ජපානයේ යොකොහාමා වරායේ නැංගුරම් ලා තිබූ ඩයමන් ප්‍රින්සස් නෞකාවේ සිටි ශ්‍රී ලාංකිකයින් දෙදෙනා ඉන්දියාවට රැගෙනවිත් ඇත.
අදාල නෞකාවේ සිටි ඉන්දීය ජාතිකයින් 119 දෙනෙකු මුදාගැනිමට යොමු කර තිබූ විශේෂ ගුවන් යානයෙන් එම ශ්‍රි ලාංකිකයින් දෙදෙනා ද ඉන්දියාවට රැගෙනවිත් ඇති බවයි වාර්තා වන්නේ.
නව කොරෝනා වෛරසය ආසාදිතයින් හඳුනා ගැනීමත් සමඟ පසුගිය 04වනදා සිට යොකොහමා වරායේ නැංගුරම් ලා ඇති ඩයමන් ප්‍රින්සස් නෞකාවේ සිටි මගීන් ඉන් ඉවත් කර ගැනිමට රටවල් කිහිපයක්ම පියවර ගෙන තිබූ අතර ඉන්දියාව ද ඒ සඳහා විශේෂ ගුවන් යානයක් යොමු කර තිබුණි.
ශ්‍රී ලාංකිකයින් දෙදෙනා යහපත් සෞඛ්‍ය තත්ත්වයෙන් පසුවන අතර ඉන්දීයාවේදී දින 14ක නිරෝධායන ක්‍රියාවලියෙන් අනතුරුව ඔවුන්ට ශ්‍රී ලංකාවට පැමිණිමේ හැකියාව පවතින බව ජපානයේ ශ්‍රී ලංකා නියෝජ්‍ය තානාපති චන්දන වීරසේන කියා සිටියේය.
