩක් වැඩ දාලා බදුල්ල පළාතෙන් දියවන්නාවට පැන ගන්න හාදයා කාටත් මතකයිනේ.
එයා නිල් පාටිය පැත්තට සෙට් වෙන්න කාලයක් දැඟලුව කියලත් කියනවා. මෑන් කොහොමත් පනින්න හරිම දක්ෂයි. ඒ නිසාම දැන් පුතාණෝ එක්ක කරේ අත දාගන්න ගමන්මයිලු. පුතාණෝ රජ්ජුරුවෝ හැටියට රට වැසියා තෝරාගන්නා දවසට තමන් අනිවාර්යෙන් ම යුව රජ හැටියට කිරුළු දරන බව තමයි මේ හාදයා නිතර නිතර තමන්ගේ ළඟ ඉන්න ඇත්තන්ට කියනවා කියන්නේ. බදුල්ල දිහාට සුරූපිනියක් තරග කරන නිසා බදුල්ල පැත්තේ වැඩියේ කරක් ගහන්න මෑන් කැමති නැතිලු.
කොහොම වුණත් තරග නොකර පුතාණෝගේ පානෙන් මේ සැරේ දියවන්නාවට පනින්න මෑන් ලෑස්ති වෙච්ච නිසා පුතාණෝගේ පාටියේ නිතර නිතර මෑන්ට කැපිලි තියනවා කියලයි ආරංචිය.
දේශපාලන නායකයන් නිවසට එනවිට ක්‍රිකට් ක්‍රීඩකයා සැඟවිලා
ශ්‍රී ලංකාව ක්‍රිකට්වලින් බැබළවූ ක්‍රීඩකයන් කිහිප දෙනෙකුම පසුගිය කාලේ දියවන්නාව පැන්න කියල රට වැසියන්ට හොඳටම මතකයිනේ. ඒ අතර සිටි බොහෝ දෙනෙකු කාටත් නොකියාම දියවන්නාවෙන් එළියට ඇවිත් රට පාලනය ගැන වචනයක්වත් කතා නොකර සිටින්නට වග බලා ගත්තලු. ඒ වෙන කිසිවක් නිසා නොවෙයි. දියවන්නාවේ ඇතුළතදී මෙන් ම පිටතදී වන වංචා දූෂණ ඉවසගන්න බැරිවයි කියලා බොහෝ දෙනෙක් කියන්නේ.
මෙවර මැතිවරණය ආරම්භ කිරීමටත් කලින් ක්‍රිකට් මහත්තයෙක් දියවන්නා සටනට එනවා කියලා ජනමාධ්‍ය, සමාජ මාධ්‍ය ඔස්සේ නිතර නිතර කතා කරාලු. හැබැයි දැන් ඒ ක්‍රීඩකයා හොයාගන්නත් නැහැයි කියලයි කියන්නේ.
ප්‍රධාන පාටිවල ලොකු ලොක්කෝ හරි හරියට මෑන්ව හමුවෙලා. දේශපාලන වේදිකා‍වට එන්න කිව්වට මෑන් එන්න කැමැති නැතිලු.
ගාල්ලේ මනාප සටන මුහුණු පොතින් ඇවිළෙයි
ගාල්ල පළාතේ වැදගත් යැයි කියා කියා ගන්නා හතර පස් දෙ‍නකුම මේ දිනවල මනාප පොරේට ලොකු ලොකු ගේම් ගහනවා කියලයි ආරංචිය. දියවන්නාව කලක සිට නියෝජනය කරපු කිහිප දෙනෙකුම මේ සටන නිසා මුහුණ බලන්නේ නැතැයි කියලයි කියන්නේ.
පොහොට්ටු පාටියේ දැවැන්තයන් ලෙස පෙනී සිටින හිටපු දියවන්නා සාමාජිකයින් මෙලෙස ඇණ කොටා ගන්නා බව මහරජුටත්, යුවරජුටත් කන වැටිලාලු. මේ සැට් එක සැට් කරන්න ලොකුම තැනින් නොයෙක් ක්‍රියාමාර්ග ගත්තත් ඒවා අසාර්ථකයි කියලයි ගාල්ල පැත්තේ ඇත්තෝ කියන්නේ. නිල් පාටියට ගොස් නැවත පොහොට්ටු පාටියට පැමිණි බව කියමින් හිටපු දියවන්නා සාමාජිකයෙකුට හොඳටම පහර දෙනවා කියලා මුළු ගාල්ලම දන්නවලු. මේ අතර පොහොට්ටු පාටියේ ප්‍රබලයින් දෙදෙනකු සහ තවත් හිටපු දියවන්නා සාමාජිකයකු අතර මුහුණු පොතින් මහා යුද්ධයක් ආරම්භ කර ඇති බව ගාල්ල පැත්තේ තරුණ තරුණියන් නිතර කියනවා කියලයි ආරංචිය. මේ වෙනුවෙන් මුහුණු පොතේ දස දහස් ගණන් මඩ ප්‍රචාර ප්‍රචාරය තරනවා කියලත් බොහෝ දෙනා කතා වෙනවලු.
බදුල්ලේ නිළියට සද්දේ වහල ඉන්න කියයි
දියවන්නාවට, එක එක විදියට රඟපාන නළු නිළියන් ඇතුළු වුණානේ. මේ කිසිවෙක් කලාකාරියන්ට කිසිදු සේවයක් නොකරන බවයි වැඩිහිටි ශිල්පීන් බොහොමයක් කියන්නේ. ඒ වගේ ම තවත් නළු නිළියන් රැසක්ම කලාවට සේවයක් කරන බව පවසමින් දියවන්නාවට පැමිණියාට කිසිදු දෙයක් තමන්ට ඒ වෙනුවෙන් කිරීමට නොහැකි බව දියවන්නාවෙන් නික්මුණු පසු ප්‍රකාශ කරන බව තවත් කලාකරුවන් රැසකගේ ම මතයයි. මෙවර බදුල්ල පැත්තෙන් දියවන්නාවට රංගන ශිල්පිනියක් පැමිණෙනවා කියලයි ඒ පළාතෙන් ආරංචිය.
ජනප්‍රිය රංගන ශිල්පිනියක් නිසා ඇයත් කලාවට බොහෝ දේ කරනවා කියලා වේදිකාවලදී කියනවාලු. සුරූපිනියගේ කටේ බ්‍රේක් නෑ කියලයි ආරංචිය. ඇය පොහොට්ටු පාටියේ ජ්‍යෙෂ්ඨයන්ට හානි වන අයුරින් නොයෙක් ප්‍රචාරයන් සිදු කරනවා කියල ඒ පාටියේ ජ්‍යෙෂ්ඨයන් බොහෝ දෙනකු යුව රජුට පැමිණිලි කරල කියලත් ආරංචියි. දියවන්නාව නියෝජනය කරපු තරුණ මන්ත්‍රීවරු කිහිප දෙනෙක්ම සුරූපිනියට කට වහන්න කියලා සද්දයක් දැම්මලු.
ඇමෙරිකාවේ නව ජනාධිපති ඔසාමා බිල්ලාඩන් බව රතු පාටිය කියයි
දියවන්නාවට තරග වැදුණු රතු පාටියේ අය හැමදාම හොඳ විනයක් ඇතිව තරග කරා කියල රටේ ජනතාව අතර ප්‍රසිද්ධ.
මේ අය කවුරුත් මනාප පොරයක නැති බවත් සෑම විටම පාටිය වෙනුවෙන් කටයුතු කරන බවත් රතු පාටියේ නායකයින් නිතර නිතර කියනවා කියලයි කියන්නෙ. මේ වනවිට ඒ තත්ත්වය සම්පූර්ණයෙන් ම වෙනස් වී ඇති බව රතු පාටියේ ආධාර කරුවන් අතර කියවෙනවාලු. දැන උගත් බුද්ධිමත් යැයි කියන කාන්තාවන් රතුපාටිය නියෝජනය කරමින් රූපවාහිනී පෙට්ටියේ වැඩසටහනකදී ගොඩක් නාගත්ත කියල මේ දිනවල සමාජ මාධ්‍යවල ප්‍රචාරය වෙනවා කියලයි කියන්නේ.
ඇමෙරිකාවේ ජනාධිපති ඔසාමා බිල්ලාඩන් බව මේ කාන්තාව දිගින් දිගටම රූපවාහිනි වැඩසටහනේදී ප්‍රකාශ කරයි කියල රතුපාටියේ ජ්‍යෙෂ්ඨයන්ට හොඳටම තරහ ගිහිල්ලා කියලයි ආරංචිය.
කොළ පාටියේ මූලස්ථානය නිසා පුතාණෝ දෙලොවක් අතර තනි වෙයි
පුතාණෝගේ පාටියේ අභ්‍යන්තර ගැටුම් එන්න එන්නම වැඩිවෙනවා කියලයි ආරංචිය. කොළ පාටියේ මූලස්ථානය කෙසේ හෝ තමන්ගේ බලයට නතු කරගන්න ඕනමයි කියලා පුතාණෝ පාටියේ චණ්ඩි කිහිප දෙනෙක්ම පුතාණෝට යෝජනා කරාලු.
මේ යෝජනාවට ඒ පාටියේ ම තවත් කට්ටියක් දැඩි විරෝධතාවයක් දක්වන නිසා පාටින් ඇතුළේ එන්න එන්නම ගැටලු වැඩි වෙලා කියලයි ආරංචිය. කොළ පාටියේ ඇත්තන්ට ඔවුන්ගේ මූලස්ථානය තියාගන්න කියලා අපි අලුත් මූලස්ථානයක් හදමු කියලා පුතාණෝ ළඟින් ම ඉන්න දියවන්නාව නියෝජනය කරපු කට්ටියක්ම කියනවාලු.
නෑ අපි කොළ මූලස්ථානය ඡන්දෙට කලින් අල්ලගමු කියලා තවත් නායකයින් කිහිප දෙනෙකුම කියනවා කියලත් ආරංචියි. මේ ගැටුම නිසා පුතාණෝ දෙලොවක් අතර තනිවෙලා කියලයි කියන්නේ.
