පවතින වැසි සහිත තත්ත්වය හේතුවෙන් ආපදාවට ලක් වී ඇති දිස්ත්‍රික්කවල සාමාන්‍ය පෙළ විභාගයට පෙනී සිටින සිසුන් සඳහා අවශ්‍ය පහසුකම් කඩිනමින් සලසන්නැයි රාජ්‍ය පරිපාලන, ස්වදේශ කටයුතු පළාත් සභා හා පළාත් පාලන ඇමැති ජනක බණ්ඩාර තෙන්නකෝන් මහතා අදාළ දිස්ත්‍රික්කවල දිසාපතිවරුන්ට උපදෙස් දී තිබේ.
ජනාධිපති ගෝඨාභය රාජපක්ෂ මහතාගේ හා අගමැති මහින්ද රාජපක්ෂ මහතාගේ උපදෙස් පරිදි ආපදා සහන පිණිස උපරිම පහසුකම් සැලසීමට ජාතික ආපදා කළමනාකරණ මධ්‍යස්ථානය හා ආපදා සහන සේවා මධ්‍යස්ථානය කටයුතු කරයි. ඒ අනුව සියලුම දිස්ත්‍රික් ලේකම්වරුන්ට රුපියල් ලක්ෂ 10 බැගින් රුපියල් මිලියන 25ක් ලබාදී ඇත. ඊට අමතරව ගංවතුර නිසා අවතැන්ව කඳවුරුවල වෙසෙන පුද්ගලයන් 5018ක් පමණ ජනතාවට පහසුකම් සැලසීමට රුපියල් ලක්ෂ 85ක් ද වෙන් කර ඇත. ඊට අමතරව අනතුරුදායක නිවාසවලින් ඉවත් කරනු ලැබූ හා ආපදාවලට ලක්වූ අයට වියළි ආහාර ලබාදීමට රුපියල් ලක්ෂ 47ක් පමණ ලබාදීමට ද පියවර ගෙන තිබේ. නායයෑමට ලක්වී ඇති ඉඩම්වලින් ජනතාව ඉවත්කර අලුත් ඉඩම් ලබාදීම සඳහා ද මෙහිදී මූල්‍ය ප්‍රතිපාදන වෙන් කර ඇත.
