මෙවර මහමැතිවරණයේදී කොළඹ දිස්ත්‍රික්කයේ ජයග්‍රහණය පිළිබඳව ඔබේ තක්සේරුව කොහොමද ?
ශ්‍රී ලංකා පොදුජන පෙරමුණේ අපි කොළඹ දිස්ත්‍රික්කය ජයග්‍රහණය කරනවා. මේ මැතිවරණයේ කිසිදු දේශපාලන පක්ෂයක් මැතිවරණ සටනට බැහැල නෑ. අපි සෞඛ්‍යය ආරක්ෂිත ක්‍රමවේද පිළිපදිමින් මහජන හමු පවත්වලා ගෙන් ගෙට යමින් ගෝඨාභය රාජපක්ෂ ජනාධිපතිවරයා ඉදිරිපත් කර ඇති සෞභාග්‍යයේ දැක්ම ප්‍රතිපත්ති ප්‍රකාශය ගැන ජනතාව දැනුම්වත් කරල ඒ ප්‍රතිපත්ති ක්‍රියාත්මක කරන්න අපි බලයක් දෙන්න කියල ජනතාවගෙන් ඉල්ලුවාම ඒකට ඉහළ ප්‍රතිචාරයක් තියෙනවා.මම කල්පනා කරන්නෙ මෙවර අපිට වෙනත් මැතිවරණ වලට වඩා වැඩි බලයක් කොළඹ දිස්ත්‍රික්කයෙන් ලැබෙනවා කියලයි.
ඔබේ පාර්ලිමේන්තු දේශපාලන කාලය ඇතුළත ඔබට මෙවර ලැබුණ අමාත්‍යාංශ ගැන මොනවද හිතන්නෙ?
මගේ පාර්ලිමේන්තු දේශපාලනය තුළ මේ දක්වා විවිධ අමාත්‍ය ධුර දරල තියෙනවා. ඒ හැම අමාත්‍ය ධුරයකම මම ඉතාම කැපවීමෙන් කටයුතු කරල අපේ රටත් ජනතාවත් යම් දියුණු තත්ත්වයකට ගෙන එන්නට කටයුතු කරල තිබෙනවා. මෙවර ගෝඨාභය රාජපක්ෂ ජනාධිපතිවරයා මට වගකිව යුතු අමාත්‍යාංශ දෙකක් බාර දීල තිබෙනවා. ඒ අමාත්‍යාංශවලින් මේ කෙටි කාලය තුළ ජාතික මට්ටමේ විශාල වැඩ කොටසක් කළා කියල මට සතුටු වෙන්න පුළුවන්. විශේෂයෙන් යහපාලන රජය අපේ රණවිරුවන්ට එරෙහිව ජීනීවා මානව හිමිකම් කවුන්සලයේ සභාගත කර තිබු 30/1 යෝජනා වලින් අප ඉල්ලා අස්වෙන බව මම ඉකුත් ජිනීවා මානව හිමිකම් කවුන්සලයේ සැසිවාරයට සම්බන්ධ වී සඳහන් කිරීමෙන් අප විශාල කරදරයකින් ගැලවුණා කියල මම හිතනවා. ඒ වාගේම මේ කොරෝනා වසංගත වෙලාවෙ විදේශ රටවල හිර වී සිටි අපේ ශ්‍රී ලාංකික ජනතාවගෙන් කොටසක් මේ වන විටත් මෙරටට ගෙන්වා ගන්න අපිටත් මැදිහත් වෙන්න පුළුවන් වුණා. අනෙක් විශේෂ කාරණය තමයි කොවිඩි 19 නිසා පෞද්ගලික අංශයේ සේවකයන් ලක්ෂ 35කගේ පමණ රැකියා අනතුරේ තිබුණ වෙලාවේ හාම්පුතුන් ගේ සම්මේලනය වෘත්තීය සමිති හා කම්කරු දෙපාර්තමේන්තුව එකට වාඩිවෙලා කතා කරල මේ රැකියාවන් සුරක්ෂිත කරන්න අපිට අවස්ථාව ලැබුණා. ඒ පිළිබඳව මම හාම්පුතුන්ගේ සම්මේලනයේ සියලු දෙනාට මේ වෙලාවෙ කෘතඥතාව පිරිනමන්න කැමතියි. මොකද රැකියාව කර ගන්න බැරිව නිවෙස්වල සිටි සේවකයන්ට ලබන සැප්තැම්බර් මාසය දක්වාම මසකට රුපියල් 14500/=ක් හෝ ඒ ඒ සේවකයා ගේ වැටුපෙන් 50%ක් හෝ මේ දෙකෙන් වැඩි එක ගෙවන්න හාම්පුතුන් එකඟවීම අපේ රජයට මේ වෙලාවෙ ලබා දෙන විශාල සහයෝගයක් ලෙස අපි සලකනවා. ඒ ගෙවීම් සමඟ සැම ආයතනයක්ම ඒ ආයතනයේ සේවකයන් ගේ අර්ථ සාධක දීමනාවද ඔවුන් ගේ ගිණුම්වල බැර කරන්න එකඟ වී තිබෙනවා.
ඔබේ පියා පිලිප් ගුණවර්ධන මෙරටේ ඒකීය භාවය හා දේශියත්වය පිළිබඳව විශාල අරගල කළ නායකයෙක්. ඒ පියා ගේ ප්‍රතිපත්ති ගැන අද ඔබ මොනවද හිතන්නෙ?
ඇත්ත වශයෙන්ම මම අද ආඩම්බර වෙනවා; මට මගේ පියා ගේ අඩිපාරේ මේ දක්වා ගමන් කරන්න ලැබීම ගැන. අපේ රටේ ඒකීයභාවය, ස්වාධීනත්වය, කිසිම බලවේගයකට යට නොකර රැක ගැනීමේ සටනේ පෙරමුණ ගෙන මට ක්‍රියා කරන්න අවස්ථාව ලැබුණේ හැමදාම කොළඹ ජනතාව මට ලබාදුන් ශක්තිය නිසයි. එදා මගේ පියා ඩී. ඒ. රාජපක්ෂ මැතිතුමා සමඟ එක්ව මේ රට බේරා ගන්න කටයුතු කළා වගේ මටත් අද පුළුවන්කම ලැබී තිබෙනවා; මහින්ද හා ගෝඨාභය යන රාජපක්ෂ සුසංයෝගය සමඟ එක්ව කරට කර වැඩ කරල රටත් ජාතියත් ආගමත් අපේකමත් ආරක්ෂා කර ගන්න. මෙවර මහ මැතිවරණයෙන් අපට විශිෂ්ට ජයග්‍රහණයක් ලබා ගැනීමෙන් පසුව නැවත මෙරටේ ජාතිවාදි ආගම්වාදී ප්‍රදේශවාදී කිසිදු අරගලයක් යළි ඇති වීමට ඉඩ නොතබා ජනාධිපති හා අගමැති සමඟ ශ්‍රී ලාංකේය අනන්‍යතාව සුරකෙන ස්ථීර වැඩ පිළිවෙළක් ක්‍රියාත්මක කරන්න අපි අපේක්ෂා කරනවා.
අපිට මතකයි ඔබ 1983 ප්‍රථම වතාවට පාර්ලිමේන්තු මන්ත්‍රීවරයකු ලෙස පත් වුණාට පස්සේ මහනුවර ශ්‍රී දළදා සමිඳුන් අබියස ප්‍රතිඥාවක් දුන්නා. ඒ ප්‍රතිඥාව අදටත් වලංගුද?
ඔව්, ඒ ප්‍රතිඥාව අදටත් එලෙසම වලංගුයි. මම පාර්ලිමේන්තුවට ආව මුල් දිනයේ සිටම ඒ ප්‍රතිඥාවේ ඇති කරුණු සාක්ෂාත් කර ගන්න තමයි කටයුතු කරන්නේ. අපේ රට අනාගාමික රාජ්‍යයක් බවට පත් කරන්න සමහරුන්ට ඕන වී තිබෙනවා. ඒවා අපි ජීවතුන් අතර සිටිනතාක් කල් කරන්න ඉඩ ලැබෙන්නෙ නෑ. අපේ බෞද්ධ උරුමය අපිට උරුම ශ්‍රේෂ්ඨ සංස්කෘතිය විනාශ කරන්න කිසිම බලවේගයකට ඉඩ දෙන්නේ නෑ. ඇත්තටම අපිට අද සතුටු වෙන්න පුළුවන්; අපේ ගෝඨාභය රාජපක්ෂ ජනාධිපති හා මහින්ද රාජපක්ෂ අගමැති දෙදෙනාම මේ රටට ආදරය කරන අපේ සභ්‍යත්වය සංස්කෘතිය ආරක්ෂා කරන ඒ සඳහා කැප වෙන දෙදෙනකු වීම ගැන. ඒ නිසයි මම මුලිනුත් සඳහන් කෙළේ මෙවර මැතිවරණයේදී ජනතාව අපිට තුනෙන් දෙකේ බලයක් ලබා දුන්නාම කිසිදු බලවේගයකට මේ රටට අහිතකර කිසිවක් කළ නොහැකි වන ආකාරයට නව අණපනත් සකස් කරලා අපේ රට ස්වාධීන ස්වෛරී රාජ්‍යයක් බවට පත් කරන්න අපි කටයුතු කරනවා කියල.
ඒකිය රාජ්‍ය සංකල්පය තුළ දෙමළ හා මුස්ලිම් ජනතාව ගේ අනන්‍යතාව තහවුරු වන්නේ කොහොමද?
ඔබගේ ප්‍රශ්නය තුළත් අපි ජාතීන් විදියට බෙදිලා. ඇයි අපි එහෙම බෙදෙන්නෙ? සිංහල හෝ දෙමළ හෝ මුස්ලිම් හෝ අපි සියලුම දෙනා ශ්‍රී ලාංකික ජාතියක්. අපි ශ්‍රී ලාංකිකයෝ කියලා අපිට කියන්න පුළුවන් වෙන්න ඕන.අපි සියලු දෙනාටම එක නීතියක් තියෙන්න ඕන. ප්‍රදේශයෙන් ප්‍රදේශයට ජාතීන් අනුව ආගම් අනුව නීති වෙනස් වෙන්න බෑ. අපි හැමෝම අනෙකා ගේ ඇදහිලිවලට, ගරු කරන්න ඕනේ. මෙරටේ පුරාවිද්‍යාත්මක වටිනාකම් ඇති තැන් ආරක්ෂා කිරීමත් ඓතිහාසික කරුණු පදනම් කර ගෙන අපි විශ්වාස කරන යම් යම් කරුණුවලට අපි සියලු දෙනාම ශ්‍රී ලාංකිකයන් විදියට ගරු කරන්න අවශ්‍යයි. මේ විදියේ පොදු සම්මුතියක් ඇතිව අපි සියලු දෙනා ශ්‍රී ලාංකිකයෝ විදියට හිතලා ඒ අනුව කටයුතු කරනවා නම් ජාතීන් හැටියට අමුතුවෙන් දිනා ගතයුතු දේවල් තියෙන්න විදියක් නැති වෙනවා පමණක් නොව අපි සියලු දෙනාටම අනෙනෝන්‍ය අවබෝධයෙන් නිදහසේ ජිවත් වෙන්නත් පුළුවන් වෙයි.
ඔබ ඔය කියන ආකාරයට අපේ පුදබිම් ආරක්ෂා කරගෙන ජාතික හා ආගමික සංහිඳියාවක් ඇති කරන්න පුළුවන් වෙයි කියල හිතනවාද?
ඇති කරන්න පුළුවන්ද නොවෙයි ඇති කරන්න ඕන. ආකල්පමය වශයෙන් මේවා වෙනස් කර ගෙන බුද්ධිමත්ව කටයුතු කරන්න කව්රු හෝ සූදානම් නැත්නම් ඔවුන් විවිධ අණපනත් වලට යටත් කරල හෝ අපි ශ්‍රී ලාංකික ජාතියක් කියන පොදු මතවාදය පිළිගන්න ඊට ගරු කරන තත්ත්වයට පත් කරන්න ඕන. ඒකයි අපි මේ මහ මැතිවරණයේදී තුනෙන් දෙකක බලයක් ඉල්ලන්නෙ. අලුතින් නීති සම්පාදනය කරලා අලුත් අණපනත් සම්මත කරගෙන අතීතයේ ඇති වු සිද්ධීන් නැවත ඇති නොවන සමාජයක් නිර්මාණය කරන්න ඕන. එහෙම නොවී අපි හැමදාම රට ඇතුළෙ ඇණ කොටා ගත්තොත් අපිට කිසිදා රට දියුණු කරන්න ඉඩක් ලැබෙන්නෙ නෑ.
ඔබ දැන් මේ මැතිවරණයක් කටඋඩ තියා ගෙන ඕවා කතා කරනවා. 1983 ඉදලා පාර්ලිමේන්තුවේ ඉන්න ඔබට මෙතෙක් ඕවා කතා කරලා ක්‍රියාත්මක කරන්න බැරි වුණේ ඇයි?
ඔබ පාර්ලිමේන්තුවේ හැන්සාඩ් වාර්තා අර ගෙන බලන්න; මේ ආකාරයේ ප්‍රශ්න ගැන මම තරම් වෙන කවුරු හරි කතා කරලා තියෙනවාද කියල. අපි එදා ඉදලම මේවා ගැන පාර්ලිමේන්තුව තුළත් ඉන් පිටටත් කතා කළා. අවශ්‍ය තැන්වලදී අරගල කළා; අධිකරණයට ගියා. 1983 ඉදලා 1995 වෙනතුරු අපිට දරුණු යුද්ධයකට මුහුණ දෙමින් සිටියා.1995න් පසුව යුද්ධයෙන් විනාශ වු රට යළි ගොඩ නඟන්න කැප වෙන්න සිද්ධ වුණා. ඒ සියල්ල ජයගෙන එද්දී 2015 කුමන්ත්‍රණකාරිව අපේ ආණ්ඩුව පෙරලා දැම්මා. ඒකෙන් වුණේ අපි එතෙක් ගොඩනගා ගෙන සිටි ආර්ථික, සමාජයීය, දේශපාලන මේ ආදී හැම දෙයක්ම ආපස්සට ගමන් කිරීමයි. දැන් අපිට රටේ ආර්ථිකය හදා ගන්න ගමන් මේ ජාතික වැඩ පිළිවෙළ ක්‍රියාත්මක කරන්න පුළුවන්. ඒ තීරණය තියෙන්නේ ජනතාව අතේ. මේ මැතිවරණයේ දී ජනතාව බුද්ධිමත් නොවී කටයුතු කළොත් අපේ රට නැවත ගොඩ ගන්න බැරි මහ අගාදයකට ඇද වැටෙිවී. ඒකයි අපි නැවත නැවත කියන්නේ මෙවර මහ මැතිවරණයේ දී ඔබේ ඡන්දය රට හදන රටට ආදරේ කරන කණ්ඩායමට දෙන්න කියල.
පාර්ලිමේන්තුවට උගත් බුද්ධිමත් තරුණ කණ්ඩායමක් පත් කළ යුතු යැයි අතැම් පිරිසක් ජනමතයක් හදමින් ඉන්නවා. මේ පිළිබඳව ඔබ මොනවද කියන්නේ?
ඇත්තටම පාර්ලිමේන්තුවට උගතුන් බුද්ධිමත් අය එවන එක හොඳයි. තරුණයින් එන එකත් හොඳයි. නමුත් පාර්ලිමේන්තුවේ මන්ත්‍රීවරු 225න් අඩුම තරමින් තුනෙන් එකක්වත් පාර්ලිමේන්තු සම්ප්‍රදාය ගැන දන්න රාජ්‍ය තාන්ත්‍රික සබඳතා පිළිබඳ අවබෝධයක් ඇති අත්දැකීම් බහුල පිරිසක් වෙන්න ඕන. එහෙම නොවුණහොත් පාර්ලිමේන්තු කටයුතු කර ගෙන යෑම දුෂ්කර වෙන්න පුළුවන්. පාර්ලිමේන්තුවේ සමහර කාරණාවලදී පොතේ දැනුමෙන් කටයුතු කරන්න බෑ. සමහර කාරණා ගරන කටයුතු කරන්න ඒ පිළිබඳ අත්දැකීමක්ම තියෙන්න ඕන. ඒ කොහොම වුණත් රටට ආදරේ කරන දේශප්‍රේමි උගත් තරුණයන්ට පාර්ලිමේන්තුවට එන්න තිබෙන අවස්ථා වැඩි කළ යුතුයි කියන මතයේ අපිත් ඉන්නවා.
රජ්‍ය සේවයේ විශ්‍රාමිකයන්ට අග්‍රහාර රක්ෂණයෙන් ප්‍රතිලාභ දෙන්න අමාත්‍ය මණ්ඩලයේ අනුමැතිය ලැබුණ බව සඳහන් වෙනවා. මේ අනුව විශ්‍රාමිකයන් කී දෙනෙකුට සහන ලැබෙනවාද?
ඇත්තටම මේ වෙන කොටත් එහෙම ප්‍රතිලාභ ලබන කණ්ඩායමක් ඉන්නවා. ඒ 2016 වසරට පසුව විශ්‍රාම ගිය අයයි. ජනාධිපතිවරයා ගේ සෞභාග්‍යය දැක්ම ප්‍රතිපත්ති ප්‍රකාශනය අනුව විශ්‍රාමිකයන් සම්බන්ධයෙන් විශේෂ අවධානයක් යොමු කර තිබෙනවා. ඒ අනුව අගමැති මහින්ද රාජපක්ෂ මහතා ගේ මඟ පෙන්වීම අනුව මමත් රාජ්‍ය පරිපාලන අමාත්‍යවරයා විදියට ජනක බණ්ඩාර තෙන්නකෝන් මහතාත් ඒකාබද්ධ අමාත්‍ය මණ්ඩල සන්දේශයක් ඉදිරිපත් කළා. ඒ අනුව 2016 ට පෙර විශ්‍රාම ලැබු ලක්ෂ හයක පමණ රාජ්‍ය සේවකයන්ටත් අග්‍රහාර රක්ෂණ ප්‍රතිලාභ ලබන්න අවස්ථා ලැබෙනවා.
ගෝඨාභය රාජපක්ෂ ජනාධිපතිවරයා ඔහුගේ බාරකාර ආණ්ඩුවේ අමාත්‍ය මණ්ඩලය තිහක් කළ හැකිව තිබියදී දහසයකට සීමා කර තිබෙනවා. මැතිවරණයෙන් පසුව රජයක් පිහිටු වන්නට හැකියාව ලැබුණොත් මේ තත්ත්වයම ක්‍රියාත්මක වෙයිද?
ආණ්ඩුක්‍රම ව්‍යවස්ථාවෙි 19 වන සංශෝධනයේ ආණ්ඩු පිහිටුවන ක්‍රමය අනුව පත් කළ හැකි අමාත්‍යධුර හා කැබිනට් නොවන අමාත්‍යධුර ගැන සඳහන් වෙනවා. අපේ රටේ අද පවතින ආර්ථික අමාරුකම් සමඟ වියදම අඩු කිරීම ගැන රජයට අවධානය යොමු කරන්න වෙනවා. ඒ අනුව ජනාධිපති අගමැතිවරයා සමඟත් සාකච්ඡා කරලා ඉදිරි අපේ ආණ්ඩුව තුළ පත් කළ යුතු අමාත්‍යවරුන්ගේ ප්‍රමාණය තීරණය කරාවි.
බලය පිළිබඳව හීන දකින අයට තනතුරු නොලැබුණොත් පත්වන ආණ්ඩුවත් උපන් ගෙයිම අර්බුදයකට යයිද? අතීතයෙත් එවැනි අත්දැකීම් තිබෙනවා නේද?
පාර්ලිමේන්තුවට එන 225ටම මොකක් හරි තනතුරක් ලැබෙනවා නම් ඒ හැමෝම සතුටු වෙයි. නමුත් එහෙම කරන්න බෑ. අනෙක අපේ මන්ත්‍රීවරු දැන් ඉතාම බුද්ධිමත්ව රට ගැන හිතල කටයුතු කරන්න කැප කිරීම් කරනවා. ඒ නිසා එහෙම කිසිම අර්බුදයක් ඇති නොවී අපේ ආණ්ඩුවක් තුළ රටටත් ජනතාවටත් දැනෙන දෙයක් කරන්න හැමෝම එකට එක්සිත්ව කටයුතු කරයි කියල මම විශ්වාස කරනවා.
ශ්‍රී ලංකා පොදුජන පෙරමුණට මෙවර මැතිවරණයේදී තුනෙන් දෙකක බලයක් නොලැබුණොත් එජාපය සමඟ සන්ධාන ගත වෙන්න සුදානමක් තිිබෙනවා කියන්නේ ඇත්තද?
ඔය කතාව එජාපයෙන්ම ප්‍රචාරය කරවනවා කියලයි අපි හිතන්නෙ. මොකද අපේ ජනතාව කුමන හේතුවක් නිසාවත් අපි රනිල් හෝ සජිත් කණ්ඩායම් සමඟ එකතු වෙනවාට කැමති වෙන්නෙ නෑ. ඒ අය මේ විදියේ කතාවක් පතුරුවන්නේ අපිට ලැබෙන ඡන්ද ප්‍රමාණය අඩු කරන්න කියලයි මම හිතන්නේ. ඡන්දය විමසන දිනය ළං වෙනකොට තව මොනවා කියයිද දන්නේ නෑ. අපි ජනතාවට කියන්නේ මේ මැතිවරණයේ දී අපිට තුනෙන් දෙකේ බලයක් ලැබෙන එක වළක්වන්න විරුද්ධවාදීන් ගෙන යන මෙවැනි බොරු ප්‍රචාර වලට රැවටෙන්න එපා කියලයි.
ස්වාධීන මැතිවරණ කොමිසම මෙවර මැතිවරණ නීති අකුරටම ක්‍රියාත්මක කිරීම නිසා අපේක්ෂකයන් මෙන්ම ඡන්දදායකයනුත් අපහසුතාවට පත්වෙලා කියන්නේ ඇත්තද?
ස්වාධීන මැතිවරණ කොමිසම කොතරම් ස්වාධීනද කියල දැන් සමාජයේ ගැටලුවක් මතුව තිබෙනවා. කොමිෂන් සභාවේ ඇතැම් සමාජිකයන් පක්පක්ෂග්‍රාහී ලෙස කටයුතු කරන බවටත් චෝදනා එල්ල වී තිබෙනවා. ඒවා එහෙම තිබියදී කොවිඩි 19 වසංගත තත්ත්වයත් එක්ක මැතිවරණ නීති අකුරටම ක්‍රියාත්මක කිරිමෙන් ඇත්ත වශයෙන්ම අපි දෙපාර්ශ්වයම අපහසුතාවලට මුහුණ දී සිටිනවා.ඒ වුනත් අපිට කොමිසමට එරෙහි වෙන්න බෑ.1981 මැතිවරණ පනත අනුව මැතිවරණ කොමිසමට පැවැරී ඇති බලතල අනුව ඒ අය කටයුතු කරනවා. මේ නිසා මෙවර මැතිවරණයේ දී මනාප ඡන්ද යම් ප්‍රමාණයකට අඩු වෙන්න ඉඩ තියෙනවා. එහෙම වුණත් පක්ෂයේ ඡන්ද ලකුණ ගැන ජනතාව දැනුම්වත්ව සිටින නිසා පක්ෂයට ලැබෙන ඡන්ද සංඛ්‍යාව සුපුරුදු පරිදි ලැබෙයි කියල අපි විශ්වාස කරනවා.
බොරළුගොඩ සිංහ පරම්පරාවේ මහජන එක්සත් පෙරමුණ හැම මැතිවරණයකදීම වෙනත් පක්ෂයක එල්ලි තරග කරන්නේ තනිව තරග කරන්න බැරි නිසාද?
නෑ, එහෙම ගැටලුවක් නිසා නොවෙයි. අපේ පක්ෂයේ ප්‍රතිපත්ති හා ක්‍රියාකාරකම් වලට සමාන දේශපාලන පක්ෂ සමග තරඟ කරනවාට වඩා එක්ව එක කණ්ඩායමක් ලෙස තරග කීරිම ජනතාවටත් අපිටත් පහසුවක් කියලයි අපි හිතන්නේ. එක පොදු ලකුණකින් ඡන්දයට ඉදිරිපත් වුණාම ජනතාවට ඡන්ද පාවිච්චි කිරීමේ ව්‍යාකූලතාවක් ඇති වෙන්නෙ නෑ. එහෙම නැතුව එක සමාන ප්‍රතිපත්ති තිබෙන අපිත් වෙන වෙනම මැතිවරණ වලට තරග කරන්න ගියොත් හැමෝම යම් ප්‍රමාණයක අපහසුතාවලට පත් වෙනවා. අනෙක අපි පොදු ලකුණකින් ඡන්දය ඉල්ලුවත් අපි ගැන දන්න ජනතාව අපිට මනාප ලබාදීල අපිව පාර්ලිමේන්තුවට තෝරා පත් කර යවනවා.
කුරුණෑගල පුරාවිද්‍යා වටිනාකමක් සහිත ගොඩනැගිල්ලක් ඩෝසර් කීරිම පිළිබඳව රටට ආගමට ආදරෙයි කියන ඔබ නිහඬව ඉන්නේ ඇයි?
නෑ අපි නිහඬ නෑ. නමුත් අපි මේ වෙලාවෙ ඒ ගැන කලබලයක් ඇති කර ගත්තොත් ඒකේ වාසිය විපක්ෂය ලබා ගන්නවා. ඒ නිසා අපි පෞද්ගලිකව ජනාධිපතිවරයාටත් අගමැතිවරයාටත් දැනුම් දීලා තිබෙනවා මේ සිදුවීම පිළිබඳව අපක්ෂපාතීව ස්වාධීන පරික්ෂණයක් පවත්වලා වරදක් කරලා තියෙනවා නම් ඒ වරදකළ අයගේ තරාතිරම නොබලා නීතියෙන් දඬුවම් දෙන්න කියලා. දැන්වත් රජය ඒ ගැන පරික්ෂණ ආරම්භ කරලා තිබෙනවා. එහි වරදක් සිදුව ඇත්නම් ඒ වරද කළ අයට දඬුවම් ලැබෙිවි. අනෙක මීට වඩා වටිනා පුරාවිද්‍යා ස්මාරක කඩා බිඳ දාලා දේශපාලන වාසි වෙනුවෙන් කටයුතු කළ යුගයකුත් තිබුණා. ඒවාට වගකිව යුතු අයම මේ සිද්ධිය ලොකු කරගෙන කටයුතු කරන්නේ මැතිවරණයේ දී දේශපාලනය වාසියක් ලබා ගැනීමේ අරමුණෙන්.
ජනාධිපති ගෝඨාභය රාජපක්ෂ එම ධුරයට පත්ව මාස අටක් ගතව තිබුණත් ඔහු ජනාධිපතිවරණ වේදිකාවේ කියපු කිසිම දෙයක් මේ දක්වා ඉටු කළේ නෑ කියල චෝදනා එල්ල වෙනවා. මේ ගැන මොනවද ඔබ කියන්නේ?
ජනාධිපතිවරයා එදා ජනාධිපතිවරණ වේදිකාවෙ කියපු බොහෝ දේ කරන්න පාර්ලිමේන්තුවක් ඕන. තිබුණු පාර්ලිමේන්තුවේ කාලය අවසන් කරන්නට ජනාධිපතිවරයාට බලය තිබුණ නිසා ඒ පාර්ලිමේන්තුව විසුරුවා හැරලා නව පාර්ලිමේන්තුවක් රැස් කරන්න නියමිතව තිබුණ කාලය කොවිඩ් 19 වසංගතය සමඟ වෙනස් වුණා. පාර්ලිමේන්තුව තුළ කතා කරලා කරන්න ඕන දේ කරන්න නොහැකි වුණත් පාර්ලිමේන්තුවෙන් පිටත තීන්දු අර ගෙන කරන්න පුළුවන් හැමදේම එතුමා කරල තිබෙනවා. කොවිඩි 19 වසංගතයෙන් පීඩාවට පත් වු අයට සහන සැලසීම, මේ වසංගතය පාලනය කරන්න ලොව බලවත් රටවල් අබිබවා නිවැරදි නායකත්වයක් දීම, මත්ද්‍රව්‍ය ජාවාරම්, පාතාල ක්‍රියාකාරකම් මැඩලීමට පියවර ගැනීම, මහ බැංකුවේ මුදල් කොල්ලය, පාස්කු ප්‍රහාරය වැනි අපරාධ සම්බන්ධයෙන් විමර්ශනය කරන්න ජනාධිපති විමර්ශන කමිටු පත් කිරීම, වැනි බොහෝ දේවල් කරල තිබෙනවා. ඒ වගේම ආනයන සීමා කරල අපනයන දිරි ගන්වන්න සහන ලබා දීම ජාතික අධ්‍යාපන ප්‍රතිපත්තියක් සකස් කිරීම සඳහා කරුණු අධ්‍යයනය කරන්න විද්වද් කමිටුවක් පත් කිරීම වගේම අපේ රටේ තරුණ පරපුරේ කුසලතා වර්ධනය සදහා කුසතා වර්ධන දශකයක් ප්‍රකාශයට පත් කිරීම වැනි වැදගත් කටයුතු බොහෝමක් මේ වන විටත් ඉටු කරල තිබෙනවා. හැබැයි ඒවායේ ප්‍රතිඵල දකින්න වෙන්නෙ ටිකක් ප්‍රමාද වෙලයි. ඒ නිසා තමයි ඔය මොනවත් කළේ නෑ කියල චෝදනා කරන්නෙ.
