පුවත්පත් ප්රවෘත්ති කර්තෘවරුන්, විශේෂාංග කර්තෘවරුන්, දේශපාලන ලිපි රචකයන්, කාටුන් ශිල්පීන් හා අග්රාමාත්යවරයා අතර හමුවක් ඉකුත් 06 වැනිදා අරලිය ගහ මන්දිරයේදී සිදුවිණි. ජොන්ස්ටන් ප්රනාන්දු, ගාමිණී ලොකුගේ, ජී. එල්. පීරිස්, අජිත් නිවාඩ් කබ්රාල්, ගෙවිඳු කුමාරතුංග ඇතුළු පිරිසක් ඒ අවස්ථාවට එක් වූහ.
එහිදී පසුගිය ජනාධිපතිවරණ සමය පිළිබඳත් ඉදිරි මහ මැතිවරණය පිළිබඳත් වැඩි අවධානයක් යොමු විණි. ඉකුත් ජනාධිපතිවරණ සමයේ ශ්රී ලංකා පොදුජන පෙරමුණෙන් දුටු විනයානුකූලභාවය මහ මැතිවරණයට නාමයෝජනා භාරදීමටත් පෙර අවසන් වී ඇති ආකාරයක් දක්නට ඇතැයි මාධ්යවේදීහු අගමැතිවරයාට කීහ.
“විවේචනය කිරීම් සිද්ධ වෙන්නෙ අපේක්ෂකයන් අතරයි. මේ ඡන්ද ක්රමයේ හැටියට තියෙන්නේ මනාප යුද්ධයක්. යූ.එන්.පී අය අපිට බණින්නේ නැහැ. තමන්ගේ කෙනා තමන්ගේ කෙනාටයි කපන්නේ. මම ඉල්ලනවා නම් මටත් කපනවා. තාත්තා පුතා වුණත් එච්චරයි.” කී අගමැතිවරයා කීවේ සියලු දෙනා සිනහාගන්වමි.
මැතිවරණ කොමිසම, උපාධිධාරීන්ගේ රැකියා පුහුණුව නතර කිරීම සම්බන්ධයෙන්ද මෙහිදී වැඩි අවධානයක් යොමු විණි. පක්ෂ පාට භේදයකින් තොරව සියලු ම උපාධිධාරීන්ට රැකියා ලබාදීම සඳහා ජනාධිපතිවරයා ගෙන තිබූ ප්රතිපත්තිමය තින්දුවක් සම්බන්ධයෙන් මැතිවරණ කොමිසම මෙවැනි තීරණයකට එළැඹීම තමන්ටද ප්රශ්නයක් බව අගමැතිවරයා සඳහන් කළේය.
“ඒ දරුවන්ට පුහුණුව නොලැබුණාට, පත්වීම් ලිපි භාර අරන් තියෙන නිසා වැටුප ගෙවන්න ඕනේ. මේ තීරණය නිසා නැති වෙන්නේ පුහුණුව විතරයි.” යනුවෙන් අග්රාමාත්යවරයා අදහස් පළ කරන අවස්ථාවේ ‘උපාධිධාරීන්ට මේ සම්බන්ධයෙන් අධිකරණ ක්රියාමාර්ගවලට යෑමේ හැකියාව තියෙනවා නේද?” යි මාධ්යවේදීහු නැවතත් අගමැතිවරයාගෙන් ප්රශ්න කළහ.
“අධිකරණ ක්රියාමාර්ගවලට ගිහින් ඒ විදියට වියදම් කරන්නේ මොකටද. මාස දෙකක් ගෙදරට වෙලා පඩි අරගෙන, ඊට පස්සේ රැකියාවට එන එක ඒ ළමයින්ට වාසියි” යනුවෙන් අගමැතිවරයා සඳහන් කළේය.
රජයේ ගිණුම් පියවීමේ අරමුණින් පාර්ලිමේන්තුවට ඉදිරිපත් කළ අතුරු සම්මත ගිණුම විපක්ෂය නිර්දය ලෙස විවේචනය කිරීම සහ තමන් බලයට පැමිණීමෙන් පසුව උපාධිධාරීන්ට රැකියා ලබා දෙන බව හිටපු විපක්ෂ නායක සජිත් ප්රේමදාස මහතා සඳහන් කිරීමද මෙහිදී සාකච්ඡා විය.
“පක්ෂය දෙකඩ වෙලා, හදාගත්ත සමගි සන්ධානයෙත් සමගිය නැති වෙලා ඉන්න වේලාවේ එයා කටට එන එන දේ කියවනවා” යැයි අගමැතිවරයා සිනාසෙමින් පිළිතුරු දුන්නේය.
ඉදිරි මහ මැතිවරණයේදී කාන්තා නියෝජනය වැඩි කිරීම පිළිබඳ අවධානය යොමු කර ඇත්දැයි කාන්තා මාධ්යවේදියනියක් අගමැවරයාගෙන් ප්රශ්න කළාය.
පොලොන්නරුවෙන් බියුටි ක්වීන් කෙනෙක්
“අපි හැම දිස්ත්රික්කයම කාන්තාවන්ට නාමයෝජනා දෙනවා. ජනතාව තමයි පත් කර ගන්න ඕනේ. මේ පාර පොලොන්නරුවෙන් බියුටි ක්වීන් කෙනෙකුත් ඉදිරිපත් වෙන්නයි ඉන්නේ” අගමැතිවරයා පෙරළා පිළිතුරු දුන්නේය. ඒ සමඟ මහාචාර්ය ජී. එල්. පීරිස් මහතා ද කතාවට සම්බන්ධ වෙමින් ‘කෙරිලා තියෙන සමීක්ෂණවලින් පේනවා කාන්තාවන් කාන්තාවන්ට ඡන්දය නොදෙන බව. පක්ෂය නාමයෝජනා දුන්නත් පත් කරගන්න ඕනේ ජනතාව.” යැයි සඳහන් කළේ සියලු දෙනා සිනාගන්වමිනි.
මේ දිනවල සමාජ මාධ්ය ඔස්සේ කුඩා දරුවෙකු අපචාරයට ලක් වීමේ සිද්ධියක් සම්බන්ධයෙන් ප්රචාරය වෙයි. අදාළ සිද්ධිය සම්බන්ධයෙන් කිසිවෙකු අත්අඩංගුවට ගෙන නැතත් විවිධ අයට චෝදනා එල්ල වෙමින් පවතියි. නමුත් එකී කුඩා ගැහැනු දරුවා සම්බන්ධයෙන් මෙතෙක් කිසිදු තොරතුරක් අනාවරණය වී නැත. මාධ්යවේදියෙකු ඒ සම්බන්ධයෙන් අග්රාමාත්යවරයාගේ අවධානය යොමු කළත් අගමැතිවරයා එකී සිද්ධිය සම්බන්ධයෙන් දැනුම්වත්ව සිටි බවක් නොපෙණිනි.
“ඔය වගේ සිද්ධිවලට දැඩි දඬුවම් දෙන්න නම් ඕනේ.” යැයි අග්රාමාත්යවරයා එහිදී සඳහන් කළේය. අග්රාමාත්යවරයා එලෙස පිළිතුරු දුන්නද මාධ්ය ලේකම්වරයාට ළඟට පැමිණෙන ලෙස හිසින් සන් කළේය.
“හේරත්, ඔය සිද්ධිය ගැන මට සම්පූර්ණ විස්තරයක් ඕනේ” කී අග්රාමාත්යවරයා නැවතත් මාධ්යවේදීන් සමඟ සුහද කතාබහට එක්වූයේය.
නව නිපැයුම් සම්බන්ධයෙන් රජයේ සහාය පිළිබඳ සැලකිලිමත් විය නොහැකි බවත් ඊට රජයේ අවධානය මීට වඩා යොමු කිරීමෙන් නව නිපැයුම් කරන අයට මෙන්ම පවතින නිපැයුම් වැඩිදියුණු කිරීම සඳහාත් අවස්ථාව ලබාදිය යුතුව ඇතැයි මාධ්යවේදියෙකු සඳහන් කිරීමත් සමඟ බන්දුල ගුණවර්ධන ඇමැතිවරයා,
“මහින්ද චින්තන ඉදිරි දැක්ම වැඩපිළිවෙළ යටතේ අපි තාක්ෂණ හා නවෝත්පාදන විෂය හඳුන්වා දුන්නා. ඒ අනුව පාසල්වල අලුත් දේවල් කෙරෙනවා. පාසලේ වැඩකටයුතු වැඩි ප්රමාණයක් දැන් කරන්නේ දරුවන් අතින්. පාසල් 300ක් විශ්වවිද්යාල 15ක් අනෙක් උසස් තාක්ෂණ හා නාවෝත්පාදන ආයතනත් එක්වෙලා 11,12,13 හෝමාගම මහින්ද රාජපක්ෂ විද්යාලය හා අවට තාක්ෂණික විද්යාලත් එකතු වෙලා ප්රදර්ශනයක් කරනවා. හෝමාගම තමයි වැඩිපුරම තාක්ෂණික විද්යාල තියෙන්නේ. නවෝත්පාදන වෙලා තියෙන ප්රමාණය දැනගන්නත් පුළුවන්. ව්යාපාරිකයන්ට ඒ නවෝත්පාදකයන්ට අතදෙන්නත් අවස්ථාව ලැබෙනවා.” යනුවෙන් අගමැතිවරයා පිළිතුරු දීමටත් මත්තෙන් පිළිතුරු දුන්නේය.
“හෝමාගම.....හෝමාගම” යැයි බන්දුල ගුණවර්ධන ඇමැතිවරයාගේ පිළිතුර අවසන් වීමත් සමඟ අගමැතිවරයා සඳහන් කළේ සියලු දෙනා සිනාගන්වමිනි. බන්දුල ගුණවර්ධන ඇමැතිවරයා නියෝජනය කරන ආසනය හෝමාගම වීම නිසා අගමැතිවරයා එවැනි විහිළුවක් කළේය.
ශ්රී ලංකා පොදුජන පෙරමුණ සුබ මොහොතින් නාම යෝජනා අත්සන් කරයි
2020 පාර්ලිමේන්තු මැතිවරණය සඳහා ඉදිරිපත් වන ශ්රී ලංකා නිදහස් පොදුජන සන්ධානයේ නාම යෝජනා, ශ්රී ලංකා පොදුජන පෙරමුණ යටතේ භාරදීමට හවුල්කාර පාර්ශ්ව තීන්දු කර ඇත. නාම යෝජනා පත්ර සඳහා සුබ මොහොතින් අස්සන් තැබීම ඉකුත් 11 වැනිදා පෙරවරුවේ අග්රාමාත්යවරයාගේ විජයරාමයේ පිහිටි නිවසේදී ආරම්භ කළේය.
එම අවස්ථාවට හිටපු පාර්ලිමේන්තු මන්ත්රීවරුන් රැසක් සහභාගි වූ අතර හිටපු ජනාධිපති මෛත්රීපාල සිරිසේන මහතාද එක් වි සිටියේය. නාමයෝජනා අස්සන් තැබුණේ එතරම් ඉඩ පහසුකම් සහිත ස්ථානයක නොවූ නිසා හිටපු ජනාධිපතිවරයා නාමයෝජනා අත්සන් කරන ස්ථානයට තදබදය මැදින් පැමිණියේ අසීරුවෙනි. හිටපු මන්ත්රීවරුන් අතරින් රිංගමින් පැමිණෙන හිටපු ජනාධිපතිවරයා දුටු සැණින් මාධ්යවේදින් අතර කසුකුසුවක් ඇතිවිණි. මේ අතර මන්ත්රීවරුද එකිනෙකාගේ මුහුණු බලාගන්නා අයුරු දැකගන්නට ලැබිණි.
හිටපු ජනාධිපතිවරයා පැමිණීමත් සමඟ මාධ්යවේදීන්ගේ අවධානය යොමු වූයේ පොලොන්නරුව දිස්ත්රික්කයේ නාමයෝජනා අස්සන් කිරීම සම්බන්ධවයි. දිස්ත්රික්ක කිහිපයක නාමයෝජනා අස්සන් කිරීමෙන් පසුව මෛත්රීපාල සිරිසේන හිටපු ජනාධිපතිවරයා අගමැතිවරයා සමඟ කෙටි කතාබහක නිරත විය. පසුව නාමයෝජනා අස්සන් කිරීමේ කටයුතු අවසන් වීමටත් පෙර හෙතෙම පිටව ගියේය. ‘මොකක්ද දන්නේ නැහැ සීන් එක” යි මාධ්යවේදීන් කියනු ඇසිණි.
අගමැතිවරයා පළමුව නාමයෝජනා අස්සන් තබයි
මහා සංඝරත්නයේ ආශිර්වාද මධ්යයේ අග්රාමාත්ය මහින්ද රාජපක්ෂ මහතා කුරුණෑගල දිස්ත්රික්කය සඳහා පළමුවෙන්ම නාම යෝජනා පත්රයට අස්සන් තැබීය. අගමැතිවරයා නාමයෝජනා සඳහා අස්සන් තබන අවස්ථාවේ අගමැතිවරයාගේ මුනුපුරු නිර්වාන්, ශිරන්ති රාජපක්ෂ මහත්මිය අතෙහි විය. එහි වන දේ පිළිබඳ කිසිවක් නොදත් ළදරු නිර්වාන් සීයාව සිපගත්තේය. නාමයෝජනා අස්සන් කිරීමේ කටයුතු අවසන් වීමත් සමඟ නිර්වාන් සියතට ගත් අගමැතිවරයා මුනුපුරා සුරතල් කිරීමත් සමඟ එහි සිටි සියලු දෙනාගේ අවධානය නිර්වාන් වෙත යොමු විණි.
නාමයෝජනා අත්සන් තැබීමේ කටයුතු අවසන් වීමෙන් පසුව තේ පානය සඳහා සියලු දෙනා එක් වූහ. එහිදි නෙලුම් පොහොට්ටුව සහිත කේක් එකක් කැපූ අගමැතිවරයා කේක් කෑල්ලක් බන්දුල ගුණවර්ධන අතට දෙමින් ‘ඔයා කවන්න‘ යැයි කීවේය. බන්දුල ගුණවර්ධන කේක් කෑල්ල අතට ගත් සැණින් විමල් වීරවංශ දෙසට හැරී විමල් වීරවංශට කේක් කැබැල්ල දිගු කළේය. කේක් කෑල්ලක් කන අතරේ විමල් විරවංශ ‘ හොඳ හිතින් නේද කවන්නේ. පරදින්න කියලා නෙවෙයිනේ ” යැයි පැවසුවේ සියලු දෙනා සිනාගන්වමිනි. බන්දුල ගුණවර්ධනත් විමල් වීරවංශත් යන දෙදෙනාම කොළඹ දිස්ත්රික්කය නියෝජනය කරමින් මැතිවරණයට ඉදිරිපත් වීම එවැනි දෙබසක් ඇති වීමට හේතු වන්නට ඇත.
විමල්ට කේක් සංග්රහයක්
ශ්රී ලංකා පොදුජන පෙරමුණේ ලේකම් සාගර කාරියවසම් මහතා සකස් කර තිබූ නාමයෝජනා ලිපි ලේඛන රැගෙන පැමිණ සිටියේ පොදුජන පෙරමුණ කාර්යාලයේ සේවය කරන තරුණියෝ දෙදෙනෙකි. මෙතැනදී අගමැතිවරයා සමඟ එම තරුණියන් දෙදෙනාට පින්තූරයක් ගැනීමට අවශ්ය වි තිබිණි. ඒ බැව් අගමැතිවරයාට කී සැණින් “එන්න. එන්න” යැයි කීවේය. එය ඇසූ අවට සිටි අයද ඒ අසලට එන්නට වුහ .
“ නැහැ නැහැ. කාන්තාවන් දරුවෝ එක්ක පින්තූරයක් ගන්න කොට ඔය ගොල්ලෝ එන්න එපා” කී අගමැතිවරයා නෙලුම් මාවතේ සිට පැමිණි තරුණියන් දෙදෙනා සමඟ පින්තූරයකට පෙනී සිටියේය.
පින්තූරයට පෙනී සිටි එක් තරුණියක පෙන්වමින් ශ්රී ලංකා පොදුජන පෙරමුණේ ලේකම් සාගර කාරියවසම් මහතා “මේ ළමයාගේ වෙඩින් එකට සර්නේ අස්සන් කළේ. සර්ට මතකද” යැයි කීවේය.
“ ඔව්.ඔව්.මට මතකයි. දැන් බබාලා ඉන්නවාද?” යි පෙරළා ඇසීය. “තවම වැඩි කාලයක් නැහැනේ සර් “ යැයි එම තරුණිය පැවසුවාය. “නැහැ, මට මතක විදියට දැන් අවුරුදු දෙකක් විතර” යැයි අගමැතිවරයා සඳහන් කිරීමත් සමඟ ‘ඔව් සර් ‘ යැයි තරුණිය පෙරළා පැවසුවාය. “ඒකනේ ළමයෝ කියන්නේ. අවුරුදු දෙකක් කියන්නේ ලොකු කාලයක්. මේ රට වෙනුවෙන් ළමයි හදන්න. තරුණ වයසේ ඔහොම හිතුවාට රට ජාතිය වෙනුවෙන් ඔයාලාගේ යුතුකම ඉටු කරන්න” යැයි අගමැතිවරයා නැවතත් එම තරුණියට පැවසීය.
කැලණියේ ප්රසන්නගේ එඩිතරකම
කෑම මේසෙන් අගමැතිවරයා ඉවත්ව ගිය පසු අගමැතිවරයා වෙත පැමිණි ප්රසන්න රණවීර මන්ත්රීවරයා දුටු සැණින් අගමැතිවරයා “ මොකෝ අස්සන් කළේ නැත්තේ” යි ඇසීය. “ලොකු අය අස්සේ අපි කරදර කරන්න ඕනේ නැහැනේ සර්. ගෙදර උන්දැයි ළමයි එක්ක ආසනේදීම අස්සන් කරන්නම්” යැයි පැවසීය.
“ඔව්. ඔව්. මෙයා ඉන්නේ මිනිස්සු එක්කනේ“ අගමැතිවරයා සඳහන් කරන විටම අපේ උත්සවයකට ආරාධනයක් කරන්නත් තියෙනවා” යි ප්රසන්න රණවීර කීවේය. පුළුවන් නම් නොමිනේසන්වලට කලින් දිනයක් දාගන්න කී අගමැතිවරයා ඒ අවස්ථාවේම මාර්තු මස 28 වැනිදා ඒ සඳහා යොදා ගන්නැයි ප්රසන්න රණවීරට කීවේය.
“මේකට නම් මම නොගිහින් බැහැ” යි සිනාසෙමින් අගමැතිවරයා සඳහන් කිරීමත් සමඟ එහි සිටි ටිරාන් අලස් “ඇයි සර්“ ඒ යැයි විමසීය.
“මෙයා කැලණියේ වුණාට උස්සන් ආවේ මගේ ගමේ කෙල්ලෙක්. ඒ නිසයි මම මෙයැයිට මේ තරම් ආදරේ”යැයි අගමැතිවරයා පිළිතුරු දුන්නේය. “සර් මෙයා ළඟට ගත්තාට තමක් නැහැ. මිරිස් කුඩු තියෙනවාද දන්නේ නැහැ”
“නැහැ මෙයා මිරිස් කුඩු ගහන්නේ නැහැ. පිහිය අමෝරාගෙන එනකොට මෙයැයි තමයි ඉස්සරහට පැනලා මාව බේරාගත්තේ” යැයි අගමැතිවරයා ද පෙරළා ටිරාන් අලස්ට පැවසීය.
පෙරමුණේ රාල ගැන පොතක්
මහ මැතිවරණයට ඉදිරිපත් වන අනෙකුත් අපේක්ෂකයන් බැසිල් රාජපක්ෂ මහතාගේ ප්රධානත්වයෙන් කොළඹදී අස්සන් තැබීම 12 වැනිදා සිදු විය. මෛත්රීපාල සිරිසේන හිටපු ජනාධිපතිවරයා නාම යෝජනා අස්සන් තැබිම සඳහා පැමිණ සිටි අතර එස්. බී. දිසානායක හිටපු ජනාධිපතිවරයා තනි නොකර ඔහු සමඟ කතාබහක නිරතව සිටියේය.
එස්. බී. දිසානායක හිටපු ජනාධිපතිවරයා සමඟ කතා කිරීමෙන් පසුව එතැන සිටි අනෙකුත් අයද මෛත්රීපාල සිරිසේන හිටපු ජනාධිපතිවරයා සමඟ කතාකරන්නට විය. බැසිල් රාජපක්ෂ, චමල් රාජපක්ෂ, මහින්ද අමරවීර, දයාසිරි ජයසේකර, හිටපු ජනාධිපතිවරයා නාමයෝජනා අස්සන් කරන අවස්ථාවේ එතැන රැඳී සිටියහ. මෛත්රීපාල සිරිසේන නාමයෝජනා අස්සන් තැබූ සැණින් බැසිල් රාජපක්ෂ මහතා අත්පොළසන් දුන්නේය. ඒ සමඟ එතැන සිටි අනෙක් අයද අත්පොළසන් දුන්හ.
මාධ්යවේදී ධනුෂ්ක ගොඩකුඹුර විසින් රචනා කරන ලද ‘ප්රසන්න - පොදුජන අරගලයේ නොකී කතාව‘ ග්රන්ථය පසුගිය බදාදා එළිදැක්වුණේ හිටපු ඇමැති බැසිල්ගේ ප්රධානත්වයෙනි. 2015-2019 කාල පරිච්ඡේදය තුළ විපක්ෂයේ සිටිමින් මහින්ද රාජපක්ෂ මහතා නැවත බලයට ගෙන ඒම සඳහා ප්රසන්න රණතුංග දැක්වූ දායකත්වය පිළිබඳ සකස් කර ඇති එම ග්රන්ථය එළිදැක්වීමේ උලෙළ මිනුවන්ගොඩ, නයිවල ජයසිංහ සිටි සෙන්ටර්හි දි පැවැත්විණි.
උලෙළ පැවැත්වීමට අදහස් කර තිබුණේ අගමැති මහින්දගේ ප්රධානත්වයෙනි. එහෙත් එදින විශේෂ සාකච්ඡා කිහිපයක් නිසා අගමැති මහින්දට උත්සවයට සහභාගී වන්නට නොහැකි බව කලින් දැනුම් දී තිබිණි. අගමැති මහින්ද සහ දිස්ත්රික් නායකයන් නාමයෝජනා පත්රයට අස්සන් තැබීමේ උත්සවයේ දී ප්රසන්නට අගමැති මහින්ද මුණගැසිණි. අගැමැති මහින්ද ප්රසන්නගේ වැඩේ ගැන එහිදී මතක් කළේය.
“ප්රසන්නගේ වැඩෙත් අද නේද? බලන්නකෝ ප්රසන්න නාමයෝජනා ගැන සාකච්ඡා වගයක් නිසා අද හවස් වරුවම කොළඹ ඉන්න වෙලානේ” අගමැති මහින්ද පැවසීය.
“මම දන්නවා සර්. පොතේ වැඩේට නාවට කමක් නැහැ. සර් කොළඹ ඉඳලා ඔය වැඩ ටික කරගන්නකෝ” ප්රසන්න කීවේය.
“ඒ වුණාට ප්රසන්නගේ වැඩකට මම නොගිහින් ඉඳලම නැහැ. මම තාමත් කල්පනා කරනවා මොකද කරන්නේ කියලා” මහින්ද පැවසීය.
“ආයෙත් ඒ ගැන කල්පනා කරන්න දෙයක් නැහැ සර්. ඔබතුමා වැඩ ටික කරගන්න. බැසිල් මහත්තයා ආවම ඇති මගේ වැඩේට” ප්රසන්න යළි කීවේය.
“බැසිල් නම් කොහොමත් එයි. ප්රසන්නගේ වැඩක් කිව්වම අපි කාටත් මඟහරින්න බැහැ. ප්රසන්නත් අපේ සටනේ පෙරමුණේ රාලකෙනෙක්නේ” අගමැති මහින්ද සිනාසෙමින් පැවසසීය.
එදින සවස පහට ප්රසන්න - පොදු ජන අරගලයේ නොකී කතාව එළිදැක්වීමේ උලෙළ ආරම්භ කෙරිණි. බැසිල් සමඟ උදය සහ වාසු ද එම උත්සවයට එක්ව සිටියහ. ප්රධාන දේශනය පවත්වනු ලැබුවේ මහාචාර්ය ඉඳුරාගාරේ ධම්මරතන හිමියන් විසිනි. උන්වහන්සේ සිය දේශනයේ දී කීවේ රට පාලනයට උගතුන් අවශ්ය යැයි නියමයක් නැති බවය. දේශපාලනයේ දී අවශ්ය මූලික සුදුසුකම උගත්කම නොව රටට ඇති ආදරය බවත් උන්වහන්සේ පෙන්වා දුන්හ.
ඇමැතිවරුන්ගෙන් රසකතා
බැසිල් කීවේ තමන් යම්කිසි තීන්දුවක් ගැනීමට පෙර ප්රසන්නගේ ඉරියව් දෙස විමසිල්ලෙන් බලන බවය. ජනතාව සමඟ සිටින ප්රායෝගික නායකයකු වශයෙන් ප්රසන්න නිතරම නිවැරැදි තීන්දු ගන්නා බව පැවසූ හිටපු ඇමැති බැසිල් තමා තීන්දුවක් ගැනීමට පෙර ප්රසන්න දෙස බලන්නේ ඒ නිසා බවත් පැවසීය. තනිව තරග කිරීමේ තීන්දුව මෙන්ම පොහොට්ටුවෙන් තරග කිරීමේ තීන්දුත් ප්රසන්නගේ ඉරියව් මත තීරණය වූ ඒවා බවත් බැසිල් පැවසීය.
තමා පළමු වතාවට පළාත් සභාවට තේරී පත් වූ විට සෑම මන්ත්රීවරයකුම තමා දෙස බැලුවේ ගෙට ඇතුළු වී ගේ විනාශ කිරීමට ආ රකුසකු දෙස බලන ආකාරයෙන් බව ගම්මන්පිල මෙහිදී කීවේය. ඊට හේතු වී තිබුණේ තමා දැඩිව පළාත් සභා ක්රමයට විරෝධය පළ කළ නිසා යැයි කී ගම්මන්පිල ඒ සියල්ල නොසලකා මන්ත්රීවරුන් සමඟ මුහු වීමට අවස්ථාව උදා කර දුන්නේ ප්රසන්න බවත් කීවේය.
එසේම සියලු මන්ත්රීවරුන් කී පරිද්දෙන් තමා උඩුගම්පොළ උපාධිය සමත් වූ බවත් ගම්මන්පිල කීවේ සිනාසෙමිනි
රස කතාවලින් හෙබි උත්සව සභාවේ ග්රන්ථය එළිදැක්වීමේ අවස්ථාවේ දී මුල්ම පිටපත ධනුෂ්ක ගොඩකුඹුර විසින් ප්රසන්නට පිළිගැන්වීමටත් අනතුරුව ප්රසන්න අනෙක් පිටපත් මැති ඇමැතිවරුන්ට පිළිගැන්වීමටත් නියමිතව තිබිණි. එහෙත් පළමු පිටපත ධනුෂ්කගේ අතින් ගත් ප්රසන්න අනෙක් ආරාධිතයන්ට පිටපත් පිළිගැන්වීමේ කටයුත්තත් ධනුෂ්කටම පැවරුවේය.
උත්සවය අවසන් වීමෙන් අනතුරුව බැසිල් ඇතුළු පිරිස සමඟ ප්රසන්න රාත්රි ආහාරය ගැනීමට ගියේ අසල තිබුණු හෝටලයකටය. එහිදී විපක්ෂයේ සිටි වසර පහේ දී මුහුණපෑ රස කතා රාශියක්ම මැති ඇමැතිවරුන්ගෙන් කියැවිණි. බැසිල් කීවේ තනිව තරග කරමු, පොහොට්ටුව විතරයි කියමින් ප්රසන්න දිවා රෑ තමනට වද දුන් හැටිය.
“අපෝ මෙයාගෙන් තමයි බේරිල්ලක් තිබ්බෙම නැත්තේ තනිවම ඉල්ලමු කියලා. අපි තීන්දුව ගන්නත් ඉස්සර මෙයා තීන්දුව අරගෙන මිනිස්සුන්ට කියලත් ඉවරයි. අන්තිමට අපිට ගන්න වෙන්නේ මෙයාට ඕනේ තීන්දුව” බැසිල් කීවේ සිනාසෙමිනි.
“ඒ කතා ටිකත් මේ පොතේ ඇති නේද? ඩුලිප් ඇසුවේය.“කෝ තාම මටත් බලන්න බැරි වුණානේ. අද ගිහින් තමයි බලන්න ඕනේ. අපේ කාර්ය මණ්ඩලයේ අය මේ පොත රත්තරන් වගේ පරිස්සම් කළා පොත එළිදක්වනකම්. අඩු ගාණේ මටවත් බලන්න දුන්නේ නැහැ” ප්රසන්න කීවේ සිනාසෙමිනි.
එක්සත් ජාතික පෙරමුණ තුළ ඇතිව තිබෙන මත බේදය සමථයකට පත් කිරීම සඳහා ගෙවී ගිය සතියේ ද තිරය පසුපස මෙහෙයුම් ගණනාවක් සිදු විය. ප්රශ්නය විසඳීමට මැදහත් වූ සියලු පාර්ශ්ව සොයා ආවේ කථානායක කරු ජයසූරියව ය. මේ අතර භික්ෂුන් වහන්සේ ඇතුළු අනෙකුත් ආගමික නායක කාරකාදීහු කිහිප දෙනෙක්ද රනිල් සජිත් දෙපිලේ ජ්යෙෂ්ඨ හා කනිෂ්ඨ සාමාජිකයෝ ද කිසිදු පාර්ශ්වයක් නොගන්න මධ්යස්ථ පිරිස්ද වූහ.
ඒ සියලු දෙනා පෙන්වා දුන්නේ දෙපාර්ශ්වයේම ගෞරවය දිනාගත් පරිණත පුද්ගලයෙකු ලෙස කරු ජයසූරිය මහතා ගේ මැදහත් වීමෙන් ප්රශ්නය විසඳාගත හැකි යැයි තමන් විශ්වාස කරන බවයි. ඒ සියලු දෙනාටම සවන් දුන් කරු ජයසූරිය මහතා පැවසුවේ සමඟිය වෙනුවෙන් තමා මෙතෙක් දැරූ උත්සාහය අසාර්ථකව ඇති නමුත් අවසන් මොහොත දක්වා ම තමන් ඒ වෙනුවෙන් දරන උත්සාහය අත්හැර නොදමන බවයි.