කුමාරතුංග මුණිදාස ශූරින්ගේ මුණුබුරකු වන ඔබ මෙරට අද පවතින දේශපාලන සංස්කෘතිය ගැන මොනවද හිතන්නෙ?
අපේ රටේ අද පවතින දේශපාලන සංස්කෘතිය නම් ඉතාම නරක දුර්වල තත්ත්වයට පත් වෙලා තියෙන්නෙ.මේක කොතරම් දරුණු පරිහානියක්ද කියල අවබෝධ කර ගන්න තිබෙන හොඳම උදාහරණය තමයි දේශපාලන පක්ෂ සමාජය ඉදිරියේ කරන ඇතැම් විවේචන අවංකව කරන විවේචන බව පෙන්වන්න කරන රඟපෑම. අනෙක් කාරණය ඉකුත් යහපාලන නඩය මාදුළුවාවේ සෝභිත නාහිමියන් සමඟ ඇති කර ගත් එකඟතා අද වෙන කොට මොකද වෙලා තිබෙන්නේ. අනෙක සමහර මන්ත්‍රීවරුන් ගේ හැසිරීම් ගැන කියවෙන හඬපට සමාජ ගතවීමේදි ඉන් ප්‍රදර්ශනය වූ කරුණු දිහා බැලුවම අපේ රටේ දේශපාලන සංස්කෘතිය මොනතරමි පිරිහීමට ලක්වෙලාද කියල තේරුම් ගන්න පුළුවන්. සමාජය නිවැරදි කරන්න ඕන කියල හඬ නඟන අයම නැවත නැවත සමාජයට වැරදි කරන අයට නාම යෝජනා ලබා දීලා ඔවුන් මහජන නියෝජිතයන් බවට පත් කරන්න ගන්නා උත්සාහයම අපේ දේශපාලන සංස්කෘතිය කොතරම් පිරිහිලාද කියල පෙන්වා දෙන හොඳ සාධකයක්.
ඔබත් ගරු කරන මෙරටේ හැට නම ලක්ෂයක ජනතා විශ්වාසය දිනා ගත් ගෝඨාභය රාජපක්ෂ ජනාධිපතිවරයා මේ තත්ත්වය වෙනස් කරයි කියල ඔබ විශ්වාස කරනවාද?
ගෝඨාභය රාජපක්ෂයන් ජනාධිපති අපේක්ෂකයා ලෙස ඒ මැතිවරණයට මුහුණ දෙමින් ප්‍රදර්ශනය කළ බොහෝ කරුණුවලින් අපේ රටේ බහුතර ජනතාවට විශ්වාසයක් ඇති වුණා එතුමා මේ රටේ දේශපාලන සංස්කෘතියේ පමණක් නොව බොහෝ ක්ෂේත්‍රයන්හි වෙනසක් ඇති කරාවී කියලා. ඒ නිසාමයි එතුමාට ජනාධිපතිවරණය ජයග්‍රහණය කරන්න පුළුවන් වන්නේ. ඒ වාගේම එතුමා ජයග්‍රහණය කළාට පසුවත් මේ දක්වා කටයුතු කර තිබෙන ආකාරය අනුවත් සත්‍ය වශයෙන්ම මෙරට දේශපාලන සංස්කෘතියේ විශාල වෙනස්කම් රැසක් ඇති කරමින් ඉන්නවා. ඒ අනුව අපිට ලොකු විශ්වාසයක් තිබෙනවා ගෝඨාභය රාජපක්ෂ ජනාධිපතිවරයා මේ රටේ අපේ අනන්‍යතාවය රකිමින් විශාල වෙනසකට යොමු කරයි කියලා.
අපේ රටේ ඩීල් දේශපාලනයත් මේ වෙන කොට ජනප්‍රිය මාතෘකාවක් බවට පත්වෙලා. යහපාලනය රාජපක්ෂවරු හොරු කිව්වා. ඔබලාත් යහපාලනයේ බහුතරය හොරු කියනවා. මේවා චෝදනා විතරයි. ඉන් එහාට මොකුත් වෙන්නේ නැද්ද?
ඇත්තටම යහපාලන රජය රාජපක්ෂවරු හොරු කියලා ඔප්පු කරන්න උත්සාහ කළේ සත්‍ය කරුණු පදනම් කර ගෙන නොවන බව මේ වෙන කොට ඔප්පු වී තිබෙනවා. නමුත් අපි යහපාලනයේ බහුතරය හොරු කියල ඔප්පු කරන්න ප්‍රමාණවත් සාක්ෂි ඉදිරිපත් කරලා තිබෙනවා. දැන් ගෝඨාභය රාජපක්ෂ ජනාධිපතිවරයා මේ චෝදනා සම්බන්ධයෙන් අපක්ෂපාතීව ස්වාධීනව විමර්ශන කටයුතු කරන්න අවශ්‍ය පසුබිම සකස් කර දීල තිබෙනවා. දේශපාලන වෛරයකින් හෝ පෞද්ගලික කෝන්තරයක් නිසාවෙන් බොරු චෝදනා ගොතලා පුද්ගලයන් අපහසුතාවට පත් කරන්න ජනාධිපතිවරයා කටයුතු නොකරන බව හොඳටම පැහැදිලියි. මහ බැංකුවේ හොරකම ගැනත් පාස්කු ප්‍රහාරය ගැනත් දැන් ඉතා වැදගත් කරුණු හෙළි වෙමින් පවතින්නේ ඒ පිළිබඳව කෙරෙන විමර්ශන ඉතාම ස්වාධීනව කෙරෙන නිසයි. මේ විමර්ශන අවසන් වෙන කොට වරදකරුවන් ගැන සමාජය දැන ගනීවී. ඒ නිසා අපේ චෝදනා නිරපරාදේ ගොනු කළ චෝදනා නොවන බව දැනටම තහවුරු වී තිබෙනවා. මම එක උදාහරණයක් විතරක් කියන්නම්. ඔබටත් මතක ඇති ස්විට්සර්ලන්ත තනාපති කාර්යාලයේ සේවිකාවක පැහැර ගත්තාය ඒකට ගෝඨාභය රාජපක්ෂ සම්බන්ධයි කියමින් මහ කලබලයක් ඇති කළා. ඒ වෙලාවෙ ඒ චෝදනාවලට මාධ්‍ය හමු තියල උත්තර දෙන්න නොගිය ගෝඨාභය රාජපක්ෂයන් ඒ චෝදනාව අතේ රෝලක් බව කරුණු සහිතව ඔප්පු කළානේ. ඒ වාගේ හැම දෙයකම ඇත්ත නැත්ත ඉදිරියේදී ජනතාවට දැන ගන්න අවස්ථාවක් උදා වේවි.
ඔබ නියෝජනය කරන යුතුකම සංවිධානයේ දේශපාලන ප්‍රතිපත්තිය මොකක්ද?
අපි බෞද්ධයන් ලෙස විශ්වාස කරනවා මනුෂ්‍යයින්ට උත්තරීතර තත්ත්වයට පත්වෙන්න පුළුවන් වගේම ඉතාම නරක අඳුරු අගාධයකට ඇද වැටෙන්නත් පුළුවන්. 2015 දී අපි දැක්කේ මේ රටේ ජනතාව බලෙන් අර අඳුරු අගාධයකට ඇද දමන්නට ඇතැම් පිරිස් උත්සාහ කරන බවයි. ඒ වෙලාවෙ අපි මිතුරන් කීප දෙනෙක් එකතු වෙලා මේ ගැන සමාජ කථිකාවක් ඇති කරන්න තමයි සංවාද කවය නමින් සංවිධානයක් හදා ගත්තේ. දේශපාලන වෙනස් වීම් සාමාන්‍ය දෙයක් වුවත් මෙරට ඇති වූ දැවැන්ත සංවර්ධන ව්‍යාපෘතිවලින් ඇස්පනාපිට ජනතාව පහසුකම් බුක්ති විඳින බව දැක දැක සාධාරණ කරුණු වලින් තොරව ඒ කටයුතු නිර්දය ලෙස විවේචනය කිරිම අපිට බලා ගෙන ඉන්න බැරි වුණා. අධිවෙිගී මාර්ග පද්ධතිය අතිශයින්ම ජනතාවට මහත් අස්වැසිල්ලක් වු බව පෙනි පෙනී ඒවායෙන් ගසා කෑවා යැයි චෝදනා කරමින් ජන මනස වෙනස් කරන්නට දැරූ උත්සාහ ව්‍යර්ථ කර ජනතාවට සත්‍ය පසක් කරන්නට තමයි අපි සංවිධානය වුණේ. අපි එදා මෛත්‍රීපාල සිරිසේනයන් ගේ හැසිරිම අපේ සමාජ සංස්කෘතියට කොයි තරම් ගෝචරද කියල එදා අපි ප්‍රශ්න කළා. එහෙම ආරම්භ වුණ අපේ සංවිධානයට විශාල දේශපාලන ඉලක්ක නෑ. අපි උත්සාහ කරන්නෙ අපේ දේශපාලන හර පද්ධතීන් රැක ගනිමින් හරි දේට හරි කියන ගමන් වැරදි දේ වැරදියි කියල පෙන්නලා ඒවා නිවැරදි කර ගන්නයි.
ඔබ ඔය කියන අපේ සංස්කෘතික හර පද්ධතිය තුළම මිනිසුන් බෙදිලා එකිනෙකා ඇන කොටා ගන්න තත්ත්වයට පත් වුණේ අපේ දේශපාලනඥයන් ගේ වරදින්ම නොවෙයිද?
නෑ; ඒක සියයට සියයක්ම එහෙම වුණා කියල අපිට කියන්න බෑ. මොකද අපි යටත් විජිතයක් වුණාට පස්සේ බ්‍රිතාන්‍යයන් අපේ මිනිසුන් ගේ සිතුම් පැතුම් වෙනස් කරලා තිබෙනවා. මේ නිසා අපේ ජනතාවට තමන්ගේ දේවල් තමන් ගේ කියන හැඟීමෙන් බලන්න බැරි මානසික විකෘතියක් ඇති වෙලා තිබෙනවා. එවැනි මානසික තත්ත්වයකින් පෙළෙන අයට පාලන බලය ලැබුණාම දේශීයත්වය ගැන හැඟීම නැතිව කටයුතු කරන්න පෙලඹෙනවා. බණ්ඩාරනායක ඝාතනයේ සිට ඒ මානසික විකෘතියේ ප්‍රතිඵලයන් අදටත් අපේ සමාජයේ වරින් වර මතු වෙනවා. මේ තත්ත්වය අපි විසින්ම වෙනස් කර ගත යුතුයි. අපි මේ කරන්නේ ඒ වෙනස් කර ගැනීමට සහය වීමක්.
මහින්ද රාජපක්ෂයන් ගේ පනස් වසරක දේශපාලන දිවිය අර්ථාන්විත වීමට යැයි කියමින් ඔබලා කොන්දේසි ඉදිරිපත් කර තිබුණා. ඇයි ඒ. ඒක සාධාරණද?
නෑ, ඒ පිළිබඳ ඔබේ විග්‍රහය සාධාරණ නෑ. අපිට උරුම උදාර ඉතිහාසය තුළ සුවිශේෂි නායකයෙක් විදියට තමයි මහින්ද රාජපක්ෂයන් අපි දකින්නෙ. එතුමා අවස්ථා තුනකදී අපේ රටේ ගමන් මඟ වෙනස් කරල තියෙනවා. ඔබටත් මතක ඇති අසුව දශකයේ එජාපය හා ජවිපෙ අතර ගැටුමෙන් නිර්මාණය වු භීෂණයෙන් රටේ ජනතාව මුදවා ගන්න එදා සාමාන්‍ය මන්ත්‍රීවරයකු ලෙස එතුමා පෙරමුණ ගත්තා. ඉන්පසුව 2005 පැවති ජනාධිපතිවරණය ජයගත් එතුමා මේ රටේ ත්‍රස්තවාදී යුද්ධය අවසන් කරලා ශ්‍රී ලාංකික ජනතාවට බියෙන් සැකෙන් තොරව ජිවත් වීමට හැකි සමාජ පරිසරයක් හැදුවා. ඒක ලෝක දේශපාලන නායකත්වය ගැන සලකද්දීත් සුවිශේෂි තත්ත්වයක්. ඊටත් වඩා සුවිශේෂි කාරණාව තමයි 2015 කුමන්ත්‍රණයෙන් එතුමා පරාජය වෙලා දේශපාලන නායකත්වය අහිමි වු මොහොතේ නැවත තමන්ට රටේ නායකත්වයට එන්න බැරි බව දැන දැනම මෙරටේ දේශප්‍රේමි ජනතාව එක්ක එකතුව තමන් ගේ සහෝදරයා රටේ නායකයා බවට පත් කර ගන්න කරපු විශාල කැප කිරිම. අපේ රටේ දේශපාලන ඉතිහාසය දිහා බැලුවම එවැනි කැපකිරීමක් කර ඇති එකම නායකයාත් මහින්ද රාජපක්ෂයන්ම පමණයි. එවැනි නායකයකු ගේ දේශපාලන භූමිකාව අනාගත පරපුරට වඩා අර්ථාන්විතව විග්‍රහ කර ගන්න බැරි කරුණු කීපයක් තිබෙනවා. එතුමා ගේ සමස්ත දේශපාලන කැපකිරීම ඒකීය රාජ්‍යයක් සඳහා නම් අපි කියන්නේ ඒකීය රාජ්‍ය සංකල්පයට එරෙහි ආණ්ඩුක්‍රම ව්‍යවස්ථා සංශෝධන සියල්ල ඉවත් කළ යුතුයි කියලයි. ඒ අනුව 13,16, හා 19 යන ආණ්ඩුක්‍රම ව්‍යවස්ථා සංශෝධන ඉවත් කළොත් පමණයි මහින්ද රාජපක්ෂයන් ගේ දේශපාලන දිවිය වඩාත් අර්ථාන්විතව සමරන්න පුළුවන්නෙ.
ඉකුත් ජනාධිපතිවරණයට අනුව මෙරටේ ජනතාවගේ දේශපාලන භාවිතය යම් වෙනසකට භාජනය වෙලා කියල ඔබ පිළි ගන්නවාද?
ඔව්, ඒ වෙනස ජනතාව ගේ පැත්තෙන් වගේම ජනාධිපති අපේක්ෂක ගෝඨාභය රාජපක්ෂ තුළිනුත් අපි දැක්කා. මෙතෙක් පැවැති මැතිවරණවලදී අපි දැක්කේ දේශපාලන වේදිකාව වෙන් වුණේ එකිනෙකා විවේචනය කරමින් පොරොන්දු පත්‍ර ඉදිරිපත් කරන්නයි. නමුත් ප්‍රථම වතාවට තමයි අපේක්ෂකයා ගේ රුව සහිත බැනර් පෝස්ටර් සැරසිලි නැතුව දේශපාලන වේදිකාවෙ කිසිවකුට ඇඟිල්ල දිගු නොකර කිසිවකු විවේචනය නොකර තමන් ගේ ප්‍රතිපත්ති ගැන පමණක් කතා කරල මැතිවරණ ව්‍යාපාරයක් දියත් වුණේ. ඒ වගේම ජනතාව ගේ පැත්තෙනුත් දේශපාලන පළපුරුද්දක් ගැන නොසලකා සාම්ප්‍රදායික දේශපාලන පක්ෂයක්ද කියන හැඟීමෙන් තොරව ජාතිකත්වය පෙරටු කරගෙන ජනතාව ඡන්දය පාවිච්චි කරල තිබෙනවා. ඒකයි අපි කියන්නේ මේ ආරම්භය මේ රටේ සෑම ක්ෂේත්‍රයකම විශාල වෙනසත් ඇති කරන ආරම්භයක් කියල.
ජනාධිපති ගෝඨාභය රාජපක්ෂයන් මේ මැතිවරණයේ දී රාජ්‍ය ආයතන ප්‍රධනීන්ට හා රාජ්‍ය නිලධාරීන්ට ප්‍රසිද්ධ දේශපාලනය තහනම් කරල තිබෙනවා. ඒ ගැන ඔබ මොනවද කියන්නේ?
ඇත්තටම ජනාධිපතිවරයා මේ තහනම මඟින් කරල තිබෙන්නේ රාජ්‍ය අංශයේ අයට දේශප්‍රේමි දේශපාලනයේ නියැළෙන්නට අවකාශයක් ඇති කර තිබීමයි. රාජ්‍ය සේවකයන් පක්ෂ දේශපාලනය නොකර රට ගැන හැඟීමෙන් තම රජකාරිය ඉටු කිරීම තමයි දේශප්‍රේමි දේශපාලනය. මේ මගින් ජනාධිපතිවරයා දේශපාලන පද්ධතියේම විශාල වෙනසක් ඇති කරල තිබෙනවා. මෙය රට ඉදිරියට ගමන් කරන බවට හොඳ සාධකයක්. ඒ වගේම එතුමා රට බාර ගත්තාට පසුව ප්‍රථම වතාවට ලංකාවෙ කුඩාම අමාත්‍ය මණ්ඩලය හදා ගත්තා. බාරකාර ආණ්ඩුවකට තිස් දෙනෙකුගෙන් යුත් කැබිනට් මණ්ඩලයක් පත් කර ගන්න පුළුවන් කම තිබියදී දහසය දෙනෙකුගෙන් යුත් අමාත්‍ය මණ්ඩලයක් පත් කර ගෙන එතුමා අපේ රටේ නාස්තිය දුෂණය නැති කරන ක්‍රම ආණ්ඩුවෙන්ම හඳුන්වා දීල තියෙනවා.
අපේ රටේ සාම්ප්‍රදායික දේශපාලන පක්ෂ දෙදරා යෑමත්, අලුත් දේශපාලන පක්ෂ බිහිවීමත් ජනතාව ඒ වටා එකතු වීමත් ඔබ දකින්නෙ කොහොමද?
ඇත්තටම මේ රටේ මුල්ම දේශපාලන පක්ෂය විදියට සලකන්න පුළුවන්. එජාපය මේ වෙන කොට ඉතාම ඛේදනීය විදියට විනාශ වෙමින් තිබෙනවා. ඒ වාගේම ඒ පක්ෂය නියෝජනය කළ නායකයිනුත් ජනතාව ගෙන් ප්‍රතික්ෂේප වෙමින් ඉන්නවා. මෙහෙම වුණේ ඇයි කියල හිතල බලන්න ඕන. ප්‍රජාතන්ත්‍රවාදී දේශපාලන ධාරාවේ පාර්ලිමේන්තුවේ ප්‍රබල විපක්ෂයක් තිබීම අනිවාර්යයි. අද එජාපයට ඒ තැනවත් ගන්න බැරි තරමට දුර්වල වෙලා. ජනතාව දැන් වෙනස් වෙන ලෝකයත් එක්ක වෙනස් වෙලා. ඒ නිසා සාම්ප්‍රදායික දේශපාලන පක්ෂ තුළ ඔවුන් දැන් රැදෙන්න කැමති නෑ. එජාපයෙන් වෙන්ව ගිය පිරිසක් සමඟිජන බලවේගය හදා ගෙන හිටියත් ඒක අලුත් පක්ෂයක් ලෙස සමාජගත වුණත් ජනතා ආකර්ෂණය ගන්න ඒ පක්ෂයත් සමත් වෙලා නෑ. මොකද ඒ පක්ෂයේ ප්‍රතිපත්ති හා එජාප ප්‍රතිපත්ති අතර වෙනසක් නැති නිසා. ශ්‍රී ලංකා නිදහස් පක්ෂයත් අපේ පැරණි පක්ෂයයක්. ඩී.ඒ. රාජපක්ෂලා මේක රැක ගෙන ආවේ එජාප විරෝධී බලවේගයක් විදියටයි. නමුත් ඉකුත් 2015 ඒ පක්ෂය නැවත එජාපය සමඟ සන්ධාන ගතවීම ජනතාව ප්‍රතික්ෂේප කරලා තිබෙනවා. ඒ අනුව තමයි ශ්‍රී ලංකා පොදුජන පෙරමුණ බිහි වුණේ. එහෙම වුණත් ශ්‍රීලනිපය හුදෙකලා නොකර ඔවුන්ද එකතු කර ගෙන මේ මැතිවරණයට ඉදිරිපත් වෙන්නෙ අද වමේ ඉන්න බොහෝ අයට දේශපාලන අත්පොත් තිබ්බෙ ශ්‍රීලනිපයෙන් නිසයි. අපේ රටේ ජනතාව රට වෙනුවෙන් කටයුතු කරන නායකයෝ වගේම බලය වෙනුවෙන් කැප වෙන නායකයන් හොඳින් හඳුනාගෙන ඉන්නෙ. ඒ නිසා තමයි 2018 පළාත් පාලන මැතිවරණයේදීත් ඉකුත් 2019 ජනාධිපතිවරණයේදීත් මෙරටේ බහුතර ජනතාව පෙහොට්ටුව සමඟ එකතු වෙන්නෙ. දැන් දේශපාලනඥයන්ට ජනතාව රවටන්න බෑ. ජනතාව නිවැරදි තැන හොයා ගන්නවා. මෙවරත් බලය වෙනුවෙන් තරග කරන දේශපාලන පක්ෂවලට ජනතාව ඉතා හොඳ උත්තරයක් දෙයි කියල අපිට විශ්වාසයක් තියෙනවා.
ඔබ සඳහන් කළ ආකාරයට ඩි. ඒ. රාජපක්ෂ සමඟ එදා දේශපාලන පොරපිටියේ එකට සිටි පිලිප් ගුණවර්ධන වගේම අද මහින්ද දිනේෂ්ලා එකට මේරට රැක ගන්න කරන සටන ඔබ දකින්නෙ කොහොමද ?
ඔබ සඳහන් කළ ආකාරයට එදා පිලිප් ගුණවර්ධන වගේම අද දිනේෂ් ගුණවර්ධන අපේ රට වෙනුවෙන් ඓතිහාසික කාර්යභාරයක් ඉටු කරනවා. අපි විශ්වාස කරනවා ගෝඨාභය රාජපක්ෂ ජනාධිපතිවරයා මෙවර අමාත්‍ය මණ්ඩලය පත්කරන කොට දිනේෂ් ගුණවර්ධනයන් විදේශ කටයුතු අමාත්‍යවරයා විදියට පත්කිරීමත් විශේෂ කාරණයක් කියල. ජිනිවා මානව හිමිකම් සමුළුවේ දී අපේ රටේ රණ විරුවන් පාවා දුන්නු ගිවිසුම ඉවත් කර ගෙන ශ්‍රී ලංකාවේ අභිමානය රැක ගන්න දිනේෂ් ගුණවර්ධන ඇමතිවරයා ඉටුකළ කාර්යභාරයත් මෙරටේ ඉතිහාසයට එකතු වෙනවා. මේ වැනි නායකයෝ පාර්ලිමේන්තුවෙ ඉන්නම ඕන අයයි. අපි විශ්වාස කරනවා කොළඹ ජනතාව ඒ ගැන අවධානය යොමු කරනවා කියල.
ඔබලා MCC ගිවිසුම ගැන ඊට එරෙහිව විවිධාකාර අරගල මෙහෙයවා තිබෙනවා. ඇත්තටම මේ ගිවිසුමේ අලගිය මුලගිය තැන් ගැන ඔබ දන්නවාද?
මේ වෙන කොට ඒ සම්බන්ධයෙන් විමර්ශනය කරල ආචාර්ය ගුණරුවන් ඇතුළු කණ්ඩායම සකස් කළ වාර්තාවෙන් මෙහි ඇති හානිකර බව තහවුරු වෙලා තිබෙනවා. මේ ගිවිසුම පිළිබඳව මීට බොහෝ කාලයකට පෙර සිටම යම් යම් කතාබහ ඇතිව තිබෙන බව දක්නට තිබෙනවා. නමුත් ඉකුත් යහපාලන ආණ්ඩුව තමයි මේ ගිවිසුම බලාත්මක කරන්න උත්සාහ කර තිබෙන්නෙ. එහි වැදගත්ම කාරණය තමයි 2017 හා 2018 වසරවල ඇමරිකන් ඩොලර් මිලියන දහයක ගනුදෙනුවක් මේ ගිවිසුම හරහා සිදුව ඇති බවට වාර්තා පළ වෙනවා. නමුත් එවැනි මුදලක් ශ්‍රී ලංකා රජයට ලබා නොදුන් බව ඇමරිකන් තානාපතිනිය කියලත් තිබුණා. අපිට මේ ගැන විශාල සැකයක් තිබෙනවා. පසුගිය මැතිවරණ වලදි විශාල වශයෙන් විදේශ මුදල් යොදවලා යම් යම් කටයුතු කෙරුණු බවට තොරතුරු සංසරණය වෙනවා. මුදල් ලැබුණෙ නැත්නම් ඒ පිළිබඳව මිට අදාළ ලිපිවල සටහන් වුණේ කොහොමද කියල පැහැදිලි කිරීම එවක රාජ්‍ය නායකයන්ගේ හා ඇමරිකන් තානාපති කාර්යාලයේ වගකීමක්.
පාර්ලිමේන්තුවට උගතුන් හා බුද්ධිමතුන් පමණක් යවන්න ඕන කියල ඇතැම් අය ගොඩනඟන ජනමතය පිළිබඳව ඔබ මොනවාද කියන්නෙ?
ජනාධිපති ගෝඨාභය රාජපක්ෂ මහතා මේ වන විටත් ජනගත කර තිබෙන සෞභාග්‍යයේ දැක්ම ප්‍රතිපත්ති ප්‍රකාශය ක්‍රියාවට නැංවීම සඳහා යම් ප්‍රමාණයක උගතුන් බුද්ධිමතුන් අවශ්‍යයි කියන එක ගැන නම් අපිට විවාදයක් නෑ. අපි ජාතිකත්වය පදනම් කර ගත්තු සංවිධානයක් ලෙස අපේ නිර්ණායකයන් වන්නේ උගත් බුද්ධිමත්කම වගේම රටට ආදරය කරන දේශීයත්වය අගය කරන මේ මහ පොළොවේ දෙපයින් හිට ගන්න පුළුවන් ප්‍රායෝගික මහජන නියෝජිතයින් පිරිසක් අපේ පාර්ලිමේන්තුවට අවශ්‍යය බවයි.
සමාජවාදය ගරුකරන පාර්ලිමේන්තුවකට අවශ්‍ය වන්නෙ බහුතර මන්ත්‍රීන් සහිත ආණ්ඩුවක් හා ශක්තිමත් විපක්ෂයක්. ඒක එහෙම නම් ගෝඨාභය රාජපක්ෂ ජනාධිපතිවරයා මේ මැතිවරණයේදී පාර්ලිමේන්තුවේ තුනෙන් දෙකක බලයක් සහිත ආණ්ඩුවක් හදන්න උත්සාහ කරන්නේ ඇයි?
අපේ රට නිවැරදි මාවතට ගන්න නම් දැන් පවතින ආණ්ඩුක්‍රම ව්‍යවස්ථාව වෙනස් කරන්න ඕන. ඒ සඳහා පාර්ලිමේන්තුවේ තුනෙන් දෙකක බලයක් අවශ්‍යයයි. ඒ වාගේම රටට හිතකර අණපනත් සම්මත කර ගැනීමේදි ඊට විපක්ෂය හරස් වුණොත් ඒවා සම්මත කරගත හැකි බලයක් ආණ්ඩුවට තිබිය යුතුයි. ආණ්ඩුව කරන්න තුනෙන් දෙකක් අවශ්‍ය නෑ. ඒ වගේම ගෝඨාභය රාජපක්ෂ ජනාධිපතිවරයාට නම් මේ රට රකින්න තුනෙන් දෙක අවශ්‍ය වෙන්නෙ නෑ. එතුමා ගේ අවුරුදු පහ තුළ එතුමා රටත් ජනතාවත් රැක ගනීවි. නමුත් එතැනින් එහාට මේ රට අස්ථාවර කරන්න පුළුවන්ද? එහෙම කරන්න බැරි නිසා තමයි රට රකින වැඩ පිළිවෙළ ස්ථාවර කරන්න තුනෙන් දෙකක් දෙන්න කියන්නෙ
