තිහේ දශකයේ (1938) අග සාහිත ලොව වර්ණවත් කළ කෘතියකි ‘විජයබා කොල්ලය’. දැනට සාර්ථකව තිරගත වෙන ‘විජයබා කොල්ලය’ චිත්‍රපටයට මුල් වූ නවකතාවේ මුල් පිටපත අනුව සැකසුණු අලුත් ම මුද්‍රණය වත්මන් පාඨකයාගේ ද රසිකත්වය පුබුදුවාලනු පිණිස දැන් සරසවි ප්‍රකාශනයක් ලෙසින් නිකුත් වී තිබේ. සාහිත්‍ය චක්‍රවර්ති යන විරුදාවලිය ලද ඩබ්ලියු.ඒ. සිල්වා ශූරීන්ගේ ‘විජයබා කොල්ලය’ 1962 – 64 කාලය තුළ අධ්‍යයන පොදු සහතික පත්‍ර සාමාන්‍ය පෙළ විභාගයට ද 40, 50, 60 දශකවල විශ්වවිද්‍යාල සඳහා ද නිර්දේශිත ග්‍රන්ථයක් විය.
16 වැනි සියවසේ කෝට්ටේ රාජධානිය හා පරංගි ආගමනය කේන්ද්‍ර කරගෙන ලියැවුණු මෙම කතාවට ජීව ගුණය එක් කරන්නේ අසංග, නීලමණී හා නයනානන්ද යන චරිත තුනයි. මෙම තුන්කොන් ප්‍රේම කතාව වඩාත් සජීවීව දැනෙන්නේ දැන් තිරගත වෙන ‘විජයබා කොල්ලය’ චිත්‍රපටය නරඹන විටය. ඩබ්ලිව්.ඒ. සිල්වා ශූරීන්ගේ සිනමාවට නැඟුණු දෙවැනි ඓතිහාසික නවකතාව ද මෙය වේ.
පිටපත් ලක්ෂ ගණනකට වැඩියෙන් අලෙවි වී ඇති ‘විජයබා කොල්ලය’ කෘතියෙන් කාලීන වටිනාකමක් ඇති සිංහල හා මුස්ලිම් ජනයාගේ දීර්ඝකාලීන මිත්‍රත්වය පිළිබඳව ද යම් ඉඟියක් සපයයි.
